-11-
KOJ LUB SIAB NTSEEG CAWM KOJ

Thaum Yes Xus nqes saum roob los, ib pab neeg coob pib raws nws. Muaj ib tug neeg mob ruas tuaj cuag Yes Xus, nws thov Yes Xus, nws txhos caug taij tias “Huab Tais, yog koj xav, mas koj yeej ua tau kom kuv rov huv.”

Yes Xus hlub tus neeg ntawd thiab pom tias tus mob ruas tso siab rau nws tiag, Yes Xus cev tes tuav nws thiab hais rau nws tias “Kuv xav. Koj rov huv mas.” 

Tam sim ntawd, tus mob ruas tso tus neeg ntawd tseg, nws cia li huv hlo. Yes Xus qhuab qhia nws nruj nruj thiab kom nws rov mus tam sis ntawd. Yes Xus hais rau nws tias “Koj ua twj ywm, txhob qhia dab tsi rau leej twg li.” 

Raws li Mais Xes Txoj Cai, thaum ib tug neeg mob ruas zoo lawm, nws yuav mus cuag cov Leej Choj thiab tua tsiaj ua ib thaj txi Ntuj mas cov Leej Choj thiaj zeem tseeb rau teb chaws tias tus neeg ntawd zoo lawm. Thaum cov Leej Choj ceeb toom li ntawd, mas tus neeg ntawd thiaj mam rov los nrog tsoom sid nyob koom vaj koom tsev thiab fim sawv daws tau, ces Yes Xus thaij hais rau tus mob ruas zoo lawm tias “Koj mus thws koj lub cev rau tus leej choj saib, thiab mus cev paj tshab ntxuav koj raws li Mais Xes qhia, ua puav pheej rau luag pom.” 

Tab sis tus neeg ntawd tawm plaws mus, nws pib tshaj tej ntawd thiab mus hais rau txhua qhov, ces tas lub nroog xav tias Yes Xus yog Leej Pleev vim cov Yaj Saub ib txwm hais tias thaum Leej Pleev yuav tuaj mas nws yuav muaj hwj huam kho cov neeg mob ruas tau thiab nws yuav kho tau cov neeg dig muag los cov neeg lag ntseg, thiab nws yuav tsa cov neeg tuag kom sawv rov los muaj sia. Yog li ntawd, Yes Xus tsis tau kev tab meeg mus hauv ib lub nroog li. Nws nyob sab nroog nraud, ntawm tej qhov chaw tsis muaj neeg. Neeg tseem tuaj tas qhov txhia chaw tuaj cuag Yes Xus (MT 8: 1-4, MK 1: 40-45, LK 5: 12-14). 

Yes Xus mus hauv Kas Fas Naus, ib tug xab txheeb txav los ze Yes Xus, nws thov tias “Huab Tais, kuv tus tub txib pw tom tsev, nws tes taw tuag tas. Nws mob heev kawg.”

Yes Xus teb tias “Kuv yuav mus kho nws.”

Tus xab txheeb hais ntxiv tias “Huab Tais, kuv tsis tsim nyog koj chaws los hauv kuv tsev, tsuav yog koj hais ib los lus xwb ces kuv tus tub txib yuav zoo hlo. Txawm tias kuv yog ib tug neeg zwm rau luag tej, kuv kuj muaj ib co tub rog zwm rau kuv thiab. Yog kuv hais rau ib tug tias ‘Koj mus’, nws cia li mus, kuv ho hais rau lwm tus tias ‘Koj los’, nws kuj cia li los. Kuv hais rau kuv tus tub txib tias ‘Koj ua qhov no’, nws cia li ua.”

Yes Xus hnov nws hais li ntawd, Yes Xus qhuas vim Yes Xus pom tus xab txheeb ntseeg tias Yes Xus muaj peev xwm kho cov neeg mob, Yes Xus pom tus xab txheeb ntseeg tias tsis tas Yes Xus yuav mus txog tus neeg mob tsev los Yes Xus yeej kho tau, thiab Yes Xus pom tus xab txheeb ntseeg tias Yes Xus muaj ib lub peev xwm tuaj ntawm Tswv Ntuj tuaj; Yes Xus yog Tswv Ntuj tus neeg. Yes Xus thiaj hais rau cov neeg raws nws tias “Kuv hais tseeb rau nej, kuv tsis tau pom ib tug neeg ntseeg npaum li ntawd hauv cov His Xas Lais. Kuv hais rau nej, yuav muaj neeg coob tuaj Toob Fab thiab Xib Fab tuaj nrog Has Nplas Has, nrog His Xas Has thiab Yas Kos noj rooj qav hauv Ntuj lub Ceeb Tsheej. Hos Ntuj yuav muab cov tub hauv Ceeb Tsheej rho mus pov rau hauv qhov tsaus ntuj nraum zoov; nyob nraud, sawv daws yuav quaj tom hniav nkawv.”

Yes Xus hais rau tus xab txheeb tias “Koj rov mus! Xav kom koj tau raws li koj lub siab ntseeg!” Tus xab txheeb ua raws li Yes Xus hais, nws pom tias tus tub txib zoo lawm (MT 8: 5-13).

