-2-
NEJ NPAJ TXOJ KEV RAU HUAB TAIS, NEJ KHO NWS COV HAUV KEV KOM NCAJ

Xyoo 740 ua Yes Xus ntej, Huab Tais Tswv Ntuj tshoj His Xais kom ua Yaj Saub, ces His Xais tau tshaj txog tus Ntxuav Plig Zam tias “Kuv xa kuv tus tub tshaj xo mus ua koj ntej, nws yuav npaj koj txoj kev. Tus qw hauv teb chaws quav poj lub suab hais tias ‘nej npaj txoj kev rau Huab Tais, nej kho nws cov hauv ev kom ncaj’ (HX 40: 3). Thaum cov Yus Das rov los nyob Yus Das teb, tus Yaj Saub Mas Las Kis kuj tau tshaj Huab Tais Tswv Ntuj cov lus tias “Kuv yuav xa kuv tus tub tshaj xov mus tho kev ua kuv ntej. Nsia saib! Kuv yuav xa Es Lias rov los cuag nej, nws yuav coj leej txiv lub siab los npuab leej tub thiab leej tub lub siab rov mus cuag leej txiv” (MLK 3: 1, 23-24). Yog li mas ua ntej Tswv Ntuj Leej Tub yuav txais lub cev nqaij xws li tib neeg, Huab Tais Tswv Ntuj thiaj xub xa Zam tuaj ua Yaj Saub qhia cov Yus Das kom paub txoj kev cawm uas tawm ntawm txoj kev zam txhaum los (LK 1: 77).
Zam yog Ntxas Kas Lias thiab Es Lis Xas Npes tus me nyuam, nws hlob Huab Tais Yes Xus li 6 hli. Zam hlob nyob hauv lub xeev Yus Das, nws muaj Leej Ntuj Plig nyob puv nws. Zam mus coj ib lub neej Twj Cuab nyob teb chaws suab puam, nws yuam nws lub cev, nws noj me kab me kooj thiab zib mu cawm siav, Zam muab ib daig tawv tsiaj los npua. 
Thaum Tis Npes Xes Ntxas (Tiberius Caesar) ua vaj tau 15 xyoos, Tswv Ntuj Lo Lus tauj txog Zam, ces Zam tuaj mus ncig thoob thaj tsam ntawm dej Yos Las Das. Zam tshaj ib co kab ke ntxuav pab lees txhaum kom Ntuj zam txhaum. Zam mus ntuas tsoom sid nyob hauv teb chaws suab puam Yus Das. Nws hais tias “Nej hloov siab mog, vim Ntuj lub Ceeb Tsheej los txog ze lawm.” 
Tas cov nyob Yes Lus Xas Les, cov nyob Yus Das teb, thiab cov nyob ib thaj tsam raws tus dej Yos Las Das puav leej tuaj cuag Zam. Lawv lees txhaum, thiab thov Zam ntxuav lawv nyob hauv tus dej Yos Las Das. Lawv nug Zam tias “Peb yuav ua dab tsi?” 
Zam teb rau lawv tias “Tus muaj ob lub tsho, yuav faib rau tus tsis muaj. Tus muaj mov noj, nws kuj yuav ua li ntawd thiab.” 
Ib co sau se kuj tuaj txais kab ke ntxuav, lawv hais rau Zam tias “Xib Hwb, peb yuav ua dab tsi?”
Zam hais rau lawv tias “Nej tsis txhob kom luag them tshaj txoj cai txiav.” 
Ib co tub rog kuj nug Zam tias “Peb ne, peb yuav ua dab tsi?” 
Zam hais rau lawv tias “Nej txhob quab yuam leej twg, txhob ntxias yuav dab tsi. Nej nyiaj hli raug npaum li cas, mas nej yuav txaus siab txais li ntawd.”
Thaum Zam pom coob tus Fas Lis Xais thiab ntau tus Xas Dus Kais tuaj txais kab ke ntxuav, nws hais rau lawv tias “Caj ces nab muaj taug, leej twg qhia nej khiav kom nej dim ntawm Ntuj Txoj Kev Npau Taws uas tuaj yuav txog? 
Nej kav tsij txi ib co txiv tsim nyog tus neeg hloov siab. Nej txhob khav rau nruab siab tias ‘Peb muaj Has Nplas Has ua peb txiv.’ 
Kuv hais rau nej tias Tswv Ntuj yuav ua kom Has Nplas Has ib co xeeb ntxwv tawm hauv cov pob zeb no los kuj tau. Zaum no, rab taus twb nyob ntawm cag ntoo lawm, tsob ntoo twg tsis txi txiv zoo, yuav tsum muab txiav pov hlawv hauv hluav taws.”
