-22-
1 Yuav txog lub hnub nyoog noj cov mov tsis xyaw poov xab, uas hu ua lub Ntees Hla. 2 Cov Thawj Leej Choj thiab cov Kws Ntawv Ntshiab nrhiav ib txog kev saib yuav muab Yes Xus tua li cas, vim lawv ntshai tsoom pej xeem.
3 Xas Tas nkag mus hauv Yus Das, tus hu ua Kas Lis Yaus. Nws kuj yog ib tug hauv Pab Kaum Ob. 4 Ces nws mus nrog cov Thawj Leej Choj thiab cov zov keeb tham txog qhov yuav muab Yes Xus muag rau lawv. 5 Lawv zoo siab, lawv hais haum tias yuav muab nyiaj rau Yus Das. 6 Yus Das kuj pom zoo, ces nws nrhiav ib lub zoo sij hawm cob Yes Xus rau lawv thaum tsis muaj neeg coob.
7 Txog hnub noj cov mov tsis xyaw poov xab, yog hnub lawv yuav tua tus yaj hla, 8 Yes Xus xa Pob Zeb thiab Zam nkawd mus, nws hais tias : “Neb mus npaj pluas Hla rau peb, peb thiaj tau noj thiab.”
9 Nkawd hais rau Yes Xus tias : “Koj xav kom wb npaj rau qhov twg?”
10 Yes Xus hais rau nkawd tias : “Thaum neb mus txog ntawm lub rooj loog tsheej, yuav muaj ib tug txiv neej nqa ib hub dej tuaj tos neb. Neb raws nws mus hauv lub tsev uas nws mus. 11 Neb hais rau tus tswv tsev tias : ‘Xib Hwb hais rau koj tias chav tsev uas kuv yuav nrog kuv cov thwj tim noj pluas Hla nyob qhov twg ?’ 12 Ces nws yuav coj neb mus saib ib chav tsev dav nyob theem saud, muaj rooj tog. Neb npaj txhua yam kom txhij.”
13 Nkawd mus, nkawd pom txhua yam raws li Yes Xus tau hais rau nkawd, ces nkawd npaj rooj qav Hla.
14 Thaum txog caij lawm, Yes Xus mus zaum ntawm rooj mov, cov Hauv Paus Xa Lus kuj nrog nws zaum thiab. 15 Yes Xus hais rau lawv tias : “Kuv xav nrog nej noj pluas Hla no kawg, kuv mam li mus txais kev tsim txom. 16 Kuv hais rau nej : txij no mus kuv yuav tsis tau noj rooj qav Hla mus txog thaum lub Ntees Hla tiav tas nyob hauv Tswv Ntuj lub Ceeb Tsheej.”
17 Yes Xus tuav ib lub ntim, nws ua Ntuj tsaug tas, nws hais tias : “Nej txais qhov no, nej sib faib haus. 18 Kuv hais rau nej, txij no mus kuv yuav tsis haus kua txiv cawv mus txog thaum Tswv Ntuj lub Ceeb Tsheej los txog.”
19 Yes Xus tuav lub ncuav mov, nws ua Ntuj tsaug, nws muab ntais, nws cev rau lawv, nws hais tias : “Qhov no yog kuv lub cev, uas kuv muab pub rau nej. Nej ua qho no kom nej nco txog kuv.” 20 Noj hmo tas, Yes Xus kuj tuav lub ntim ib yam li ntawd thiab, nws hais tias : “Lub ntim no yog kev Cog Lus Tshiab hauv kuv cov ntshav, yog cov ntshav nchuav los cawm nej.”
21 Saib, tus uas muab kuv muag nrog kuv nyob ua ke, nws txhais tes nyob saum lub rooj mov no. 22 Txawm tias Neeg Leej Tub taug nws txoj kev raws li Ntawv sau tseg, tsis kav, tus neeg uas muab nws muag tau txoj hmoov phem !”
23 Ces lawv pib sib nug saib yog leej twg yuav ua li ntawd .
24 Cov thwj tim tseem muaj lus sib cav saib nyob hauv lawv leej twg yog tus loj dua cov. 25 Yes Xus hais rau lawv tias : “Tsoom kuj cuab cov vaj tswj lawv. Cov muaj hwj huam uas kav cov kuj cuab, kom luag hu lawv ua niam txiv pov hwm. 26 Hos nej, mas tsis yog li ntawd. Tus loj dua cov nyob hauv nej yuav ua tus hluas dua cov. Tus tswj yuav ua tus tsob hwb. 27 Leej twg yog tus loj dua, puas yog tus zaum ntawm rooj mov los yog tus nqa zaub nqa mov ? Tsis yog tus zaum ntawm rooj mov lod ? Hos kuv, mas kuv nyob hauv nruab nrab nej xws li tus tsob hwb !”
