Ua ntej Les Os yuav ua Vaj Qhia, nws tau ua tus tsob hwb Vaj Qhia Is Nos Xes thiab Vaj Qhia Xes Tus tim 3. Xyoo 440 tim 29 lub 9 hli, lub Koom Txoos xaiv Les Os ua Vaj Qhia.
Lub caij ntawd, nyob Tws Kis teb thiab nyob Toob Fab Nrab muaj ib cov neeg ntseeg pib tshaj tej zaj lus cuav, uas tsis mus raws qhov tseeb hauv lub Koom Txoos. Lawv ntseeg tias Yes Xus yog tus Huab Tais cawm seej ntag. Tab sis nws tsis yog tseem neeg. Vaj Qhia Les Os thiaj hu 500 tus Tswv Qhia tuaj ua lub Rooj Ncauj Lus nyob hauv lub nroog Kas Tshaws Dos Nias (Calchedonia). Vaj Qhia Les Os xa 2 tug tiam lis mus nrog cov Tswv Qhia sab laj, nkawd nqa Vaj Qhia tsab ntawv mus cuag tsoom Tswv Qhia. Tsab ntawv muaj lub ntsiab lus tias: ‘Cov neeg uas lawv tshaj tias Huab Tais Yes Xus tsuas yog Tswv Ntuj xwb, nws tsis yog tseem neeg; cov neeg ntawd yuam kev. Ib txwm los nyob hauv lub Koom Txoos peb tau khaws tej zaj zeem tseeb tseg tias ‘Tswv Ntuj xa nws Leej Tub nqes los ua neeg nyob hauv ntiaj teb no kom tau cawm neeg ntawm kev ua txhaum thiab kho neeg lub siab ntsws kom tiaj tus. Tus Hauv Paus Xa Lus Paj Lug kuj hais tias ‘nyob ntawm Tswv Ntuj thiab tib neeg kis nruab nrab, tsuas muaj ib tug cev lus xwb; yog Yes Xus Pleev. Nws yog tseem neeg, nws muab nws los ua nqe txhiv peb sawv daws’ (1TMT 2: 5). Yog vim tej lus tseeb ntawd, mas txij no mus peb yuav ntseeg khov kho tias Yes Xus Pleev muaj hwj chim ib yam nkaus Huab Tais Leej Txiv thiab Huab Tais Leej Ntuj Plig Ntshiab.’
Cov Tswv Qhia pom muaj tseeb raws li Vaj Qhia Les Os cov lus, ces txij hnub ntawd los cov neeg ntseeg thiaj ntseeg tias ‘Huab Tais Yes Xus yog tseem Tswv Ntuj thiab tseem tib neeg.’
Vaj Qhia Les Os tseem muab siab ntuas cov neeg kom nyob nraim hauv txoj kev ntseeg, xws li thaum txog hnub hwm Yes Xus mus saum ntuj, mas Vaj Qhia Les Os ntuas sawv daws tias “Hnub no, Huab Tais Leej Txiv uas yog peb tus Huab Tais Tswv Ntuj. Nws yog tus ib txwm nyob thiab muaj txoj sia mus txog txhiab niag tim puas xyoo, nws txais nws Leej Tub Yes Xus Pleev mus nyob ntawm nws sab xis hauv nws lub Ceeb Tsheej lawm.
Nej yuav nco ntsoov tias Yes Xus Pleev yog lub taub hau, hos peb yog nws tes taw. Niaj hnub Huab Tais Yes Xus pub txoj sia tuaj rau peb.
Huab Tais Yes Xus nce mus pem Ntuj lub Ceeb Tsheej thiab nws tau txais lub hwj chim loj tshaj. Peb cov ntseeg uas koom siab nrog Huab Tais Yes Xus, mas hnub no peb kuj tau txais lub hwj chim loj tib yam nkaus li Huab Tais Yes Xus thiab. Tsis tas li ntawd, peb tso siab tias muaj ib hnub peb lub cev yuav tau nce mus saum ntuj ib yam li Huab Tais Yes Xus thiab. Tab sis peb lub cev yuav txawv lub cev uas nyob ntiaj teb no.”
