Mas Nkas Lis yog tus vaj ntxwv Aas Kiv hu ua Es Vaws (Edward the Exile) tus ntxhais. Nws yug xyoo 1045 nyob Hoos Nqias teb (Hungary). Leej Ntshiab Mas Nkas Lis tau lub npe tias ‘lub hlaws piag deg hauv Kos Lees teb’ (The Pearl of Scotland).
Xyoo 1016 tus vaj Kas Nus Tes (Canute) coj cov Das Nis (Danish) hauv teb chaws Das Mas (Denmark) tuaj txeeb tau Aas Kiv teb, nws xa tus vaj Aas Kiv ob tug tub Es Vaws thiab Es Mus (Edmund) mus nrauj zoo nyob Xws Ves Lis teb (Sweden). Tus vaj Xws Ves Lis hlub nkawd ob kwv tij, nws thiaj xa nkawd mus nrog tus vaj Tes Fas Nos (Stephen I) nyob hauv nws lub teb chaws Hoos Nqias. Es Vaws hlob thiab tsa cuab nyob hauv lub teb chaws, ces Mas Nkas Lis thiaj yug nyob Hoos Nqias teb.
Lub teb chaws Hoos Nqias yog ib lub teb chaws ua Ntuj kev cai zoo, yog li Mas Nkas Lis thiaj tau kawm Ntawv Ntshiab, kawm cov phau ntawv qhia teev Ntuj, thiab kawm lus Las Tis Nas.
Xyoo 1057 tus vaj kav Aas Kiv teb laus thiab tsis muaj me nyuam, mas cov nom tswv Aas Kiv hu Mas Nkas Lis txiv kom sawv kev ntawm Hoos Nqias teb rov los ua vaj nyob Aas Kiv teb, ces lawv tsev neeg thiaj tshais chaws los rau Aas Kiv. Thaum lawv los txog, ua cas Mas Nkas Lis txiv cia li tuag tam sim ntawd, ces cov nom tswv thiaj tsa Mas Nkas Lis tus nus ‘Es Nkas’ (Edgar Ætheling) ua vaj ntxwv. Xyoo 1066 tus vaj laus tuag tas mas cov nom tswv xaiv Has Los (Harold Godwinson) ua vaj Aas Kiv vim thaum ntawd Es Nkas tseem yau dhau. Ib xyoos tom qab tus vaj Has Los tuag, mas Es Nkas mam tau ua vaj tab sis cov Nos Maas (Norman) tuaj txeeb tau lub nroog Loos Doos (London), ces Mas Nkas Lis lawv tsev neeg raug ntes mus nyob Nos Maas Ntis teb (Noemandy) hauv daim av Fab Kis.
Xyoo 1068 cov Nos Maas tso lawv rov los Aas Kiv, Mas Nkas Lis niam thiaj coj nws tsev neeg tsiv mus nyob pem qaum teb Aas Kiv, hauv lub teb chaws Nos Thus Nplias (Northumbria). Nyob ntawd tsis ntev mas lawv nqes nkoj yuav rov mus rau Aws Los Pas tuam teb, tab sis muaj ib nthwv cua loj tshuab lub nkoj mus pem hauv ntuj, coj lawv mus txog Kos Lees teb (Scotland). Nyob ntawd, tus vaj Mas Koos tim 3 (Malcolm III) tau pab lawv cia.
Xyoo 1070 Mas Nkas Lis muaj 25 xyoos lawm, ces tus vaj Mas Koos tim 3 yuav Mas Nkas Lis ua nws poj niam. Nkawd muaj 8 tus me nyuam. Mas Nkas Lis yog ib tug poj niam paub txuj thiab tswv yim zoo, mas tus vaj hwm Mas Nkas Lis zoo kawg, nws kom Mas Nkas Lis nyeem Ntawv Ntshiab rau nws mloog. Mas Nkas Lis xav kho lub Koom Txoos nyob hauv Kos Lees teb, mas tus vaj pom zoo cia Mas Nkas Lis ua ywj siab, ces Mas Nkas Lis thiaj txhim kho lub Koom Txoos hauv lub teb chaws kom mus raws li lub Koom Txoos nyob Las Mas tus piv txwv.
Mas Nkas Lis muab siab ntuas cov pej xeem Kos Lees kom coj tus yam ntxwv haum Yes Xus lub Moo Zoo. Niaj hnub Mas Nkas Lis tawm hauv lub tuam tsev mus faib zaub mov rau cov neeg txom nyem thiab cov me nyuam ntsuag noj tas, mas nws mam rov los noj pluas tshais. Mas Nkas Lis kuj nquag tawm mus ntxuav cov neeg txhais taw xws li Yes Xus tau ua. Thaum ib tag hmo mas nws sawv los teev Ntuj raws li lub Koom Txoos ib txwm coj. Mas Nkas Lis kuj tau caw cov tub koom haum Npes Nes Dis Tis tuaj tsa tsev Twj Cuab nyob hauv lub teb caws, thiab nws kom cov kws ntoo txua ob lub nkoj cia tau thauj cov neeg tawm rooj fiv ntuj.
Xyoo 1093 cov Aas Kiv tuaj ntaus rog nrog cov Kos Lees, ces tus vaj Mas Koos Peb thiab tus tub hlob raug tua tuag hauv tshav rog, ua rau Mas Nkas Lis tu siab heev ces hnub tim 16 lub 11 hlis nws cia li siav tu, yog 3 hnub tom qab tus txiv thiab tus tub tuag.
Vaj Qhia Is Nos Xes tim 4 (Pope Innocent IV) pom tias Mas Nkas Lis yog ib tug neeg muaj siab ntshiab, tas nws sid mas nws poo nraim lub Koom Txoos nyob Los Mas, Mas Nkas Lis tseem muaj siab pab txhim kho lub Koom Txoos thiab hlub tsoom pej xeem hauv lub teb chaws; yog li nyob hauv tim 19 lub 6 hli 1250 Vaj Qhia thiaj tsa Mas Nkas Lis ua ib tug Leej Ntshiab.
Leej Ntshiab Mas Nkas Lis nyob Kos Lees (St. Magaret of Scottland)
