-18-
1 Yes Xus hais ib zag paj lug rau lawv, nws qhia lawv tias yuav tsum teev Ntuj tsis tseg, txhob ntaus siab yau. Yes Xus hais tias : 2 Nyob hauv ib lub nroog, muaj ib tug txwj laus txiav txim, nws tsis ntshai Tswv Ntuj thiab tsis hwm leej twg li. 3 Muaj ib tug poj ntsuam nyob hauv lub nroog ntawd tuaj cuag tus txwj laus txiav txim, nws hais tias : “Thov koj pab tsa kuv cai tiv tus neeg ntxub kuv.”
4 Tus txwj laus tsis quav ntsej, nws ncua ntev ntev. Tab sis ntev mus nws xav tias : “Tab yog kuv tsis ntshai Tswv Ntuj thiab tsis hwm ib tug neeg li, 5 tsis kav tus poj ntsuam ntawd txob kuv dhau, kuv yuav tsa nws cai tiv tus ntxub nws, kom xwv nws txhob tuaj txob kuv thiab txhob ua kuv dias taub hau ntxiv.”
6 Ces Huab Tais hais tias : “Nej mloog tus txwj laus txiav txim siab tsis ncaj cov lus saib. 7 Thaum Tswv Ntuj cov xaiv ua hnub ua hmo hu txog nws tsis tseg, Tswv Ntuj yuav tsis tsa lawv cai lod ? Nws yeej ua siab ntev rau lawv. 8 Kuv hais rau nej, Tswv Ntuj yuav tsa lawv cai sai sai. Tab sis thaum Neeg Leej Tub rov los, nws puas yuav pom neeg ntseeg nyob ntiaj teb ?”
9 Yes Xus tseem hais zaj paj lug no ntxiv, nws hais rau ib txhia neeg uas lawv khav tias lawv yog neeg ncaj, ces lawv thuam luag tej.
10 “Muaj ob tug neeg nce mus teev Ntuj pem lub Tuam Tsev Teev Ntuj. Ib tug yog Fas Lis Xais, ib tug yog neeg sau se. 11 Tus Fas Lis Xais sawv ntsug, nws teev Ntuj li no nyob hauv siab : ‘Aub, Tswv Ntuj, kuv ua koj tsaug, vim kuv tsis zoo li zeej tsoom sawv daws. Lawv mas lawv ua tub sab, ua tsis ncaj, deev luag txij luag nkawm, thiab tseem ua zoo li tus sau se ntawd. 12 Ib lis piam, kuv yoo mov ob zaug. Kuv pub ib feem kaum ntawm tas txhia yam uas kuv khwv tau.’
13 Tus sau se nyob deb, tsis muaj cuab kav tsa muag ntsia saum ntuj. Nws ntaus nws hauv siab, nws hais tias : ‘Aub ! Tswv Ntuj, thov koj khuv leej kuv, vim kuv yog neeg txhaum !’
14 Kuv hais rau nej : tus sau se nqes rov mus tsev, nws ntshiab huv lawm, hos tus Fas Lis Xais tsis tau ntshiab huv. Vim tias leej twg tsa nws siab, Ntuj yuav txo nws qis, hos leej twg txo nws qis, Ntuj yuav tsa nws siab.”
15 Lawv coj cov me nyuam me tuaj rau Yes Xus kom nws plhws. Cov thwj tim pom qhov ntawd, mas cov thwj tim cem lawv. 16 Tab sis Yes Xus hu cov me nyuam me los ntawm nws, ces nws hais tias : “Nej cia cov me nyuam tuaj cuag kuv, nej txhob txwv lawv, vim cov yuav tau Tswv Ntuj lub Ceeb Tsheej yog cov neeg zoo li cov me nyuam no. 17 Kuv hais tseeb rau nej : leej twg tsis txais Tswv Ntuj lub Ceeb Tsheej xws li ib tug me nyuam, mas nws yuav mus tsis tau hauv.”
18 Muaj ib tug nom nug Yes Xus tias : “Xib Hwb siab zoo, kuv yuav ua li cas thiaj tau txais txoj sia nyob mus li los ua yus tug ?”
