-12-
1 Thaum ntawd, neeg coob coob tuaj sib txoos ua tsheej pawg, muaj txog ntau txhiab leej, sawv daws sib txiv, sib tsuj ko taw tas nrho. Yes Xus pib hais lus, nws xub hais rau nws cov thwj tim tias : “Nej ceev faj rau cov poov xab Fas Lis Xais, rau lawv txoj kev ua zoo sab nraud. 2 Tsis muaj ib yam zais ntshis uas yuav tsis qhib tawm los, tsis muaj ib yam npog uas yuav tsis muaj neeg paub. 3 Yog vim li ntawd, tas ib puas tsav yam uas nej hais nyob hauv qhov tsaus ntuj nti, yuav nrov rau luag hnov nruab hnub nrig. Yam uas nej ntxhi rau hauv luag pob ntseg nyob hauv tej chav kaw nti, yuav muaj tus tuaj saum sam lawj tshaj.
4 Kuv cov phooj ywg, kuv hais rau nej : Nej tsis txhob ntshai cov uas tua neeg lub cev, thaum lawv tua tas, lawv ua tsis tau dab tsi ntxiv rau nej. 5 Kuv qhia nej tias nej yuav tsum ntshai leej twg : nej yuav ntshai tus uas tua neeg lub cev tas, muaj peev xwm muab nej pov rau hauv dab phem teb. Kuv hais rau nej, tus ntawd mas nej yuav ntshai nws tiag. 6 Tsib tug tsig txhuv tsuas muag tau ob lub txiaj toog xwb, puas yog ? Tsis kav, tsis muaj ib tug tsig txhuv uas Tswv Ntuj yuav tsis nco txog. 7 Tab yog nej cov plaub hau los Tswv Ntuj yeej suav tas huv si lawm. Nej tsis txhob txhawj mog : nej muaj nqis dua tej pab tsig txhuv coob coob.
8 Kuv hais rau nej : leej twg lees rau tsoom neeg tias nws paub kuv, mas Neeg Leej Tub kuj yuav lees tias nws paub tus ntawd nyob ntawm Tswv Ntuj cov Tshiab xub ntiag. 9 Tab sis leej twg tsis lees paub kuv nyob ntawm tsoom neeg xub ntiag, mas yuav tsis muaj tus lees paub nws nyob ntawm Tswv Ntuj tsoom Tshiab xub ntiag thiab.
10 Leej twg hais ib lo lus cem Neeg Leej Tub, mas Ntuj yuav zam rau nws. Tab sis tus twg thuam Leej Ntuj Plig Ntshiab, Ntuj yuav tsis zam rau nws li.
11 Thaum luag coj nej mus sawv hauv cov tsev txoos, ntawm cov thawj tswj cai, thiab ntawm cov nom tswv, nej txhob txhawj tias nej yuav teb li cas thiab yuav hais dab tsi ; 12 vim lub sij hawm ntawd, Leej Ntuj Plig Ntshiab yuav qhia nej kom hais dab tsi.”
13 Muaj ib tug neeg hauv tsoom sid hais rau Yes Xus tias : “Xib Hwb, koj hais kom kuv tij laug faib peb lub cuab tam rau kuv thiab.” 14 Yes Xus hais rau nws tias : “Npawg, leej twg tsa kuv ua tus txiav txim los tus faib cuab tam rau neb ?” 15 Yes Xus hais rau lawv tias : “Nej ceev faj, nej yuav txuag kom nej txhob ntshaw, vim tias neeg txawm nplua nuj npaum twg, los nws txoj sia tsis nyob hauv nws lub cuab tam.”
16 Yes Xus hais zaj paj lug no rau lawv : “Muaj ib tug neeg nplua nuj, nws cov teb ntsu qoob loo kawg. 17 Nws xav tias : ‘Kuv yuav ua li cas, vim kuv tsis muaj chaw rau kuv cov qoob ?’ 18 Ces nws hais tias : ‘Kuv yuav ua li no : kuv yuav rhuav kuv cov txhab, yuav rov ua ib co txhab loj dua, kuv yuav sau kuv cov nplej thiab kuv tej cuab yeej cuab tam huv si los tso rau hauv. 19 Ces kuv yuav hais rau kuv tus plig tias : ‘Me ntsuj plig, koj muaj qoob loo cuab tam ntau kav koj ntev niaj ntau xyoo : koj so mog, koj noj, koj haus, koj ua si.’ 20 Tab sis Tswv Ntuj hais rau nws tias : ‘Neeg ruam ! Hmo no kiag, Ntuj yuav coj koj tus ntsuj plig rov qab. Tej yam uas koj npaj tau, yuav yog leej twg tug ? 21 Tus uas khaws nyiaj txiag tseg rau nws tib leeg kheej, yuav zoo li ntawd, vim nws tsis nrhiav kev nplua nuj nyob hauv Tswv Ntuj.”
