-12-

Thaum Yes Xus lub moo ncha mus thoob lub teb chaws, cov Kws Ntawv thiab cov Fas Lis Xais pib ntxub Yes Xus, lawv nrhiav kev liam Yes Xus.

Txog Hnub Xas Npas Tos Yes Xus mus hauv l lub tsev txoos. Muaj ib tug neeg uas txhais tes qhuav nyob ntawd. Cov neeg ntxub Yes Xus xav liam rau Yes Xus, ces lawv nug tias “Hnub Xas Npas Tos, puas kheev kho neeg mob?”

Yes Xus teb rau lawv tias “Yog nej leej twg tsuas muaj tib tug yaj xwb; hnub Xas Npas Tos, tus yaj ntawd mus poob hauv ib lub qhov. Nws puas yuav mus muab, mus rub tawm los? Neeg muaj nqi dua ib tug yaj lawm pes tsawg npaug? Vim qhov ntawd, hnub Xas Npas Tos, yeej kheev kom ua ib yam hauj lwm zoo.”

Yes Xus hais rau tus qhuav tes tias “Koj xyab koj txhais tes.”

Tus neeg ntawd xyab tes, txhais tes cia li zoo hlo, muaj zog ib yam li lwm sab. Cov Fas Lis Xais tawm mus sab laj nrhiav saib yuav muab Yes Xus tua zoo li cas (MT 12: 9-14).

Thaum ub cov Yus Das xav tias ib tug neeg hais tsis tau lus mas yog vim nws raug tus dab nplaig txhav. Muaj ib hnub lawv txawm coj ib tug neeg nplaig txhav tuaj cuag Yes Xus, ces tus neeg nplaig txhav cia li hais lus tau. Tas tsoom sid qhuas kawg, lawv hais tias “Tsis tau muaj dua tej yam zoo li ntawd tshwm sim hauv haiv His Xas Lais ib zaug li” (MT 9: 32-34). 

Tab sis cov Fas Lis Xais hnov cov lus ntawd, lawv hais tias “Tus neeg ntawd kawg hu txog tus tuam thawj dab Npes Ntxes Npus los ntiab dab xwb.”

Tus dab Npes Ntxes Npus yog ib tug dab uas cov neeg ib txwm nyob ib ncig Pas Les Tis Nas lawv teev. 

Yes Xus paub lawv xav li cas, nws hais rau lawv tias “Lub teb chaws twg tawm tsam rov sib ntaus, yeej yuav liam sim tas. Tsis muaj ib lub nroog, los ib tse neeg uas tawm tsam rov sib ntaus, yuav nyob ruaj ua ke tau. Li ntawd, yog Xas Tas rov ntiab Xas Tas, mas nws rov tawm tsam tiv nws. Yog li ntawd, nws lub teb chaws yuav ua cas nyob ruaj tau? 

Yog kuv hu txog Npes Ntxes Npus los ntiab dab, ua li nej cov tub hu txog leej twg los ntiab dab? Nej cov tub yuav txiav txim rau nej. Hos yog kuv hu txog Tswv Ntuj Leej Ntuj Plig los ntiab dab, qhov ntawd ua kom paub tias Tswv Ntuj lub Ceeb Tsheej tuaj txog nej lawm. 

Leej twg yuav ua cas nkag tau mus hauv tus neeg muaj zog lub tsev, lwg nws lub cuab tam, yog tsis xub muab tus muaj zog ntawd khi tso, nws mam lwg lub tsev? 

Tus twg tsis tuaj kuv tog, mas nws tiv kuv. Tus twg tsis nrog kuv sau, nws muab pov rau ob cag. Li ntawd, kuv hais rau nej, Ntuj yuav zam neeg tej txhaum thiab tej lus thuam Ntuj; tab sis, tej lus thuam Leej Ntuj Plig, mas Ntuj yuav tsis zam rau neeg. Leej twg hais ib lo lus phem txog Neeg Leej Tub, mas Ntuj yuav zam rau nws. Tab sis, leej twg hais lus phem txog Leej Ntuj Plig Ntshiab, mas Ntuj yuav tsis zam rau nws tiam no thiab fab lwm tiam” (MT 12: 24-32). 

Yes Xus hais ntxiv tias “Thaum dab tsis huv tawm ntawm neeg mus lawd, nws ua loj leeb mus rau tej teb chaws qhuav qhawv, nrhiav chaw so, tab sis nrhiav tsis tau. Ces nws hais tias ‘Kuv yuav rov qab mus nyob hauv lub tsev uas kuv tawm tuaj.” Nws rov los txog, pom lub tsev khab seeb, cheb huv, tu du lug cia. Ces nws mus coj xya tus dab uas tseem phem tshaj nws, nrog nws los. Cov dab nkag los nyob hauv lub qub tsev. Zaum no ces tus neeg ntawd haj yam raug lub neej phem dua qhov qub. Tiam neeg phem no, kuj yuav raug ib yam li ntawd thiab” (MT 12: 43-45).

