-10-
YES XUS COV LUS QHIA SAUM ROOB

Yes Xus pom neeg coob coob tuaj mloog nws lus; lawv yog cov pej xeem pluag txom nyem, cov nyob nruab liaj nruab teb, cov tsis tau txais kev ncaj ntawm lawv cov nom tswv. Yes Xus xav kom lawv hloov lub tswv yim tshiab mas nyob hauv lawv thiaj yuav muaj kev xyiv fab, ces Yes Xus tsa ncauj qhia lawv hais tias “Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li. Cov tau txoj hmoov zoo, yog cov siab zoo, vim lawv yuav txais lub ntiaj teb los ua lawv tug. Cov tau txoj hmoov zoo, yog cov quaj ntsuag, vim Ntuj yuav nplij lawv. Cov tau txoj hmoov zoo, yog cov tshaib thiab nqhis txoj kev ncaj, vim Ntuj yuav daws lawv qhov nqhis. Cov tau txoj hmoov zoo, yog cov hlub luag tej, vim Ntuj yuav hlub lawv. Cov tau txoj hmoov zoo, yog cov siab huv, vim lawv yuav pom Tswv Ntuj. Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam. Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug. Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo. Nej zoo siab thiab nej hom khaj mog, vim nej yuav tau txais koob haum loj nyob saum ntuj. Cov yaj saub ua nej ntej, kuj raug luag hiam zoo li ntawd thiab” (MT 5: 1-12).

Yes Xus hais txog 8 hom neeg tau txoj hmoov zoo tas, nws pib hais txog lawv tej Txoj Cai tias “Nej txhob xav tias kuv tuaj rhuav Txoj Cai thiab cov Yaj Saub; kuv tsis tuaj rhuav, kuv tuaj qhia ntxiv kom thoob. Vim tias qhov kuv hais rau nej muaj tseeb. Lub ntuj lub teb yuav dua, tab sis tsis muaj ib tug txwm ntawv, los ib lub cim ntawv me me hauv Txoj Cai yuav ploj. Tas ib puas tsav yam nyob hauv Txoj Cai yuav tsum tshwm sim tuaj tso. Tus twg hla ib txog cai me, thiab nws qhia kom luag ua xws li nws, mas Ntuj yuav saib tus ntawd qis tshaj cov nyob hauv Ntuj lub Ceeb Tsheej. Hos tus ua raws Txoj Cai tas huv si, thiab nws qhia kom luag ua xws li nws, Ntuj yuav saib nws yog tus loj nyob hauv Ntuj lub Ceeb Tsheej” (MT 5: 17-19).

Yes Xus nthuav Txoj Cai rau tsoom sid mloog tias “Nej hnov cov lus qhia rau tej laus thaud tias ‘Koj tsis txhob tua neeg. Tus twg tua neeg, nws yuav raug luag txiav txim rau nws.’ Hos kuv, mas kuv hais rau nej tias leej twg npau taws rau nws tus kwv, nws yuav raug txim ntawm tsev hais plaub. Yog nws hais rau nws tus kwv tias ‘Niag ruam’, mas nws yuav raug txim ntawm lub rooj txwj laus Xas Nes Nrees. Yog nws hais rau nws tus kwv tias ‘Niag vwm’, mas nws yuav raug txim nyob hauv dab phem cov hluav taws. 

Thaum koj cev ib co txim rau saum lub thaj txi Ntuj, yog koj nco dheev tias koj tus kwv tau muaj lus rau koj lawm. Mas koj cia li tso koj cov txim rau ntawm lub thaj txi Ntuj, koj mus nrog koj tus kwv hais kom haum tso, koj mam rov los cev koj cov txim. 

Thaum koj nrog tus neeg ntxub koj tseem ua ke mus kev, koj kav tsij nrog nws hais kom haum, tsam nws coj koj mus kom rau tus txiav txim, ces tus txiav txim muab koj cob rau tub ceev xwm kom muab koj kaw hauv tsev loj faj. 

Kuv hais tseeb rau koj, koj yuav tawm tsis tau hauv tsev loj faj, mus txog thaum koj rho nyiaj qab nas txog npib kawg nkaus los them. 

Nej hnov tej lus qhia tias ‘Koj yuav tsis txhob deev luag txij luag nkawm.’ Hos kuv, mas kuv hais rau nej tias leej twg ntsia ib tug poj niam vim ntshaw zes nws, tus ntawd twb deev tus poj niam ntawd hauv nruab siab lawm. 

Yog koj sab qhov muag xis coj koj mus ua txhaum, mas kav tsij muab sab qhov muag ntawd kaus pov tseg deb koj; txhiaj khoov cia ib sab qhov muag puas zoo dua tas koj lub cev poob hauv dab phem teb. 

Yog koj sab tes xis coj koj mus ua txhaum, kav tsij muab txiav pov tseg deb koj; txhiaj khoov cia tu ib sab tes zoo dua tas koj lub cev poob hauv dab phem teb.

