-8-
1 Yes Xus taug kev hla nroog thiab hla zos. Nws qhia thiab tshaj lub Moo Zoo txog Tswv Ntuj lub Ceeb Tsheej. Pab Kaum Ob leeg nrog Yes Xus mus.
2 Tseem muaj ib co poj niam uas Yes Xus tau kho lawv dim ntawm dab phem thiab dim ntawm lawv tus mob. Cov ntawd muaj Mab Liab uas luag hu ua Mas Ntas Las, yog tus uas Yes Xus ntiab xya tus dab phem tawm hauv nws. 3 Muaj Zag, uas yog Sus Ntxas poj niam ; Sus Ntxas yog Hes Los tus tim xyoob. Muaj Xus Xas Nas thiab coob leej ntxiv. Lawv muab lawv lub cuab tam los tsob hwb Yes Xus thiab cov thwj tim.
4 Thaum ntawd muaj tej pab neeg coob tuaj sis sau ua ke, thiab muaj neeg tuaj txhua lub nroog tuaj cuag Yes Xus. Ces Yes Xus ua paj lug hais li no : 5 “Tus tseb nplej tawm mus tseb nws cov noob qoob. Thaum nws tseb, muaj ib co noob poob rau ntawm ntug kev. Luag tsuj cov noob ntawd, thiab noog ya saum ntuj los noj tas huv si lawm. 6 Muaj ib co noob poob rau saum pob zeb, cov yub nplej hlob, tab sis cov yub cia li qhuav, vim av tsis noo. 7 Muaj ib co noob poob rau hauv cov pos, cov yub nplej nrog pos hlob ua ke, tab sis pos laum nplej tuag tas. 8 Muaj ib co noob poob rau hauv thaj av zoo, cov yub nplej hlob, cov nplej txi txiv txog pua lub.” Yes Xus hais cov lus no tas, nws hais nrov nrov tias : “Leej twg muaj pob ntseg mloog, cia nws mloog !”
9 Yes Xus cov thwj tim nug nws saib zaj paj lug no lub ntsiab yog dab tsi. 10 Yes Xus hais tias : “Ntuj pub kom nej paub tej txuj ci tob tob hauv Tswv Ntuj lub Ceeb Tsheej, tab sis rau luag tej, mas tsuas yog lus ua paj lug kom xwv lawv ntsia, los lawv tsis pom, lawv hnov, los lawv tsis to taub.”
11 Zaj paj lug ntawd lub ntsiab txhais li no : Cov noob, yog Tswv Ntuj Lo Lus. 12 Cov noob uas poob ntawm ntug kev, yog cov uas tau hnov, tab sis dab phem tuaj rho Lo Lus tawm hauv lawv lub siab mus, kom lawv txhob ntseeg, thiab txhob tau txais kev cawm. 13 Cov uas poob rau saum pob zeb, yog cov neeg uas thaum lawv hnov Lo Lus, lawv zoo siab hlo txais. Tab sis lawv tsis muaj cag, lawv tsuas ntseeg ib ntus xwb, lub caij sim lawv siab, lawv cia li tso tseg. 14 Cov noob uas poob rau hauv hav pos, yog cov neeg uas tau hnov Lo Lus, tab sis thaum lawv taug lawv txoj kev, lub neej tej kev txhawj, tej nyiaj txiag, tej kev ntxias neeg lub siab lub cev laum Lo Lus, ces Lo Lus hlob tsis taus. 15 Hos cov noob poob hauv thaj av zoo, yog cov uas tau hnov Lo Lus, lawv khaws Lo Lus rau hauv ib lub siab loj siab dav, ces lawv txi txiv vim lawv lub siab ruaj.
16 “Tsis muaj leej twg taws tau ib lub teeb, yuav muab ib lub thoob los khwb, los yuav muab txawb rau hauv qab txag. Luag tsuas muab txawb saum tus ncej teeb, kom xwv cov neeg los hauv tsev pom kev. 17 Vim tias tsis muaj ib yam zais ntshis uas yuav tsis tshwm los, tsis muaj ib yam npog uas yuav tsis qhib los rau sawv daws paub thiab pom tseeb. 18 Nej ceev faj saib, thaum nej mloog, nej ua li cas. Vim tias tus uas twb muaj lawm, Ntuj yuav pub ntxiv rau nws. Hos tus tsis muaj, tab yog qhov nws xav tias nws muaj, mas Ntuj yuav rho ntawm nws mus.”
