-17-
1 Yes Xus hais rau cov thwj tim tias : “Yeej yuav cheem tsis tau kom txhob muaj kev coj luag ua txhaum, tab sis tus coj kom luag ua txhaum mas nws txoj hmoov phem ! 2 Txhiaj khoov muab ib lub zeb zom dai ntawm nws caj dab thiab muab nws pov rau hauv dej ntuj, kom nws txhob coj ib tug me me no ua txhaum. 3 Nej ceev faj mog !”
“Yog koj tus kwv ua txhaum, koj yuav qhuab ntuas nws. Yog nws thov txhaum, mas koj zam rau nws. 4 Yog ib hnub nws ua txhaum rau koj xya zaus, nws rov los thov koj xya zaus hais tias ‘Kuv thov txhaum,’ mas koj yuav zam rau nws.”
5 Cov Hauv Paus Xa Lus hais rau Huab Tais tias : “Koj txhab kev ntseeg rau peb mas !”
6 Ces Huab Tais hais tias : “Yog nej muaj kev ntseeg luaj li lub noob zaub roj, mas nej yuav hais tau rau tsob ntoo txiv pos no tias ‘Rho koj cov cag, koj tshais mus cog koj rau hauv dej ntuj,’ mas tsob ntoo yuav mloog nej lus.
7 “Nyob hauv nej, yog leej twg tus tub txib mus laij teb, los nws mus zov tsiaj lawm, thaum nws rov tom teb los txog, nej leej twg yuav hais rau nws tias : “Koj tsuag tsuag los zaum noj mov ?”
8 Ntshai nws yuav hais rau tus tub txib tias : “Koj ua hmo rau kuv, koj sia siv, koj rau mov rau kuv. Thaum kuv noj kuv haus tas, mas koj mam li noj haus tom qab.” 9 Tus tub txib ua raws li nws tus tswv txib, tus tswv puas pom nws txiaj ntsim ?
10 Nej kuj zoo ib yam li ntawd : thaum nej ua tas txhua yam raws li tej lus luag txib nej, mas nej hais tias : “Peb yog ib co tub txib tsis muaj nqi ; peb ua qhov uas peb yuav tsum ua.”
11 Yes Xus taug kev mus Yes Lus Xas Les, nws hla Xas Mas Lias thiab Nkas Lis Lais ciam teb. 12 Thaum Yes Xus yuav mus hauv ib lub zos, muaj kaum tus mob ruas tuaj cuag nws, lawv nres nrug deb.
13 Lawv tsa suab hais nrov rau nws tias : “Xib Hwb Yes Xus, thov koj khuv leej peb.”
14 Yes Xus pom lawv, nws hais rau lawv tias : “Nej mus thws nej lub cev rau cov Leej Choj saib.”
Thaum lawv tab tom mus, ces lawv lub cev huv. 15 Muaj ib tug hauv pab ntawd pom tias nws lub cev zoo lawm, ces nws tig hlo rov qab los, nws tsa suab nrov cav txog Tswv Ntuj. 16 Nws pe ntsej muag ti av rau ntawm Yes Xus ko taw, nws ua Yes Xus tsaug. Nws yog ib tug Xas Mas Lias. 17 Yes Xus thiaj tsa ncauj hais tias : Tsis muaj kaum leej rov huv tuaj lod ? Tshuav cuaj leeg ne, lawv dua qhov twg lawm? 18 Ua cas tsuas muaj tus qhua no xwb thiaj rov los cav txog Tswv Ntuj ?”
19 Ces Yes Xus hais rau nws tias : “Koj sawv mus, koj lub siab ntseeg cawm koj lawm.”
20 Cov Fas Lis Xais nug Yes Xus saib thaum twg Tswv Ntuj lub Ceeb Tsheej thiaj li los txog. Yes Xus teb rau lawv tias : “Tswv Ntuj lub Ceeb Tsheej yog ib yam uas neeg qhov muag tsom tsis tau. 21 Yus yuav hais tsis tau tias ‘Ntuj lub Ceeb Tsheej nyob ntawm no’, Los nyob tod’, vim tias Tswv Ntuj lub Ceeb Tsheej nyob nruab nrab hauv nej.”
22 Yes Xus hais rau cov thwj tim tias : “Yuav muaj tej lub sij hawm uas nej ntshaw pom Neeg Leej Tub nrog nej nyob ib hnub, tab sis nej yuav tsis pom. 23 Ces luag yuav hais rau nej tias : ‘Neeg Leej Tub nyob tod’, los ‘Nws nyob ntawm no’. Mas nej tsis txhob mus, tsis txhob tso sas ntws khiav mus rau tod. 24 Vim tias Neeg Leej Tub lub zim txwv yuav zoo xws li ib kab xob laim ci dawb paug ib ceg kaum ntuj mus rau lwm ces. 25 Tab sis nws yuav tsum xub raug luag tsim txom loj kawg thiab raug tiam neeg no muab xyeeb pov tseg tso. 26 Tej xwm uas yuav tshwm sim thaum txog Neeg Leej Tub lub zim txwv, mas yuav zoo xws li tej xwm tshwm hauv Nom Hes lub zim txwv. 27 Sawv daws noj, sawv daws haus, sawv daws yuav poj niam thiab muab tej ntxhais pub tshoob, mus txog hnub uas Nos Hes chaws mus rau hauv lub nkoj, ces dej tuaj nyab, ua kom sawv daws tuag tas. 28 Thiab tseem yuav zoo li lub zim txwv uas Los ua neej nyob : Sawv daws noj haus, sawv daws muas thiab muag cuab yeej, cog qoob loo, thiab txhim vaj tse. 29 Tab sis hnub uas Los tawm plaws khiav ntawm Xos Dos Mas, ces hluav taws thiab leej faj poob saum ntuj los ua sawv daws tuag tas huv si. 30 Hnub uas Neeg Leej Tub yuav tawm los rau pom kuj yuav zoo li ntawd thiab.
31 Hnub ntawd, tus uas nyob saum sam thiaj, tab sis nws cov cuab yeej nyob hauv tsev, mas nws yuav tsis txhob nqes mus nqa. Tus nyob tom teb kuj ib yam, nws yuav tsis txhob tig rov tom qab. 32 Nej nco ntsoov txog Los tus poj niam. 33 Leej twg nrhiav kev txuag nws txoj sia, mas nws yuav plam nws txoj sia. Hos leej twg plam nws txoj sia, mas nws txoj sia yuav ciaj.
34 Kuv hais rau nej : Hmo ntawd, ob leeg pw ib txag : yuav coj ib tug mus, tseg ib tug. 35 Ob tug poj niam ua ke zom zeb : yuav coj ib tug mus, tseg ib tug.” [36…]
37 Ces cov thwj tim qhib ncauj hais rau Yes Xus tias : “Coj mus qhov twg, Huab Tais ?”
Yes Xus hais rau lawv tias : “Lub cev tuag nyob qhov twg, dav noj nyuj kuj yuav sib sau ntsauv nyob ntawd.”