22 Yes Xus hais rau nws cov thwj tim tias : “Yog vim li ntawd, kuv thiaj hais rau nej tias nej tsis txhob txhawj txog nej txoj sia, txhob txhawj tias yuav muab dab tsi los noj, los txhawj txog nej lub cev tias yuav muab dab tsi los hnav. 23 Vim txoj sia muaj nqis dua txhiam xws noj, thiab lub cev muaj nqes dua tsoos hnav. 24 Nej sim ntsia cov uab lag saib : lawv tsis tseb tsis hlais nplej, lawv tsis muaj tsev rau cawv, tsis muaj txhab nplej, tab sis Tswv Ntuj yug lawv. Nej haj yam muaj nqis dua tej me noog. 25 Nej leej twg, yog nws txhawj txhawj, nws puas rub tau nws txoj sia kom ntev ib tshim ntxiv ? 26 Yog nej tsis muaj peev xwm ua tau tej yam me me li no, vim li cas nej txhawj txog lwm yam ? 27 Nej ntsia cov paj ntoos, lawv tsis ua maj, tsis ntos ntaub. Tsis kav, kuv hais rau nej, tab yog Xas Los Moos, thaum nws muaj koob meej nto moo lug, nws tsis tau hnav zoo li ib lub paj ntoos. 28 Tej nroj hauv nruab tsuag tsuas ciaj hnub no, tag kis luag twb yuav muab pov hlawv hauv qhov txos, tsis kav Tswv Ntuj tseem muab zam zoo rau lawv hnav. Neeg ntseeg tsis ti txha, Tswv Ntuj haj yam yuav ua ntau tshaj rau nej. 29 Nej tsis txhob nrhiav saib yuav muab dab tsi los noj, thiab yuav muab dab tsi los haus, thiab nej tsis txhob txhawj. 30 Ib tsoom neeg teev dab nyob ntiaj teb puav leej nrhiav tej ntawd, tab sis nej Txiv paub tias nej yuav tsum muaj txhua yam ntawd.
31 Nej xub nrhiav Tswv Ntuj lub Ceeb Tsheej tso, ces Ntuj yuav pub tej ntawd huv tib si los ntxiv rau nej.
32 Pab me yaj, nej txhob ntshai mog, vim nej Txiv zoo siab muab lub Ceeb Tsheej rau nej.”
33 “Muab nej lub cuab tam muag, nej muab pub rau cov pluag. Nej tsim tej nas nyiaj tsis txawj qub, tsim ib txhab kub uas tsis txawj nqig rau saum ntuj. Nyob saud, tsis muaj tub sab tuaj ze, tsis muaj kab rws xwv. 34 Vim tias nej txhab kub nyob qhov twg, nej lub siab kuj yuav nyob qhov ntawd.”
35 “Nej sia siv thiab taws teeb, 36 zoo li ib co tub txib uas tos lawv tus tswv mus ua tshoob rov los. Thaum tus tswv rov los txog, nws yuav khob qhov rooj, ces lawv yuav qhib rau nws tam sis ntawd. 37 Cov tub txib uas thaum tus tswv los txog, nws pom lawv tseem zov hmo, mas lawv txoj hmoov zoo. Kuv hais tseeb rau nej, tus tswv yuav sia siv, yuav kom cov tub txib ntawd zaum ntawm rooj mov, nws yuav rau mov rau lawv noj. 38 Txawm tias, tus tswv los txog thaum ib tag hmo los thaum qaib qua, yog nws pom zov hmo zoo li ntawd, mas cov tub txib txoj hmoov zoo ! 39 Nej to taub qhov no zoo mog ! Yog tias tus tswv tsev paub lub sij hawm twg tub sab yuav tuaj, nws yuav tsis cia tub sab tho qhov tsev. 40 Nej kuj ib yam thiab, nej yuav npaj kom txhij, vim yog lub sij hawm uas nej tsis nco faj, mas Neeg Leej Tub thiaj yuav tuaj .”
