-19-
1 Yes Xus mus hauv Yes Lis Kos, nws hla lub tsheej. 2 Muaj ib tug neeg lub npe hu ua Ntxas Kais, nws yog ib tug nom hauv cov sau se, nws nplua nuj. 3 Nws nrhiav kom tau kev pom saib Yes Xus yog leej twg, tab sis nws tsis tau kev, vim neeg coob dhau, thiab nws yog neeg qig taub. 4 Ces nws khiav mus ua ntej, nws nce saum tsob txiv cev kom tau pom Yes Xus, vim Yes Xus yuav hla ntawd mus. 5 Thaum Yes Xus los txog ntawm qhov chaw ntawd, nws tsa muag ntsia, nws hais tias : “Ntxas Kais, koj nqes los sai, vim hnub no kuv yuav tsum mus hauv koj tsev.”
6 Ntxas Kais nqes nrawm nroos los, nws zoo siab txais Yes Xus. 7 Sawv daws pom li ntawd, lawv yws yws hais tias : “Nws mus so hauv ib tug neeg txhaum lub tsev !”
8 Hos Ntxas Kais sawv ntsug, nws hais rau Huab Tais tias : “Huab Tais, saib, kuv yuav muab kuv tej cuab yeej cuab tam ib nrab pub rau cov pluag. Yog kuv tau ua tsis ncaj rau leej twg, mas kuv yuav muab plaub npaug pauj rau nws.”
9 Yes Xus hais rau Ntxas Kais tias : “Hnub no, txoj kev cawm los txog hauv lub tsev no, vim tus no kuj yog Has Nplas Has ib leeg tub thiab. 10 Vim tias Neeg Leej Tub tuaj nrhiav thiab tuaj cawm yam uas ploj lawm.”
11 Thaum lawv mloog tej lus ntawd, Yes Xus tseem hais dua ib zag paj lug, yog vim nws nyob ze Yes Lus Xas Les, ces sawv daws xav hais tias Tswv Ntuj lub Ceeb Tsheej yuav tawm los tam sis ntawd. 12 Yes Xus thiaj hais tias : “Muaj ib tug neeg yog caj ces vaj ntxwv, nws mus txais hwj chim vaj ntxwv nyob ib lub teb chaws deb, nws yuav rov qab los. 13 Nws hu nws kaum leej tub txib tuaj, nws muab kaum choj nyiag rau lawv, nws hais lawv tias : “Nej coj mus ua lag ua luam mus txog hnub kuv rov los.”
14 Tab sis cov pej xeem ntxub nws, lawv xa ib pab tiam lis lawv qab mus hais tias : “Peb tsis xav kom tus no ua vaj kav peb.”
15 Thaum nws txais hwj chim ua vaj tas, nws rov los, nws hu cov tub txib uas nws tau muab nyiaj rau ceev tuaj, kom paub saib nyias tau ua nyias lag luam li cas. 16 Thawj tug tuaj txog, nws hais tias : “Huab Tais, koj choj nyiaj ntxeev tau kaum choj paj.”
Tus vaj hais rau nws tias : 17 “Zoo kawg, tub txib zoo. Koj tau ua kom pom koj lub siab pheej xeeb hauv tej yam me me, ua li mas koj txais hwj chim kav kaum lub nroog.”
18 Tus ob tuaj txog, nws hais tias : “Huab Tais, koj choj nyiaj ntxeev tau tsib choj paj.”
19 Tus vaj hais rau tus ntawd tias : “Koj ua nom tswj tsib lub nroog.”
20 Hos muaj ib tug tuaj txog, nws hais tias : “Huab Tais, qho no yog koj choj nyiaj, kuv muab qhwv rau hauv ib daim ntaub. 21 Kuv ntshai koj, vim koj yog ib tug neeg coj nruj, koj khaws xyeem yuav tej yam uas koj tsis tau muab tshwj tseg, koj sau tej yam uas koj tsis tau tseb.”
22 Tus vaj hais rau nws tias : “Tub txib phem dab tsi, kuv txiav txim rau koj raws nraim li koj lub ncauj tau hais. Koj paub tias kuv yog ib tug neeg coj nruj, kuv khaws xyeem yuav tej yam uas kuv tsis tau muab tshwj tseg, kuv sau tej yam uas kuv tsis tau tseb. 23 Vim li cas koj tsis coj kuv choj nyiaj mus tso hauv cov tsev ceev nyiaj ? Thaum kuv rov los, kuv yuav rho kuv choj nyiaj nrog ib qho paj.”
24 Ces tus vaj hais rau cov neeg nyob ntawd tias : “Nej rho nws choj nyiaj, nej muab rau tus uas muaj kaum choj.”
Ces lawv hais rau tus vaj tias : 25 “Huab Tais, nws muaj kaum choj lawm.”