Tsoom pej xeem ua xyem xyav txog Zam rau nruab siab tias tej zaum Zam yog Leej Pleev, ces lawv xa ib cov Leej Choj thiab cov Les Vis tuaj nug Zam tias “Koj yog leej twg?”
Zam hais tias “Kuv tsis yog Leej Pleev.”
Lawv nug Zam tias “Ua li koj yog leej twg? Koj puas yog Es Lias?”
Zam hais tias “Kuv tsis yog.”
Lawv nug ntxiv tias “Koj puas yog tus Yaj Saub?”
Zam teb tias “Tsis yog.”
Lawv thiaj hais rau Zam tias “Koj yog leej twg? Peb yuav tsum coj ib lo lus teb rov mus rau cov xa peb tuaj. Koj hais dab tsi txog koj?”
Zam hais tias “Kuv yog tus neeg nyob hauv teb chaws quav poj lub suab qw tias ‘Nej ua kom Huab Tais txoj kev rov tiaj, raws li yaj saub His Xais tau hais tseg’.”
Lawv nug Zam tias “Koj tsis yog Leej Pleev, tsis yog Es Lias, thiab tsis yog tus Yaj Saub, vim li cas koj thiaj ua kab ke ntxuav?”
Zam teb rau lawv tias “Kuv ua kab ke ntxuav nyob hauv dej kom nej tig los yuav ib lub siab tshiab; hos tus lawv kuv qab tuaj, nws muaj zog dua kuv, kuv tsis tsim nyog hle nws nkawm khau. Tus ntawd yuav ntxuav nej nyob hauv Leej Ntuj Plig Ntshiab thiab nyob hauv hluav taws. Nws txhais tes tuav rawv ib lub vab, nws yuav ntxuaj nws lub tshav ntaus nplej, nws yuav yawm cov nplej qoos rau hauv txhab, hos cov npluag, nws yuav muab hlawv hauv cov hluav taws tsis txawj tuag” (MT 3: 1-12, MK 1: 1-8, LK 3: 1-18, Z 1: 19-28).
Zam qhuab qhia tas zog kom sawv daws ‘hloov siab tshiab’ tig los mloog Tswv Ntuj cov lus qhia, mas lawv thiaj tsim nyog txais lub Moo Zoo uas Huab Tais Yes Xus yuav tshaj rau lawv. 
Tus neeg hloov siab tshiab, nws yuav tsum ‘tu siab rau rau tej yam nws ua tsis yog, ces nws txiav siab hloov tswv yim thiab tso qhov nws ua tsis yog ntawd pov tseg, ces lawv tig los ua qhov haum rau Tswv Ntuj cov lus qhia. Zam thiaj hais rau cov tuaj txais kab ke ntxuav ntawm nws tias “Yog nej muaj ob lub tsho, nej yuav faib ib lub rau tus tsis muaj. Yog nej muaj mov noj, nej kuj yuav pub nej cov mov rau tus tsis muaj. Yog nej ua cov hauj lwm sau se, mas nej kuj yuav kom luag them se raws qhov ncaj, nej txhob quab yuam leej twg, txhob ntxias yuav dab tsi ntawm lwm tus. Nej cov ua hauj lwm thawm hli, mas nej yuav rau siab ua nej txoj hauj lwm thiab nej yuav txaus siab txais nej cov nyiaj hli.”
Zam ua kab ke ntxuav, yog ua ib lub cim kom lawv pom tias lawv tu siab thiab tig los yuav lub siab tshiab hloov tus cuj pwm tshiab, tsis yog ‘ntxuav lawv cov txhaum’ kom tas. 
Peb yuav muab kev hloov siab tshiab piv tau rau dab tsi zoo?
Peb saib tus neeg haus luam yeeb, muaj ib hnub twg nws cia li ua ib siab thum luam yeeb tsis haus ntxiv; tsis yog nws haus txaus lawm ces nws tsis haus, yog nws pom tias luam yeeb tsis muaj dab tsi zoo rau nws lub cev. Tus neeg haus dej haus cawv, muaj ib hnub nws pom tias yog hauv ntxiv mus mas nws kawg tuag, ces nws ua ib siab tso tseg dej cawv.
Peb muab pib li no kom nej ntsia pom tias kev hoov siab tshiab muaj ntsis zoo li ntawd. 
Zam qhia lawv kom ua neeg xyuam xim ceev faj, vim tias ib hnub tom hauv ntej Tswv Ntuj yuav muab txim rau cov neeg phem uas pheej ua tej yam nkaus. 