Vaj Qhia Les Os hais ntxiv tias “Hnub nej tau txais lub Cim Ntxuav mas Huab Tais Yes Xus tau cawm nej dim ntawm qhov tsaus ntuj. Nyob hauv Huab Tais Yes Xus, nej yuav tau txais Tswv Ntuj cov txiaj ntsim cawm neeg thiab txoj kev zam txhaum. Yog nej paub tias nej nyob hauv Huab Tais Yes Xus, mas nej yuav ceev faj kom nej tsis txhob zwm rau kev tsaus ntuj thiab kev txhaum. Cov ntseeg sawv daws! Niaj hnub, nej yuav nco ntsoov hais tias yav tas los lawd, nej tau txais lub Cim Ntxuav, ces nej txia ua ib lub tsev rau Leej Ntuj Plig Ntshiab nyob. Leej Ntuj Plig nyob txawm hauv nej nruab siab tiag.
Yog vim Huab Tais Yes Xus hlub nej txhua tus, nws thiaj tuaj yeej ris kev raug txom nyem kom tau txhiv nej ntawm neeg cov txhaum thiab txoj kev raug dab phem ntxias. Niaj hnub, nej yuav ceev faj txog tas txhia yam uas nej tau ua. Yog tias nej ua txhaum, mas txhais tias nej muab Huab Tais Yes Xus tshem hauv nej siab lawm. Nej yuav nco ntsoov tias tus yeeb ncuab Xas Tas niaj hnub cuab ntxiab saib nej puas yuav mag nws rooj ntxiab.
Yog ib tug neeg ntseeg nws ‘kub siab teev Ntuj’, mas nws yuav tau txais Tswv Ntuj cov txiaj ntsim daws nws cov txhaum. Tus neeg ntseeg nws ‘pub mov’ los ‘pub nyiaj’ rau cov neeg pluag, mas nws kuj tau txhiv nws tus kheej ntawm nws tej txhaum thiab. Yog ib tug ntseeg nws kub siab ua 3 yam ntawd, mas Tswv Ntuj lub txiaj ntsim yuav ci kaj nws lub siab, ces nws yuav muaj lub siab kub lug nyob ruaj nreb hauv txoj kev teev Tswv Ntuj.”
Xyoo 452 nyob Aws Los Pas teb muaj ib pab neeg qus hu ua Hees tuaj ntawm Lav Xias teb tuaj. Lawv mus txog lub teb chaws twg, mas lawv ua tub sab nyiag noj nyiag haus, ua kom tas ib puas tsav yam hauv lub teb chaws ntawd puas tsuaj. Cov neeg Aws Los Pas ntshai cov Hees kawg. Tus vaj Hees As Tis Las coj nws ib pab tub rog coob coob mus txog teb chaws Is Tas Lias. Lawv mus yuav txog lub nroog Los Mas tiag. Tus vaj Vas Lees Tis Nus xav tswv yim tias yuav ua li cas kom tus vaj Hees As Tis Las thiaj tsis txhob txeeb tau lub tuam ceeb Los Mas. Nws nug nws cov tim xyoob tias “Kuv yuav xa leej twg mus nrog tus vaj As Tis Las sab laj, thiab thov kom As Tis Las tsis txhob tuaj rhuav lub nroog Los Mas.”
Cov tim xyoob teb tias “Tsoom pej xeem nyob hauv lub nroog Los Mas, feem coob lawv hwm Vaj Qhia Les Os zoo. Peb xav tias nws yog tus tsim nyog koj yuav xa mus, vim nws yog tus yuav muaj peev xwm mus nrog As Tis Las cev lus sab laj.”
