-11-
1 Muaj ib zaug, Yes Xus teev Ntuj nyob ib qho chaw. Thaum nws teev Ntuj tas lawd, nws ib tug thwj tim hais rau nws tias : “Huab Tais, koj qhia peb teev Ntuj xws li Zam qhia nws cov thwj tim saib.” 2 Yes Xus hais rau lawv tias : “Thaum nej teev Ntuj, nej hais li no : Txiv, kom koj lub Npe ntshiab, 3 kom koj lub Ceeb Tsheej los txog ! Thov koj niaj hnub pub mov rau peb noj txwm hnub. 4 Thov koj zam txhaum rau peb vim peb zam rau cov tshuav nqi ntawm peb. Koj txhob cia peb poob rau hauv txoj kev ntxias.
5 Yes Xus hais rau lawv tias : “Yog nej muaj ib tug phooj ywg tuaj cuag nej thaum ib tag hmo, thiab nws hais rau nej tias : ‘Phooj ywg, koj txais peb lub ncuav mov rau kuv, 6 vim kuv ib tug npawg mus tawm rooj los so hauv kuv tsev, kuv tsis muaj dab tsi rau nws noj.’ 7 Hos tus nyob hauv tsev teb tias : ‘Txhob txob kuv, lub qhov rooj twb xauv lawm, kuv cov me nyuam peb pw tas lawm, kuv sawv tsis tau los muab dab tsi rau koj li.’ 8 Kuv hais rau nej tias, tab yog nws tsis sawv los muab vim tus ntawd yog nws phooj ywg, tsis kav nws yeej yuav sawv los muab rau tus ntawd raws li nws thov, vim nws taij tsis tseg.”
9 “Li ntawd, kuv hais rau nej : Nej thov, Ntuj yuav pub rau nej. Nej nrhiav, ces nej yuav ntsib. Nej khob qhov rooj, Ntuj yuav qhib rau nej. 10 Vim tias leej twg thov, nws yuav tau txais, leej twg nrhiav, nws yuav ntsib, hos leej twg khob qhov rooj, luag yuav qhib rau nws. 11 Nyob hauv nej, leej txiv twg, yog nws tus tub taij ib tug ntses, nws tsis muab ntses, nws puas muab ib tug nab rau ? 12 Los leej txiv twg, yog nws tus tub taij ib lub qe, nws yuav muab ib tug kab lij tshooj rau ? 13 Txawm tias nej yog neeg phem, tsis kav, nej tseem txawj pub tej yam zoo rau nej cov me nyuam. Ua li mas Leej Txiv nyob saum ntuj haj yam txawj pub Leej Ntuj Plig Ntshiab rau cov uas thov nws !”
14 Yes Xus ntiab ib tug dab phem, yog tus dab ua kom neeg tsis txawj hais lus. Thaum tus dab tawm lawd, ces tus neeg nplaig txhav hais tau lus. Tej pab neeg coob ntawd ua siab poob nthav. 15 Tab sis, nyob hauv cov neeg ntawd, ib txhia hais tias : “Nws hu txog tus vaj dab phem Npes Ntxes Npus los ntiab dab.” 16 Tseem muaj ib txhia xav sim Yes Xus, ces lawv thov kom Yes Xus ua ib lub cim tawm saum ntuj tuaj. 17 Tab sis Yes Xus paub qhov lawv xav, nws hais rau lawv tias : “Lub teb chaws twg sib tawm tsam, mas nws kawg raug kev puas tsuaj. Tej vaj tse, ib lub vau lawv ib lub qab. 18 Yog tias Xas Tas rov tawm tsam rau Xas Tas, mas nws lub ceeb tsheej yuav ua cas nyob tau ruaj ? Ua cas nej hais tias kuv hu txog Npes Ntxes Npus los ntiab dab ? 19 Yog kuv vam txog Npes Ntxes Npus los ntiab dab no, nej cov tub ho vam txog leej twg los ntiab dab ? Ua li mas, nej cov tub yuav txiav txim rau nej. 20 Hos yog tias kuv vam txog Tswv Ntuj tus ntiv tes los ntiab dab, mas Tswv Ntuj lub Ceeb Tsheej los txog nej lawm. 21 Thaum tus neeg muaj zog tuav ntaj tuav hmuv zov nws lub tuam tsev, mas nws lub cuab tam nyob nyab xeeb. 22 Tab sis, thaum twg lwm tus muaj zog dua nws tuaj ntaus yeej nws, txeeb tau nws cev ris tsho hlau uas yog nws lub chaw tso siab, ces luag muab nws tej cuab yeej cuab tam sib faib. 23 Leej twg tsis nrog kuv, nws tiv kuv. Leej twg tsis nrog kuv sau, mas nws ua txhua yam ploj.”
