Leej Ntshiab Mas Tis Nus nyob Tuj (St. Martin of Tours)

Mas Tis Nus (Martinus Turonesis) yug xyoo 316 nyob Hoos Nqias teb (Hungary) hauv ib tsev neeg thawj tub rog teev dab. Thaum Mas Tis Nus muaj hnub nyoog 10 xyoo, Mas Tis Nus nyiam Yes Xus lub Moo Zoo heev, nws thiaj mus kawm Ntuj kev cai. Muaj 2 lo lus raug Mas Tis Nus siab tshaj mas yog lo lus tias ‘Nej tau ua npaum li cas rau cov me tshaj nyob hauv kuv tsoom kwv, mas yog nej tau ua rau kuv’ thiab lo lus tias ‘Tas ib puas tsav yam nej xav kom luag ua rau nej, mas nej yuav ua qhov ntawd rau luag.’
Mas Tis Nus hais tias niaj hnub peb tsis tuaj yeem pom Yes Xus ntawm peb qhov muag, tab sis yog thaum twg peb tau pab ib tug neeg txom nyem, mas peb yuav pom Yes Xus txoj kev nyiam kev hlub nyob ntawd ntag. Li ntawd, Mas Tis Nus thiaj hlub txhua tus neeg pluag uas nws tau ntsib, tab sis lub caij ntawd Mas Tis Nus tseem tsis tau txais lub Cim Ntxuav.
Thaum Mas Tis Nus muaj hnub nyoog 14 xyoos, nws xav ua txoj hauj lwm tshaj Ntuj Lus, tiam sis nws txiv tsis pub nws ua txoj hauj lwm tshaj Ntuj Lus, nws xav kom Mas Tis Nus mus ua tub rog li nws. Mas Tis Nus thiaj ua ib siab mus ua tub rog raws li nws txiv tau hais.
Xyoo 334 Mas Tis Nus tuaj ua tub rog nyob hauv lub nroog As Mis Yees nyob Nkas Lias teb. Mas Tis Nus caij nees mus txog tog kev, Mas Tis Nus pom ib tug yawg laus hnav khaub khaub hlab zaum nyob ntawm ib lub tsev sab nraud. Nws khooj tib pob thiab tshee tshee vim no heev. Mas Tis Nus yuav luag tsis ntseeg tias nyob ntiaj teb no tseem muaj tej tug neeg pluag tsis muaj tsev nyob. Mas Tis Nus nco dheev txog Yes Xus lo lus hais tias “Nej tau ua npaum li cas rau cov me tshaj hauv kuv tsoom kwv, mas yog nej tau ua rau kuv.” Mas Tis Nus xav tias tus neeg pluag ntawd yog Yes Xus, ces tam sim ntawd, nws nqes ntawm tus nees los. Nws rho hlo nws rab ntaj hlais nws lub tsho tiv no ua ob sab, ces nws cev ib sab tsho rau tus yawg laus ntawd hnav kom nws tsis txhob tuag no. Ua li ntawd tas Mas Tis Nus thiaj caij nees mus tom nws lub yeej tub rog lawm. Hmo ntawd Mas Tis Nus ua npau suav pom Yes Xus los hais rau nws tias “Mas Tis Nus, Mas Tis Nus! Koj tsis tau txais lub Cim Ntxuav. Tab sis koj tau ua raws nraim kuv lub Moo Zoo, vim tias nag hmo nyob ntawm tog kev koj tau pub koj ib sab tsho tiv no rau kuv hnav, mas kuv ua koj tsaug.”
Mas Tis Nus tsim dheev los, ces tas ib hmos ntawd nws pw tsis tsaug zog li. Nws xav tswv yim thiab nws to taub txog lo lus tias “Tas ib puas tsav yam nej xav kom luag ua rau nej, mas nej yuav ua yam ntawd rau luag.”
Txij hnub ntawd los, Mas Tis Nus haj yam hlub cov neeg pluag, cov neeg txom nyem dua qhov qub, vim tias tej hauj lwm nws tau ua ntawd yog nws nyiam Yes Xus tiag.
Mas Tis Nus xav tias nws yuav tsum ua tub rog mus txog thaum nws muaj 40 xyoo, nws thiaj yuav tau txais lub Cim Ntxuav. Yog lub caij ntev dhau rau nws, ces Mas Tis Nus txiav txim siab tsis ua tub rog ntxiv.
Mas Tis Nus mus thov cov thawj tub rog kom muab nws rho tawm. Tus thawj tub rog cem Mas Tis Nus hais tias vim yog Mas Tis Nus ntshai ua tub rog mas Mas Tis Nus thiaj li nrhiav kev thov tawm mus.
Mas Tis Nus teb rau tus thawj tub rog ntawd tias “Kuv coj Yes Xus tus Ntoo Cuam, kuv tsis ntshai yeeb ncuab.”
