-3-
1 Lub zwj ceeb ntawd, Tis Npes Xes Ntxas ua vaj ntxwv tau kaum tsib xyoos, Poos Xyus Pis Las Tos ua tswj kav Yus Das, Hes Los ua vaj txheeb kav Nkas Lis Lais, Hes Los tus tij laug Fis Lis Pos ua vaj txheeb kav Is Tus Lias thiab Thas Kos Nis Tis. Lis Xas Nias ua vaj txheeb kav As Npis Les Nas. 2 As Nas thiab Kais Fas nkawd ua Tuam Leej Choj. Thaum ntawd, Tswv Ntuj Lo Lus nrov tuaj txog Zam nyob hauv teb chaws suab puam. Zam yog Ntxas Kas Lias tus tub. 3 Ces Zam tuaj mus ncig thoob thaj tsam ntawm dej Yos Las Das, nws tshaj ib co kab ke ntxuav pab lees txhaum kom Ntuj zam txhaum, 4 raws li cov lus sau tseg rau hauv Yaj Saub His Xais phau ntawv tias : Tus qw hauv teb chaws quav poj lub suab hais tias : Nej npaj kev rau Huab Tais, nej ua kom nws txoj lw ncaj tuaj. 5 Yuav txhub av rau txhua lub kwj ha, yuav ncaws txhua lub roob txhua lub pov toj kom qis, yuav tho tej kev cuam kawb kom ncaj, tej kev qawj, yuav hloov ua kev tiaj. 6 Ces tas ib tsoom uas muaj lub cev nqaij yuav pom Tswv Ntuj txoj kev cawm.
7 Zam hais rau tsoom neeg uas tuaj txais kab ke ntxuav ntawm nws tias : “Caj ces nab liab tsaig, leej twg qhia nej kom nej khiav dim ntawm txoj kev Npau Taws uas tuaj yuav txog ? 8 Nej cia li txi ib co txiv phim tus neeg lees txhaum. Nej txhob xav hauv nruab siab tias : “Peb muaj Has Nplas Has ua peb txiv.” Kuv hais rau nej tias, Tswv Ntuj xav ua kom Has Nplas Has ib co tub ki tawm hauv cov pob zeb no los kuj tau. 9 Zaum no rab taus twb nyob ntawm cag ntoo lawm, tsob ntoo twg tsis txi txiv zoo nkauj, yuav muab ntov, muab pov rau hauv hluav taws.
10 Ces tsoom neeg nug Zam tias : “Peb yuav ua dab tsi ?” 11 Zam teb rau lawv tias : “Tus muaj ob lub tsho, yuav faib rau tus tsis muaj. Tus muaj mov noj, nws kuj yuav ua li ntawd thiab.” 12 Ib co sau se kuj tuaj txais kab ke ntxuav, lawv hais rau Zam tias : “Xib Hwb, peb yuav ua dab tsi ?” 13 Zam hais rau lawv tias : “Nej tsis txhob kom luag them tshaj txoj cai txiav.” 14 Ib co tub rog kuj nug Zam tias : “Peb ne, peb yuav ua dab tsi ?” Zam hais rau lawv tias : “Nej txhob quab yuam leej twg, txhob ntxias yuav dab tsi. Nej nyiaj hli raug npaum li cas, mas nej yuav txaus siab txais li ntawd.”
15 Tsoom pej xeem vam vam tos ntsoov, sawv daws ua xyem xyav txog Zam rau nruab siab tias tej zaum Zam yog Leej Pleev. 16 Ces Zam hais rau sawv daws tias : “Ntawm kuv, mas kuv muab dej los ntxuav nej, tab sis tus muaj zog dua kuv yuav tuaj. Kuv tsis tsim nyog daws txoj hlua khi nws nkawm khau. Tus ntawd yuav ntxuav nej nyob hauv Leej Ntuj Plig Ntshiab thiab hauv hluav taws. 17 Nws txhais tes tuav lub vab, nws yuav ntxuaj nws lub tshav ntaus nplej. Nws yuav yawm nplej rau hauv nws lub txhab. Hos cov npluag, nws yuav muab hlawv hauv lub cub tawg tsis txawj kug.” 18 Zam tseem hais ntau zaj qhuab qhia ntxiv los tshaj lub Moo Zoo rau tsoom pej xeem.
19 Zam qhuab ntuas vaj txheeb Hes Los, tim Hes Los Dias uas yog Hes Los tij laug tus poj niam, thiab tim lwm cov kev phem ntau uas Hes Los tau ua. 20 Ces Hes Los ua ib qho txhaum ntxiv txhab rau tej kev phem uas nws tau ua los lawm : nws kom luag muab Zam kaw hauv tsev loj faj.
21 Thaum uas tsoom pej xeem txais kab ke ntxuav tas, thiab Yes Xus kuj txais kab ke ntxuav tas lawm, ces Yes Xus teev Ntuj. Lub ntuj qhib plho los, 22 ces Leej Ntuj Plig Ntshiab yees ua ib lub cev, xws li ib tug nquab, nqes los saum Yes Xus. Ib lub suab nrov saum ntuj tuaj tias : “Koj yog kuv Leej Tub. Hnub no kuv xeeb koj.”
23 Thaum Yes Xus pib tshaj lus, nws muaj hnub nyoog ze peb caug xyoo. Sawv daws xav tias nws yog Yos Xes tub, Hes Lis tub, 24 Mas Thas tub, Les Vis tub, Mes Kis tub, Zas Nais tub, Yos Xes tub, 25 Mas Tas Thias tub, As Mos tub, Nas Us tub, Es Lis tub, Nas Nkais tub, 26 Mas As tub, Mas Tas Thias tub, Xes Mes Ees tub, Zos Xes tub, Zos Das tub, 27 Yuas Nas tub, Les Xas tub, Ntxos Los Npas Npes tub, Xas Las Thias tub, Nes Lis tub, 28 Mes Kis tub, As Dis tub, Kos Xas tub, Ees Mas Das tub, Ej tub, 29 Zes Xus tub, Es Lis Yes Xes tub, Yos Lis tub, Mas Thas tub, Les Vis tub, 30 Xis Mes Oos tub, Yus Das tub, Yos Xes tub, Zos Nas tub, Es Lias Kis tub, 31 Mes Les As tub, Mes Nas tub, Mas Tas Thas tub, Nas Thas tub, Das Vis tub, 32 Yes Xes tub, Yos Npes tub, Npuag Oos tub, Xas Las tub, Nas As Xoos tub, 33 As Mis Nas Das tub, As Das Mis tub, As Nis tub, Hes Xaws Loos tub, Fas Les tub, Yus Das tub, 34 Yas Kos tub, His Xas Has tub, Has Nplas Has tub, Thas Las tub, Nas Khos tub, 35 Xes Lus tub, Las Nkaus tub, Fas Les tub, Es Npes tub, Xas Las tub, 36 Kais Naas tub, As Fas Xas tub, Xees tub, Nos Hes tub, Las Mes tub, 37 Mas Thus Xas Las tub, Hes Nos tub, Yes Les tub, Mas Les Lees tub, Kais Naas tub, 38 Es Naus tub, Xes tub, As Das tub, Tswv Ntuj tub.