41 Ces Pob Zeb hais tias : “Huab Tais, koj hais zaj paj lug no, puas yog koj hais rau peb, los hais rau sawv daws ?” 42 Huab Tais teb hais tias : “Leej twg yog tus tub txib pheej xeeb thiab xyuam xim, uas tus tswv tsev yuav tsa nws saib tus tswv cov tub zog, kom thaum txog caij nws faib hmoov nplej rau lawv ? 43 Yog thaum tus tswv rov los txog, nws pom tus tub txib tab tom lis nws tej num, mas tus tub txib no txoj hmoov yuav zoo. 44 Kuv hais tseeb rau nej, tus tswv yuav tsa nws saib tus tswv lub cuab tam tas huv si. 45 Tab sis yog tus tub txib ntawd xav hauv siab tias ‘kuv tus Tswv yuav los lig,’ ces nws muab tus tswv tej tub txib ntxhais txib ntaus, nws noj nws haus kom qaug. 46 Tus tub txib no tus tswv yuav los txog hnub uas nws tsis nco faj, thiab lub sij hawm uas nws tsis paub. Tus tswv yuav ntiab tus tub txib mus nrog cov tsis hwm Ntuj nyob.
47 Tus tub txib uas nws yeej paub qhov uas tus tswv xav kom ua, tab sis nws tsis npaj dab tsi li, thiab tsis tau ua raws li qhov tus tswv xav kom ua, mas tus tub txib ntawd yuav mag tus tswv rab nplawm ntau teg. 48 Hos tus tub txib uas yeej tsis paub qhov uas tus tswv xav kom ua, thiab nws kuj tau ua tej yam tsim nyog ntaus, mas nws yuav mag tus tswv nplawm sib me ntsis. Tus uas Ntuj tau pub ntau rau, Ntuj yuav taij ntau rov qab. Tus uas Ntuj tso ntau yam rau nws ceev, mas Ntuj yuav kom nws xa ntau dua rov qab.
49 “Kuv coj ib co hluav taws tuaj rau lub ntiaj teb, kuv yeej xav kom cov hluav taws ntawd twb cig lawm. 50 Kuv yuav tsum txais ib co kab ke ntxuav. Kuv ntxhov siab mus txog hnub uas tej ntawd tiav tas.
51 Nej puas xav tias kuv tuaj pub txoj kev thaj yeeb nyob ntiaj teb no ? Kuv hais rau nej, kuv tsis tuaj pub kev thaj yeeb, kuv coj kev sib ncaim tuaj. 52 Txij no mus, ib tse neeg muaj tsib leeg yuav sib ncaim, peb leeg yuav tiv ob leeg, ob leeg yuav tiv peb leeg : 53 sawv daws yuav sib ncaim, txiv yuav tiv tub, tub yuav tiv txiv, niam yuav tiv ntxhais, ntxhais yuav tiv niam, poj yuav tiv nyab, nyab yuav tiv poj.”
54 Yes Xus tseem hais rau tsoom neeg sawv daws tias : “Thaum nej pom huab sawv ntxoov sab hnub poob, tam sis ntawd, nej hais tias ntuj yuav los nag, ces kuj los nag tiag. 55 Thaum nthwv cua qab teb tshuab tuaj, nej hais tias tshav yuav kub, mas muaj li ntawd tuaj tiag. 56 Neeg zoo sab nraud, nej paub ntsuas lub ntuj lub teb tus yam ntxwv, ua cas nej ntsuas tsis tau lub zim txwv no tej xwm ?
57 Vim li cas nej tsis txiav nej tias qhov ncaj yog qhov twg ? 58 Yog koj nrog tus ntxub koj mus cuag nom, mas thaum koj tseem txog ib tog kev, koj yuav ua tib zoo nrog nws hais kom haum. Tsam nws coj koj mus rau tus nom txiav txim, ces tus nom txiav txim muab koj cob nkaus rau tub ceev xwm. Tub ceev xwm muab koj pov rau hauv tsev loj faj. 59 Kuv hais rau koj : Koj yuav tsis tawm hauv tsev loj faj mus txog thaum koj rho nyiaj qab nas txog xus kawg los them kom tas.