-5-
YES XUS TSEV NEEG

Thaum cov kws hnub qub rov qab mus lawm, tus Tshiab tawm tuaj ua npau suav rau Yos Xes tias “Koj sawv, koj coj tus me nyuam thiab nws niam khiav mus Hais Nkws Tos teb, koj yuav nyob ntawd mus txog thaum kuv rov tuaj qhia koj, vim Hes Los tab tom nrhiav tus me nyuam tua.” 

Yos Xes sawv, nws coj Mab Liab thiab tus me nyuam Yes Xus khiav hmo ntuj mus Hais Nkws Tos teb. Lawv mus li ib lub hlis thiaj txog Hais Nkws Tos teb. Lawv nyob Hais Nkws Tos teb li ob peb hlis ntau, ces txog caij Hes Los tuag.

Hes Los muaj 3 tug tub nto npe dua cov; yog ‘Fis Lis Pos’, ‘Hes Los As Kis Pas’ thiab ‘As Kes Los’. 

Thaum Hes Los tuag lawm, tus vaj Los Mas muab Pas Les Tis Nas faib rau Hes Los 3 tug tub sib pab kav; Fis Lis Pos kav lub xeev Is Tus Lias thiab Thas Kos Nis Tis, Hes Los As Kis Pas kav xeev Nkas Lis Lais thiab Pes Les, As Kes Los kav lub xeev Yus Das. 

Tus Tshiab tawm los ua npau suav rau Yos Xes tias “Koj sawv, koj coj tus me nyuam thiab nws niam, nej sawv kev rov mus His Xas Lais thaj av, vim cov neeg uas xav muab tus me nyuam tua, tuag lawm.” 

Yos Xes sawv, nws coj Mab Liab thiab Yes Xus rov los Pas Les Tis Nas. Tab sis, Yos Xes ntshai mus Yus Das teb, ces nws thiaj tsiv mus nyob xeev Nkas Lis Lais. 

Raws li Txoj Cai mas tus poj niam twg yug tau me tub mas nws yuav tsis huv mus txog 7 hnub, thiab yuav caiv li 33 hnub ntxiv hos yog yug tau me ntxhais mas nws yuav tsis huv txog 14 hnub thiab yuav caiv li 66 hnub. Thaum dhau lub caij caiv lawm, yuav cab ib tug me nyuam yaj li 1 xyoos thiab ib tug nquab lwb rwg, los ib tug thav nquab dawb mus hlawv txi Ntuj them txim. Tab sis yog nws nrhiav tsis tau ib tug me nyuam yaj mas tseev kom nws muab ib nkawg nquab lwb rwg, los ob tug thav nquab dawb hlawv txi Ntuj them txim ces nws thiaj rov huv (LV12: 1-8). Txoj cai tseem ceev tseg tias txhua tus me tub xub yug, yuav muab qee rau Tswv Ntuj.

Yos Xes lawv rov Hais Nkws Tos teb los, nws coj Mab Liab thiab tus me nyuam mus pem lub Tuam Tsev Teev Ntuj nyob Yes Lus Xas Les kom tau ua kab ke ntxuav thiab cev Yes Xus rau Huab Tais Tswv Ntuj raws li Mais Xes Txoj Cai. 

NKawd tuaj txog hauv lub Tuam Tsev Teev Ntuj, muaj ib tug txiv neej hu ua Xis Mes Oos los txais tus me nyuam Yes Xus rau hauv nws ob txhais npab, ces Xis Mes Oos cav lus zoo txog Tswv Ntuj tias “Txiv Tswv, nyem no koj tso koj tus tub txib mus kaj lug, raws li koj lo lus, vim kuv qhov muag tau pom koj txoj kev cawm neeg, uas koj npaj nyob ntawm ib tsoom haiv neeg xub ntiag, yog qhov pom kev tawm tuaj kaj cov pej kum haiv neeg, yog koj tsoom pej xeem His Xas Lais lub koob meej.”

