Tus sau: Txiv Plig Txhiaj Foom (2002)
Peb nyob hauv lub ntiaj teb no, yog ib lub caij tsis ntev. Muaj ib hnub peb yeej yuav ncaim lub ntiaj teb no mus. Huab Tais Yes Xus qhia peb tias peb muaj ib txoj sia tseem ceeb, yog txoj sia nyob mus li.
Peb yuav ua li cas thiaj yuav tau txoj sia nyob mus li los ua peb tug?
Huab Tais Yes Xus qhia tias tus tseeg Tswv Ntuj Leej Tub thiab txais lub Cim Ntxuav mas nws yuav tau txoj sia tshiab nyob mus li, nws yuav tau kev mus cuag Tswv Ntuj, nws yuav txais txoj sia nyob mus li ua nws tug. Peb cov neeg ntseeg, mas peb zoo siab uas peb tau txais lub Cim Ntxuav. Thaum peb txais lub Cim Ntxuav mas peb txia ua Tswv Ntuj cov tseem me nyuam, ces peb zoo siab ua lub neej zoo li Huab Tais Yes Xus qhia kom peb ua.
Peb muaj ib lub neej nyob tsis ntev, muaj ib hnub peb yuav tuag xwb. Li ntawd, thaum ib tug neeg ntseeg raug kev mob nkeeg, peb paub tias nws yuav tsis zoo, mas peb ua tej yam zoo li no:
1. Peb sib sau teev Ntuj, peb thov Ntuj rau tus neeg mob nkeeg.
2. Peb mus hais rau Txiv Plig paub, thov Txiv Plig tuaj xyuas thiab pub lub Cim Pleev rau tus neeg mob nkeeg.
Thaum peb tsev neeg muaj ib tug mob hnyav, mas peb hu tas nrho yus tsev neeg, thiab hu cov neeg ntseeg hauv yus lub zos tuaj thov Ntuj rau tus neeg mob ntawd. Lub caij teev Ntuj peb cev ib co lus thov Ntuj, thiab peb hais tej zaj teev Ntuj. Piv txwv, yam li hais zaj Peb Txiv Nyob Saum Ntuj, zaj Koj Nyob Kaj Lug Mab Liab. Zaj Leej Ntuj Plig Koj Los Mas. Peb yuav hais lwm zaj kuj tau.
Peb ua li hais los no, thiab peb tso neeg mus hais rau Txiv Plig paub, thov Txiv Plig tuaj ua lub Cim Pleev rau tus neeg mob hnyav ntawd. Txiv Plig tuaj txog, nws yuav ua lub Cim Daws Txhaum rau tus neeg mob, Txiv Plig pub lub Cim Yug rau tus neeg mob, thiab ua lub Cim Pleev rau tus neeg mob.
Vim li cas ho pub lub Cim Yug rau tus neeg mob hnyav?
Vim tias Huab Tais Yes Xus nyob txawm hauv lub Cim Yug, nws yuav coj tus neeg mob nkeeg mus pem Tswv Ntuj lub Ceeb Tsheej. Lub Cim Yug kuj yog ib co txiam xws yug neeg tus ntsuj plig. Li ntawd, lub Cim Yug ua kom tus neeg mob tus ntsuj plig muaj zog mus cuag Tswv Ntuj tau.
Tswv Ntuj hlub ntiaj teb neeg tiag. Tiam sis Tswv Ntuj kuj txiav txim rau neeg raws txoj kev ncaj. Txhais tias Tswv Ntuj tsis kws leej twg cai, nws txiav txim ncaj, nws txiav txim rau neeg raws li nyias tau ua tseg.
Thaum ib tug neeg tas sim neej, mas Tswv Ntuj soj ntsuam tus ntawd tej koob hmoov thiab tej txhaum huv tib si. Tswv Ntuj yuav txiav txim rau nws raws li ib txwm nws tau ua los. Tswv Ntuj yuav cia nws ncaj qha mus pem Tswv Ntuj lub Ceeb Tsheej, los yuav cia mus teb chaws them txim, los yuav cia mus hauv dab phem teb
Ntawv Moo Zoo yeej muaj tej zaj hais txog lub caij txiav txim, thiab hais txog lub teb chaws neeg tus ntsuj plig yuav nyob mus li.