Zam hu cov Yus Das kom hloov siab tshiab, kom lawv npaj Huab Tais txoj kev kom tiaj thiab ncaj; nyem no Huab Tais Tswv Ntuj kuj hais li ntawd rau peb, kom peb npaj txoj kev rau Huab Tais Yes Xus taug los nyob hauv peb txoj sia. Peb yuav ua zoo li no; tus muaj lub siab tsis du, lub siab ua taiv tais ib qho siab ib qho qis, nws yuav tau hliv txoj kev nyiam rau kom lub siab puv tuaj, kom lub siab du dais. Tus muaj lub siab nkhaus nws yuav nchuav nws lib siab rau hauv tus qauv ncaj kom nws lub siab ncaj tuaj. Tus muaj lub siab nqaim nws yuav tau nthuav siab kom dav. Tus muaj lub siab tshaj, nws kuj yuav txiav qhov tshaj ntawd pub rau lwm tus.
Peb kuj yuav mloog Tswv Ntuj cov lus qhia, vim kev mloog Tswv Ntuj yog kev nyiam Tswv Ntuj. Yog tias peb hu txog Tswv Ntuj lub npe thiab peb vam txog Tswv Ntuj pab peb hos peb tsis mloog Tswv Ntuj cov lus qhia mas peb kawg yuav raug txim, peb yuav zoo li ib cov ntoo uas xuas rab taus muab ntov pov tseg.
Zam hais tias nws ua kab ke ntxuav nyob hauv dej kom cov neeg tig los yuav ib lub siab tshiab; hos Huab Tais Yes Xus yuav ntxuav sawv daws nyob hauv Leej Ntuj Plig Ntshiab thiab nyob hauv hluav taws. Qhov no yog Zam xav qhia tias Huab Tais Yes Xus yuav xa Leej Ntuj Plig nqes los nyob saum cov neeg ntseeg txog nws, Leej Ntuj Plig cov hluav taws yuav kub lug hauv lawv lub nrog cev kom lawv ua tim khawv txog lub Moo Zoo. Leej Ntuj Plig yuav ntxuav lawv kom ntshiab tuaj. Huab Tais Yes Xus yuav ntxuav cov neeg ntseeg txog nws kom lawv rov yug tshiab nyob hauv Leej Ntuj Plig Ntshiab.
Leej Ntshiab Paj Lug hais tias tus muaj Leej Ntuj Plig nyob hauv nws, mas nws yuav ua neeg nyiam Ntuj (Love), nws zoo siab ua neeg (Joy), nws nyob kaj lug (Peace), nws ua siab ntev (Patient endurance), nws xyiv fab pab luag tej (Kidness), nws ua siab zoo rau lwm tus (Generosity), nws tso siab rau luag (Faith), nws txawj hlub luag tej (Mildness), thiab nws txawj kav nws lub cev (Chastity) (NLT 5: 22-23).
Lub Koom Txoos tau qhia tias Leej Ntuj Plig Ntshiab pub ntau lub txiaj ntsim rau tus txais Leej Ntuj Plig; yam li kev thoob tsib (Wisdom), lub siab ntseeg (Faith), zaj tswv yim zoo (right judgement), kev to taub (understanding), lub siab loj (courage), kev paub (knowledge), thiab kev hwm Ntuj (fear of the Lord).
Zam qhia tias Huab Tais Yes Xus yuav ntxuav sawv daws nyob hauv hluav taws. Yog kawg, muaj ib hnub twg, Huab Tais Yes Xus yuav ua tus txiav txim rau sawv daws. Nyob hauv phau ntawv Qhib Yav Tom Ntej hais tias “Kuv tseem pom ib lub theej kiab loj dawb paug, thiab pom tus zaum saum lub theej kiab. Lub ntuj lub teb khiav mus deb ntawm nws lub ntsej muag. Tsis muaj chaw rau lub ntuj lub teb nyob ntxiv lawm. Ces kuv pom cov tuag, cov hlob, cov yau huv tib si, sawv daws sawv ntsug nyob ntawm lub theej kiab xub ntiag. Luag nthuav tej phau ntawv, luag tseem nthuav dua ib phau ntxiv thiab, yog phau ntawv txheeb txoj sia. Ces ib tsoom neeg tuag raug txiav txim raws li cov lus sau tseg rau hauv tej phau ntawv ntawd, raws nraim cov hauj lwm uas lawv tau ua. Lub hiav txwv xa cov tuag, uas mus nyob hauv hiav txwv rov los. Txoj Kev Tuag thiab Tub Tuag Teb xa cov tuag rov los. Lawv nyias raug txiav txim raws li nyias cov hauj lwm. Ntuj muab Txoj Kev Tuag thiab Tub Tuag lub Teb Chaws pov tseg rau hauv lub pas hluav taws; lub pas hluav taws no” (QYTN 20: 11-15).