Zam Aws Des yug tim 14 lub 11 hlis 1601 hauv lub zos Lis (Ri). Zam niam hu ua Mas Tas hos Zam txiv hu ua His Xas Has. Zam muaj 4 tug muam thiab 2 tug kwv tij.

Zam txais lub Cim Yug thaum nws muaj 12 xyoos. Thaum muaj 14 xyoos mas nws cog lus tias yuav qee lub neej rau Tswv Ntuj, ces Zam mus kawm txuj nyob hauv lub koom haum Yes Xus Is. Xyoo 1623 Zam mus nyob hauv lub koom haum Os Las Tos Lias As (Oratorians) uas yog kub siab rau kev txhim kho sab ntsuj plig. Xyoo 1625 thaum lub 12 hlis tim 20 Zam tau txais Cim Tiag Tes ua Leej Choj, nws ua thawj Thaj Txi Ntuj nyob hauv hnub Yes Xus yug.

Xyoo 1627 txog 1631 muaj kab mob sib kis ces Txiv Plig Zam tawm mus ua hauj lwm pab cov neeg mob, Txiv Plig Zam ua kab ke rau cov neeg tuag. Txiv Plig Zam ntshai tsam cov Leej Choj hauv lub koom haum kis mob ntawm nws, ces Txiv Plig Zam tawm mus nyob nruab liaj.

Xyoo 1633 Txiv Plig Zam pib txoj hauj lwm tshaj lub Moo Zoo rau ib cheeb tsam nws nyob. Txiv Plig Zam ras tias cov Leej Choj mas tsum tau txhim kho sab ntsuj plig kom ntshiab ces nws thiaj tsa cov tsev kawm ua Leej Choj ntau lub nyob hauv lub xeev Lees (Rennes).

Txiv Plig Zam pom tias cov poj ntiav tsis muaj chaw tau so tau nkaum mas nws ntxhov siab, ces xyoo 1641 Txiv Plig Zam thiaj tsa lub koom haum Leej Niam tus pab neeg lub chaw nkaum (Order of Our Lady of Charity of the Refuge) nyob hauv lub nroog Koos (Caen) kom tau ua chaw so rau lawv. Muaj 3 tug Phauj tuaj pab Txiv Plig saib xyuas lub koom haum. Xyoo 1644 lawv qhib tau ib lub tsev, muaj lwm pab poj niam tuaj koom nyob hauv lub koom haum.

Txiv Plig Zam tawm hauv nws lub koom haum los txhim tsa lub koom haum cog lus tshiab hu ua Aws Dis (Eudist) thaum hnub tim 25 lub 3 hlis 1643. Txiv Plig Zam txhawb kom cov tub haum xeeb tso siab rau Yes Xus lub siab thiab niam Mab Liab lub siab ntshiab. Xyoo 1680 Txiv Plig Zam thiaj tas sim neej.