Vas Lees Tis Nus thiaj thov Vaj Qhia Les Os ua cov dej num tseem ceeb ntawd. Vaj Qhia Les Os zoo siab ua cov dej num ntawd. Thaum lub 7 hli xyoo 452 thiaj muaj ib cov nom nyob Los Mas nrog Vaj Qhia Les Os ua ke mus ntsib tus vaj As Tis Las. Vaj Qhia Les Os hnav cov tsoos tsho ua Vaj Qhia. Muaj ib co Tub Tsob Hwb hnav dawb nrog Vaj Qhia mus. Kuj muaj ob tug neeg uas nkawd tuav Vaj Qhia tus chij thiab tus ntoo cuam zoo nkauj mus ua ntej.
Thaum As Tis Las coj nws pab neeg tuaj txog tus dej Mees Xyos (Mancio), yuav hla tuaj rau Los Mas. As Tis Las pom ib pab Leej Choj thiab ib pab Txiv Twj Cuab maj mam nquam ib tug ntoo cuam ua lawv ntej tuaj. Pab neeg ntawd hu nkauj cav txog Tswv Ntuj thiab teev Ntuj.
Vaj Qhia Les Os thiab tus vaj As Tis Las sib tham ob hnub, ces Vaj Qhia Les Os cev tus vaj Vas Lees Tis Nus pob nyiaj rau As Tis Las. Qhov kawg As Tis Las zoo siab ua raws li Vaj Qhia Les Os cov lus thov, cov Hees thiaj thim rov qab.
Vaj Qhia Les Os hais rau tsoom neeg ntseeg nyob hauv lub nroog Los Mas tias “Tsim nyog peb yuav ua Huab Tais Tswv Ntuj tsaug, vim Huab Tais Tswv Ntuj tau pab cawm peb dim ntawm kev raug xwv txheej.” Txij xyoo 452 los, mas cov neeg ntseeg nco ntsoov txog Vaj Qhia Les Os cov dej num tseem ceeb nws tau ua, vim nws tau txuag lub Koom Txoos Kav Tos Liv kom dim ntawm cov Hees txhais tes, ces Vaj Qhia Les Os lub npe nto moo loj nyob rau lub caij ntawd.
Vaj Qhia Les Os kuj tau pab cov neeg pluag; nws tawm mus faib hmoov nplej rau cov neeg tshaib plab. Nws kuj rau siab tshaj Ntuj Lus, nws tsim kab ke ua lub Cim Ntxuav. Vaj Qhia Les Os sau ntawv ntuas thiab sau cov Thaj Txi Ntuj ua ib phau kom txhij kom txhua. Nws tau sau lub Koom Txoos cov Cim thiab tej kab ke los ua tej phau ntawv cia.
Thaum cov Vaas Das hla lub hiav txwv Mes Dis Tes Las Nes tuaj txeeb Los Mas, tus vaj Los Mas nyuag qhuav tuag, ces Vaj Qhia Les Os ua tus mus ntsib tus vaj Vaas Das. Vaj Qhia Les Os thov kom cov Vaas Das txhob hlawv lub nroog thiab txhob tua neeg, cov Vaas Das lwg lub nroog tau 14 hnub ces lawv tso tseg.
Tim 10 lub 11 hlis xyoo 461 Vaj Qhia Les Os tuag, lawv muab nws zwm av nyob hauv Leej Ntshiab Pob Zeb lub Tuam Tsev Teev Ntuj. Lawv txaug cov lus nyob saum nws lub ntxa tias ‘Thov koj pov hwm peb mus li, kom cov hma nyas peb mus li tsis txhob tom tau pab yaj’.
Yog vim Vaj Qhia Les Os tau ua cov dej num tseem ceeb thiab muaj txiaj ntsim rau lub Koom Txoos, mas cov neeg ntseeg thiaj cav txog Vaj Qhia Les Os tias nws yog tus loj thiab yog lub Koom Txoos cov kws txuj.
Leej Ntshiab Les Os tus Loj (St. Leo the Great)
