-8-
YES XUS COV CIM

Yes Xus lawv nyob Npes Xais Das ob peb hnub tej ces lawv nce mus pem lub zos Kas Nas. Nyob hauv lub zos lawv muaj ib rooj tshoob mas lawv caw Yes Xus thiab cov thwj tim mus koom. Tus nraug vauv lawv tsis tshuav cawv ntxiv lawm, Mab Liab hais rau Yes Xus tias “Lawv tsis muaj cawv ntxiv lawm.” Ces Yes Xus hais rau nws niam tias “Niad, tsis yog wb hauj lwm. Kuv lub sij hawm tseem los tsis tau txog.”

Mab Liab thiaj hais rau cov tub ce cawv tias “Yes Xus kom nej ua yam twg, mas nej ua huv tib si mog.”

Nyob ntawd, muaj rau lub hub zeb teem dej rau cov Yus Das siv raws li lawv tej kev cai ntxuav tes. Yes Xus hais rau cov tub ce cawv tias “Nej hliv dej kom puv cov hub no.” Ces lawv hliv dej puv nkaus cov hub. Yes Xus hais rau lawv tias “Zaum no, nej ce cov dej no nqa mus rau txiv thiaj com.” 

Cov tub ce cawv thiaj ce cov dej ntawd nqa mus. Thaum txiv thiaj com saj cov dej txia ua cawv, nws hu nraug vauv los. Nws hais rau nraug vauv tias “Sawv daws ce cov cawv qab los haus tso. Thaum cov neeg qaug cawv lawd, mam li ce cov qab tsis heev los haus. Hos koj, koj muab cov cawv qab cia txog tav no” (Z 2: 1-11).

Thaum koom rooj tshoob tas, Yes Xus, Mab Liab, Yes Xus cov kwv tij thiab cov thwj tim nqes mus nram Kas Fas Naus. Hnub xas npas tos, Yes Xus mus hauv lub tsev txoos, nws qhia sawv daws tam sim ntawd. Zeej tsoom qhuas nws cov lus qhia, vim nws qhia lawv xws li neeg muaj peev xwm, tsis zoo li cov kws Ntawv Ntshiab.
Nyob hauv lawv lub tsev txoos, tam sim ntawd, muaj ib tug neeg raug ib tug dab tsis huv nthe nthe tias “Yes Xus Nas Xas Les, koj xav ua dab tsis rau wb? Puas yog koj tuaj rhuav wb? Kuv paub koj yog leej twg; koj yog Tswv Ntuj tus Ntshiab.” 

Yes Xus cem nws tias “Ua twj ywm, koj cia li tawm hauv tus neeg no mus.” 

Dab tsis huv siv zog muab tus neeg ntawd co heev heev, nws nthe ib suab nrov nrov ces nws tawm hauv tus neeg mus. Tas sawv daws ntshai, lawv sib nug zom zaws tias “Qhov ntawd yog dab tsi? Puas yog ib txog kev qhuab qhia tshiab muaj peev xwm? Tab yog dab tsis huv, los nws tswj lawv, ces lawv mloog nws lus.” Ces ib sij huam, Yes Xus lub moo nto lug rau txhua qhov, mus thoob ib cheeb tsam hauv xeev Nkas Lis Lais (MK 1: 21-28).

Tam sim ntawd, Yes Xus tawm hauv tsev txoos, nws nrog Yas Kos thiab Zam nkawd mus hauv Pob Zeb thiab As Nres nkawd tsev. Pob Zeb niam tais mob kub cev, nws pw saum txaj. Lawv tham txog tus niam tais tus mob rau Yes Xus paub. Yes Xus txav los tuav niam tais txhais tes, tsa nws sawv, tus mob kub cev cia li thim hlo ces nws tsob hwb Yes Xus lawv (MK 1: 29-31).

Yav tsaus ntuj, thaum lub hnub poob qho lawm, sawv daws coj tas nrho cov neeg mob thiab cov raug dab huv si tuaj rau Yes Xus. Tas lub nroog sau nthwv tuaj nyob ua ke ntawm qhov rooj. Yes Xus kho neeg coob coob, cov uas nyias raug nyias hom mob, thiab Yes Xus tseem ntiab ntau tus dab tawm. 

Yes Xus lawv pw hauv Pob Zeb tsev ib hmos, tag kis thaum sawv ntxov, Yes Xus sawv, nws tawm mus rau ib qho chaw tsis muaj neeg, ces Yes Xus teev Ntuj nyob ntawd. Pob Zeb thiab cov npawg raws Yes Xus qab. Thaum lawv nrhiav tau Yes Xus, lawv hais rau Yes Xus tias “Sawv daws nrhiav koj.” 

Yes Xus hais rau lawv tias “Peb mus lwm qhov chaw, hauv cov zej zog nyob tsis deb ntawm no, kom kuv tau kev tshaj lus nyob ntawd thiab, yog vim li ntawd, kuv thiaj tawm tuaj”. Ces Yes Xus mus thoob lub xeev Nkas Lis Lais, nws tshaj lus nyob hauv cov tsev txoos, thiab nws ntiab dab phem (MK 1: 32-39).