Xis Mes Oos cav txog Tswv Ntuj li ntawd tas, nws foom hmoov zoo rau lawv. Leej Ntuj Plig Ntshiab qhia Xis Mes Oos ces nws thiaj ua Yaj Saub xub pom Yes Xus raug txom nyem thiab pom Mab Liab sawv ze ntawm tus Ntoo Cuam dai Yes Xus, ces  nws hais rau Mab Liab tias “Koj ntsia! Tus me nyuam no yuav ua chaw rau ntau leej His Xas Lais ntog thiab ntau leej rov sawv. Nws yog ib lub cim ua kom sawv daws sib cav. Hos ntawm koj, mas ib rab ntaj yuav hno koj tus plig, kom xwv tej lus uas coob leej xav tuaj nruab siab tawm los rau sawv daws paub.”

Nyob ntawd, tseem muaj ib tug poj niam hu ua As Nas, nws lub hnub nyoog laus kawg. As Nas ua poj ntsuam ces nws tuaj nyob rawv hauv lub Tuam Tsev Teev Ntuj kom tau teev Ntuj los hawm Tswv Ntuj thawm hnub thawm hmo. Leej Ntuj Plig Ntshiab kuj tshoj As Nas ces nws cav lus zoo txog Tswv Ntuj thiab hais txog tus me nyuam Yes Xus rau cov neeg tos txog txoj kev txhiv Yes Lus Xas Les.

Thaum Yos Xes coj nws poj niam Mab Liab thiab tus me nyuam Yes Xus ua txhua yam raws li Txoj Cai tas lawm, lawv rov mus Nas Xas Les.

Lub caij ntawd, lub zos Nas Xas Les yog ib lub zos me me muaj 35 los 40 lub tsev, thiab muaj 300 tus neeg nyob. Nas Xas Les nyob ntawm ib phab toj, tsis deb ntawm lub nroog Xes Fos Lis uas tus vaj Hes Los As Tis Pas nyob. Tsis deb ntawm lub zos Nas Xas Les mus rau sab pej mas yog lub zos Kas Nas, mus rau sab hnub tuaj mas yog lub roob Tas Npos, thiab muaj lub zos Nas Ees nyob tsis deb mus rau naj fab sab hnub tuaj.

Cov tsev nyob Nas Xas Les lub cuam khoov yog ntoo, cov phab ntsa yog av. Lub tsev muaj ob kem; thawj kem yog kem tsev mov, lwm kem yog cia pw. 

Nyob hauv kem tsev mov muaj lauj kaub av, muaj tshuab ntos ntaub, muaj cov hub rau nplej mov mog, cov hub rau roj, cov hub rau cawv txiv ntoo, cov hub rau dej, muaj lub zeb zom, muaj lub txee txawb twj taig thiab cov teeb tsav. 

Kem tsev pw mas muaj cov phij xab rau khaub ncaws, thiab cov mej loos ntim tej yam muaj nqe. Nyob rau ib sab lawv kauv cov lev pua chaw pw. Hmo ntuj lawv pua lev pw. 

Cov neeg nyob Nas Xas Les lawv ua teb npleg, cog txiv ntoo cawv thiab cog txiv ntoo roj. Lawv yug tus puav yaj thiab tshis los yug ib tug luj, yug qaib yug os, yug nees los yug nyuj. Tej yim tsis muaj tsiaj ntau mas lawv kaw tus luj los tus tshis los tus yaj nyob hauv kem tsev mov. Tab sis tej yim xov nkuaj nyob ti lub tsev.  

Nyob hauv lub zos Nas Xas Les mas lawv muaj ib lub tsev txoos. Lub tsev txoos yog lub tsev uas cov His Xas Lais sib sau nyeem cov Yaj Saub tej ntawv thiab teev Ntuj. Xya hnub lawv sib txoos ib zaug thaum hnub Xas Npas Tos.