Tseem muaj tej lus qhia tias ‘Leej twg nrauj nws poj niam, yuav tsum muab ib daim ntawv nrauj rau tus poj niam.’ Tab sis, kuv hais rau nej tias tus txiv neej twg nrauj nws poj niam, tus ntawd tso nws poj niam rau luag deev. Qhov no tsis yog hais txog tus poj niam uas mus nrog lwm tus txiv neej ua dev ua npua. Hos leej twg yuav ib tug poj nrauj, mas tus ntawd yog ib tug deev luag txij luag nkawm. 

Nej tseem hnov cov lus qhia rau tej laus thaud tias ‘Koj tsis txhob twv ntuj, koj yuav ua raws li cov lus koj tau cog rau Huab Tais.’ Tab sis kuv hais rau nej, nej tsis txhob twv ntuj ib zaug li. Txhob muab lub ntuj los ua tim khawv, vim ntuj yog Tswv Ntuj lub theej kiab; txhob muab lub ntiaj teb los ua tim khawv, vim lub ntiaj teb yog Tswv Ntuj lub rooj tiag taw; txhob muab Yes Lus Xas Les los ua tim khawv, vim yog tus Tuam Vaj lub Nroog. Txhob muab koj lub taub hau los ua tim khawv, vim koj ua tsis tau kom ib txog plaub hau dawb tuaj los dub tuaj. 

Nej yuav hais li no ‘Muaj’, ces hais tias muaj; ‘tsis muaj’, ces hais tias tsis muaj. Cov lus hais tshaj, yog tuaj ntawm tus Phem tuaj. 

Nej hnov tej lus qhia tias ‘Qhov muag pauj qhov muag, kaus hniav pauj kaus hniav.’ Hos kuv hais rau nej tias nej tsis txhob nrog tus neeg phem sib cav. Yuav ua li no: leej twg ib ncuav pias rau koj sab plhu xis, tig sab plhu laug rau nws thiab.

 Leej twg xav ua plaub rau koj kom tau koj lub tsho, mas koj muab koj lub tsho tshaj sab ntxiv rau nws thiab. Leej twg thov koj xa nws mus ib ncuas kev, mas koj nrog nws mus ob ncuas. Leej twg thov koj, mas koj pub rau nws. Leej twg xav txais nyiaj ntawm koj, mas koj txhob tig nraub qaum rau nws.

Nej hnov tej lus qhia tias ‘Koj yuav nyiam tus nyob ze koj, koj yuav ntxub koj tus yeeb ncuab.’ Tab sis, kuv hais rau nej tias nej yuav nyiam nej cov yeeb ncuab, nej yuav thov Ntuj rau cov tsim txom nej; nej thiaj yog nej Txiv nyob saum ntuj cov tub; vim nej Txiv ua kom lub hnub tuaj ziab cov neeg phem thiab cov neeg zoo, nws ua kom nag los rau cov siab ncaj thiab cov siab nkhaus. 

Yog nej nyiam cov neeg nyiam nej, mas nej yuav tau koob haum dab tsi? Tab yog cov sau se, lawv kuj txawj nyiam li ntawd.

Yog nej tshwj zias nej cov lus foom zoo rau nej cov kwv tij xwb, mas nej tau ua dab tsi zoo tshaj luag? 

Tab yog cov neeg teev pej kum dab, los lawv kuj txawj ua li ntawd. Hos nej, mas nej yuav ua neeg zoo tshaj, vim nej Txiv nyob saum ntuj yog tus zoo tshaj. Tas ib puas tsav yam nej xav kom luag ua rau nej, mas nej yuav xub ua rau luag tso. Txoj Cai thiab cov Yaj Saub tej lus yog li ntawd (MT 5: 21-48, MT 7: 12).

Thaum ntawd, Pob Zeb txav los hais rau Yes Xus tias “Huab Tais, yog kuv tus kwv ua txhaum rau kuv, kuv yuav zam pes tsawg zaus? Kuv puas yuav zam txog xya zaus?”

Yes Xus hais rau Pob Zeb tias “Kuv tsis hais rau koj tias ‘xya zaus’. Kuv hais rau koj tias ‘xya caum xya zaus’. Nej txhob txiav txim, Ntuj thiaj yuav tsis txiav txim rau nej; vim tias nej txiav txim li cas rau luag, Ntuj yuav txiav txim ib yam li ntawd rau nej. Nej luj li cas rau luag, Ntuj kuj yuav luj li ntawd rau nej. 

Ua cas koj ntsia tus quav nplej nyob hauv koj tus kwv qhov muag? Tab sis tus nqaj tse nyob hauv koj qhov muag, koj ho tsis pom! Koj tseem hais rau koj tus kwv tias ‘Cia kuv rho tus quav nplej hauv koj qhov muag pov tseg’, tab sis ib tug nqaj twb nyob hauv koj qhov muag! Neeg zoo sab nraud, koj xub rho tus nqaj hauv koj qhov muag tso, koj thiaj li pom kev rho tus quav nplej hauv koj tus kwv qhov muag” (MT 18: 21-22, 7: 1-5).

