Zes Laus yug xyoo 1486 hauv nroog Ves Nis, Is Tas Lias teb. Zes Laus yog ib tus tub ntau rog. Muaj ib hnub Zes Laus raug ntes kaw hauv tsev loj faj, niam Mab Liab yees tawm rau Zes Laus pom thiab coj Zes Laus dim hauv tsev loj faj. Zes Laus txiav siab tig los yuav siab tshiab, los coj lub neej tsob hwb Leej Pleev.
Muaj kab mob kis nyob hauv thaj tsam Zes Laus nyob; ua rau neeg tuag coob, muaj neeg raug tso pov tseg ntau. Zes Laus tsa cov koom haum pab cov neeg txom nyem.
Xyoo 1537, Zes Laus kis kab mob ntawm cov neeg nws niaj hnub mus tu lawv, ces Zes Laus thiaj tau tas sim neej. Cov neeg hu kam Zes Laus tias ‘Zes Laus yog sawv daws cov kwv tij’.
Xyoo 1767, lub Koom Txoos thiaj tsa Zes Laus ua Leej Ntshiab thiab xyoo 1928 Vaj Qhia Pis Yus tim 11 thiaj hwm Leej Ntshiab Zes Laus Es Mis Lis As Nis ua tus Leej Ntshiab pov hwm cov me nyuam ntsuag.
Leej Ntshiab Zes Laus sau ib tsab ntawv rau nws cov phooj ywg tias “Tus peb yuav tso siab rau mas yog Tswv Ntuj tib tug xwb. Tswv Ntuj hlub peb mas Tswv Ntuj thiaj tshoj peb kom muaj lub siab ntseeg ruaj nreb, vim tias yog peb lub siab tsis ntseeg mas Tswv Ntuj yuav ua hwj huam tsis tau. Tswv Ntuj xav mloog peb zaj lus thov, Tswv Ntuj thiaj kheev cia nej raug txom nyem thiab rho kuv tawm hauv nej mus. Tswv Ntuj tib leeg yog tus paub tias ua cas tej xwv txheej ntawd tuaj raug rau peb. Ntawm peb, mas peb yuav muab xav li no tias vim Tswv Ntuj xav sau peb los ua nws cov me nyuam, xav kom peb tso siab rau Tswv Ntuj, thiab vim Tswv Ntuj xav sim peb li cov kws nchuav tooj sim cov tseem kub hauv lub yeej vub. Yog peb lub siab ntseeg ruaj nreb mus li mas Tswv Ntuj yuav pub kev kaj lug rau peb hauv tiam no, thiab yuav pub txoj sia nyob mus li rau peb hauv fab lwm tiam.”