Yes Xus hais ntxiv tias “Yog nej tu ib tsob ntoo kom zoo, nws cov txiv yuav zoo nkauj. Nej cia ib tsob ntoo lwj, mas nws cov txiv kuj yuav lwj. Pom cov txiv, ces paub tsob ntoo. Caj ces nab muaj taug! Nej yeej phem, nej yuav ua cas hais tau cov lus zoo? Vim neeg lub ncauj hais yam phwj hauv neeg lub siab tuaj. 

Tus neeg zoo, thau tej yam zoo tawm hauv nws lub siab zoo los. Hos tus neeg phem thau tej yam phem tawm hauv nws lub siab phem los. 

Kuv tseem hais rau nej tias Hnub Txiav Txim, neeg yuav tsum ris lawv tej lus dag lus cuav. Vim Ntuj yuav ntsuas koj cov lus, ces Ntuj thiaj yuav saib tias koj siab ncaj, los koj yuav raug txim vim koj cov lus (MT 12: 33-37). 

Yes Xus tseem tab tom hais lus rau lawv, ces Yes Xus niam thiab nws cov kwv tij tuaj sawv nraum zoov, lawv xav nrog nws txuas lus. Muaj ib tug hais rau Yes Xus tias “Koj niam thiab koj cov kwv tij tuaj txog nraud, lawv xav nrog koj txuas lus.”

Yes Xus teb rau tus neeg tuaj qhia nws tias “Leej twg yog kuv niam, thiab leej twg yog kuv cov kwv tij?”

Yes Xus taw tes rau nws cov thwj tim, nws hais tias “Kuv niam thiab kuv kwv tij yog cov ntawd. Vim tias tus twg ua raws kuv Txiv nyob saum ntuj lub siab, tus ntawd yog kuv ib tug kwv, ib tug muam, los ib leeg niam” (MT 12: 46-49). Thaum ntawd, muaj ib tug poj niam tsa suab hais tias “Lub xub ntiag nqa koj thiab lub mis koj ntxais, lawv txoj hmoov zoo.” Yes Xus hais rau tus poj niam ntawd tias “Cov muaj txoj hmoov zoo yog cov mloog thiab coj Tswv Ntuj Lo Lus” (LK 11: 27-28).

Yes Xus thiab cov thwj tim mus rau Nas Ees. Thaum Yes Xus tuaj yuav txog lub qhov rooj loog nkag hauv lub nroog, luag tab tom kwv ib tug tuag tawm tuaj txog ntawd. Yog ib leeg tub twm zeej, hos leej niam yog ib tug poj ntsuam. Ib pab neeg coob hauv nroog nrog leej niam tawm tuaj. Yes Xus pom tus poj ntsuam, Yes Xus khuv leej nws. Yes Xus hais rau nws tias “Koj txhob quaj.” 

Yes Xus txav los tuav lub hleb, cov kwv hleb nres, ces Yes Xus hais tias “Tus hluas, kuv hais koj; koj sawv!” 

Ces tus tuag sawv zaum, thiab nws pib hais lus. Yes Xus muab tus tub hluas ntawd cob rau nws niam. Tas sawv daws ntshai tas nrho. Lawv cav txog Tswv Ntuj tias “Ib tug Yaj Saub loj sawv los nyob hauv peb, Tswv Ntuj tuaj xyuas nws haiv neeg.” 

Cov lus hais txog tus hluas ntawd ncha mus thoob tas xeev Yus Das thiab ib ncig lub teb chaws ntawd (LK 7: 11-17), ces Zam cov thwj tim qhia tej ntawd rau Zam. 

Thaum ntawd, Hes Los twb ntes Zam kaw hauv tsev loj faj lawm. Zam xa ob tug thwj tim tuaj nug Yes Xus tias “Koj puas yog tus yuav tuaj? Los peb tseem yuav tos dua lwm tus?”

Yes Xus teb rau nkawd tias “Nej rov mus qhia qhov nej hnov thiab qhov nej pom rau Zam; cov dig muag rov pom kev, cov ceg tawv mus taus kev, cov mob ruas rov huv lawm, cov lag ntseg hnov lus, cov tuag sawv rov los, cov pluag tau hnov lub Moo Zoo lawm. Tus uas nws tsis ntog vim kuv, mas nws txoj hmoov zoo.”

Thaum Zam cov thwj tim rov mus lawm, Yes Xus hais txog Zam rau cov pab neeg raws nws li no tias “Nej mus xyuas dab tsi hauv teb chaws suab puam ? Nej puas mus xyuas ib tsob tauj raug cua nplawm? Nej tawm mus xyuas dab tsi? Puas yog mus xyuas ib tug neeg hnav tsoos tsuj tsoos npuag? Tab sis cov neeg hnav tsoos tsuj tsoos npuag nyob hauv vaj ntxwv tej tsev xwb. Ua li mas nej tawm mus xyuas dab tsi? Puas yog mus xyuas ib tug yaj saub? Muaj tseeb tiag, kuv hais rau nej tias nws tseem loj dua ib tug yaj saub. Ntawv sau txog nws li no: Kuv tso kuv tus tub xa xov mus ua koj ntej, nws yuav npaj txoj kev tom koj hauv ntej.”