19 Yes Xus niam thiab nws cov kwv tij tuaj, tab sis lawv tuaj cuag nws tsis tau vim muaj neeg coob. 20 Muaj neeg mus qhia Yes Xus tias : “Koj niam thiab koj cov kwv tij tuaj sawv nraud, lawv xav pom koj.” 21 Tab sis Yes Xus teb rau lawv tias : “Kuv niam thiab kuv cov kwv tij yog cov uas mloog Tswv Ntuj Lo Lus thiab lawv ua raws li Tswv Ntuj Lo Lus.
22 Muaj ib hnub, Yes Xus nce hauv ib lub nkoj, nws cov thwj tim kuj nce mus hauv thiab, nws hais rau lawv tias : “Peb hla mus rau sab ntug dej tim ub.”
Ces lawv caij nkoj mus hauv plawv dej ntuj. 23 Thaum cov thwj tim nquam nkoj, mas Yes Xus tsaug zog lawm. Muaj ib nthwv cua hlob kawg tuaj ntsawj lub pas dej, ces dej nyab lub nkoj, lawv yuav raug xwv txheej. 24 Lawv los cuag Yes Xus, lawv tsa nws tias : “Xib Hwb, Xib Hwb, peb yuav tuag !” Yes Xus tsim los, nws cem cua thiab cem cov dej nphau. Ces cua thiab dej rov nyob tus yees, huab cua ntsiag to. 25 Yes Xus hais rau lawv tias : “Nej lub siab ntseeg dua qhov twg lawm ?” Lawv ntshai kawg, lawv yoob tas, lawv rov sib tham tias : “Tus ntawd yog leej twg ? Txawm yog cua thiab dej, los nws muaj peev xwm txib kom mloog nws lus ?”
26 Lawv caij nkoj tuaj txog cov Zes Las Xas teb chaws, uas nyob ncaj ntawm Nkas Lis Lais. 27 Thaum Yes Xus nqes nkoj rau tim ntug nqhuab, muaj ib tug neeg raug dab nyob hauv lub nroog ntawd tuaj cuag Yes Xus. Tus neeg ntawd yeej tsis hnav ris tsho tau ib ntus ntev loo los lawm. Nws yeej tsis nyob hauv ib lub tsev li, nws nyob hauv cov ntxa xwb.
28 Nws pom Yes Xus, nws qw qw, nws pe ntawm Yes Xus ko taw, ces nws tsa suab nrov nrov hais tias : “Yes Xus, tus Tswv Ntuj Nyob Siab Tshaj Leej Tub, koj xav ua dab tsi rau kuv ? Kuv thov koj, koj txhob tsim txom kuv.” 29 Vim tias Yes Xus quab kom dab tsis huv tawm hauv tus neeg ntawd mus. Vim tus dab tsis huv ntawd twb nkag ntau zaus rau hauv tus neeg ntawd lawm. Luag muab saw hlau muab cuab los khi nws kom nws nyob twj ywm, tsis kav nws ua hlua tu tas, ces dab phem mooj nws mus rau tej chaw uas tsis muaj neeg nyob. 30 Yes Xus nug nws tias : “Koj lub npe hu li cas ? Tus neeg raug dab teb tias : “Npoj”, vim tias ntau ntau tus dab phem tau nkag mus nyob hauv nws. 31 Cov dab phem thov Yes Xus kom txhob yuam lawv mus rau hauv qhov ntuj.
32 Thaum ntawd, muaj ib pab npua coob tab tom noj zaub saum roob. Cov dab phem ntawd thov kom Yes Xus kheev lawv nkag mus hauv cov npua. Ces Yes Xus tso lus rau pab dab. 33 Pab dab phem ntawd tawm hauv tus neeg, lawv nkag mus nyob hauv pab npua, ces tas pab npua ntawd dhia puag saum tsag siab rau hauv pas dej, pab npua poob dej tuag tas.
34 Cov zov npua pom qhov ntawd, lawv khiav mus qhia tej xwm ntawd rau lub nroog thiab cov zej zos. 35 Ces neeg tawm hauv nroog tuaj xyuas qhov uas tau tshwm sim tuaj. Lawv tuaj txog ntawm Yes Xus, lawv pom tus neeg uas dab tawm hauv nws mus lawd, zaum ntawm Yes Xus ko taw, hnav ris tsho, thiab hais lus meej pem lawm. Cov neeg ntawd ntshai kawg. 36 Cov uas tau pom ntawm qhov muag piav tias Yes Xus cawm tus neeg raug dab zoo li cas. 37 Tas ib tsoom neeg nyob tsis deb tsis ze Zes Las Xas teb thov Yes Xus kom mus deb ntawm lawv, vim lawv ntshai loj kawg. Ces Yes Xus nce nkoj rov qab mus.