Yes Xus thiaj hais ib zag paj lug tias “Muaj ib tug vaj uas xav nrog nws cov tub txib txheeb nws tej nyiaj txiag. Thaum lawv pib txheeb, ces luag coj ib tug tub txib uas tshuav nuj nqis ib vam nras nyiaj, tuaj rau tus vaj. Tus tub txib tsis muaj dab tsi them, ces tus vaj kom luag muab nws thiab nws poj niam, nws cov me nyuam thiab tas nws lub cuab tam huv si muag, los them cov nuj nqis ntawd. Tus tub txib txhos caug ntua ntawm tus tswv ko taw, nws pe tus tswv, nws hais tias ‘Thov koj ua siab ntev rau kuv, kuv yuav them kom tas rau koj.’

Tus tswv hlub tus tub txib, ces nws tso tus tub txib mus thiab tseem zam cov nuj nqis huv tib si rau nws. Thaum tus tub txib tawm rov qab mus, nws ntsib nws ib tug npawg, uas tshuav nqi ntawm nws ib puas lub txiaj nyiag. Tus tub txib ntawd nthos nkaus nws tus npawg caj dab, zawm tus npawg caj pas, thiab hais tias ‘Them koj cov nqi.’

Nws tus npawg txhos caug ntua ntawm nws ko taw thov tias “Thov koj ua siab ntev rau kuv, kuv yuav them rau koj.’

Tab sis tus tub txib ntawd tsis kam li, nws kom luag muab nws tus npawg kaw hauv tsev loj faj mus txog hnub tus npawg them nuj nqis tas huv tib si rau nws. Tus tub txib cov phooj ywg pom nws ua li ntawd, lawv chim kawg, lawv mus qhia tej ntawd rau lawv tus tswv. Ces tus vaj hu tus tub txib tuaj, nws hais rau tus tub txib ntawd tias ‘Tub txib siab phem dab tsi! Cov nuj nqis uas koj tshuav ntawm kuv, kuv twb zam tas huv si rau koj, vim koj thov kuv. Ua cas koj tsis hlub koj tus npawg zoo li kuv tau hlub koj?’

Ces tus vaj npau taws heev, nws muab tus tub txib rau cov tub hiam neeg mus txog hnub nws them nws cov nuj nqis tas huv tib si. 

Nej txhua tus, yog nej tsis zam hauv nruab siab rau nej ib tug kwv tij, mas kuv Txiv nyob saum Ntuj kuj yuav ua ib yam li ntawd rau nej thiab” (MT 18: 21-35).

Yes Xus qhia txog kev pub rau lwm tuas tias “Nej ceev faj, nej txhob ua ncaj nyob ntawm neeg xub ntiag xwb, kom luag qhuas nej. Yog nej ua li ntawd, mas nej yuav tsis txais koob haum ntawm nej Txiv nyob saum ntuj. Thaum koj pub rau luag, koj txhob tshuab hom ua koj ntej. Cov neeg zoo sab nraud ua li ntawd nyob hauv cov tsev txoos thiab nyob ntawm tej kev, kom sawv daws cav lus zoo txog lawv. Kuv hais tseeb rau nej, lawv twb txais lawv cov koob haum tas lawm. Hos koj, mas thaum koj pub rau luag, koj txhob cia koj sab tes laug paub qhov uas sab tes xis ua. Li ntawd, tsis muaj neeg paub tias koj tau pub. Ces koj Txiv uas nws pom hauv qhov chaw nraim yuav pauj rau koj” (MT 6: 1-4).

Yes Xus hais rau sawv daws tias “Tsis yog cov uas hu kuv ua ‘Huab Tais, Huab Tais’, yuav tau mus hauv Ntuj lub Ceeb Tsheej. Yog cov ua raws li kuv Txiv nyob saum ntuj lub siab nyiam. Hnub ntawd, yuav muaj coob leej hais rau kuv tias ‘Huab Tais, Huab Tais, thaud, tsis yog peb tuav koj lub npe ua yaj saub lod? Tsis yog peb tuav koj lub npe ntiab dab lod? Peb ua hwj huam yees ntxwv ntau zaus, tsis yog peb tuav koj lub npe los ua lod?’

Ces kuv yuav ncaj qha teb rau lawv tias ‘Kuv tsis paub nej! Nej cov tau ua phem, nej txav mus deb kuv.’

Leej twg mloog cov lus uas kuv nyuam qhuav hais, thiab nws ua raws li cov lus no, mas tus neeg ntawd piv tau rau ib tug neeg xyuam xim uas nws txhim tsev rau saum tsua. Thaum los nag hlob, dej sab siv huam, cua tshuab ntsawj lub tsev, tab sis tsev tsis vau, vim lub tsev cog rau saum tsua. Hos leej twg hnov cov lus kuv nyuam qhuav hais, tab sis nws tsis ua raws li cov lus ntawd, tus neeg ntawd piv tau rau ib tug neeg ruam txhim tsev rau saum tej av suab puam. Thaum los nag hlob, dej sab siv huam, cua tshuab ntsawj lub tsev, ces lub tsev vau. Nws raug xwv txheej loj” (MT 7: 21-29).