-4-
YES XUS YUG LOS LAWM

Thaum tus nab ntxias Es Vas kom txhob mloog Tswv Ntuj lus, ces Es Vas thiab As Das nkawd thiaj ua txhaum. Tswv Ntuj hais rau tus nab tias “Kuv yuav kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws” (HP 3: 15).

Raws li lub Koom Txoos qhia rau peb, tus nab yog txoj kev haub ntxias neeg kom txhob mloog Tswv Ntuj lus; tus poj niam caj ces yog Tswv Ntuj Leej Tub tus nqes los txhiv tib neeg kom dim ntawm txoj kev txhaum. Tswv Ntuj Leej Tub yuav muab txoj kev phem ntxias neeg tsuj tuag nthi rau hauv qab xib taws. Txoj kev phem ntxias neeg yuav ua kom Tswv Ntuj Leej Tub nqaij ntuag ntshav nrog, tab sis cov ntshav ntawd yuav ntxuav sawv daws kom rov huv tuaj.

Huab Tais Tswv Ntuj tshoj cov His Xas Lais thoob tsib kom sau zaj kwv huam no cia zeem tseeb txog Huab Tais Tswv Ntuj lub siab hlub lub qab ntuj neeg, ces Huab Tais Tswv Ntuj thiaj cog lus cuav rov tuaj tsa neeg lub tsim kom siab tuaj; kom tib neeg rov tau mua cuag Tswv Ntuj.

Cov His Xas Lais ib txwm piav zaj kwv huam no los tau ntau tiam, txog thaum kwv yees 700 xyoo ua Yes Xus ntej mas lawv thiaj muab sau ua tej phau tseg cia. Thaum ntawd, His Xas Lais teb twb tawg tas lawm. Cov His Xas Lais raug ua cov As Xis Lias thiab cov Npas Npis Los qhev. 

Xyoo 538 tus vaj Pes Xis hu ua Kws Los tso cov His Xas Lais rov los nyob Yus Das teb, ces lawv yuav tsis hais txog lub npe His Xas Lais ntxiv, lawv yuav hu ua cov Yus Das.

Xyoo 333 Yus Das teb poob rau cov Hes Las thiab xyoo 63 lawv zwm rau cov Los Mas. 

Cov Los Mas muab ib cheeb tsam ntawm Kas Nas Has teb uas yog cov Yus Das nyob hu ua ‘Pas Les Tis Nas’.

Pas Les Tis Nas faib ua 5 lub xeev; yog lub xeev Nkas Lis Lais nyob sab qaum teb, lub xeev Xas Mas Lias nyob nruab nrab, lub xeev Yus Das nyob nram qab teb, lub xeev Des Kas Pos Lis nyob sab hnub tuaj yav qaum teb, thiab lub xeev Pes Les nyob sab hnub tuaj yav qab. 

Lub xeev Nkas Lis Lais muaj cov nroog thiab zos; xws li Nas Xas Les, Kas Nas, Npes Xais Das, Kas Fas Naus. Lub xeev Xas Mas Lias muaj lub tsheej Xas Mas Lias. Lub xeev lub xeev Yus Das muaj Yes Lis Kos, Npes Tas Nis, Npes Les Hes, thiab lub tsheej Yes Lus Xas Les.

Xyoo 37 ua Yes Xus ntej mas tus vaj Los Mas hu ua ‘Xes Ntxas Aus Nkus Tus’ tsa Hes Los ua kav Pas Les Tis Nas teb. Tus vaj Hes Los yuav tsum saib xyuas tsoom pej xeem kom lawv mloog tus tuam vaj nyob Los Mas, kom tsoom pej xeem them se rau tus tuam vaj. 

Yos Xes yug los nyob Npes Les Hes hauv xeev Yus Das tab sis nws tsiv mus nyob Nas Xas Les hauv xeev Nkas Lis Lais, ces Yos Xes yuav Mab Liab nyob hauv Nas Xas Les. 

Tus vaj Xes Ntxas Aus Nkus Tus tau tshaj lus ceeb toom kom lub teb chaws Los Mas txheeb tsoom pej xeem, ces sawv daws sawv kev mus sau npe hauv lub nroog sawv daws nyob. Yos Xes thiaj li coj Mab Liab nrog nws sawv kev hauv Nas Xas Les mus pem Npes Les Hes, nkawd mus li 5 los 6 hnub thiaj txog. Thaum ntawd, Mab Liab cev hnyav lawm. 

Thaum nkawd tuaj txog Npes Les Hes, mas cov tsev txais qhua puv tas lawm, ces tsis muaj chaw rau nkawd so. Mab Liab thiab Yos Xes mus so hauv lub tsev yug tsiaj. Thaum ntawd, Mab Liab daws cev ces nws muab ntaub qhwv, thiab muab tus me nyuam tso pw hauv ib lub dab nyuj.