Mas Tis Nus tawm tub rog los mus txais lub Cim Ntxuav. Thaum ntawd Mas Tis Nus muaj 20 xyoo.
Txij ntawd los, Mas Tis Nus pib coj lub neej teev Ntuj thiab nyiam Yes Xus tas siab ntsws. Nws mus nrog Tswv Qhia His Las Yus nyob rau Puas Ces. Mas Tis Nus tau kawm Yes Xus cov lus ntau, thiab Mas Tis Nus tseem paub txog txoj kev ua neeg siab ntshiab, txawj hlub luag tej.
Mas Tis Nus nrog ib pab Txiv Twj Cuab ua lub neej Twj Cuab nyob ib qhov chaw xu kev thiab deb nroog. Lawv kub siab coj lub neej mloog txoj cai ua Txiv Twj Cuab thiab lawv txhob txwm yoo mov thov kom Tswv Ntuj zam txhaum rau cov neeg tsis mloog Tswv Ntuj lus.
Tswv Qhia His Las Yus pom tias Mas Tis Nus yog ib tug neeg siab ntshiab, txawj hlub luag tej thiab muaj lub siab kub lug kawm Yes Xus lub Moo Zoo tiag. Tswv Qhia His Las Yus xav tsa Mas Tis Nus ua Tub Tsob Hwb, tab sis Mas Tis Nus tsis kam vim nws xav tias nws tsis tsim nyog ua ib tug Tub Tsob Hwb nyob hauv lub Koom Txoos. Niaj hnub Mas Tis Nus tsuas thov ua tus pab Tswv QhiaHis Las Yus tshaj Tswv Ntuj Lo Lus xwb txaus nws siab lawm.
Muaj ib hnub, Mas Tis Nus rov nco txog nws niam nws txiv uas tseem teev dab nyob Hoos Nqias teb. Mas Tis Nus xav mus qhia nws niam nws txiv nkawd kom paub txog Ntuj Lo Lus thiab los nrog Mas Tis Nus ntseeg txog Yes Xus, ces Mas Tis Nus thiaj tso Tswv Qhia tseg, nws rov los tsev.
Thaum Mas Tis Nus mus txog nws niam thiab nws txiv tsev lawm, Mas Tis Nus qhia Yes Xus lub Moo Zoo rau nkawd. Mas Tis Nus niam tau tso kev teev dab tseg thiab tig los nrog Mas Tis Nus ntseeg txog Yes Xus.
Tom qab ntawd, Mas Tis Nus tau mus nyob ze ntawm tus dej Das Nws. Muaj ib hnub Mas Tis Nus tau khiav mus rau Is Tas Lias sab pej.
Lub caij uas Mas Tis Nus tau tsiv mus nyob rau Is Tas Lias teb sab pej, Mas Tis Nus tau mus ntsib cov neeg ntseeg tuaj As Lis Yus tog. Mas Tis Nus tau nrog cov neeg ntawd sib cav tsis sib haum ntau zaus. Ntev mus Mas Tis Nus yuav nyob tsis tau Is Tas Lias teb, rau qhov tias cov As Lis Yus yuav ua phem rau nws xwb, ces Mas Tis Nus thiaj tau mus nyob hauv ib lub pov txwv. Mas Tis Nus pib lub neej xyaum ua Txiv Twj Cuab ib ntus.
Mas Tis Nus mus nyob hauv lub pov txwv thiab xyaum ua lub neej Txiv Twj Cuab tau tsis ntev, nws hnov xov hais txog Tswv Qhia His Las Yus mus nyob txim nyob Tws Kis teb tau rov qab los nyob Puas Ces lawm. Mas Tis Nus thiaj rov qab los nrog Tswv Qhia His Las Yus nyob.
Mas Tis Nus qhia txoj kev ua Txiv Twj Cuab nyob Nkas Lias teb thiab tau tsim ob lub tsev Txiv Twj Cuab nyob Nkas Lias teb; ib lub yog nyob Lis Nkws Zes, ib lub yog nyob Mas Mus Ces.
Nyob nyob, Tswv Qhia uas kav lub nroog Tuj tau tuag, cov neeg ntseeg uas nyob hauv lub nroog ntawd ntxhov siab kawg, cov neeg ntseeg ntawd nco tias tshuav Mas Tis Nus uas yog ib tug tsim nyog ua Tswv Qhia. Cov neeg ntseeg thiaj mus cuag Mas Tis Nus thiab thov kom nws tsis txhob ua Txiv Twj Cuab ntxiv, kom nws los ua lawv tus Tswv Qhia nyob hauv lub nroog Tuj. Tab sis Mas Tis Nus tsis kam ua li cov ntseeg hais. Nws hais tias nws xav ua Txiv Twj Cuab li qhov qub.
