As Foos Xos (Alfonso) yug nyob hauv ib yim neeg muaj suab npe, nyob hauv lub nroog Nas Pos Lis (Naples) Is Tas Lias teb, xyoo 1699. Nws tau lub npe tias ‘Tus Leej Choj daws txhaum’.
Thaum muaj 19 xyoos, nws kawm tiav kws txoj cai, ces nws pib ua kws lij choj hais plaub ntug. Nws ua ib tug kws lij choj nto npe nyob hauv lub nroog Nas Pos Lis. Nws hais ib rooj plaub tsis tiav, ces nws thiaj hloov nws lub neej los ua tub tshaj Ntuj Lus.
Thaum muaj 30 xyoo, As Foos Xos txais lub Cim Tiag Tes ua Leej Choj. Tas tsoom neeg ntseeg qhuas tias As Foos Xos yog ib tug neeg txawj nthuav Ntawv Ntshiab kawg.
Xyoo 1732 As Foos Xos rub cov tub tshaj Ntuj Lus los ua ib pab tsim lub koom haum hu ua “Tus Cawm Seej” (Redemtorists) los cav txog Yes Xus txoj kev txhiv neeg.
Lub koom haum yog qhia kev ntseeg thiab nplij siab cov neeg tsis muaj kev cia siab. Lawv tshaj Ntuj Lus rau cov neeg txom nyem nyob nruab liaj nruab teb, lawv yug mov rau cov neeg tshaib noj.
As Foos Xos raug xaiv ua Tswv Qhia. Nws tsim tej phau nkauj teev Ntuj, sau tej phau ntawv qhia neeg ua neej, ces nws lub zog pib ntaug.
As Foos Xos mob tes taw vwm thiab mus tsis taus kev mas nws thiaj tsis ua Tswv Qhia ntxiv. As Foos Xos tuag thaum nws hnub nyoog muaj 91 xyoos, yog xyoo 1787.
Xyoo 1839 tim 26 lub 5 hlis, Vaj Qhia Nqes Nkos Lis tim 16 tsa As Foos Xos ua Leej Ntshiab. Xyoo 1871 Vaj Qhia Pis Yus tim 9 tsa Leej Ntshiab As Foos Xos ua lub Koom Txoos cov kws txuj (Doctor of the Church).
Leej Ntshiab As Foos Xos (St. Alphonsus Liguori)