Tsoom pej xeem Yus Das sawv daws puav leej hais xeem lus As Las Mais, tab sis nyob hauv cov Ntawv Tos Las thiab cov Yaj Saub tej ntawv mas yog sau ua xeem lus Hes Nplaws, ces nyob ze lub tsev txoos thiaj muaj ib lub tsev qhia cov ntawv Hes Nplaws rau cov me nyuam tub tuaj kawm. Tus qhia ntawv yog tus saib lub tsev txoos. Tus xib hwb xuas tes sau ntawv saum daim tawv yaj. Cov me nyuam zaum pem teb, nyias muaj nyias ib daig txiag plooj ciab ntab. Lawv xyaum kos cov txwm ntawv hauv ciab ntab. Cov tub hluas sawv daws tsum kawm cov Ntawv Tos Las los yog Txoj Cai hauv phau Ntawv Ntshiab Cog Lus Qub. 

Dhau ntawm xeem lus As Las Mais thiab Hes Nplaws lawm, tsoom pej xeem kuj siv lus Hes Las nrog cov nom tswv, cov tub rog, thiab cov neeg ua luam sib tham. 

Yog li mas thaum Yes Xus muaj 6 xyoo tej, nws thiaj tau kawm ntawv xws li cov me nyuam tub hauv lub zos.  

Yes Xus muaj 8 xyoo los 9 xyoo tej, nws nrog cov me nyuam hauv zos ua si. Nws pom cov neeg ua hauj lwm, pom lawv zom cov txiv ntoo ua cawv, pom lawv cub cawv, ntim cawv hauv cov hnab tawv yaj. Yes Xus pom lawv coj lawv cov yaj mus nog zaub, pom lawv tseb nplej, hlais nplej. Nws pom lawv xuas cov luj thauj nra. Yes Xus pom luag ua yam twg, hnov luag hais dab tsi, nws khaws tas puas tsav yam tseg hauv nws nruab siab.

Thaum Yes xus hlob me ntsis, nws muaj zog tuaj, nws nrog Yos Xes ua tus kws ntoo hauv lub zos Nas Xas Les. Nws nrog Yos Xes pab luag tsa cuam khoov tsev. Nws ua tej phij xab rau khaub ncaws, ua rooj noj mov. Nws txua tej rab voom thiab lwm yam twj uas sawv daws siv kam hauv tsev los siv mus ua liaj ua teb.

Yes Xus kuj niaj hnub fim cov neeg nyob hauv lub zos. Zaum puav nws mus xyuas cov kwv tij neej tsa nyob tsis deb tsis ze. Nws nrog sawv daws tham pem, nrog zej zog koom rooj qav. Rov txog tej hnub nyoog ua si, nws kuj nrog lawv so ua si. 

Niaj hnub, cov His Xas Lais teev Tswv Ntuj hauv lawv tsev peb zaug thaum sawv ntxov, thaum tav su, thiab thaum tsaus ntuj.

Thaum lawv teev Ntuj hauv lawv tsev li ntawd, lawv muab ib txog phuam los npua xub pwg, lawv tig xub ntiag ncaj rau lub tsheej Yes Lus Xas Les. Lawv hais ib zag teev Ntuj muaj 18 lo lus thov Ntuj thiab ua Ntuj tsaug.

Niaj lis piam, hnub xya los hais tias ‘Hnub Xas Npas Tos’, lawv caiv hauj lwm, lawv ua ib hnub lom zem nyob hauv lawv tsev, lawv hnav zam zoo nkauj, lawv teem ib lub caij ua tas zej zog mus sib sau hauv lub tsev txoos, lawv ua ke teev Ntuj, lawv hu cov Nkauj Paj Nruag los cav txog Tswv Ntuj, thiab lawv nyeem Ntawv Tos Las.

Nyob hauv lub xyoo, cov Yus Das muaj 4 lub Caij ua Hmoov loj tshaj nyob Yes Lus Xas Les: yam li ua Hmoov Hla, ua Hmoov Tsiab Caug, ua Hmoov Tsa Tsev Tsam Phooj, thiab ua Hmoov Them Txim.