Yes Xus hais tias “Muaj ib tug neeg nplua nuj, nws hnav ntaub tsuj ntaub npuag. Nws niaj hnub noj tej rooj qav zoo tas nrho. Ho muaj ib tug neeg pluag uas lub npe hu ua Las Ntxas Los, pw ntawm tus nplua nuj lub rooj loog. Las Ntxas Los ib ce mob kiav txhab tas huv si. Nws ntshaw noj tej yam poob ntawm tus nplua nuj lub rooj mov los. Cov dev, los pheej tuaj yaim nws tej kiav txhab thiab. Nyob nyob, tus pluag tuag. Ntuj cov Tshiab nqa nws mus nyob hauv Has Nplas Has xub ntiag. Tus nplua nuj kuj tuag thiab. Luag muab nws pam thiaj coj mus los. Tus nplua nuj nyob hauv nruab yeeb raug txom nyem loj kawg. Nws tsa muag ntsia pom Has Nplas Has nyob deb, thiab pom Las Ntxas Los nyob hauv Has Nplas Has xub ntiag. Nws hu nrov tias ‘Yawg Has Nplas Has, thov koj hlub kuv mas! Kuv txom nyem nyob hauv cov hluav taws no. Koj kom Las Ntxas Los muab nws ntiv tes tub dej tuaj chwv kuv tus nplaig kom txias.’ Tab sis Has Nplas Has teb tias ‘Tub, koj yuav nco ntsoov tias, tas koj sid, koj muaj cuab yeej cuab tam ntau, hos Las Ntxas Los tau kev txom nyem. Nyem no Las Ntxas Los txais kev nplij nyob qhov no. Hos koj raug kev txom nyem. Peb nyob ib sab, nej nyob ib sab. Nyob nruab nrab muaj ib lub qhov ntuj tob kawg. Leej twg nyob sab no xav hla sab tim nej tsis tau. Leej twg nyob sab tim nej xav hla tuaj sab no kuj tsis tau thiab.’ Tus nplua nuj hais tias ‘Yawg, kuv thov koj! Koj xa Las Ntxas Los mus txog kuv txiv tsev. Kuv tseem muaj tsib tug kwv. Las Ntxas Los yuav mus qhia lawv, kom lawv txhob tuaj nyob hauv lub teb chaws txom nyem no.’ Has Nplas Has teb tias ‘Koj tsib tug kwv twb muaj Mais Xes thiab cov Yaj Saub lawv tej lus, cia lawv mloog Mais Xes thiab cov Yaj Saub.’ Tus nplua nuj tseem hais tias ‘Yawg Has Nplas Has, lawv tsis mloog. Tab sis, yog muaj ib tug sawv hauv cov tub tuag rov mus cuag kuv cov kwv, mas lawv yuav tig los yuav lub siab tshiab.’ Has Nplas Has hais rau tus nplua nuj tias ‘Yog lawv tsis mloog Mais Xes thiab cov Yaj Saub tej lus, mas tab muaj ib tug sawv hauv cov tub tuag rov los, lawv kuj yuav tsis ntseeg thiab’” (LK 16: 19-31).
Las Ntxas Los tuag, nws mus nyob ntawv Has Nplas Has lub xub ntiag. Yog txhais tias Las Ntxas Los mus nyob pem Tswv Ntuj lub Ceeb Tsheej. Hos tus nplua nuj kuj tuag thiab, thaum ua neej nyob tus nplua nuj tsis tau pab tus neeg pluag, mas nyem no nws mus hauv lub teb chaws txom nyem, nws poob hauv dab phem teb.
Ntawv Moo Zoo hais tias nws nyob hauv cov hluav taws. Lo lus no yog txhais tias nws raug txom nyem heev kawg nkaus, vim tias tas nws sim neej nws tsis mloog Tswv Ntuj Lus, nws tsis pab tus pluag, nws tsis hlub tus raug txom nyem.
Tseem muaj lwm lo lus hais tias “Leej twg nyob sab no xav hla lawm tim nej kuj tsis tau.” Kuj txhais tias tus neeg mus hauv Tswv Ntuj lub Ceeb Tsheej, mas yuav tau nyob kaj siab lug mus li, tsis muaj hnub kawg, tsis muaj leej twg yuav txeeb tau nws txoj kev nyob kaj siab lug.
Ntawv Moo Zoo hais tias “Leej twg nyob sab tim nej xav hla tuaj sab tim no kuj tsis tau.” Yog txhais tias tus poob hauv dab phem teb, yuav raug txom nyem mus li tsis muaj caij kawg. Nws yuav tsis tau kev dim
Tus nplua nuj hais rau Has Nplas Has tias “Yawg Has Nplas Has, kuv thov koj! Koj xa Las Ntxas Los mus txog kuv txiv tsev, kuv tseem muaj 5 tug kwv. Las Ntxas Los yuav qhia kom lawv txhob tuaj nyob hauv lub teb chaws txom nyem no.” Has Nplas Has teb tias “Lawv muaj Mais Xes thiab cov Yaj Saub tej lus qhia, cia lawv mloog Mais Xes thiab cov Yaj Saub.”
Mais Xes thiab cov Yaj Saub tej lus qhia yog Tswv Ntuj cov lus ntag, yog Huab Tais Yes Xus cov lus uas peb niaj hnub tau hnov no. Li ntawd, peb yuav muab siab rau mloog Huab Tais Yes Xus cov lus qhia, peb coj mus ua raws, ces peb thiaj yuav muaj lub neej ntxim Tswv Ntuj siab. Lwm tiam peb thiab yuav tau txais Tswv Ntuj lub Ceeb Tsheej los ua peb tug, ces peb yuav nrog Tswv Ntuj nyob mus li ib txhiab ib txhis.