38 Tus neeg uas dab phem tawm hauv nws lawd, thov kom tau nrog Yes Xus mus, tab sis Yes Xus kom nws rov mus tsev, Yes Xus hais tias : 39 “Koj rov mus tsev, koj mus piav tas ib puas tsav yam uas Tswv Ntuj tau ua rau koj.” Ces nws thiaj rov qab mus tsev, nws tshaj rau tas lub nroog paub txog tej uas Yes Xus tau ua rau nws tas huv si .
40 Yes Xus rov qab los, tas tsoom sid txais nws, vim tas sawv daws yeej tos ntsoov nws. 41 Ib ziag ntawd, muaj ib tug neeg tuaj txog, nws lub npe hu ua Yais Los. Nws yog tus thawj tswj lub tsev txoos. Nws txhos caug ntua ntawm Yes Xus taw, thov kom Yes Xus mus tim nws tsev, 42 vim nws muaj ib tug ntxhais twm zeej xwb, kwv yees muaj kaum ob xyoos, tus ntxhais mob yuav tuag. Thaum Yes Xus yuav mus tim Yais Los tsev, tsoom sid txiv nws heev.
43 Thaum ntawd, muaj ib tug poj niam mob tsob ntshav tau kaum ob xyoos. Yeej tsis muaj leej twg kho tau nws li. 44 Tus poj niam ntawd txav los ntawm Yes Xus nraub qaum, nws kov Yes Xus tw tsho, nws tus mob tsob ntshav tu nrho tam sis ntawd. 45 Ces Yes Xus hais tias : “Leej twg kov kuv ?” Lawv sawv daws tsis muaj leej twg lees li, ces Pob Zeb hais tias : “Xib Hwb, yog tsoom sid sib txiv thiab phoom koj xwb.” 46 Tab sis, Yes Xus hais tias : “Muaj neeg tau kov kuv, vim kuv hnov ib lub zog tawm hauv kuv lawm.” 47 Tus poj niam pom tias nws yuav zais tsis tau ntxiv lawm, ces nws tshee tshee los txhos caug ntawm Yes Xus xub ntiag. Nws qhia rau tas tsoom pej xeem uas nyob ntawd tias yog vim li cas nws thiaj kov Yes Xus, thiab ua cas nws tus mob thiaj li zoo hlo tam sis ntawd kiag.
48 Yes Xus hais rau tus poj niam tias : “Me ntxhais, koj lub siab ntseeg cawm tau koj lawm. Koj mus, koj nyob kaj lug.” 49 Yes Xus tseem tab tom hais lus li ntawd, muaj ib tug neeg tuaj tim tus tswj tsev txoos lub tsev tuaj txog, nws hais tias : “Koj tus ntxhais tuag lawm. Tsis txhob ua tab kaum Xib Hwb ntxiv.”
50 Yes Xus hnov hais li ntawd, nws teb tias : “Koj txhob ntshai. Tsuav koj ntseeg xwb, ces tus ntxhais yuav dim.” 51 Thaum lawv tuaj txog hauv Yais Los tsev, Yes Xus tsis pub leej twg nrog nws mus hauv li, nws tsuas kheev Pob Zeb, Zam thiab Yas Kos, thiab tus me nyuam niam thiab txiv nrog nws mus. 52 Tas sawv daws quaj thiab ntaus hauv siab vim tus me ntxhais. Yes Xus hais tias : “Nej txhob quaj, tus me ntxhais tsis tuag, nws tsaug zog xwb.” 53 Lawv luag luag Yes Xus, vim lawv paub tias nws tuag lawm tiag. 54 Yes Xus tuav tus me ntxhais txhais tes thiab hu nws tias : “Me ntxhais, koj sawv.” 55 Tus ntxhais txoj pa rov los, nws sawv tam sis ntawd. Yes Xus kom lawv muab mov rau nws noj. Nws niam thiab nws txiv ntshai kawg. Yes Xus txwv kom tsis txhob hais txog qhov uas nyuam qhuav tshwm sim no rau leej twg li.