24 “Thaum dab tsis huv tawm hauv neeg, nws mus ua loj leeb rau hauv tej teb chaws quav poj, nrhiav ib lub chaw so, tab sis nrhiav tsis tau, ces nws hais tias : ‘Kuv yuav rov mus nyob hauv lub tsev uas kuv tso tseg.’ 25 Thaum dab tsis huv rov qab los txog, nws pom lub tsev cheb huv thiab tu du lug cia. 26 Ces tus dab ntawd mus coj xya tus dab tseem tsiv tsaim dua nws nkag los nyob hauv lub tsev ntawd. Thaum kawg, tus neeg ntawd lub neej tseem phem tshaj qhov qub.”
27 Thaum Yes Xus tseem hais tej lus ntawd, muaj ib tug poj niam nyob hauv nruab nrab tsoom sid tsa suab hais nrov rau Yes Xus tias : “Lub plab uas tau nqa koj thiab lub xub ntiag uas pub mis rau koj tau txoj hmoov zoo !” 28 Tab sis Yes Xus hais tias : “Cov uas mloog Tswv Ntuj Lo Lus thiab ua raws li Tswv Ntuj Lo Lus, mas lawv haj yam tau txoj hmoov zoo.”
29 Thaum tej pab neeg coob coob tuaj sib txiv nyob ua ke, Yes Xus pib hais lus li no : “Tiam neeg no yog ib tiam neeg phem. Lawv taij ib lub cim, tab sis lub cim lawv yuav pom kawg yog Yos Nas lub cim xwb. 30 Vim tias Neeg Leej Tub yog ib lub cim rau tiam neeg no, xws li Yos Nas yog ib lub cim rau cov neeg nyob Nis Nis Vas. 31 Hnub txiav txim, tus poj vaj nyob Naj Fab yuav nrog tiam neeg no sawv, nws yuav muab txim rau tiam neeg no, vim nws tuaj puag tim npoo ntiaj teb tuaj mloog Xas Los Moos cov lus thoob tsib. Hos nyob ntawm no, twb muaj tus loj dua Xas Los Moos ! 32 Hnub txiav txim, cov neeg nyob Nis Nis Vas yuav nrog tiam neeg no sawv rov los, lawv yuav muab txim rau tiam neeg no, vim tias thaum Yos Nas tuaj qhia lawv, mas lawv thov txhaum, hos nyob ntawm no twb muaj tus loj dua Yos Nas !
33 “Tsis muaj leej twg taws tau ib lub teeb yuav muab coj mus zais los yuav muab txawb rau hauv qab thoob. Luag muab lub teeb txawb saum tus ncej teeb kom cov neeg uas chaws los hauv tsev pom lub teeb ci. 34 Lub teeb kaj koj lub cev yog koj lub qhov muag. Thaum koj lub qhov muag zoo, tas koj lub cev pom kev nrig. Hos thaum koj lub qhov muag phem lawm, koj lub cev kuj tsaus ntuj nti. 35 Koj yuav ceev faj kom lub teeb uas ci hauv koj tsis txhob tsaus. 36 Yog tias tas koj lub cev ci kaj nrig tsis muaj ib sab tsaus li, mas tas koj lub cev yuav ci ntsa xws li thaum lub teeb ci tuaj rau koj.”
