-7-
YES XUS HU THAWJ PAB THWJ TIM

Tom qab Zam ua kab ke ntxuav rau Yes Xus tas, Yes Xus mus nyob teb chaws suab puam. Nyob ntawd, dab phem tuaj ntxias Yes Xus tab sis Yes Xus tsis zwm rau dab phem kev ntxias. Yes Xus nyob tau 40 hnub 40 hmo mas nws mam rov tom teb chaws suab puam los, ces Zam pom Yes Xus. Zam qhia cov thwj tim tias Yes Xus yog Tswv Ntuj tus Pleev tuaj cawm lub qab ntuj neeg. As Nres thiab Zam Ntxes Npes Dais tus tub hnov li ntawd, nkawd raws Yes Xus mus. Nkawd nrog Yes Xus sib tham ib tog hnub mas nkawd ntseeg tias Yes Xus yog tus Pleev tiag. Thaum nkawd rov qab los tom nkawd qhov chaw so, As Nres tham qhia nws tij laug Xis Moos thiab coj Xis Moos mus ntsib Yes Xus. Yes Xus tis lub npe tshiab rau Xis Moos tias ‘Pob Zeb’.

Yes Xus rov los rau lub zos Nas Xas Les. Hnub Xas Npas Tos, Yes Xus mus hauv lub tsev txoos, ces lawv kom Yes Xus mus nyeem phau Ntawv Ntshiab. Tus tub txib cev tus Yaj Saub His Xais phau ntawv rau Yes Xus. Yes Xus nthuav kauj ntawv, nws nyeem tus Yaj Saub cov lus tias “Huab Tais lub Tswv Yim nyob saum kuv, vim nws pleev roj los qee kuv. Nws xa kuv mus tshaj lub Moo Zoo rau cov pluag. Nws xa kuv mus ceeb toom rau cov nyob txim tias lawv yuav dim, rau cov dig muag tias lawv yuav rov pom kev, rau cov raug luag yuam tias lawv yuav rov tau ua neeg twj lij, kom kuv tshaj tias yog xyoo Huab Tais yuav pub txiaj ntsim.”

Nyeem tas Yes Xus kauv phau ntawv, nws rov muab rau tus tub txib, ces Yes Xus zaum. Tas tsoom neeg uas nyob hauv lub tsev txoos ntsia ntsoov Yes Xus saib Yes Xus yuav nthuav cov lus ntawd li cas. Yes Xus thiaj hais rau lawv tias “Hnub no, cov lus nyob hauv zaj Ntawv no tsheej xeeb raws li nej tau hnov.” 

Tas cov neeg ntawd hnov li ntawd, lawv pib sib tham tias “Tus ntawd, tsis yog Yos Xes tus tub lod?” Ces Yes Xus hais rau lawv tias “Kuv hais tseeb rau nej, tsis muaj ib tug yaj saub uas luag yuav txais nws zoo hauv lub zos nws hlob. Kuv hais tseeb rau nej lub caij Es Lias nyob, muaj coob tus poj ntsuam nyob His Xas Lais teb. Thaum ntuj kaw nag tau peb xyoos thiab rau hli, tas teb chaws tshaib plab loj kawg. Tab sis Ntuj tsis xa Es Lias mus pab cov poj ntsuam His Xas Lais ib tug li. Ntuj xa Es Lias mus pab ib tug poj ntsuam nyob lub zos Xas Les Tas, nyob Xis Doos teb. Lub caij tus yaj saub Es Lis Xais nyob, muaj coob tus mob ruas nyob His Xas Lais teb, tab sis tsis muaj ib tug mob ruas His Xas Lais rov huv, tsuas yog tus mob ruas Xis Lias hu ua Nas Maas thiaj rov huv.”

Tas cov neeg hauv lub tsev txoos hnov cov lus ntawd, mas lawv npau taws kawg. Lawv sawv tsees, lawv ntiab Yes Xus tawm sab nroog nraud. Lawv coj Yes Xus mus txog ntawm ib phab toj saum lub roob uas lawv txhim lub nroog, lawv yuav thawb Yes Xus kom poob lawm hauv lub qab toj ntxhab. Tab sis Yes Xus hla plaws hauv nruab nrab lawv, nws taug nws kev mus lawm (LK 4: 16-30).

Yes Xus nqes mus nram lub nroog Kas Fas Naus nyob ntawm ntug dej ntuj Nkas Lis Lais. Yes Xus pib tshaj tias ‘Nej hloov siab mog, vim Ntuj lub Ceeb Tsheej los txog ze lawm” (MT 4: 17).

Yes Xus tuaj txog ntawm lub zos Npes Xais Das nyob ntawm lub hauv dej ntuj Nkas Lis Lais. Muaj ib pab neeg coob sib txiv mloog Yes Xus, ces Yes Xus pom ob lub nkoj nres ntawm ntug dej. Cov tub puav ntses nqes nkoj tas lawm, lawv tab tom ntxuav lawv cov vas. Yes Xus pom ib tug hauv cov neeg puav ntses yog Xis Moos tus uas Yes Xus muab hu ua Pob Zeb, ces Yes Xus nce mus hauv Pob Zeb lub nkoj, nws kom Pob Zeb nquam nkoj mus deb ntawm ntug dej me ntsis. Yes Xus zaum hauv nkoj qhia tsoom sid.

Thaum Yes Xus hais lus tas, nws hais rau Pob Zeb tias “Koj nquam nkoj mus lawm tom qhov dej tob, nej tso nej cov vas nqes mus puav ntses.”

