-3-
MAB LIAB THIAB YOS XES MLOOG TSWV NTUJ LUS

Muaj ib tug ntxhais hu ua Mab Liab nyob hauv lub zos Nas Xas Les, nyob Nkas Lis Lais teb; lawv muab nws qhaib rau Yos Xes hauv lub xeem Das Vis. Thaum nkawd tseem tsis tau los nyob ua ke, Tswv Ntuj xa tus Tshiab Nkas Nplias mus cuag Mab Liab. Tus Tshiab chaws mus hauv Mab Liab tsev, nws hais rau Mab Liab tias “Koj nyob kaj lug, tus tau txiaj ntsim puv siab! Huab Tais nrog koj nyob.” 

Mab Liab hnov lo lus ntawd, nws lub siab nphau npog, nws xav hauv nruab siab tias lo lus hawm ntawd yog dab tsi. Tus Tshiab hais rau Mab Liab tias “Mab Liab, koj tsis txhob ntshai. Tswv Ntuj saib koj ntxim Tswv Ntuj siab. Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus. Nws yuav yog ib tug loj, luag yuav hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws. Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg.” 

Mab Liab hais rau tus Tshiab tias “Qhov ntawd yuav muaj tuaj zoo li cas, vim kuv tsis paub ib tug txiv neej.” 

Tus Tshiab teb rau Mab Liab tias “Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub. Saib! Es Lis Xas Npes, tus uas txheeb koj, luag hu nws ua pog khoom, nws hnub nyoog laus lawm, tab sis nws kuj xeeb tub lawm thiab. Lub hlis no, nws xeeb tub tau rau hli lawm. Vim tias, tsis muaj ib yam uas Tswv Ntuj ua tsis tau.” 

Mab Liab tsis to taub tas txhua yam tus Tshiab hais ntawd, tab sis nws ‘zoo siab mloog’ Tswv Ntuj, ces Mab Liab hais tias “Kuv yog Huab Tais tus ntxhais txib. Kuv xav kom muaj raws li koj hais.” Tus Tshiab thiaj tso Mab Liab tseg.

Tau ob peb hnub, ces Mab Liab sawv kev mus, nws rau siab ntso mus pem toj siab, rau ib lub nroog nyob xeev Yus Das. Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes, ces Es Lis Xas Npes tsa suab hlo hais nrov nrov tias “Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. Ua cas Ntuj thiaj pub kom kuv tus Huab Tais leej niam tuaj xyuas kuv? 

Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo!”

Mab Liab xav cav txog Tswv Ntuj lub txiaj ntsim, ces nws muab ib co lus hauv Ntawv Ntshiab los cav txog Tswv Ntuj, nws hais tias “Kuv tus plig cav txog Huab Tais lub hwj chim, kuv lub tswv yim hom khaj nyob hauv Tswv Ntuj, tus Cawm kuv, vim nws dauv muag ntsia nws tus ntxhais txib hauv txheej qis. Vim li ntawd, txij no mus, txhua tiam neeg yuav hais tias kuv txoj hmoov zoo, vim tus Muaj Hwj Huam ua tej yam loj rau kuv, nws lub npe Ntshiab. Nws lub siab hlub roos cov neeg hwm nws tiam dhau tiam. Nws sab npab nthuav nws lub zog rau sawv daws pom. Cov neeg uas lub siab muab hlob, Huab Tais ua kom lawv tawg. Huab Tais nchuav cov muaj hwj huam poob ntawm lawv lub theej kiab. Nws tsa cov neeg hauv txheej qis kom siab. Nws pub tej yam zoo rau cov neeg tshaib noj seem noj so, hos nws ntiab cov neeg muaj rov qab mus tes qhuav. Huab Tais pab nws tus tub txib His Xas Lais, vim nws nco ntsoov tias nws lub siab hlub neeg, nws ua raws li nws tau tshaj rau peb cov yawg koob, nws ua zoo tas nrho rau Has Nplas Has thiab Has Nplas Has cov xeeb ntxwv mus ib txhiab ib txhis.”

Mab Liab zaj hu nkauj no muaj lub ntsiab tias nws zoo siab rau qhov tias Tswv Ntuj tau xaiv nws. Tej yam xis Tswv Ntuj siab tsis yog tias yus muaj zog los yus muaj peev xwm kav neeg coob, los yus muaj nyiaj txiag ntau, los yus yog ib tug kws txuj loj nto npe. Tswv Ntuj saib cov neeg ‘tso siab’ rau Tswv Ntuj, saib cov neeg ‘zoo siab mloog’ Tswv Ntuj lus, saib cov neeg ‘tsis muab hlob’ yog cov ua xis Tswv Ntuj siab.

Mab Liab nrog Es Lis Xas Npes nyob peb lub hlis txog thaum Es Lis Xas Npes yug nws tus tub Zam, ces Mab Liab mam rov mus tsev.

Mab Liab rov los txog lub zos Nas Xas Les, mas Yos Xes pom tias Mab Liab lub cev xeeb me nyuam lawm, ces Yos Xes txiav siab yuav nrauj Mab Liab ntsiag ntsiag kom txhob muaj tus twg paub. Tos Yos Xes txiav siab li ntawd, vim nws yog ib tug neeg ncaj, nws tsis xav kom zeej tsoom hais lus xaiv txog Mab Liab.