37 Thaum Yes Xus tseem tab tom hais lus, muaj ib tug Fas Lis Xais caw Yes Xus mus noj mov tim nws tsev. Yes Xus chaws mus hauv tsev, nws mus zaum ntawm rooj mov. 38 Tus Fas Lis Xas pom li ntawd, ces nws poob siab rau qhov Yes Xus tsis xub ntxuav tes tso mam noj mov. 39 Tab sis Huab Tais hais rau tus Fas Lis Xais ntawd tias : “Nej cov Fas Lis Xais, mas nej zoo li ntawd, nej ntxuav khob ntxuav phaj sab nraud kom huv, tab sis muaj kev tub sab thiab kev phem nyob puv nej sab hauv. 40 Neeg ruam ! Tus tsim sab nraud, nws tsis ua kom muaj sab hauv thiab lod ? 41 Phim nej yuav muab yam nej muaj pub rau luag, ces txhua yam yuav huv rau nej. 42 Nej tsoom Fas Lis Xais, nej txoj hmoov phem, vim nej them se ib feem kaum ntawm cov pum hub, cov zaub txhwb nyug dub, thiab ntawm txhua yam zaub. Tab sis nej tsis rau siab saib txoj kev haum pheej thiab txoj kev nyiam Tswv Ntuj ! Yuav tsum ua qhov no, tab sis txhob tso qhov tod pov tseg. 43 Nej tsoom Fas Lis Xais, nej txoj hmoov phem, vim nej nyiam zaum thawj lub rooj kim txwv hauv cov tsev txoos, thiab nyiam kom luag hawm nej tom tej tshav puam ! 44 Nej txoj hmoov phem, vim nej yog zoo li tej ntxa uas tsis muaj dab tsi qhia tias yog ntxa, ces sawv daws mus tsuj saud, tsis paub tias yog ntxa.
45 Ces ib tug Kws Lij Choj hais rau Yes Xus tias : “Xib Hwb, koj hais tej ntawd mas kuj tub qaug peb thiab.” 46 Yes Xus thiaj hais tias : “Nej, cov Kws Lij Choj, nej kuj tau txoj hmoov phem thiab, vim nej nog tej lub nra ceeb laj ris kawg rau zeej tsoom sawv daws, tab sis nej tsis xuas nej ib tug nyuag ntiv tes mus kov tej nra ntawd !
47 Nej txoj hmoov phem, vim nej txhim cov yaj saub tej ntxa, uas yog nej phaj txiv muab tua. 48 Nej yog cov tim khawv uas lees tias phaj txiv cov hauj lwm zoo : lawv yog cov tua, hos nej yog cov txhim ntxa.
49 Yog vim li ntawd Tswv Ntuj txoj kev Thoob Tsib thiaj hais tias : Kuv yuav xa ib co yaj saub thiab ib co tub xa lus mus cuag lawv, lawv yuav muab ib co tua thiab hiam lwm cov. 50 Vim li ntawd tiam neeg no yuav tsum ris lub txim them cov yaj saub tej ntshav uas tau nchuav txij thaum ntuj tsim teb raug los, 51 txij As Npes cov ntshav los txog Ntxas Kas Lias cov ntshav. Ntxas Kas Lias raug tua ntawm lub thaj txi Ntuj thiab lub Tsev Ntshiab kis nruab nrab.
Kuv hais rau nej tias : tiam neeg no yuav raug lub txim them cov nqi ntshav ntawd.
52 Nej tsoom Kws Lij Choj, nej txoj hmoov phem, vim nej rho tus yuam sij qhib kev txawj ntse, tab sis nej tsis nkag mus hauv. Hos cov xav nkag mus hauv, los nej tsis pub lawv mus.”
53 Thaum Yes Xus tawm hauv lub tsev ntawd mus lawm, cov Kws Ntawv Ntshiab thiab cov Fas Lis Xais pib ntxub Yes Xus tas siab nrho. Lawv nug Yes Xus ntau yam kawg, 54 lawv cuab ntxiab tos rawv ib lo lus ntawm nws lub ncauj.