Pob Zeb teb tias “Xib Hwb, peb twb khwv ib hmos tsis tau dab tsi. Tab sis yog vim koj hais, mas kuv yuav pov cov vas nqes mus.” Ces lawv pov vas, lawv puav tau ntses ntau kawg ua lawv cov vas ntuag kiag. Lawv co tes rau cov npawg nyob lwm lub nkoj kom tuaj pab. Cov npawg tuaj txog, sawv daws muab ntses ntim rau ob lub nkoj puv nkaus, ua nkoj yuav luag tog.

Pob Zeb pom li ntawd, nws txhos caug ntua pe Yes Xus, nws hais tias “Huab Tais, koj txav mus deb kuv, vim kuv yog ib tug neeg txhaum.”

Pob Zeb ntshai kawg, nws ob tug npawg Yas Kos thiab Zam uas yog Ntxes Npes Dais ob tug tub kuj ntshai kawg. Yes Xus hais rau Pob Zeb tias “Koj txhob ntshai, txij no mus, koj yuav puav neeg” (LK 5: 1-11).

Yes Xus hais li ntawd tas, tab sis zoo li Pob Zeb lawv tseem ua xyem xyav, ces muaj ib hnub Yes Xus rov tawm tuaj taug ntug pas dej ntuj Nkas Lis Lais, nws rov pom Pob zeb thiab tus kwv As Nres. Nkawd tseem tab tom pov vas ntses rau hauv dej ntuj. Yes Xus hais rau nkawd tias “Neb raws kuv mus, kuv yuav tsa neb ua tub puav neeg.”

Yes Xus mus ntxiv, nws ho pom Yas Kos thiab Zam, nkawd tab tom nrog nkawd txiv Ntxes Npes Dais ntxiv cov vas ntses nyob hauv nkoj. Yes Xus hu nkawd.

Zaum no, Pob Zeb, As Nres, Yas Kos, thiab Zam lawv tsis ua xyem xyav ntxiv, lawv txiav txim siab mloog Yes Xus lus, ces lawv tso plhuav cov vas ntses thiab cov nkoj tam sis ntawd, lawv sawv daws raws Yes Xus mus (MT 4: 18-22).

Hnub tom Yes Xus, Pob Zeb, As Nres, Yas Kos thiab Zam lawv mus hauv lub zos Npes Xais Das. Yes Xus ntsib Fis Lis Pos ces Yes Xus nrog Fis Lis Pos tham thiab yaum Fis Lis Pos kom raws nws mus. Fis Lis Pos muaj ib tug phooj ywg hu ua ‘Nas Tas Nais’ ces nws khiav mus hais qhia tus phooj ywg tias “Tus uas Mais Xes tau sau txog nyob hauv Txoj Cai, thiab cov yaj saub tau hais txog, mas peb ntsib lawm. Yog Yes Xus, Yos Xes nyob Nas Xas Les tus tub.”

Nas Tas Nais hais rau Fis Lis Pos tias “Puas yuav muaj ib yam zoo tawm hauv Nas Xas Les tuaj tau?” Fis Lis Pos hais tias “Koj tuaj, koj yuav pom.” Ces Nas Tas Nais nrog Fis Lis Pos mus ntsib Yes Xus. 

Yes Xus pom Nas Tas Nais tuaj, nws hais rau lawv cov raws nws tias “Nej saib, tus ntawd yog ib tug tseem His Xas Lais uas tsis zais siab li.”

Nas Tas Nais hnov Yes Xus hais txog nws li ntawd rau cov nrog Yes Xus mas Nas Tas Nais nug Yes Xus tias “Ua cas koj paub kuv?” 

Yes Xus teb rau Nas Tas Nais tias “Thaum Fis Lis Pos tsis tau hu koj, kuv twb pom koj nyob hauv tsob qab ntoo txiv ncuav pias.”

Nas Tas Nais pom tias Yes Xus hais li ntawd mas raug kawg vim thaum Fis Lis Pos tuaj hais txog Yes Xus rau nws, mas nws tab tom zaum nyeem phau Ntawv Ntshiab nyob hauv tsob qab ntoo txiv bcuav pias tiag; ces Nas Tais Nais ntseeg tias Yes Xus yog Tswv Ntuj tus Pleev tiag, ces Nas Tas Nais teb rau Yes Xus tias “Xib Hwb, koj yog Tswv Ntuj Leej Tub tiag! Koj yog His Xas Lais tus Vaj.”

Nas Tas Nais hais li ntawd, vim cov Ntawv Ntshiab sau txog Leej Pleev tias yog cov tus vaj cawm cov His Xas Lais ntawm kev ua qhev. Lawv hu cov vaj ua ‘Tswv Ntuj Leej Tub’.

Yes Xus hais rau Nas Tas Nais tias “Yog vim kuv hais rau koj tias kuv pom koj nyob hauv tsob qab ntoo txiv ncuav pias, mas koj thiaj ntseeg. Koj yuav pom tej yam loj dua no.” Ces Yes Xus tig los hais rau pab neeg raws nws tias “Kuv hais qhov muaj tseeb tiag rau nej tias nej yuav pom ntuj qhib los, thiab pom Tswv Ntuj cov Tshiab nce thiab nqes los saum Neeg Leej Tub” (Z 1: 43-51). Yes Xus cov lus hais rau lawv muaj ib lub ntsiab tias Yes Xus yog ib tug loj dua lawv xav, thiab yog lawv raws Yes Xus mas muaj ib hnub lawv yuav pom xws li thaum ub Yas Kos tau pom; yam li pom tus ntaiv ntuj muaj cov Tshiab mus mus los los.