Cov ntseeg lawv xav ntxias Mas Tis Nus siab, ces lawv tso ib tug txiv neej rov mus ntsib Mas Tis Nus. Nws taij Mas Tis Nus tas zog tias nws poj niam mob hnyav heev pw nyob saum txaj xwb, sawv tsis taus li. Li ntawd, thiaj thov kom Mas Tis Nus mus foom hmoov zoo rau nws poj niam. Mas Tis Nus hlub tus txiv neej ntawd, ces Mas Tis Nus nrog tus txiv neej ntawd mus tom lub nroog Tuj. Thaum nkawd mus txog ze ntawm lub tsev teev Ntuj, mas muaj ib pab neeg coob coob nyob ntawd. Pab neeg ntawd qw nrov nrov thiab dhia zoo siab, lawv hais tias “Mas Tis Nus tuaj txog lawm! Nws yog peb tus Tswv Qhia tshiab, nws tuaj nrog peb nyob.”
Tab sis Mas Tis Nus hais rau cov ntseeg tias “Kuv tsuas nyiam ua Txiv Twj Cuab xwb. Yog kuv mloog nej hais, mas ntshai tsam kuv tsis muaj peev xwm ua tau nej tus Tswv Qhia.”
Cov neeg ntseeg haj yam qw nrov nrov tias “Mas Tis Nus yuav tsum ua peb tus Tswv Qhia xwb.”
Qhov kawg Mas Tis Nus swb cov neeg ntseeg ntawd. Thaum txog Hnub Chiv hauv lub lis piam, mas muaj ib pab Tswv Qhia nyob ib ncig ntawm lub nroog Tuj tuaj tsa Mas Tis Nus ua Tswv Qhia.
Muaj ib co Tswv Qhia tsis pom zoo rau Mas Tis Nus ua Tswv Qhia, vim lawv ntshai tsam Mas Tis Nus ua ib tug Tswv Qhia tsis muaj hwj chim. Vim tias lawv pom Mas Tis Nus hnav dab hnav tuag, Mas Tis Nus tsis txawj ntsis plaub hau, tsis txawj tu cev kom zoo li cov neeg muaj hwj chim.
Mas Tis Nus ua ib tug Tswv Qhia txawv luag tej; niaj hnub Mas Tis Nus ua Txiv Twj Cuab nyob hauv lub nroog Mas Mus Ces nyob deb ntawm lub nroog Tuj li 40 ncua kev, tiam sis txog hnub uas Mas Tis Nus yuav ua tus tswj coj pej xeem mas nws kuj txawj ua tus muaj hwj chim thiab.
Tsis ntev Mas Tis Nus xav tau tias nws yuav mus tshaj lub Moo Zoo rau cov nyob nruab liaj nruab teb, cov neeg nyob deb ntawm lub nroog loj. Cov neeg ntawd lawv tsuas coj dab xwb, ces Mas Tis Nus thiaj caij nees mus qhia lub Moo Zoo rau cov neeg nruab liaj nruab teb uas lawv nyob tsis deb tsis ze ntawm lub nroog Tuj, cov nyob hauv lub ceeb Npes Lis thiab cov nyob ib ncig ntawm Pas Lis.
Mas Tis Nus ntoj kev mus txog lub zos twg mas nws qhia lawv txog Yes Xus lub Moo Zoo thiab nws tsa ib lub Koom Txoos me me nyob lub zos ntawd. Mas Tis Nus ua li no mas ua rau tsoom pej xeem huab hwm tig los ntseeg txog Yes Xus. Lawv muab lawv tej tsev teev dab hloov ua tsev teev Tswv Ntuj.
Thaum xyoo 397 Mas Tis Nus muaj hnub nyoog 81 xyoos lawm, nws tau tuaj mus tshaj Ntuj Lus nyob hauv ib lub zos hu ua Kaas, ces nws ua ib tug npaws. Mas Tis Nus yeej paub zoo tias nws yuav tuag, nws pom nws cov thwj tim lawv ntxhov siab kawg thiab lawv nyob ncig nws. Mas Tis Nus thiaj tsa suab hais rau Tswv Ntuj tias “Huab Tais, yog koj tseem xav yuav kuv lub zog los qhia koj cov neeg, mas kuv tsis yig li.”
Hais li ntawd tas, Mas Tis Nus pom cov dab phem nyob ncig nws, nws hais rau cov dab phem tias “Nej ua dab tsi ntawm no? Nyob hauv kuv tsis muaj dab tsi ua nej tug.”
Mas Tis Nus hais rau cov Txiv Twj Cuab nrog nws ua ke tias “Kuv cov kwv tij, nej tso lus rau kuv ntsia lub ntuj, ces kuv yuav tsis xav txog tej yam nyob hauv lub ntiaj teb no. Nej thov Tswv Ntuj los pab kuv, kom kuv txawj npaj ib lub siab dawb huv mus cuag Huab Tais Tswv Ntuj uas yog peb Txiv.” Mas Tis Nus hais tas ces nws txoj sia tu.