Leej Ntshiab His Las Yus (St. Hilary)

Leej Ntshiab His Las Yus yug xyoo 310 hauv lub nroog Pos Cias (Poitiers), Nkas Lias teb, nws ua Tswv Qhia nyob hauv Puas Cias. His Las Yus niam thiab txiv teev dab, nws txiv yog ib tug nom loj ces His Las Yus thiaj tau kawm ntawv ntau.

Thaum yav hluas, nws pom Zam phau Ntawv Moo Zoo, nws muab los nyeem ces nws poob siab rau lo lus no ‘Leej Lo Lus yuav ib lub cev neeg, Leej Lo Lus tuaj nrog peb nyob.’ Txij ntawd los, His Las Yus xav ntsoov txog Tswv Ntuj nqes los ua neeg, nws qhuas kawg. Ob peb xyoos los, His Las Yus thiaj txais lub Cim Ntxuav.

Xyoo 355 cov neeg ua Ntuj kev cai xav yuav His Las Yus los ua lawv tus Tswv Qhia. Nyob rau tiam ntawd, mas muaj ib txhia ntseeg raws li As Lis Yus (Arius) cov lus qhia tias Yes Xus tsis yog tseem Tswv Ntuj. Tswv Qhia His Las Yus thiaj sawv los tawm tsam As Lis Yus cov lus qhia, nws sau cov Tswv Qhia tuaj ua Rooj Ncauj Lus nyob Pas Lis (Paris). Lawv txiav tias lawv yuav tsis kheev leej twg tuaj qhia As Lis Yus zaj tswv yim nyob Nkas Lias teb. Tiam sis tus vaj Los Mas nyiam As Lis Yus zaj, ces cov As Lis Yus thiaj thov kom tus vaj Los Mas pab lawv. Tus vaj thiaj xa His Las Yus mus nyob Fis Zias, hauv As Xias Me.

Nyob ntawd, His Las Yus tau kawm cov txuj hauv lub Koom Txoos sab hnub tuaj thiab nws niaj hnub ua cov hauj lwm tshaj qhov tseeb tias Yes Xus yog tseem Tswv Ntuj thiab tseem tib neeg. His Las Yus pib nto moo nyob sab hnub tuaj, ces tus vaj thiaj rov hu His Las Yus los nyob Puas Cias.

His Las Yus los txog ces nws rov qab tiv cov As Lis Yus li qub, thiab nws qhia cov neeg ntseeg kom nyiam coj lub neej ua Txiv Twj Cuab, nws sau cov ntawv qhia Ntuj kev cai thiab nthuav Ntawv Ntshiab. His Las Yus tuag xyoo 367.

Related Post

Leave a Reply

Your email address will not be published. Required fields are marked *

Translate »