Lub npe ‘Npas Tos Los Mas Yos’ txhais tias ‘Tis Los Mas Yos tus tub’.

Lub Koom Txoos ntseeg tias Leej Ntshiab Npas Tos Los Mas Yos yog Yes Xus tus thwj tim ‘Nas Tas Nais’. Nyob hauv Zam Ntawv Moo Zoo tau hais txog Nas Tas Nais tias yog thawj tug lees tias Yes Xus yog Tswv Ntuj Leej Tub. Thaum Yes Xus sawv kev mus Nkas Lis Lais, nws hu Fis Lis Pos raws nws qab, ces Fis Lis Pos mus hu Nas Tas Nais tuaj ntsib Yes Xus. Yes Xus hais rau Nas Tas Nais tias “Nej saib, tus ntawd yog ib tug tseem His Xas Lais uas tsis zais siab li.” Thiab hais ntxiv tias “Thaum Fis Lis Pos tsis tau hu koj, kuv twb pom koj nyob hauv tsob qab ntoo txiv ncuav pias.”

Nas Tas Nais hais rau Yes Xus tias “Las Npis, koj yog Tswv Ntuj Leej Tub tiag! Koj yog His Xas Lais tus vaj” (Z 1: 45-49).

Nas Tas Nais kuj yog ib tug thwj tim tau pom Yes Xus yees tawm tuaj nyob ntawm ntug dej ntuj Tis Npes Lias nrog Xis Moos Pob Zeb, Tos Mas Dis Dws Mos, Yas Kos thiab Zam (Z 21: 2). Nws kuj yog ib tug zeem tseeb txog Yes Xus nce mus saum Ntuj thiab (HL 1: 12-13).

Tom qab Yes Xus mus saum Ntuj lawm, Nas Tas Nais tau mus tshaj lub Moo Zoo nyob As Las Npias teb, nws raug ntes coj mus laws tawv thiab txiav caj dab tuag ua tim khawv nyob As Mes Nias teb kwv yees xyoo 69 los 70 ntawd.