26 “Kuv hais rau nej tias tus uas muaj lawm, luag yuav pub ntxiv rau ; hos tus uas tsis muaj, mas luag tseem yuav muab qhov uas nws muaj tshem mus thiab. 27 Hos kuv cov yeeb ncuab, uas tsis kam kuv ua vaj saib lawv, nej coj lawv los ntawm no, nej muab lawv txiav caj dab tas huv si rau ntawm kuv xub ntiag.”
28 Thaum Yes Xus hais cov lus ntawd tas, nws mus pem Yes Lus Xas Les. Nws mus kev ua ntej. 29 Thaum nws tuaj yuav txog Npes Fas Zes thiab Npes Tas Nias, ze lub roob uas hu ua Roob Txiv Ntoo Roj, nws xa ob tug thwj tim mus, nws hais tias : 30 “Neb mus hauv lub zos uas nyob tom hauv ntej tod. Thaum neb chaws mus hauv zos, neb yuav pom ib tug me nyuam luj uas luag muab khi cia, tsis tau muaj neeg caij ib zaug li. Neb daws hlua, neb cab los. 31 Yog muaj neeg nug neb tias : ‘Vim li cas neb daws tus me nyuam luj hlua ?’ Neb yuav hais li no : ‘Yog vim Huab Tais yuav siv.”
32 Ob tub thwj tim mus, nkawd pom raws nraim li Yes Xus tau hais rau nkawd. 33 Thaum nkawd tab tom daws tus me nyuam luj txoj hlua, cov tswv luj hais rau nkawd tias : “Neb daws tus me nyuam luj ua dab tsi ?”
34 Nkawd hais tias : “Yog vim Huab Tais yuav siv.”
35 Ces nkawd cab los rau Yes Xus. Nkawd muab nkawd cov tsho ntev pov mus pua me nyuam luj nraub qaum, nkawd kom Yes Xus caij. 36 Thaum Yes Xus caij tus me nyuam luj mus, mas tsoom neeg muab lawv cov tsho ntev pua txoj kev. 37 Thaum Yes Xus yuav nqes phab toj saum Roob Txiv Ntoo Roj, ces ib tsoom thwj tim coob coob, zoo siab, lawv pib cav txog Tswv Ntuj nrov nrov rau tej hwj huam yees ntxwv uas lawv tau pom tas huv tib si. 38 Lawv hais tias : Tus Vaj uas Huab Tais xa tuaj nto koob meej. Nyob saum ntuj muaj kev thaj yeeb. Nyob saum cov txheej ntuj siab, yog lub koob meej.”
39 Nyob hauv cov neeg ntawd, muaj ib co Fas Lis Xais hais rau Yes Xus tias : “Xib Hwb, koj qhuab ntuas koj cov thwj tim mas !”
40 Yes Xus teb rau lawv tias : “Kuv hais rau nej : Yog lawv cov no tswm seeb, mas cov pob zeb yuav qw.”
41 Thaum Yes Xus tuaj yuav txog, nws pom lub nroog, nws quaj rau lub nroog, 42 nws hais tias : “Hnub no, koj kheev lam paub txog tej yam uas yuav ua kom muaj kev thaj yeeb mas ! Tab sis, tej ntawd nyob zais ntshis rau koj qhov muag. 43 Vim tias, yuav muaj tej hnub uas, koj cov yeeb ncuab yuav khawb qhov vij koj, lawv yuav puav koj, lawv yuav nias qees qhov txhia chaw tuaj. 44 Lawv yuav tsuj koj rau hauv av, yuav tsuj koj thiab koj cov me nyuam uas nyob hauv koj. Lawv yuav tsis tseg ob lub pob zeb uas txhim sib tshooj nyob, yog vim koj tsis kam txais lub caij uas Ntuj tuaj xyuas koj.”
45 Yes Xus chaws mus hauv lub Tuam Tsev Teev Ntuj, nws ntiab cov neeg muag toob xib, nws hais rau lawv tias : 46 “Ntawv sau hais tias : Kuv lub tsev yog tsev teev Ntuj, tab sis nej muab ua ib lub qhov tsua rau tub sab nkaum.”
47 Yes Xus niaj hnub qhia nyob hauv lub Tuam Tsev Teev Ntuj. Cov Thawj Leej Choj, cov Kws Ntawv Ntshiab, thiab pej xeem cov thawj coj nrhiav ib txog kev muab nws tua. 48 Tab sis lawv nrhiav tsis tau tias lawv yuav ua dab tsi, vim tsoom pej xeem mloog nws thiab dai dhuam rau nws lub ncauj.