28 “Nej yog cov uas nrog nraim kuv thaum kuv raug kev sim siab. 29 Kuv muaj ib lub Ceeb Tsheej uas kuv muab pub rau nej, ib yam li kuv Txiv tau pub rau kuv, 30 kom nyob hauv kuv lub Ceeb Tsheej, nej noj thiab nej haus saum kuv lub rooj, thiab kom nej zaum saum ib co theej kiab txiav txim rau kaum ob lub xeem His Xas Lais.”
31 “Xis Moos, Xis Moos, saib, Xas Tas taij kom tau muab nej tshau hauv vab tshaus xws li tshau hmoov nplej. 32 Tab sis kuv thov Ntuj rau koj lawm, kom koj lub siab ntseeg txhob qaug. Hos koj, thaum koj rov qab los, koj yuav pab koj cov kwv tij kom lawv lub siab ruaj.
33 Xis Moos hais rau Yes Xus tias : “Huab Tais, kuv tuaj yeem nrog koj mus nyob hauv tsev loj faj, thiab nrog koj tuag.”
34 Yes Xus hais tias : “Pob Zeb, kuv hais rau koj : Hnub no, thaum qaib tsis tau qua, koj twb yuav tsis lees peb zaug tias koj paub kuv .”
35 Yes Xus hais rau cov thwj tim tias : “Thaum kuv xa nej mus, nej tsis nqa nas nyiaj, tsis nqa hnab, tsis nqa khau. Nej puas tshaib nqhis dab tsi ?’
36 Lawv hais tias : “Tsis tau tshaib tsis tau nqhis dab tsi.”
Yes Xus hais rau lawv tias : “Hos zaum no, mas tus muaj nas nyiaj, kom nws nqa. Tus muaj hnab, kom nws ris. Tus tsis muaj riam, nws yuav muag nws lub tsho ntev, kom muas tau ib rab riam. 37 Kuv hais rau nej tias, qhov uas Ntawv sau txog kuv, yuav tsum tshwm sim kom tiav. Vim Ntawv sau lo lus no tseg tias : ‘Luag suav nws nrog cov tsis mloog txoj cai,’ ces tas txhia yam uas hais txog kuv, yuav tiav nto ntsis.”
38 Cov thwj tim hais tias : “Huab Tais, nyob ntawm no, muaj ob rab ntaj.” Yes Xus hais tias : “Txaus lawm.”
39 Yes Xus tawm mus pem lub Roob Txiv Ntoo Roj, xws li nws ua kam. Nws cov thwj tim kuj raws nws mus thiab.
40 Yes Xus tuaj txog qhov chaw ntawd, nws hais rau cov thwj tim tias : “Nej teev Ntuj mog, kom nej txhob swb txoj kev ntxias.”
41 Ces Yes Xus ncaim ntawm lawv rau ib qho, kwv yees deb li txawb ib pob zeb. Yes Xus txhos caug, nws teev Ntuj. 42 Nws hais tias : “Txiv, yog koj pom zoo, thov koj tshem lub ntim no mus deb kuv. Tab sis, koj txhob ua raws li kuv xav. Koj ua raws li koj xav.”
43 Ces ib tug Tshiab nqes saum ntuj los rau nws pom, pab nws ua siab loj. 44 Thaum ntawd, Yes Xus txhawj kawg. Nws teev Ntuj heev dua, nws tawm tej cev hws xws li tej tee ntshav nrog rau hauv pem teb.
45 Yes Xus teev Ntuj tas, nws sawv los cuag cov thwj tim, nws pom lawv tsaug zog vim lawv tu siab. 46 Ces Yes Xus hais rau lawv tias : “Vim li cas nej tsaug zog ? Nej sawv, nej teev Ntuj kom nej txhob swb txoj kev ntxias.”
47 Thaum Yes Xus tseem hais lus, ib sij huam, ib pab neeg tuaj txog. Tus ua lawv ntej, yog tus hu ua Yus Das, nws yog ib tug hauv Pab Kaum Ob. Yus Das txav los ze Yes Xus, nws nwj Yes Xus. 48 Ces Yes Xus hais rau nws tias : “Yus Das, koj nwj Neeg Leej Tub kom tau muab nws rau luag ntes lod ?”