Nyob thaj tsam ntawd, muaj ib co neeg zov yaj. Lawv nyob nruab teb. Hmo ntuj, lawv nyob zov lawv pab yaj. Tswv Ntuj tus Tshiab tawm los rau lawv pom, Tswv Ntuj lub hwj chim ci dawb paug ncig lawv, lawv ntshai kawg. Tus Tshiab hais rau lawv tias “Nej txhob ntshai, vim kuv tuaj xa ib tsab xov zoo uas yuav ua kom nej zoo siab thiab ib tsoom neeg zoo siab. Hnub no, nyob hauv Das Vis lub nroog, tus Cawm nej yug los lawm, nws yog Leej Pleev, thiab yog Huab Tais. Lub cim yuav ua kom nej paub yog lub cim no; nej yuav pom ib tug me nyuam mos qhwv ntaub pw hauv ib lub dab nyuj.” 

Ib sij huam, txawm muaj ib pab Tshiab coob coob tuaj nrog tus Tshiab xa xov cav lus zoo txog Tswv Ntuj tias “Nyob saum cov txheej ntuj siab, Tswv Ntuj nto meej nto moo, nyob ntiaj teb, tsoom neeg Tswv Ntuj nyiam, nyob thaj yeeb.”

Thaum cov Tshiab tso cov zov yaj tseg rov mus saum ntuj lawm, cov zov yaj sib yaum tias “Peb mus Npes Les Hes, mus xyuas yam xwm uas Huab Tais tuaj qhia peb ntawd saib.” Ces lawv maj zeeg tuaj mus. Lawv pom Mab Liab thiab Yos Xes, thiab pom tus me nyuam mos pw hauv dab nyuj. Thaum lawv pom li ntawd, lawv piav lo lus uas tus Tshiab tau qhia rau lawv txog tus me nyuam. 

Cov zov yaj rov mus tsev, lawv foom koob meej thiab cav lus zoo txog Tswv Ntuj vim tas txhua yam lawv tau pom thiab tau hnov raws li Ntuj qhia lawv.

Thaum dhau lub caij yim hnub lawm, txog hnub ua lub cim txiav, nkawd tis npe rau tus me nyuam hu ua ‘Yes Xus’ txhais tias ‘Yas Ves cawm’ los yog ‘Huab Tais cawm’.

Tib lub caij ntawd, muaj ib co kws hnub quj Toob Fab tuaj txog Yes Lus Xas Les. Lawv nug tias “Tus vaj Yus Das uas nyuam qhuav yug los nyob qhov twg? Peb pom nws lub hnub qub tawm nyob Toob Fab, peb tuaj hawm nws.”

Tus vaj Hes Los hnov li ntawd, nws lub siab nphau npog. Tas Yes Lus Xas Les kuj nrog nws ua siab nphau npog thiab. Hes Los hu cov thawj leej choj thiab pej xeem cov kws ntawv tuaj tas huv tib si. Nws nug lawv txog qhov chaw uas Leej Pleev yuav yug los. Lawv teb tias “Nyob Npes Les Hes, Yus Das teb, vim tus yaj saub sau tseg tias ‘Koj, Npes Les Hes, Yus Das thaj av, koj tsis yog lub zos Yus Das me tshaj cov, vim ib tug thawj coj yuav tawm hauv koj los, nws yuav zov kuv haiv His Xas Lais’.”

Hes Los hu cov kws hnub qub twj ywm tuaj. Nws kom lawv qhia meej lub sij hawm uas lub hnub qub tau tawm tuaj. Ces nws cia lawv mus Npes Les Hes. Hes Los hais rau lawv tias “Nej mus tshuaj tus me nyuam kom meej, thaum nej nrhiav tau nws, nej xa xov qhia kuv paub, vim kuv xav mus hawm nws thiab.”

Tus vaj tso lus li ntawd, ces lawv sawv kev mus. Thaum ntawd, lub hnub qub uas lawv tau pom nyob Toob Fab rov mus ua lawv ntej. Nws mus nres saum qhov chaw uas tus me nyuam nyob. Lawv rov pom lub hnub qub, mas lawv zoo siab kawg. Lawv chaws mus hauv tsev, lawv pom tus me nyuam thiab nws niam Mab Liab, lawv pe, lawv hawm nws. Lawv qhib lawv cov phij xab, lawv cev kub, cev txab ntoo xyab, thiab cev txab txiv yoov ua paj tshab rau nws. 

Cov kws hnub qub cev kub, txab ntoo xyab, thiab txab txiv yoov; mas vim lawv ntseeg tias tus me nyuam Yes Xus yuav yog ib tug vaj tuaj ntawm Tswv Ntuj tuaj, thiab nws yuav tuag cawm lub qab ntuj neeg. 

Ntuj qhia cov kws hnub qub hauv npau suav kom txhob rov qab mus pem Hes Los tsev, ces lawv taug dua ib txog kev rov mus lawv teb chaws.Hes Los pom tias cov kws hnub qub dag nws, ces nws npau taws ceev kawg. Nws xa neeg mus tua cov me nyuam uas muaj ob xyoos raws li nws hnov cov kws hnub qub hais. Nws tua cov nyob Npes Les Hes thiab nyob ib ncig ntawm Npes Les Hes tas tib si (LK 1: 26-56, MT 1: 18-25, MT 2: 1-12, 16). Thaum ntawd, ntshai muaj kwv yees 30 los 40 leej raug tus vaj Hes Los cov tub rog muab tua pov tseg.