-20-
1 Muaj ib hnub Yes Xus qhia tsoom pej xeem nyob hauv lub Tuam Tsev Teev Ntuj thiab nws tshaj lub Moo Zoo. Cov Thawj Leej Choj thiab cov Kws Ntawv Ntshiab nrog cov txwj laus tuaj tsham, 2 lawv hais rau nws tias : “Koj qhia peb saib koj tau cai qhov twg los ua tej ntawd ? Thiab tus tso cai rau koj yog leej twg ?”
3 Yes Xus teb rau lawv tias : “Kuv kuj yuav nug nej ib lo thiab. Nej qhia kuv saib : 4 Zam cov kab ke ntxuav tuaj ntawm Ntuj tuaj los tuaj ntawm neeg tuaj ?”
5 Lawv sib tuav xam li no : ‘Yog peb hais tias tuaj ntawm Ntuj tuaj,’ nws yuav hais tias : ‘Vim li cas nej tsis ntseeg txog nws ?’ 6 Yog peb hais tias : ‘tuaj ntawm neeg tuaj,’ mas tas tsoom pej xeem yuav xuas pob zeb txawb peb, vim lawv yeej ntseeg ruaj nreb tias Zam yog ib tug yaj saub.”
7 Ces lawv teb tias lawv tsis paub Zam cov kab ke ntxuav tuaj qhov twg tuaj. 8 Yes Xus thiaj hais rau lawv tias : “Kuv kuj yuav tsis qhia nej tias kuv tau cai qhov twg los kuv thiaj ua tej ntawd.”
9 Yes Xus pib hais zaj paj lug no rau tsoom pej xeem : “Muaj ib tug neeg cog tau ib thaj txiv cawv. Nws muab ntiav rau ib co neeg tu. Ces nws tawm rooj mus ntev loo rau ib txog kev deb.
10 Thaum txog caij de txiv, nws xa ib tug tub txib mus cuag cov neeg zov teb kom lawv faib ib co txiv rau tus tub txib. Cov zov teb muab tus tub txib ntaus, thiab kom nws rov qab mus tes qhuav nquas.
11 Tus tswv teb tseem xa dua ib tug tub txib mus. Cov zov teb kuj muab nws ntaus thiab, ua tub qaug nws, tas ces lawv kom nws rov mus tes qhuav nquas.
12 Tus tswv tseem xa dua ib tug ntxiv, yog tus peb. Cov zov teb kuj muab tus ntawd ntaus sab kawg, lawv muab nws pov rau sab ntug teb nraud.
13 Tus tswv teb thiaj hais tias : “Kuv yuav ua li cas ? Kuv yuav xa kuv tus tub mus, nws yog tus kuv nyiam tshaj. Tej zaum lawv yuav hwm nws.”
14 Tab sis cov zov teb pom tus tub, lawv sib tham zoo li no : ‘Tus no yog tus yuav txais lub cuab tam. Peb muab nws tua, lub cuab tam thiaj yuav yog peb tug.’ 15 Ces cov zov teb muab tus tub pov rau sab ntug teb nraud, lawv muab nws tua.
“Tus tswv teb yuav ua dab tsi rau lawv ? 16 Nws yuav tuaj muab cov zov teb txiv cawv tua. Ces nws yuav muab thaj txiv cawv rau lwm cov saib.”
Lawv hnov li ntawd, lawv hais tias : “Kom txhob muaj li ntawd ib zaug !”
17 Tab sis Yes Xus ntsia ntsoov lawv, nws hais tias : “Lo lus uas Ntawv sau tseg no xav hais dab tsi ?”
Lub pob zeb uas cov tub txhim tsev muab pov tseg txia ua lub pob zeb txheem ncov ruv tsev ? 18 Leej twg ntog saum lub pob zeb no yuav tawg ntsoog tas. Hos lub pob zeb no poob los raug leej twg, mas tus ntawd yuav raug lub pob zeb tsuam lwj tas.
19 Cov Kws Ntawv Ntshiab thiab cov Thawj Leej Choj nrhiav saib yuav ua cas thiaj tsa tes ntes tau Yes Xus lub sij hawm ntawd kiag, vim lawv to taub tias Yes Xus ua paj lug hais txog lawv. Tab sis lawv ho ntshai tsoom pej xeem.
20 Lawv nyas ntshis Yes Xus. Lawv xa ib co neeg tshuaj xwm tuaj ua txuj ua li neeg ncaj. Lawv tuaj sim Yes Xus saib nws puas hais tej lo lus yuam kev, lawv thiaj li tau kev ntes nws mus cob rau tus nom tswj teb chaws uas muaj cai thiab muaj hwj huam. 21 Lawv nug Yes Xus hais tias : “Xib Hwb, peb paub tias koj hais raug thiab koj qhia ncaj, koj tsis ntsia neeg sab nraud. Koj qhia Tswv Ntuj txoj kev raws nraim qhov tseeb. 22 Ua li mas Txoj Cai puas kheev peb them se rau Xes Ntxas los tsis kheev ?”