49 Thaum cov nyob ncig Yes Xus pom tias luag tuaj ua dab tsi, ces lawv nug tias : “Huab Tais, peb puas xuas ntaj tua lawv ?”
50 Ces cov nrog Yes Xus muaj ib tug, tib ntag rau tus Tuam Leej Choj tus qhev, txiav raug nws sab pob ntseg xis tu nrho. 51 Tab sis Yes Xus qhib ncauj hais tias : “Tsum li no.”
Yes Xus kov tus qhev yav pob ntseg, kho nws zoo hlo. 52 Ces Yes Xus hais rau cov Thawj Leej Choj, cov thawj zov keeb saib lub Tuam Tsev Teev Ntuj thiab cov txwj laus uas tuaj ntes nws tias : “Nej nqa ntaj nqa qws tawm tuaj ntes kuv xws li ntes ib tug tub sab. 53 Kuv niaj hnub nrog nej nyob hauv lub Tuam Tsev Teev Ntuj, nej ho tsis cev tes ntes kuv. Tab sis, nyem no, yog nej lub sij hawm thiab yog Kev Tsaus Ntuj lub hwj huam.”
54 Lawv ntes Yes Xus, lawv coj nws mus. Lawv coj nws mus hauv tus Tuam Leej Choj lub tsev. Pob Zeb raws qab deb. 55 Thaum lawv rauv tau taws rau hauv nruab nrab lub tshav loog, lawv sawv daws zaum ncig, Pob Zeb kuj nrog lawv zaum thiab. 56 Ib tug ntxhais txib pom Pob Zeb zaum ze lub cub tawg, nws ntsia ntsoov Pob Zeb, ces nws hais tias : “Tus neeg ntawd nrog Yes Xus thiab.”
57 Tab sis Pob Zeb tsis lees, nws hais tias : “Phauj, kuv tsis paub tus ntawd.”
58 Ib me ntsis tom qab, muaj dua ib tug neeg pom Pob Zeb, nws hais tias : “Koj yog lawv ib tug thiab.”
Tab sis Pob Zeb hais tias : “Npawg, kuv tsis yog.”
59 Kwv yees li ib teev tom qab, tseem muaj dua ib tug hais tsis tseg tias : “Muaj tseeb tiag, tus neeg ntawd yog ib tug nrog Yes Xus, nws twb yog neeg Nkas Lis Lais.”
60 Tab sis Pob Zeb hais tias : “Yawg, kuv tsis paub xyov koj hais dab tsi !” Lub sij hawm uas Pob Zeb tseem hais lus ntawd, ces ib tug qaib qua. 61 Huab Tais tig los ntsia Pob Zeb. Ces Pob Zeb nco txog Huab Tais lo lus uas nws hais rau Pob Zeb tias : “Hnub no, thaum qaib tsis tau qua, koj yuav tsis lees kuv peb zaug.”
62 Ces Pob Zeb tawm mus nraum zoov, nws quaj, nws tu siab kawg.
63 Thaum ntawd, cov neeg zov Yes Xus thuam nws thiab ntaus nws. 64 Lawv muab ib daim ntaub npog Yes Xus ntsej muag, lawv nug nws tias : “Ua yaj saub saib, tus ntaus koj yog leej twg ?”
65 Lawv tseem hais ntau lo lus thuam Yes Xus.
66 Thaum kaj ntug, pej xeem cov txwj laus, nrog cov Thawj Leej Choj thiab cov Kws Ntawv Ntshiab sib sau ua rooj sab laj. Lawv coj Yes Xus mus rau lub rooj txwj laus Xas Nes Nrees. 67 Lawv hais rau Yes Xus tias : “Saib koj yog Leej Pleev no, mas koj qhia peb.”
Yes Xus hais rau lawv tias : “Yog kuv hais qhia nej, los nej yuav tsis ntseeg. 68 Yog kuv nug nej, los nej yuav tsis teb. 69 Txij no mus, Neeg Leej Tub yuav zaum ntawm Tswv Ntuj lub hwj huam sab xis.”
70 Ces tas lawv sawv daws hais tias : “Ua li mas koj yog Tswv Ntuj Leej Tub puas tiag lod ?”
Yes Xus hais rau lawv tias : “Nej hais nej tias : kuv yog.”
71 Ces lawv hais tias : “Peb tseem yuav nrhiav tim khawv ua dab tsi ? Peb twb hnov kiag ntawm nws lub ncauj lawm.”