-7-
1 Thaum Yes Xus hais nws cov lus rau tsoom sid mloog tas, nws mus hauv Kas Fas Naus. 2 Ib tug xab txheeb muaj ib tug tub txib uas nws nyiam kawg tab tom mob hnyav, yuav tuag. 3 Thaum tus xab txheeb hnov hais txog Yes Xus, nws xa ob peb tug laus neeg Yus Das tuaj thov Yes Xus kom mus cawm nws tus tub txib. 4 Thaum cov laus neeg tuaj txog ntawm Yes Xus, lawv thov Yes Xus tas zog rau tus xab txheeb tias : “Tsim nyog koj yuav ua qhov ntawd rau nws, 5 nws nyiam peb haiv neeg, thiab nws yog tus tau txhim lub tsev txoos rau peb.” 6 Yes Xus nrog lawv taug kev mus. Thaum lawv tuaj yuav txog lub tsev, ces tus xab txheeb xa ib pab phooj ywg tuaj hais rau Yes Xus tias : “Huab Tais, txhob ua nyuaj koj, vim kuv tsis tsim nyog koj chaws los hauv kuv tsev, 7 thiab kuv saib kuv tsis tsim nyog tuaj cuag koj. Tab sis koj hais ib lo lus kom kuv tus tub txib zoo hlo. 8 Vim tias, txawm kuv yog ib tug neeg zwm rau ib tug loj, kuj muaj ib co tub rog uas kuv tswj lawv, yog kuv hais rau ib tug tias ‘Mus !’ ces nws cia li mus ; hos kuv hais rau lwm tus tias : ‘Los !’, mas nws cia li los. Kuv hais rau kuv tus tub txib tias ‘Ua qhov no !’ ces nws cia li ua”. 9 Yes Xus hnov cov lus no, nws qhuas tus xab txheeb. Yes Xus tig ntsia tom qab, nws hais rau cov neeg lawv nws qab hais tias : “Kuv hais rau nej, nyob hauv tsoom His Xas Lais, kuv tsis tau pom ib lub siab ntseeg npaum li no.” 10 Thaum cov neeg uas tuaj tos Yes Xus rov mus txog tsev, lawv pom tus tub txib twb zoo neej lawm.
11 Dua li ntawd, Yes Xus mus hauv ib lub nroog hu ua Nas Ees. Yes Xus cov thwj tim thiab ib pab neeg coob nrog Yes Xus ua ke mus. 12 Thaum Yes Xus tuaj yuav txog lub qhov rooj loog nkag hauv lub nroog, luag tab tom kwv ib tug tuag tawm tuaj txog ntawd. Yog ib leeg tub twm zeej, hos leej niam yog ib tug poj ntsuam. Ib pab neeg coob hauv nroog nrog leej niam tawm tuaj. 13 Huab Tais pom tus poj ntsuam, Huab Tais khuv leej nws. Huab Tais hais rau nws tias : “Koj txhob quaj.” 14 Yes Xus txav los tuav lub hleb, cov kwv hleb nres. Ces Yes Xus hais tias : “Tus hluas, kuv hais koj : Koj sawv !” 15 Ces tus tuag sawv zaum, thiab nws pib hais lus. Yes Xus muab tus tub hluas ntawd cob rau nws niam. 16 Tas sawv daws ntshai tas nrho. Lawv cav txog Tswv Ntuj tias : “Ib tug yaj saub loj sawv los nyob hauv peb, Tswv Ntuj tuaj xyuas nws haiv neeg.” 17 Cov lus hais txog tus hluas ntawd ncha mus thoob tas xeev Yus Das thiab ib ncig lub teb chaws ntawd.
18 Zam cov thwj tim qhia txhua yam ntawd rau Zam. Ces Zam hu nws ob leeg thwj tim, 19 nws xa nkawd mus nug Huab Tais tias : “Koj puas yog tus yuav tuaj, los peb yuav tos dua lwm tus ?” 20 Thaum ob tug thwj tim tuaj txog ntawm Yes Xus, nkawd hais tias : “Zam Ntxuav Plig xa wb tuaj nug koj tias : “Koj puas yog tus yuav tuaj, los peb yuav tos dua lwm tus ?” 21 Lub sij hawm ntawd, Yes Xus nyuam qhuav kho coob leej muaj txiab nkeeg, raug mob, raug dab phem, thiab nws ua kom ntau tus dig muag rov pom kev. 22 Ces Yes Xus teb rau ob tug uas Zam xa tuaj tias : ” Neb rov mus qhia Zam txog qhov neb tau pom thiab tau hnov : Cov dig muag rov pom kev, cov tuag ceg mus taus kev, cov mob ruas rov huv, cov lag ntseg hnov lus, cov tuag sawv rov los, hos lub Moo Zoo tuaj txog cov neeg pluag. 23 Tus uas yuav tsis ntog vim kuv, mas nws txoj hmoov zoo.” 24 Thaum ob tug thwj tim Zam xa tuaj rov mus lawm, Yes Xus thiaj pib hais txog Zam rau tsoom sid tias : “Nej tawm mus saib dab tsi hauv teb chaws suab puam ? Puas yog nej mus nuam ib tsob tauj raug cua tshuab ? 25 Nej mus xyuas dab tsi ? Nej puas mus xyuas ib tug neeg hnav tsoos tsuj tsoos npuag ? Tab sis cov neeg hnav tsoos zoo nkauj thiab noj qab hnav zoo, mas lawv nyob hauv cov tuam tsev vaj ntxwv. 26 Ua li nej mus xyuas dab tsi ? Puas yog nej mus xyuas ib tug yaj saub ? Muaj tseeb. Kuv hais rau nej, nws tseem loj dua ib tug yaj saub. 27 Nws yog tus uas Ntawv sau tseg tias : Ntsia saib, kuv xa kuv tus tub tshaj xo mus ua koj ntej, nws yuav npaj txoj kev tom hauv ntej rau koj.