Hmoov Hla yog lub 4 hli, lawv cav txog Tswv Ntuj cawm cov His Xas Lais dim ntawm Hais Nkws Tos teb. Txij thaum Yes Xus muaj 12 xyoos lawm nws niaj xyoo mus ua lub Ntees Hla nyob Yes Lus Xas Les.

Ua Hmoov Hla tas tau 50 hnub ces lawv ua Hmoov Tsib Caug, kuj yog ua tsaug rau Tswv Ntuj pub qoob loo. 

Txog lub 9 hli lawv ua Hmoov Them Txim; tus Thawj Leej Choj tua ib tug hees nyuj, nws muab cov ntshav los pov rau saum tsoom pej xeem thiab hauv Kem Tsev Ntshiab, nws muab tus tshis ris neeg txhaum tua. Lub 10 hli tej, thaum sawv daws sau qob thiab de txiv cawv, mas lawv ua Hmoov Tsa Tsev Tsam Phooj, lawv nyob hauv tsev tsam phooj 7 hnub. 

Mab Liab thiab Yos Xes, nkawd niaj xyoo mus ua lub Ntees Hla pem Yes Lus Xas Les. Thaum Yes Xus muaj 12 xyoos lawm, lawv mus ua lub Ntees Hla pem Yes Lus Xas Les raws li kev cai ua Ntees Hla. 

Ib txwm thaum txog lub caij ua Ntees Hla, cov hluas Yus Das ntau leej tuaj txog Yes Lus Xas Les mas lawv yuav nyob ob peb hnub ntxiv kom tau twv Ntawv Tos Las ntawm cov Kws Ntawv thiab cov Kws Txoj Cai. Yes Xus kuj mus nrog cov hluas twv Ntawv ntawm cov Kws Ntawv thiab, ces thaum ua Ntees Hla tas, Mab Liab thiab Yos Xes nkawd xav tias Yes Xus nrog pab swm neeg ua lawm, ces nkawd nrog sawv daws rov mus Nas Xas Les. 

Mab Liab thiab Yos Xes mus ib hnub ke, ces nkawd mam nrhiav Yes Xus nyob hauv cov kwv tij thiab nyob hauv cov swm neeg. Nkawd nrhiav tsis tau, nkawd thiaj rov mus pem Yes Lus Xas Les.

Nkawd nrhiav tau peb hnub, mam ntsib Yes Xus zaum hauv nruab nrab cov Kws Ntawv. Yes Xus mloog cov Kws Ntawv qhia thiab nug lawv txog cov Ntawv Tos Las. Cov Kws Ntawv hnov Yes Xus hais lus mas lawv poob siab thiab qhuas txog Yes Xus lub tswv yim thiab cov lus teb.

Mab Liab thiab Yos Xes nkawd pom Yes Xus nkawd zoo siab hlo. Mab Liab hais rau Yes Xus tias “Me tub, ua cas koj ua li ntawd rau koj txiv wb? Saib, koj txiv wb nrhiav tsis tau koj, ntxhov wb siab kawg.” Yes Xus nyob hauv lub Tuam Tsev Teev Ntuj, nws saib Tswv Ntuj yog nws Leej Txiv, ces Yes Xus hais rau Mab Liab thiab Yos Xes tias “Ua cas neb yuav nrhiav kuv? Neb tsis paub tias kuv yuav leg kuv Txiv tej hauj lwm lod?” Mab Liab thiab Yos Xes nkawd tsis to taub txog lo lus Yes Xus hais rau nkawd, ces nkawd khaws cia hauv nruab siab twj ywm. Yes Xus nrog Mab Liab thiab Yos Xes mus nram Nas Xas Les. Yes Xus mloog nkawd lus. Yes Xus hlob nyob hauv txoj kev thoob tsib. Nws hlob cev thiab hlob nyob hauv Ntuj lub txiaj ntsim, nyob ntawm Tswv Ntuj thiab nyob ntawm zeej tsoom xub ntiag.