-6-
YES XUS NYIAM UA QHOV NCAJ

Yes Xus tawm hauv xeev Nkas Lis Lais mus cuag Zam ntawm tus dej Yos Las Das, kom Zam ua kab ke ntxuav rau nws. Zam tsis kam, Zam hais tias “Kuv yog tus yuav tsum thov koj ntxuav kuv, tab sis, koj ho tuaj cuag kuv.”

Yes Xus teb rau Zam tias “Nyem no, cia koj ua rau kuv; wb thiaj tau ua raws txoj kev ncaj.” Ces Zam ua raws li Yes Xus hais. Yes Xus txais kab ke ntxuav tas, nws tawm hauv dej los tim ntug nqhuab tam sis ntawd lub ntuj qhib plho; Zam pom Tswv Ntuj tus Ntsuj Plig nqes xws li ib tug nquab los rau saum Yes Xus thiab ib lub suab nrov saum ntuj tuaj hais tias “Tus no yog kuv Leej Tub uas kuv nyiam. Nws yog kuv qhov chaw zoo siab” (MT 3: 13-17).

Thaum Zam hnov Tswv Ntuj lub suab thiab pom Leej Ntuj Plig zeem tseeb txog Yes Xus, mas Zam thiaj paub tias Yes Xus yog Leej Pleev, ces Zam xav tias nws tej hauj lwm tiav lawm. Zam hais tias “Nyem no Yes Xus yuav hlob mus. Ntawm kuv mas kuv yuav yau mus zuj zus.” 

Leej Ntuj Plig coj Yes Xus mus rau teb chaws suab puam kom raug dab phem ntxias. Yes Xus yoo mov tau plaub caug hnub plaub caug hmo, ces nws tshaib plab. Ces niag ntxias neeg txav los, nws hais rau Yes Xus tias “Saib, koj yog Tswv Ntuj Leej Tub no, koj hais kom cov pob zeb no txia ua mov!”

Tab sis Yes Xus teb tias “Muaj lus sau cia tias ‘Neeg tsis kawg muab mov xwb los yug txoj sia, neeg tseem muab txhua lo lus tawm ntawm Tswv Ntuj lub ncauj los yug txoj sia thiab’.”

Dab phem tseem coj Yes Xus nrog nws mus hauv lub Nroog Ntshiab. Ces dab phem coj Yes Xus mus tso puag saum lub ruv Tuam Tsev Teev Ntuj, 6 dab phem hais tias “Saib, koj yog Tswv Ntuj Leej Tub no, koj dhia lawm puag hauv, vim muaj lus sau cia tias ‘Ntuj yuav txib nws cov tshiab, kom lawv nqa koj nyob hauv lawv txhais tes, kom koj ko taw txhob dawm ib lub pob zeb li’.”

Yes Xus hais rau dab phem tias “Tseem muaj lus sau cia tias ‘Koj yuav tsis txhob ntxias koj tus Huab Tais Tswv Ntuj’.”

Dab phem tseem coj Yes Xus mus txog saum ib lub roob siab siab. Nws taw cov ceeb tsheej muaj koob meej nyob ntiaj teb rau Yes Xus ntsia. Nws hais tias “Yog koj txhos caug pe kuv, mas kuv yuav muab tej ntawd tas huv si rau koj.”

Yes Xus hais rau dab phem tias “Xas Tas, koj khiav mus! Vim muaj lus sau cia tias ‘Tus koj yuav pe, yog koj tus Huab Tais Tswv Ntuj. Koj yuav teev nws tib leeg xwb’.”

Dab phem thiaj khiav ntawm Yes Xus mus, ces cov Tshiab txav los tsob hwb Yes Xus (MT 4: 111).

Hnub tom qab, Zam pom Yes Xus tuaj ze ntawm nws, Zam hais rau nws cov thwj tim tias “Nej ntsia Tswv Ntuj tus Yaj, tus daws qab ntuj neeg cov txhaum. Tus ntawd yog tus uas kuv hais txog nws tias muaj ib tug neeg lawv kuv qab, nws yuav tuaj, nws twb huas kuv ntej lawm, vim nws xub nyob dua kuv. Kuv tsis tau paub nws, tab sis kuv tuaj ua kab ke ntxuav nyob hauv dej kom xwv nws tawm los rau His Xas Lais pom xyeem.” Zam hais cov lus ua tim khawv tias “Kuv pom Leej Ntuj Plig nqes saum ntuj xws li ib tug nquab los rau saum nws. Kuv tseem tsis tau paub nws, tab sis Tus xa kuv tuaj ua kab ke ntxuav hauv dej, nws hais rau kuv tias ‘Tus uas koj yuav pom Leej Ntuj Plig nqes los nyob saum nws, mas nws yog tus ua kab ke ntxuav nyob hauv Leej Ntuj Plig Ntshiab.’ Kuv tau pom, ces kuv ua tim khawv tias nws yog Tswv Ntuj tus Xaiv” (Z 1: 29-34).