19 Yes Xus hais rau nws tias : “Vim li cas koj hu kuv ua siab zoo ? Tsis muaj leej twg siab zoo, tsuas kawg Tswv Ntuj tib leeg xwb. 20 Koj paub cov lus qhia : Koj tsis txhob deev luag txij luag nkawm, txhob tua neeg, txhob ua tub sab, txhob ua tim khawv cuav, koj yuav hwm koj niam koj txiv.
21 Tus nom hais tias : “Tej ntawd, kuv yeej coj rawv txij thaum kuv tseem hluas los.”
22 Yes Xus hnov li ntawd, nws hais rau tus nom tias : “Tseem tshuav ib yam uas koj tsis tau ua : Muab ib puas tsav yam uas yog koj tug muag, muab tus nqi faib rau cov pluag. Ces koj yuav tau ib lub cuab tam muaj nqis nyob saum ntuj. Ua li ntawd tas, koj los raws kuv.”
23 Tus nom hnov li ntawd, nws tu siab kawg, vim nws nplua nuj tas nrho.
24 Yes Xus ntsia tus nom, nws hais tias : “Cov neeg muaj nyiag yuav mus hauv Tswv Ntuj lub Ceeb Tsheej mas nyuaj npaum li no ! 25 Ib tug ntxhuav nkag hauv ib lub qhov koob yooj yim dua ib tug neeg nplua nuj nkag mus hauv Tswv Ntuj lub Ceeb Tsheej.”
26 Cov neeg uas hnov Yes Xus hais li ntawd, lawv hais tias :”Ua li leej twg thiaj yuav txais kev cawm ?”
27 Yes Xus hais tias : “Yam uas neeg ua tsis tau, mas Tswv Ntuj ua tau.”
28 Pob Zeb hais tias : “Saib ! Peb tso peb tej cuab tam pov tseg, peb los raws koj.”
29 Yes Xus hais rau lawv tias : “Kuv hais tseeb rau nej : tsis muaj ib tug neeg uas tau tso vaj tse, poj niam, kwv tij, niam thiab txiv, thiab me tub me nyuam tseg vim Tswv Ntuj lub Ceeb Tsheej, 30 uas yuav tsis tau txais ntau tshaj hauv tiam neej no, thiab txais txoj sia nyob mus li rau fab lwm tiam, “
31 Yes Xus coj Pab Kaum Ob nrog nws, nws hais rau lawv tias : “Zaum no peb nce mus pem Yes Lus Xas Les, mas tas ib puas tsav yam uas cov Yaj Saub sau txog Neeg Leej Tub yuav tshwm sim kom tiav. 32 Vim luag yuav muab Neeg Leej Tub rau cov pej kum neeg, lawv yuav thuam nws, yuav ua tub qaug nws, thiab nto aub ncaug rau nws. 33 Thaum luag muab nws nplawm tas, luag yuav muab nws tua. Hnub peb nws yuav sawv rov los.”
34 Cov thwj tim tsis to taub dab tsi txog tej ntawd li. Lo lus ntawd lub ntsiab nyob zais ntshis rau lawv, lawv tsis paub Yes Xus hais dab tsi.35 Thaum Yes Xus tuaj yuav txog Yes Lis Kos, muaj ib tug dig muag zaum thov khawv ntawm ntug kev. 36 Nws hnov ib pab neeg taug kev, nws nug saib yog dab tsi. 37 Luag qhia nws tias yog Yes Xus Nas Xas Les hla tuaj mus. 38 Ces nws tsa suab hu nrov tias : “Yes Xus, Das Vis Leej Tub, thov koj khuv leej kuv !”
39 Cov uas mus kev tom hauv ntej cem nws kom ua twj ywm, tab sis nws haj yam hu nrov tias : “Das Vis Leej Tub, thov koj khuv leej kuv !” 40 Yes Xus nres, nws kom lawv coj tus dig muag los rau nws. Thaum tus dig muag los txog ze, Yes Xus nug nws tias : 41 “Koj xav kom kuv ua dab tsi rau koj ?”
Tus dig muag hais tias : “Huab Tais, thov kom kuv rov pom kev.”
42 Ces Yes Xus hais rau nws tias : “Koj rov pom kev mas ! Koj lub siab ntseeg cawm koj lawm.”
43 Tam sis ntawd, tus dig muag rov pom kev, ces nws raws Yes Xus mus, nws cav txog Tswv Ntuj. Tas tsoom pej xeem pom qhov ntawd, lawv cav lus zoo txog Tswv Ntuj.