Les Moos yug xyoo 1175 hauv ib yim neeg noob nom nyob Kas Tas Los Nias, Xyiv Pas Yas teb. Les Moos mus kawm txuj thiab ua hauj lwm rau Is Tas Lias. Les Moos rov los nyob Kas Tas Los Nias thiab txais Cim Tiag Tes nyob hauv lub koom haum cov tub tshaj Ntuj Lus ‘Dos Mis Nis Kas’. Thaum ntawd, nws muaj 47 xyoo.
Xyoo 1230 Vaj Qhia Nqes Nkos Lis tim 9 (Pope Gregory IX) kom Txiv Plig Les Moo mus pab tshuaj xwm lub Koom Txoos txoj cai nyob Los Mas.
Txiv Plig Les Moos mus pab Vaj Qhia tau 6 xyoo ces nws mam rov los rau Kas Tas Los Nias. Txiv Plig Les Moos ua tus coj lub koom haum Dos Mis Nis Kas tau 2 xyoos ces nws tsis kam ua ntxiv, nws hais tias nws laus lawm. Thaum ntawd, Txiv Plig Les Moos muaj 65 xyoos.
Txiv Plig Les Moos pib tsa ib pawg tub tshaj Ntuj Lus pab cov neeg Hes Nplaws thiab cov Mawv Xim Lim hloov siab tshiab los ntseeg txog Yes Xus nyob hauv Xyis Pas Yas teb. Xyoo 1275 Txiv Plig Les Moos thiaj mam tuag.
Leej Ntshiab Les Moos tau sau nyob hauv nws ib tsab ntawv tias “Kev iab hiam yog Leej Pleev tus Ntoo Cuam peb yuav vam txog vim txoj kev raug hiam yog lub hauv paus chiv peb txoj kev xyiv fab. Leej Ntshiab As Nres zoo siab thaum nws raug luag tsim txom. Leej Ntshiab Paj Lug qhia tias peb nrhiav tau lub koob meej nyob saum peb tus ntoo cuam.”
Leej Ntshiab Les Moos sau ntawv tseg tias Tswv Ntuj tus tub tshaj qhov tseeb hais rau kuv tias “Cov neeg xav ua lub neej ncaj ncees nyob hauv Leej Pleev, lawv tsum txais kev txom nyem vim kev iab hiam.” Kuv xav tias yuav tsis muaj leej twg yuav hla dhau lo lus no tau, tshwj kiag tus ua lub neej dog dim, los tsis paub ua lub neeg haum rau txoj kev ncaj xwb. Thov kom nej txhob tau nyob hauv tsev neeg nyob noj qab pw sov thiab tsis muaj kev ntxhov siab dab tsi, thiab nej tsis tau mag dua Tswv Ntuj rab nplawm, vim tias tsam ib ntsais muag xwb nej poob kiag rau dab phem teb lawm. Nej lub neej ntshiab dawb huv thiab nej lub siab ntseeg, phim yuav tau txais koob haum, vim tias nej tau ua xis Tswv Ntuj siab. Nej lub neej dawb huv yuav tsum ntshiab mus li xwb, thiab nej yuav tawm tsam mus kom txog hnub nej lub siab ntshiab txaus. Muaj tej zaus zoo li nej raug hniav ntab hniav riam nkaug, mas nej yuav hom khaj luag ntxhi.
Rab ntaj ob sab hniav ntse yog kev cov nyom sab nraud, thiab kev ntshai sab hauv. Rab ntaj ua kom nej mob, thaum tus phem ntxias nej siab, thiab dag nej kom yuam kev. Nej paub tawm tsam tej no kom txaus, mas nej thiaj li yuav tau saj kev xyiv fab thiab kaj siab.
Rab ntaj ua kom lub cev raug mob, vim lub Koom Txoos raug luag hiam. Yog tus hiam yus yog yus tus phooj ywg, yus qhov mob yim loj heev.
Qhov no yog Yes Xus tus Ntoo Cuam Ntshiab uas Leej Ntshiab As Nres tus muaj zog zoo siab hlo txais los ris. Tsuas yog Yes Xus tus Ntoo Cuam xwb thiaj tsim nyog rau peb cav txog. Yog li thov kom peb ntsia Yes Xus Pleev tus pub thiab txuag peb lub siab ntseeg, tus tsis muaj txhaum tab sis yeem ris ntiaj teb neeg cov txhaum, tus raug nws cov neeg rov liam rau. Yog nej haus Yes Xus lub ntim, thov kom nej cav txog nws lub txiaj ntsim.
Thov kom tus Tswv Ntuj muaj lub siab nyiam thiab pub kev thaj yeeb tseb kev kaj los rau nej nruab siab, kom nej mus taus. Thov Tswv Ntuj muab nej zais rau hauv nws txoj kev nyiam, kom nej nyob deb ntawm yam tuaj looj koov nej mus kom txog hnub Tswv Ntuj coj nej mus nyob pem Tswv Ntuj lub Nras Lom Zem. Nyob ntawd, nej yuav tau so mus li nyob hauv kev kaj lug kaj nrig. Nej yuav nrog Tswv Ntuj koom kev zoo siab xyiv fab mus li.
