-21-
1 Yes Xus tsa muag ntsia, nws pom cov neeg nplua nuj tso nyiaj pub ua paj tshab rau hauv lub txhab ceev nyiaj. 2 Nws kuj pom ib tug poj ntsuam pluag tso ob lub txiaj toog thiab, 3 ces nws hais tias : “Kuv hais tseeb rau nej tias tus poj ntsuam no pluag, tab sis nws tso nyiaj ntau tshaj sawv daws huv tib si. 4 Vim tias tas cov neeg ntawd, lawv rho lawv cov nyiaj seem los pub ua paj tshab. Tab sis tus poj ntsuam ntawd rho nyiaj hauv nws txoj kev pluag. Nws muab tas nws lub cuab tam los tso rau hauv.”
5 Thaum ntawd, ib txhia hais tias lub Tuam Tsev Teev Ntuj txhim tau pob zeb zoo nkauj rau thiab muaj paj tshab txi Ntuj zoo saib. Yes Xus hais tias : 6 “Tej uas nej qhov muag ntsia ntawm no, muaj ib hnub luag yuav rhuav tsis tseg ob lub pob zeb txhim sib tshooj sawv ntsug.”
7 Lawv nug Yes Xus tias : “Xib Hwb, thaum twg tej ntawd mam li tshwm sim tuaj, thiab yuav muaj lub cim dab tsi thaum tej ntawd yuav tshwm sim tuaj ?”
8 Yes Xus hais tias : “Nej ceev faj txhob cia luag ua kom nej yuam kev. Vim yuav muaj coob leej siv kuv lub npe tuaj, lawv yuav hais tias : ‘Yog kuv’, thiab yuav hais tias : ‘Lub zim txwv twb los txog ze ze lawm’. Mas nej txhob mus raws lawv. 9 Thaum nej hnov luag tham txog kev tsov rog thiab kev kub ntxhov, mas nej tsis txhob ntshai. Vim tias tej ntawd yuav tsum tshwm sim tuaj tso, tab sis tsis tau txog lub zim txwv kawg tam sis ntawd.”
10 Yes Xus hais rau lawv tias : “Ib haiv neeg yuav sawv los ntaus lwm haiv neeg, ib lub teb chaws yuav sawv los ntaus lwm lub teb chaws. 11 Lub ntiaj teb yuav qeeg heev kawg. Nyob rau ntau qhov chaw yuav muaj mob aws, thiab muaj kev tshaib. Yuav muaj tej yam xwm txaus ntshai kawg, thiab tej lub cim loj nyob saum ntuj. 12 Tab sis ua ntej ib puas tsav yam ntawd, luag yuav cev tes ntes nej, luag yuav hiam nej, luag yuav coj nej mus kom rau cov tsev txoos thiab tsev loj faj. Luag yuav coj nej mus rau ntawm cov vaj thiab cov nom tswj teb chaws xub ntiag vim kuv lub npe. 13 Tej ntawd yuav pub ib lub zoo sij hawm rau nej ua tim khawv. 14 Nej khaws rau nruab siab tias nej yuav tsis txhob npaj ib co lus teb kom txuag tau nej. 15 Vim kuv yuav muab ib co lus thiab ib txog kev thoob tsib rau nej, ces cov ntxub nej yuav tsis muaj ib tug teb tau thiab cav tau nej cov lus.
16 Tab yog nej niam nej txiv, nej cov kwv tij, cov txheeb ze, thiab cov phooj ywg, los lawv tseem yuav mus kom nej. Luag yuav muab nej ib txhia tua. 17 Luag yuav ntxub nej vim kuv lub npe. 18 Tab sis tsis muaj ib txoj plaub hau saum nej taub hau yuav ploj. 19 Nej ua siab ruaj kom tom thawj, ces nej yuav cawm nej txoj sia.”