Yes Xus los txog Kas Fas Naus, sawv daws paub tias Yes Xus nyob hauv tsev, ces neeg tuaj sib sau coob coob ua ke tsis tshuav chaw seem ntawm qhov rooj li. Yes Xus qhia Lo Lus rau sawv daws. Muaj plaub leeg nqa ib tug tuag ceg tuaj rau Yes Xus. Lawv tsis tau kev nqa tus tuag ceg los rau Yes Xus vim neeg coob dhau, ces lawv yaws lub ruv tsev ncaj qhov chaw Yes Xus nyob, lawv tho qhov saum ruv tsev, lawv dauv lub txaj uas tus tuag ceg pw nqes los. 

Yes Xus pom lawv lub siab ntseeg vim lawv kwv tus mob tuaj thiab lawv nrhiav tau kev tso tus neeg mob nqes los ntawm Yes Xus xub ntiag, Yes Xus hais rau tus tuag ceg tias “Me kwv, koj cov txhaum daws tas lawm.” 

Tos Yes Xus hais li ntawd vim cov Yus Das ntseeg tias tos neeg mob mas yog cov neeg muaj txhaum. 

Muaj ib co kws Ntawv Ntshiab nrog tsoom neeg zaum nyob ntawd, lawv xav hauv nruab siab tias “Tus neeg ntawd hais dab tsi li ntawd? Nws thuam Ntuj! Leej twg thiaj daws txhaum tau? Tsuas kawg Tswv Ntuj tib leeg xwb.”

Yes Xus lub tswv yim paub tam sis ntawd tias lawv xav qhov ntawd hauv siab, nws thiaj hais rau lawv tias “Ua cas nej xav tej zaj zoo li no hauv nej siab? Lo lus twg yog lo hais yooj yim dua rau tus tuag ceg; Yog lo tias ‘Koj cov txhaum daws tas’, los yog lo tias ‘Koj sawv, nqa koj lub txaj, koj mus’? Ua li mas, nej yuav paub tias Neeg Leej Tub muaj hwj huam daws txhaum tau nyob ntiaj teb no.”

 Ces Yes Xus hais rau tus tuag ceg tias “Kuv hais rau koj, koj sawv, nqa koj lub txaj, koj rov mus tsev.” 

Tus tuag ceg sawv tsees. Nws nqa hlo nws lub txaj tam sim ntawd, nws hla sawv daws xub ntiag tawm mus. Cov neeg nyob ntawd yoob tas, lawv cav txog Tswv Ntuj, thiab lawv hais tias “Peb tsis tau pom dua ib yam zoo li ntawd ib zaug li” (MT 9: 1-8, MK 2: 1-12).

Yes Xus tseem tab tom hais lus rau lawv, muaj ib tug nom tswj lub tsev txoos hu ua Yais Los tuaj txog, nws txhos caug ntua ntawm Yes Xus, nws thov tias “Kuv tus ntxhais txoj sia nyuam qhuav tu. Thov koj tuaj tsa tes rau saum nws, ces nws yuav rov muaj txoj sia.”

Yes Xus sawv, cov thwj tim nrog Yes Xus lawv tus nom qab mus. Muaj ib tug poj niam tsob ntshav tau kaum ob xyoos lawm, nws txav los ze ntawm Yes Xus nraub qaum, nws kov Yes Xus lub tw tsho. Vim nws xav hauv siab tias ‘Tsuav yog kuv kov tau nws lub tsho xwb, mas kuv yuav dim.’ 

Yes Xus tig ntsia, nws pom tus poj niam, ces nws hais rau tus poj niam tias “Phauj, koj tso siab mog! Koj lub siab ntseeg cawm koj lawm.”

Tus poj niam cia li dim plaws ntawm tus mob txij ntawd los. Yes Xus tuaj txog tus nom lub tsev, nws pom cov txiv raj thiab pom neeg coob ua ntxhov hnyo. Yes Xus hais tias “Nej tawm mus. Tus me ntxhais tsis tuag, nws tsaug zog xwb.”

Sawv daws luag Yes Xus. Thaum cov neeg tawm nraum zoov tas, Yes Xus chaws mus hauv, nws tuav tus ntxhais txhais tes, ces tus ntxhais sawv los. Lub moo ntawd nto mus thoob thaj tsam ntawd (MT 9: 18-26).

Thaum Yes Xus tawm ntawm qhov chaw ntawd mus, muaj ob tug neeg dig muag raws nws qab. Nkawd qw qw hais tias “Das Vis Leej Tub, thov koj khuv leej wb.”

Thaum Yes Xus los txog hauv tsev, ob tug dig muag los ze Yes Xus, ces Yes Xus hais rau nkawd tias “Neb puas ntseeg tias kuv ua tau qhov ntawd?”

Nkawd teb tias “Huab Tais, wb ntseeg.” 

Yes Xus kov nkawd qhov muag, nws hais tias “Xav kom muaj rau neb raws li neb ntseeg.” Ces nkawd qhov muag qhib los. Yes Xus txwv nkawd nruj nruj tias “Neb ceev faj! Kom txhob muaj neeg paub!”

Tab sis, thaum nkawd tawm mus lawm, nkawd tshaj rau ib cheeb tsam ntawd paub tas huv si (MT 9: 27-31).