Faus Tis Nas los yog ‘Hes Les Nas Kos Vas Xas Kas’ (Helena Kowalska) yug hnub tim 25 lub 8 hli xyoo 1905 hauv Pos Kas teb.
Xyoo 1925 Hes Les Nas yuav luag muaj 20 xyoo, nws tau mus coj lub neej tab seeb hauv lub koom haum Leej Niam Khuv Leej Neeg Tus Muam. Lub koom haum leej phauj no cog lus tias lawv yuav ua hauj lwm tsob hwb thiab muab kev kawm rau cov poj niam coj lub neej tsis nto ntsis.
Tim 30 lub 4 hlis 1928, Hes Les Nas txiav siab meej tias nws yuav ua Leej Phauj mus tas ib sim neej, ces lawv tis npe tshiab rau Hes Les Nas tias ‘Phauj Mab Liab Faus Tis Nas ntawm lub Cim Yug’ (Sister Maria Faustina of the Blessed Sacrament).
Xyoo 1930 Phauj Faus Tis Nas tau txais Yes Xus lo lus khuv leej, ces plaub xyoos tom qab nws thiaj muab sau ua ib phau ntawv tuab li 600 nplooj; yog phau ntawv ‘Txoj Kev Khuv Leej Nyob Hauv Kuv Tus Plig.’ Phau ntawv no nthuav cov zaj hais txog Tswv Ntuj txoj kev hlub tib neeg raws li Ntawv Moo Zoo, thiab ntuas sawv daws kom tso siab rau Huab Tais Tswv Ntuj cov hauj lwm.
Lub 7 hli 1934 Yes Xus yees tawm los rau Phauj Faus Tis Nas pom thiab hais rau nws tias Tswv Ntuj xav kom ntiaj teb neeg ua hmoov hwm Tswv Ntuj kev khuv leej (Divine Mercy) nyob hauv Hnub Chiv lub Lis Piam 2 caij Hla. Yes Xus hais ntxiv tias “Koj yuav mus hais rau cov Leej Choj kom tshaj rau sawv daws paub tias kuv xav kom hnub ntawd yog hnub cia rau tsoom ntsuj plig tshwj xeeb yog cov neeg muaj txhaum tau chaw so thiab tau nkaum. Hnub ntawd, lub hiav txwv khuv leej neeg yuav qhib rau sawv daws, thiab kuv yuav nchuav kuv lub txiaj ntsim los rau saum cov neeg tuaj nyob hauv kuv lub hiav txwv khuv leej neeg. Leej twg daws txhaum thiab txais lub Cim Yug nyob hauv hnub ntawd, kuv yuav zam lub txim txhaum rau nws kom tas. Cov neeg muaj txhaum txhob ntshai los cuag kuv mog!”
Nyob hauv hnub tim 13 lub 9 hli xyoo 1935 Faus Tis Nas pom Tswv Ntuj tus Tshiab tab tom yuav rau txim rau lub ntiaj teb, ces nws teev Ntuj thiab thov Tswv Ntuj khuv leej ntiaj teb neeg sawv daws. Thaum ntawd nws hnov ib lub suab qhia kom nws hais cov zaj teev Ntuj. Nws teev Ntuj li lub suab qhia tas, nws ntsia pom tus Tshiab tsis rau txim rau lub ntiaj teb lawm.
Tom qab Yes Xus thiaj yees tawm rau Faus Tis Nas pom thiab hais rau nws tias “Kuv me leej ntxhais, koj kav tsij hais txoj saw thov Tswv Ntuj kev khuv leej tsis tseg mog. Leej twg hais thiab nco txog kuv txoj kev txom nyem, mas thaum nws yuav tuag, nws yuav tau txais kuv txoj kev khuv leej ua nws lub txiaj ntsim.
Koj mus hais qhia cov Leej Choj, kom lawv qhia cov neeg txhaum thov mas lawv thiaj yuav tau kev vam khom nyob hauv lawv txoj sia.
Txawm tias tus neeg muaj txhaum hnyav thiab siab txhav siab qhuav, yog lawv tau thov raws li kuv qhia, mas lawv yuav tau txais kuv lub txiaj ntsim khuv leej lawv.
Kuv xav kom tas ntiaj teb paub tias kuv khuv leej lawv tsis muaj chaw xaus. Kuv xav pub kuv txoj kev khuv leej no rau cov neeg tso siab rau kuv.
Thaum ib tug neeg twg hais txoj saw thov kev khuv leej ua ntej nws txoj sia yuav tu, mas kuv yuav sawv nyob ntawm kuv Leej Txiv thiab nws. Kuv yuav cawm nws, tsis yog txiav txim rau nws.”
Yes Xus hais rau Faus Tis Nas ntxiv tias “Me ntxhais, koj xav tias tus neeg tsis muab hlob cov lus thov yog thov kom tau yam muaj txiaj ntsim rau nws lub cev thiab tus plig, yog sib txuas lus nrog Tswv Ntuj nyob hauv cov zaj teev Ntuj los yog hauv nruab siab; thaum koj thov Ntuj mas koj xav tias Tswv Ntuj yuav teb koj cov lus thov.
Me ntxhais, tsis yuav thov npaum li ntawd. Yog koj nyiam kuv thiab tso siab rau kuv, koj nrog kuv tham xws li koj nrog koj tus zoo phooj ywg tham, koj hais lus rau kuv xws li koj hais rau koj niam los koj cov kwv tij xwb ces txaus lawm.