Muaj ib tug neeg mob ruas tuaj cuag Yes Xus, nws thov Yes Xus, nws txhos caug taij tias “Yog koj xav, mas koj yeej ua tau kom kuv rov huv.” Yes Xus hlub tus neeg ntawd, Yes Xus cev tes tuav nws thiab hais rau nws tias “Kuv xav. Koj rov huv mas.” Tam sim ntawd, tus mob ruas tso tus neeg ntawd tseg, nws cia li huv hlo. Yes Xus qhuab qhia nws nruj nruj thiab kom nws rov mus tam sis ntawd. 

Yes Xus hais rau nws tias “Koj ua twj ywm, txhob qhia dab tsi rau leej twg li. Koj mus thws koj lub cev rau tus leej choj saib, thiab mus cev paj tshab ntxuav koj raws li Mais Xes qhia, ua puav pheej rau luag pom.” 

Tab sis tus neeg ntawd tawm plaws mus, nws pib tshaj tej ntawd thiab mus hais rau txhua qhov, ces Yes Xus tsis tau kev tab meeg mus hauv ib lub nroog li. Nws nyob sab nroog nraud, ntawm tej qhov chaw tsis muaj neeg. Neeg tseem tuaj tas qhov txhia chaw tuaj cuag nws (MK 1: 40-45).

Yes Xus thiab cov thwj tim nce mus hauv nkoj, lawv hla dej mus rau sab tim ub. Yes Xus tsaug zog lawm, ces dej sawv nphau tej niag twv hauv dej ntuj tuaj. Cov nplaim dej nphau tuaj npog nkaus lub nkoj, cov thwj tim ntshai ces lawv tsa Yes Xus tias “Huab Tais, koj cawm peb, peb yuav tuag!”

Yes Xus hais rau lawv tias “Vim li cas nej ntshai, ua cas nej ntseeg me ua luaj?” Ces Yes Xus sawv ntsug, nws txwv cua thiab dej ntuj. Dej cia li rov tus yees. Cov neeg ntawd nyob hab nuv cia; lawv sib hais zom zaws tias “Tus ntawd yog leej twg? Tab yog cua thiab dej ntuj los yeej mloog nws lus!” (MT 8: 23-27).

Thaum Yes Xus lawv tuaj txog Nkas Das Las teb chaws nyob sab ntug dej ntuj Nkas Lis Lais tim ub, muaj ib tug neeg raug dab tawm hauv cov ntxa tuaj cuag Yes Xus. Nkawd tsiv tsaim kawg, tsis muaj leeg twg muaj cuab kav taug txoj kev ntawd li. Ob tug ntawd qw nrov nrov tias “Tswv Ntuj Leej Tub, koj xav ua dab tsi rau wb? Tsis tau txog lub caij, koj txawm siv tuaj tsim txom wb lod?”

Nyob tsis deb ntawd, muaj ib pab npua coob tab tom noj zaub. Cov dab thov Yes Xus tias “Yog koj ntiab peb tawm, thov koj cia peb mus nyob hauv pab npua tod.” 

Yes Xus teb tias “Kav tsij mus.” Cov dab tawm plaws nkag mus nyob hauv cov npua, ces tas pab npua dhia puag saum tsag rau hauv dej ntuj. Pab npua tuag tas rau hauv dej. Cov tub zov npua tso tes khiav mus hauv nroog, lawv mus piav tej xwm tshwm sim rau ob tug neeg raug dab ntawd huv tib si, ces tas lub nroog tawm tuaj cuag Yes Xus; lawv thov kom Yes Xus tawm hauv lub teb chaws.

Yes Xus thiab cov thwj tim nce mus hauv nkoj, tus neeg raug dab thov tias nws xav nrog Yes Xus mus tab sis Yes Xus tsis kheev. Yes Xus hais rau nws tias “Koj rov mus cuag koj tsev neeg, koj tshaj tas txhua yam Tswv Ntuj pab koj rau lawv thiab tshaj tias Tswv Ntuj tau hlub koj.” Tus neeg raug dab thiaj mus tsev (MT 8: 28-34, MK 4: 35-41, LK 8: 22-25).

Yes Xus lawv tuaj txog lub zos Npes Xais Das. Luag coj ib tug neeg dig muag tuaj rau Yes Xus, lawv thov kom Yes Xus kov tus dig muag. Yes Xus tuav tus dig muag tes, thiab coj nws tawm hauv zos rau sab nraud. Yes Xus muab nws aub ncaug pleev tus dig muag ob lub qhov muag, ces nws tsa tes rau saum tus dig muag. Yes Xus nug nws tias “Koj puas pom ib qho dab tsi?” Tus dig muag pib pom kev, nws teb tias “Kuv pom ib co neeg, zoo li ib co ntoo mus kev.”

Yes Xus rov qab tsa tes rau saum tus dig muag ob lub qhov muag dua, ces tus dig muag pom kev tseeb, nws zoo lawm. Nws pom ib puas tsav yam meej thiab nws pom tau deb. Yes Xus thiaj kom nws rov mus tsev, Yes Xus hais rau tus dig muag tias “Tab yog lub zos no, los koj tsis txhob rov mus hauv li.”