23 Tab sis Yes Xus twb pom tias lawv zais lawv lub siab nkhaus, ces nws hais rau lawv tias : 24 “Nej muab ib lub txiaj nyiag rau kuv saib. Leej twg tus duab thiab leej twg cov npe ntawv nyob hauv no ?”
Lawv hais tias : “Yog Xes Ntxas.”
25 Yes Xus hais rau lawv tias : “Ua li mas, yam twg yog Xes Ntxas tug, nej muab rov rau Xes Ntxas. Yam twg yog Tswv Ntuj tug, nej muab rov rau Tswv Ntuj.”
26 Ces lawv lem tsis tau Yes Xus kom hais ib lo lus yuam kev nyob ntawm tsoom pej xeem xub ntiag. Lawv yoob tas rau Yes Xus cov lus teb, ces lawv ua twj ywm.
27 Muaj ob peb tug Xas Dus Kais txav los, lawv yog cov uas hais tias neeg tuag tsis muaj kev sawv rov los. 28 Lawv nug Yes Xus tias : “Mais Xes sau cia rau peb tias : Yog leej twg tus kwv tij tuag lawm, tseg poj niam cia tsis tau muaj me nyuam li, mas tus kwv yuav tsum qaws tus poj ntsuam kom tsa tau tus kwv tij uas tuag lawd lub keeb sawv. 29 Muaj xya leej kwv tij. Thawj tug yuav poj niam, nws tuag tsis tau muaj tub ki. 30 Tus ob kuj tuag ib yam li ntawd. 31 Tus peb qaws tus poj niam. Tas lawv xya leej puav leej tuag tsis muaj tub ki li. 32 Thaum kawg, tus poj niam kuj tuag lawm thiab. 33 Ua li mas lub zim txwv neeg tuag yuav sawv rov los, tus poj niam ntawd yuav yog tus twg poj niam ? Vim lawv xya leej tau yuav nws ua poj niam.”
34 Yes Xus thiaj hais rau lawv tias : “Cov tub ki hauv lub qab ntuj no sib qaws ua txij ua nkawm. 35 Tab sis cov uas Ntuj txiav tias lawv tsim nyog txais ib feem nyob fab lwm tiam, thiab tsim nyog sawv hauv cov tuag rov los, mas lawv tsis yuav poj niam thiab tsis yuav txiv. 36 Rau qhov lawv yuav tsis txawj tuag ntxiv. Lawv nrog cov Tshiab sib txig. Lawv yog Tswv Ntuj cov tub, vim lawv yog kev sawv rov los cov tub.
37 Hais txog cov tuag sawv rov los, Mais Xes twb qhia txog qhov ntawd nyob hauv zaj hais txog Tsob Pos, thaum nws hu Huab Tais ua Has Nplas Has tus Tswv Ntuj, His Xas Has tus Tswv Ntuj, Yas Kos tus Tswv Ntuj. 38 Ua li mas Tswv Ntuj tsis yog cov tuag tus Tswv Ntuj, yog cov neeg ciaj tus Tswv Ntuj. Tas sawv daws muaj txoj sia kom tau hwm Tswv Ntuj.”
39 Ob peb tug Kws Ntawv Ntshiab qhib ncauj hais tias : “Xib Hwb, koj hais zoo kawg.”
40 Ces lawv tsis muaj cuab kav rov nug Yes Xus ib lo lus ntxiv.
41 Yes Xus hais rau lawv tias : “Ua li cas luag hais tias Leej Pleev yog Das Vis Tub ? 42 Vim Das Vis tau hais nyob hauv phau Ntawv Nkauj Paj Nruag tias :Huab Tais hais rau kuv tus Huab Tais tias : Koj zaum ntawm kuv sab xis 43 mus txog thaum kuv muab koj cov yeeb ncuab los ua rooj rau koj tiag taw.
44 Yog Das Vis hu Leej Pleev ua Huab Tais, vim li cas Leej Pleev thiaj yog Das Vis tub thiab ?
45 Lub caij uas tsoom pej xeem tseem mloog Yes Xus, mas nws hais rau cov thwj tim tias : 46 “Nej ceev faj rau cov Kws Ntawv Ntshiab. Lawv nyiam hnav tej lub tsho ntev piav yeev mus los. Lawv nyiam kom luag hawm lawv nyob tom tej tshav puam. Lawv nyiam zaum thawj cov rooj hauv cov tsev txoos. Thaum noj tej rooj qav, lawv nyiam zaum thawj cov rooj. 47 Tab sis, lawv yog cov uas dhuas cov poj ntsuam lub cuab tam, tsis kav, lawv ua txuj hais tej zaj teev Ntuj ntev ntev. Cov neeg ntawd yuav raug txim hnyav dua luag tej.”