Kuv nyiam tus neeg muaj lub siab dav khuv leej lwm tus, tus neeg hlub thiab nrhiav kev pab lwm tus, tus neeg nco qab lwm tus dua nws rov nco txog nws. Koj yuav tham txog lawv kev txom nyem rau kuv mloog, koj yuav qhia kuv saib koj xav pab lawv li cas.
Me ntxhais, koj yuav thov ib lo lus rau lawv. Yog koj nyiam lawv tas siab thiab xav thov Ntuj rau lawv, mas koj yuav hais txog kuv cov lus cog tseg rau cov neeg kub siab thov ntawm kuv.
Koj yuav qhia txog koj qhov tsis muaj zog, koj tej txhaum rau kuv paub, xws li koj npau taws sai, koj siab ceev, koj ntshaw kev zoo sab cev nqaij, koj muab hlob, koj cib nyeej, koj tsis nco qab txog tej yam koj tsim nyog ua. Koj yuav thov kuv pab rhuav pab ntxuav koj cov txhaum ntawd. Txawm koj nquag poob hauv kev txhaum, los koj yuav kub siab thov kuv tiag tiag thiab vam ntsoov tias koj yuav hloov siab tshiab kom tau, kom koj txhob ua kev txhaum tus qhev ntxiv.
Me ntxhais, koj txhob txaj muag hais koj cov txhaum mog. Tsoom Leej Ntshiab saum Ntuj los lawv yeej ib txwm tau ua txhaum xws li koj thiab, tab sis niaj hnub ua neeg me kub siab thov, lawv nco txog lawv tej txhaum, lawv qhov tsis muaj zog, ces thaum kawg lawv yuav tso lawv dim hauv txoj kev txhaum los txais kev twj lij.
Me ntxhais, leej tib neeg lub siab raug ntxias tau yooj yim heev. Tab sis kuv yog koj tus Huab Tais yog tus txiav ncaj mus li, yog li koj yuav qhia ncaj rau kuv mog.
Koj puas rau siab khiav kom deb txoj kev ua txhaum hnyav mas? Koj puas nrauj tej yam kev phem los raug koj tus ntsuj plig mas? Koj puas tso tseg tej yam qias coj koj lub cev mus poob hauv qhov tsis huv mas? Koj puas txav deb cov neeg ua kom koj lub siab dhia tsis tus mas? Koj puas tseb kev khuv leej rau koj tus yeeb ncuab mas? Kuv leej ntxhais, koj txhob hnov qab cov lus kuv hais rau koj mog!
Koj yuav nyob nstiag to, koj yuav pab lwm tus, koj yuav txaus siab rau yam koj muaj, koj yuav hlub lwm tus xws li koj ua tau mog. Koj yuav nyiam thiab hwm kuv leej niam, kuv muab kuv niam ua koj thiab sawv daws leej niam.
Tag kis, koj yuav rov tuaj ntsib kuv, koj yuav coj koj lub siab tuaj koom nrog kuv lub siab nyob ua ke. Nyob ntawd, koj yuav pom kev nyiam, kev khuv leej, lub txiaj ntsim thiab kev txhawb siab mus li. Kuv tos ntsoov koj mog!
Faus Tis Nas pom Yes Xus hnav lub tsho ntev tsos dawb. Yes Xus txhais tes xis tsa los foom hmoov zoo, txhais tes laug kov nws hauv siab. Yes Xus hais rau Faus Tis Nas tias “Koj yuav kos daim duab zoo li koj pom no mog. Koj yuav sau ib npe ntawv tias: Yes Xus, kuv tso siab rau koj.”
Yes Xus hais rau Faus Tis Nas ntxiv tias “Kuv xav kom muaj kev hwm kuv tus duab no nyob hauv koj lub me nyuam tsev teev Ntuj thiab koj yuav qhia tas lub qab ntuj neeg hwm kuv tus duab no. Kuv cog lus tias leej twg hwm kuv tus duab no mas nws tus ntsuj plig yuav tsis puas tsuaj mus li. Nws tus ntsuj plig yuav yeej tus yeeb ncuab thaum nws tseem ua neej nyob thiab nyob hauv lub zim txwv nws txoj sia yuav tu, mas kuv yuav txuag nws tus ntsuj plig xws li yog kuv lub koob meej. Kuv yuav txuag lub zos thiab lub tsev muaj kuv tus duab no.”
Faus Tis Nas xav paub tias 2 txoj kab sab ci tawm hauv Yes Xus nruab siab los yog dab tsi, ces nws nug Yes Xus. Yes Xus qhia nws tias “Thaum kuv raug dai nyob saum Ntoo Cuam muaj ib tug tau muab hmuv nkaug kuv sab tav, ces kuv cov ntshav thiab cov dej ntws tawm los. Cov ntshav thiab cov dej no ntws tawm hauv kuv lub hiav txwv khuv leej neeg los. Txoj kab sab dawb yog cov dej ua kom cov ntsuj plig ua neeg ncaj, kab sab liab yog cov ntshav ua kom cov ntsuj plig muaj txoj sia. Ob txoj kab sab no yuav thaiv cov ntsuj plig ntawm kuv Leej Txiv kev npau taws. Tus twg los nkaum nyob hauv ob kab sab no mas nws yuav tsis raug txiav txim.”
Xyoo 1938 tim 5 lub 10 hli, Phauj Faus Tis Nas txoj sia tu, thaum ntawd nws muaj 33 xyoos xwb.