20 “Thaum nej pom tej pab tub rog tuaj vij Yes Lus Xas Les, mas nej yuav to taub tias kev rhuav Yes Lus Xas Les nyob ze lawm. 21 Thaum ntawd mas, cov nyob hauv xeev Yus Das kav tsij cia li khiav mus pem roob, cov nyob hauv nroog yuav tsum khiav tawm mus deb, hos cov uas nyob tom tej teb txhob mus hauv nroog. 22 Vim yog lub caij rob caub, txhua tsav txhua yam uas sau tseg lawd yuav tsum tshwm sim tuaj. 23 Lub caij ntawd, cov poj niam uas cev tsis tab seeb thiab cov uas muaj me nyuam mos noj mis yuav raug txom nyem loj. Vim tias yuav muaj kev txhawj ntshai loj nyob ntiaj teb, thiab yuav muaj kev npau taws loj rau haiv neeg no. 24 Lawv yuav ntog hauv hniav ntaj ntse. Luag yuav ntes lawv mus nyob txim rau tom luag tsoom kuj cuab, ces lwm cov haiv neeg yuav tsuj Yes Lus Xas Les mus txog hnub lawv lub zim txwv dua.”
25 “Yuav muaj ib co cim nyob saum lub hnub, lub hli thiab cov hnub qub. Nyob ntiaj teb no, ib tsoom haiv neeg yuav raug kev txhawj xeeb loj. Dej ntuj yuav nphau ua suab nrov nroo ntws, ces cov haiv neeg yuav txhawj. 26 Neeg yuav tuag ntshai, vim sawv daws txhawj kawg txog tej yam yuav tuaj raug lub qab ntuj neeg ; vim tej yam muaj hwj huam nyob txheej ntuj saud yuav co ua zog koog. 27 Thaum ntawd, sawv daws yuav pom Neeg Leej Tub muaj hwj huam thiab muaj koob meej loj kawg, los hauv ib tw huab los. 28 Thaum tej ntawd pib tshwm sim tuaj, mas nej yuav sawv, nej yuav tsa taub hau, vim txoj kev txhiv nej los txog ze lawm.”
29 Yes Xus hais ib zag piv lus tias : “Nej ntsia tsob txiv ncuav pias thiab tas cov ntoo huv tib si. 30 Thaum nplooj pib hlav, nej ntsia cov ntoo, nej to taub tias ntuj sov los yuav txog. 31 Nej kuj ib yam thiab : thaum nej pom tej ntawd tshwm sim tuaj, nej yuav to taub tias Tswv Ntuj lub ceeb tsheej los yuav txog. 32 Kuv hais tseeb rau nej tias tiam neeg no tsis tau dua, tas ib puas tsav yam ntawd twb yuav tshwm sim tuaj.
33 Lub ntuj thiab lub ntiaj teb yuav dua mus, tab sis kuv cov lus yuav tsis dua.
34 Nej ceev faj mog, kom nej lub siab txhob qaug rau txoj kev phem kev tsis zoo, rau kev luab cawv kom qaug, thiab rau lub neej tej kev txob xeeb, kom xwv lub zim txwv ntawd tsis txhob poob nthav los saum nej 35 xws li ib lub vas. Vim tias lub zim txwv ntawd yuav los raug txhua leej txhua tus uas nyob saum ntiaj teb daim npoo av. 36 Nej ua ib co neeg feeb meej, nej teev Ntuj tsis tseg, nej thiaj yuav muaj zog hla dim ib puas tsav yam uas yuav tshwm sim tuaj, nej thiaj yuav sawv taus ntsug ntawm Neeg Leej Tub xub ntiag.”
37 Nruab hnub, Yes Xus qhia nyob hauv lub Tuam Tsev Teev Ntuj, tab sis hmo ntuj, nws tawm mus nyob saum lub roob hu ua Txiv Ntoo Roj. 38 Kaj ntug txoog, tas tsoom pej xeem tuaj mloog nws hauv lub Tuam Tsev Teev Ntuj.