Tswv Ntuj yog tus Huab Tais siab ntshiab. Tsuas yog cov neeg siab ntshiab xwb, thiaj yuav tau mus nrog Tswv Ntuj nyob nraim. Peb ua ib sim neej xwb, mas peb thiaj yuav niaj hnub rau siab ntso ua cov hauj lwm zoo, pab cov neeg raug txom nyem, thiab peb nquag tsim koob tsim hmoov cia. Peb txhob xav tias kuv coj lub neej dog dig mas tsis ua li cas. Ib tug tib neeg xav li ntawd, nws yuam kev loj.
Nej hnov tus nplua nuj hais tias “Yawg Has Nplas Has, kuv cov kwv tsis mloog Mais Xes thiab cov Yaj Saub lawv tej lus. Tab sis yog muaj ib tug neeg sawv hauv cov tub tuag mus qhia lawv, mas lawv yuav mloog, lawv yuav tig los yuav lub siab tshiab.” Hos Has Nplas Has hais rau tus nplua nuj tias “Yog tias lawv tsis mloog Mais Xes thiab cov Yaj Saub tej lus, mas tab txawm muaj ib tug sawv hauv cov tub tuag rov los, lawv yeej yuav tsis mloog thiab.”
Tej zaus nej yuav xav tias ua cas Tswv Ntuj tsis kam ua raws li tus nplua nuj thov?
Tswv Ntuj yeej paub tias cov neeg tawv ncauj tsis kam mloog leej twg qhia, lawv xav ua ywj lawv siab. Tswv Ntuj hais tias cov neeg tawv ncauj zoo li ntawd, mas tab txawm muaj ib yam hwj huam yees ntxwv rau nws pom, tsis kav nws yuav tsis ntseeg. Cov neeg tawv ncauj zoo li hais no lawv yuav tsis pom Tswv Ntuj lub Ceeb Tsheej.
Peb txhob ua neeg tawv ncauj. Txhob tos kom muaj ib tug sawv hauv cov tuag rov los qhia peb, ces peb mas ntseeg. Nyem no twb muaj Yes Xus lub Moo Zoo qhia peb, thiab muaj cov neeg sawv Huab Tais Yes Xus chaw qhia peb. Yog peb tsis ntseeg ob yam no, mas peb txhob xav tias peb yuav ntseeg tau tus tuag tej lus.
Tswv Ntuj tsis kam ua hwj huam yees ntxwv kom Las Ntxas Los sawv hauv cov tub tuag los qhia tus nplua nuj 5 tug kwv, kuj yog vim Tswv Ntuj tsis xav quab yuam neeg. Tswv Ntuj tsis xav kom peb mloog Ntuj lus zoo li ib cov qhev ntshai lawv tus tswv. Tswv Ntuj hlub peb, nws qhia kom peb ua zoo. Tiam sis Tswv Ntuj tsis yuam peb, nws cia peb ua ywb peb siab. Yog thaum txog hnub kawg Tswv Ntuj thiaj yuav txiav txim rau nyias raws li nyias tau ua cia. Cov neeg zoo yuav tau txais Tswv Ntuj lub Ceeb Tsheej ua lawv tug. Cov neeg phem yuav raug txim mus li.
Tswv Ntuj niaj hnub hu peb kom peb ua neeg zoo thiab hlub luag tej, Tswv Ntuj xav kom peb pab cov pluag, thiab pab cov raug txom nyem. Saib peb puas kam ua raws li Tswv Ntuj hu? Tswv Ntuj yog peb txiv, nws hlub peb kawg, nws hu peb los ua nws cov me nyuam nyob hauv nws txoj kev nyiam.
Cov lus khaws tseg:
1. Dhau lub caij nyob ntiaj teb no, mas Tswv Ntuj yuav txiav txim rau neeg raws li nyias tau ua cia; saib leej twg yuav mus nyob qhov twg. Li ntawd, peb yuav nco ntsoov tias peb ua ib sim neej xwb, peb yuav tsum ua zoo kom peb tsim nyog mus pem Tswv Ntuj lub Ceeb Tsheej. Tsuas yog cov neeg siab ntshiab xwb, thiaj tsim nyog mus nrog Tswv Ntuj nyob pem Tswv Ntuj lub Ceeb Tsheej.
2. Cov neeg poob hauv dab phem teb yuav raug txom nyem mus li, tsis tau kev dim. Raws li lo lus tias “Leej twg nyob sab tim nej xav hla tuaj sab no kuj tsis tau li.”
3. Tswv Ntuj yuav soj ntsuam saib peb puas tau mloog Tswv Ntuj lus, peb puas tau nyiam luag tej tiag, peb puas tau pab cov neeg pluag, peb puas tau zam rau cov neeg ntxub peb. Yog tias peb tau ua tej no, mas peb kuj yuav tau mus pem Tswv Ntuj lub Ceeb Tsheej.
4. Tswv Ntuj hlub neeg tas nrho, nws tsis yuam peb zoo li cov qhev raug yuam kom mloog tus tswv. Tiam sis Tswv Ntuj hu peb, thiab cia peb xaiv nyiam Tswv Ntuj. Peb ua raws li peb xav ua. Hos Tswv Ntuj yuav txiav txim raws li nyias tau ua cia.