Yes Xus hais ntxiv tias “Kuv hais tseeb rau nej, tas cov tub uas tsoom poj niam yug huv tib si, tsis muaj ib tug sawv loj dua Zam Ntxuav Plig. Tab sis, tus me tshaj hauv Ntuj lub Ceeb Tsheej, tseem loj dua Zam thiab. Txij Zam Ntxuav Plig los txog tav no, Ntuj lub Ceeb Tsheej raug luag sib txeeb; cov neeg siab ceev txeeb lub Ceeb Tsheej. Cov yaj saub thiab Txoj Cai puav leej tau ceeb toom lo lus los txog lub caij Zam tuaj. Nej ntseeg kuv mog! Zam yog tus Es Lias uas yuav rov los. Leej twg muaj pob ntseg, cia nws mloog” (MT 11: 1-15).

Tos Yes Xus hais li vim Zam yog ib tug Yaj Saub tseem ceeb ib yam li Es Lias ces thaum lawv mus mloog Zam nyob ze ntawm tus dej Yos Las Das mas lawv tau mus mloogib tug Yaj Saub loj cov lus, lawv tsis yuam kev. Zam xav kom tau Tswv Ntuj lub Ceeb Tsheej mas Zam tso tas puas tsav yam tseg, nws yuam nws lub cev, nws ua cuag li tus siab ceev xav txeeb kom tau Tswv Ntuj lub Ceeb Tsheej los ua nws tug.

Yes Xus xav txog cov neeg hnov nws tshaj lub Moo Zoo tab sis lawv tsis ntseeg, ces Yes Xus hais rau cov thwj tim tias “Tas tsoom neeg uas tau hnov Zam cov lus, tab txawm lawv yog neeg sau se, lawv lees tias Tswv Ntuj yog tus ncaj, vim lawv txais kab ke ntxuav ntawm Zam. Hos cov Fas Lis Xais thiab cov Kws Lij Choj muab Tswv Ntuj zaj tswv yim uas nws npaj rau lawv xyeeb pov tseg, lawv tsis kam txais Zam cov kab ke ntxuav.

Kuv yuav muab tiam neeg no piv rau leej twg? Tiam neeg no zoo li ib pab me nyuam yaus zaum tom tshav puam; lawv rov sib hu tias ‘Peb twb tshuab raj, nej tsis dhia! Peb cuab suab nyiav, nej tsis ntaus hauv siab!’ Zam tuaj, nws tsis noj mov, tsis haus cawv, luag hais tias ‘Nws raug dab!’ Neeg Leej Tub tuaj, nws noj mov haus cawv, luag hais tias ‘Saib tus ntawd! Nws hu dab thiab quav cawv, nws nrog cov sau se thiab cov neeg txhaum ua phooj ywg!’ Tab sis, Tus Thoob Tsib cov hauj lwm ua kom luag pom tias nws yog txoj kev ncaj.

Kos Las Ntxis, koj txoj hmoov phem! Npes Xais Das, koj txoj hmoov phem! Vim tias, cov hwj huam yees ntxwv uas kuv tau ua hauv neb, kheev lam yog ua nyob Tws Los thiab nyob Xis Doos, mas ob lub nroog ntawd twb hnav ntaub tsaj thiab muab plua av los nphoo lawv, lawv twb hloov siab lawm ntxov. Kuv hais meej rau neb, hnub txiav txim, Tws Los thiab Xis Doos yuav raug txim sib dua neb. Thiab koj, Kas Fas Naus, koj xav tias koj yuav sawv siab txij ntuj puas yog? Koj twb nqes yuav txog tub tuag teb. Vim tias cov hwj huam yees ntxwv kuv tau ua nyob hauv koj, kheev lam yog ua nyob Xos Dos Mas, mas lub nroog ntawd tseem yuav nyob txog tav no. Kuv hais meej rau koj, hnub txiav txim, Xos Dos Mas teb yuav raug txim sib dua koj.”

Ces Yes Xus teev Ntuj tias “Txiv, kuv cav lus zoo txog koj, Huab Tais kav lub ntuj lub teb, vim koj zais tej yam ntawd rau cov neeg thoob tsib thiab cov neeg ntse, koj ho qhib rau cov me nyuam yaus. Muaj tseeb tiag, Txiv, koj lub siab nyiam li ntawd. Kuv Txiv muab tas ib puas tsav yam rau kuv. Tsis muaj leej twg paub Leej Tub, tsuas kawg Leej Txiv thiaj paub. Kuj tsis muaj leej twg paub Leej Txiv, tsuas kawg Leej Tub thiaj paub, thiab tus uas Leej Tub pom zoo qhia rau kom paub” (MT 11: 17-29, LK 7: 31-35).