Zam muaj ob tug thwj tim tuaj Npes Xais Das pem lub pas dej ntuj Nkas Lis Lais tuaj; yog As Nres thiab Zam Ntxes Npes Dais tus tub. Nkawd hnov Zam hais li ntawd, nkawd raws Yes Xus qab mus. Yes Xus tig los pom nkawd raws nws, ces Yes Xus hais rau nkawd tias “Neb nrhiav dab tsi?”

Nkawd hais rau Yes Xus tias “Xib Hwb, koj tsev nyob qhov twg?”

Yes Xus hais rau nkawd tias “Neb tuaj, neb yuav pom.”

Ces nkawd mus, nkawd pom qhov chaw Yes Xus nyob. As Nres thiab Zam kub siab txais Tswv Ntuj lo lus nyob hauv Ntawv Ntshiab, ces nkawd nyiam mloog Yes Xus cov lus piav rau nkawd, nkawd ntseeg tias Yes Xus yug tus Mes Xias uas cov Yaj Saub tau hais txog nyob hauv cov Ntawv Ntshiab. Lub hnub yuav poob qho ces nkawd thiaj mam rov qab los nyob hauv nkawd ob lub tsev pheej suab tsis deb tsis ze ntawm qhov chaw tus Ntxuav Plig Zam tuaj ua kab ke ntxuav.

As Nres mloog Yes Xus cov lus tas mas nws lub siab kub lug, ces tag kis nws mus ntsib nws tus tij laug Xis Moos. As Nres hais rau Xis Moos tias nws thiab Zam tau ntsib tus Mes Xias lawm, ces As Nres coj Xis Moos mus cuag Yes Xus. Yes Xus ntsia Xis Moos, Yes Xus tsom tau tias Xis Moos yuav yog ib tug txawj coj luag tej, nws yuav ua tau ib daim leeg phiaj zeb ces Yes Xus tis npe tshiab rau Xis Moos, Yes Xus hais tias “Koj yog Xis Moos, Zam tus tub, koj lub npe yuav hu ua Pob Zeb” (Z 1: 35-51).

Peb paub tias Yes Xus yog tus tsis muaj txhaum, yog tus siab dawb siab huv. Vim li cas Yes Xus tseem thov kom Zam ua kab ke ntxuav rau nws? 

Yog vim Yes Xus yuav pib tshaj lub Moo Zoo mas Yes Xus tsis xav kom zeej tsoom hais tias nws tuaj rhuav cov Yaj Saub uas xub qhia Tswv Ntuj Lo Lus tau ntau puas xyoo los lawm. Cov Yaj Saub tsuas pib cev Tswv Ntuj Lo Lus rau haiv neeg tos tus Huab Tais yuav tuaj. Ntawm Yes Xus mas nws tuaj qhia Tswv Ntuj Lo Lus, ces Yes Xus txhob txwm tuaj cuag Zam kom sawv daws paub tias Yes Xus tsis thuam cov ua nws ntej; Yes Xus xav kom sawv daws paub tias nws hwm cov Yaj Saub mas Yes Xus thiaj tuaj txais kab ke ntxuav ntawm Zam.

Hais txog dab phem ntxias Yes Xus nyob teb chaws suab puam, mas dab phem siv 3 zag tswv yim los ntxias Yes Xus. Yes Xus tsis mloog dab phem ntxias nws. Yes Xus paub tias nws cov hauj lwm tshaj Tswv Ntuj Lo Lus muaj nqe dua mov no ib puas npaug, muaj nqe dua txoj kev hnav zoo pw sov ib txhiab npaug. Yes Xus thiaj teb rau dab phem tias “Neeg tsis kawg muab mov los yug siav xwb. Neeg tseem yuav cov lo lus tawm ntawm Tswv Ntuj lub ncauj los yug siav thiab.” 

Dab phem ua txuj xav pab Yes Xus. Nws hais rau Yes Xus tias yog Yes Xus xav kom tas ib zeej tsoom neeg txais Tswv Ntuj Lo Lus mas kom Yes Xus siv hwj huam ces sawv daws yuav ntseeg sai. Tab sis Yes Xus tsis kam siv nws lub hwj huam los ua kom sawv daws qhuas txog nws. Yes Xus tsis kam yuam zeej tsoom kom lawv ntseeg nws. Yes Xus tsis kam yuam Tswv Ntuj kom Tswv Ntuj ua tej yam loj yuam sawv daws lub tswv yim thiab lub siab. Yes xus nyiam ua hwj haum hauv neeg lub siab ntau dua hauv neeg lub cev. 

Dab phem pom Yes Xus tsis swb nws, ces nws tab meeg hais kom Yes Xus pe nws thiab muab dab phem saib loj dua Tswv Ntuj mas dab phem yuav pub txoj kev yooj yim rau Yes Xus taug. Yes Xus kuj tsis yeem tso Tswv Ntuj pov tseg, txawm tias Tswv Ntuj txoj kev yog kev nyuaj thiab ceeb laj.