28 “Kuv hais rau nej tias : tas cov me nyuam uas yug ntawm tsoom poj niam los, tsis muaj ib tug loj dua Zam. Tsis kav tus me tshaj hauv Tswv Ntuj lub Ceeb Tsheej tseem loj dua Zam thiab. 29 Tas tsoom neeg uas tau hnov Zam cov lus, tab txawm lawv yog neeg sau se, lawv lees tias Tswv Ntuj yog tus ncaj, vim lawv txais kab ke ntxuav ntawm Zam. 30 Hos cov Fas Lis Xais thiab cov Kws Lij Choj muab Tswv Ntuj zaj tswv yim uas nws npaj rau lawv xyeeb pov tseg, lawv tsis kam txais Zam cov kab ke ntxuav”.
31 “Kuv yuav muab tiam neeg no piv rau leej twg ? Lawv zoo li leej twg ? 32 Lawv zoo li pab me nyuam yaus zaum tom tshav puam, lawv sib hu tias : ‘Peb twb tshuab raj rau nej, nej tsis seev cev dhia ! Peb twb cuab suab nyiav, nej tsis quaj !’
33 Zam Ntxuav Plig tuaj, nws tsis noj mov, tsis haus cawv, nej hais tias : ‘Nws raug dab !’ 34 Neeg Leej Tub tuaj, nws noj mov thiab haus cawv, nej hais tias : ‘Saib, tus neeg ntawd hu dab thiab quav cawv, nws nrog cov sau se thiab cov neeg txhaum ua phooj ywg !’ 35 Tus Thoob Tsib cov me nyuam huv tib si puav leej lees tias tus Thoob Tsib txoj kev yog kev ncaj.”
36 Muaj ib tug Fas Lis Xais caw Yes Xus mus nrog nws noj mov. Yes Xus chaws mus hauv tus Fas Lis Xais tsev, nws zaum ntawm rooj mov. 37 Muaj ib tug poj niam nyob hauv lub nroog ntawd, yog ib tug neeg txhaum, nws hnov tias Yes Xus noj mov hauv tus Fas Lis Xais ntawd tsev, ces nws nqa ib hwj tshuaj tsw qab tuaj. 38 Nws tuaj nyob ntawm Yes Xus nraub qaum, nram Yes Xus ko taw, nws quaj, nws ua kua muag poob los ywg Yes Xus ko taw, ces nws muab nws cov plaub hau los so Yes Xus ko taw, nws nwj Yes Xus ko taw tsis tseg, thiab muab tshuaj tsw qab los pleev Yes Xus ko taw.
39 Tus Fas Lis Xais uas caw Yes Xus, pom li ntawd, nws xav hauv siab tias : “Yog tias tus neeg no yog ib tug yaj saub, mas phim nws yuav paub tias tus poj niam uas kov nws yog leej twg. Tus poj niam ntawd yog ib tug neeg txhaum !” 40 Tab sis Yes Xus tsa ncauj hais rau tus Fas Lis Xais tias : “Xis Moos, kuv muaj ib lo lus xav hais rau koj.” Tus Fas Lis Xais teb tias : “Xib Hwb, koj hais mas !” 41 “Muaj ib tug neeg qiv nyiaj rau ob tug neeg. Thawj tug tshuav nuj nqis txog tsib puas lub txiaj nyiag ; lwm tus tshuav nqi txog tsib caug lub txiaj nyiag. 42 Nkawd ob leeg tsis muaj dab tsi them rov qab, tus tswv nyiaj cia li zam rau nkawd ob leeg. Ob tug neeg ntawd, tus twg yuav nyiam tus tswv nyiaj dua ?” 43 Xis Moos teb tias : “Kuv xav mas yog tus uas tus tswv nyiaj zam nuj nqis ntau dua rau.” Yes Xus hais rau Xis Moos tias : “Koj txiav raug lawm.”
44 Yes Xus tig mus ntsia tus poj niam, nws hais rau Xis Moos tias : “Koj puas pom tus poj niam no ? Kuv los hauv koj tsev, koj tsis tau hliv dej los yaug kuv ko taw. Hos, tus poj niam no, nws muab kua muag los ywg kuv ko taw, thiab nws muab plaub hau los so kuv ko taw. 45 Koj tsis nwj kuv, hos tus poj niam no, txij thaum nws chaws los hauv no, mas nws nwj kuv ko taw tsis tseg. 46 Koj tsis tau hliv roj saum kuv taub hau, hos tus poj niam no hliv tshuaj tsw qab ywg kuv ko taw. 47 Yog vim qhov ntawd, mas kuv hais rau koj : tus poj niam no muaj txhaum, nws tau ua txhaum ntau, tab sis Ntuj daws tas lawm, vim nws nyiam kawg. Tus uas luag zam rau nws tsawg, mas nws nyiam tsawg.” 48 Ces Yes Xus hais rau tus poj niam tias : “Koj cov txhaum daws tas lawm.”
49 Cov neeg nrog Yes Xus koom rooj mov, nyias xav nyias tias : “Tus ntawd yog leej twg, ua cas nws yuav daws txhaum tau ?” 50 Yes Xus hais rau tus poj niam tias : “Koj lub siab ntseeg cawm koj lawm. Koj rov mus nyob kaj siab lug mog.”