Thaum Yos Xes txiav siab nrauj li ntawd, tus Tshiab tawm los ua npau suav rau Yos Xes thiab hais rau nws tias “Yos Xes, Das Vis leej tub, koj txhob ntshai coj Mab Liab, koj tus poj niam, los nyob hauv koj tsev. Yog Leej Ntuj Plig Ntshiab ua kom nws xeeb tub. Nws yuav yug ib tug tub, koj yuav tis nws npe hu ua Yes Xus vim nws yuav cawm nws haiv neeg ntawm lawv cov txhaum.”

Thaum Yos Xes tsim los, nws thiaj to taub tias yog nws yuav Mab Liab los ua nws poj niam, mas zej zog yuav xyav tsis tau lus phem rau Mab Liab tias nws muaj me nyuam tsaub. Yos Xes thiaj to taub tias tsis yog Mab Liab deev hluas muaj me nyuam tiam sis yog Leej Ntuj Plig Ntshiab ua kom Mab Liab xeeb tub, mas Mab Liab tus tub yuav yog ib tug Pleev Ntshiab. Yos Xes thiaj to taub tias yog nws yuav Mab Liab los ua nws poj niam, mas thiaj yuav muaj raws li cov Yaj Saub ib txwm hais tias Leej Pleev yog Das Vis tus xeeb ntxwv. 

Yos Xes to taub li ntawd, nws ‘mloog Tswv Ntuj lo lus’ ces nws ua raws li tus Tshiab qhia rau nws; nws coj Mab Liab los nyob hauv nws tsev. Yos Xes yog neeg tsim txiaj, nws paub tias Mab Liab yog tus poj niam Tswv Ntuj xaiv ua ib tug ntshiab cia xeeb Tswv Ntuj Leej Tub, ces Yos Xes hwm Mab Liab zoo, nws tsis kov Mab Liab lub cev, nws tsis nrog Mab Liab pw. Yos Xes yuav ua li ntawd mus tas nws sid, nws paub tias Tswv Ntuj muab txoj hauj lwm rau nws ua tus pab coj Tswv Ntuj Leej Tub los ua neeg nyob ntiaj teb no.

Yog nej saib hauv cov kws kos dua tej duab hais txog Yos Xes mas nej yuav pom tias Yos Xes yog ib tug txiv neej muaj hnub nyoog ntau; hos ntawm Mab Liab mas nws yog ib tug ntxhais hluas. Ua cas lawv kos daim duab zoo li ntawd? 

Nyob hauv Ntawv Ntshiab tsis tau qhia tias Yos Xes yog ib tug laus los hluas, tab sis cov ntseeg txheej thaud lawv muaj tej zaj kwv huam piav txog Mab Liab thiab Yos Xes; yam li lawv hais tias Mab Liab niam thiab txiv tsis muaj me nyuam, ces nkawd thov Ntuj kom pub me nyuam rau nkawd. Tus me nyuam yug los mas nkawd yuav qee rau Tswv Ntuj kom tau tsob hwb Tswv Ntuj nyob hauv lub Tuam Tsev Teev Ntuj. Tsis ntev tom qab nkawd muaj me nyuam; yog me nyuam ntxhais, nkawd tis npe hu ua ‘Mab Liab’. 

Mab Liab niam thiab txiv qee nkawd tus me nyuam ua ntxhais txib nyob hauv lub Tuam Tsev Teev Ntuj. Mab Liab nyob hauv lub Tuam Tsev Teev Ntuj mus txog thaum nws muaj 12 xyoos, ces txog lub caij nws yuav tsum tawm mus ua lub neej nyob sab nraud.

Thaum ntawd, Mab Liab niam thiab txiv tuag tas lawm, cov Leej Choj sab laj tias lawv yuav thov Tswv Ntuj pub ib tug txiv neej cia rau ua Mab Liab tus txij nkawm, ces Ntxas Kas Lias yog tus tuav txoj kab xwm thov Ntuj, nws chaws mus hauv Kem Tsev Ntshiab, nws teev Ntuj nyob ntawd. Muaj ib lub suab nrov saum ntuj tuaj tias “Ntxas Kas Lias, koj sau tas cov yawg ntsuag tuaj nyob hauv lub Tuam Tsev Teev Ntuj, koj hais kom lawv nqa lawv rab pas nrig tuaj thiab. Tswv Ntuj yuav qhia tias Mab Liab yuav yog tus yawg ntsuag twg li cuab tam.”

Ntxas Kas Lias tawm los, nws ua raws li Tswv Ntuj qhia. Tas cov yawg ntsuag tuaj nyob hauv lub Tuam Tsev Teev Ntuj, cov Leej Choj sau lawv cov pas nrig mus tso ntawm lub thaj txi Ntuj, ces lawv teev Ntuj. Lawv teev Ntuj tas lawv rov coj cov pas nrig los rau cov tswv, los tsis pom muaj dab tsi tshwm sim li. Lawv nug saib puas tseem tshuav tus yawg ntsuag twg tsis tau tuaj. Sawv daws tias tshuav ib tug yawg ntsuag hnub nyoog ntau lawm hu ua ‘Yos Xes’ nyob Nas Xas Les.

Yos Xes muaj hnub nyoog li ib nrab neej lawm, nws muaj me tub thiab me ntxhais ntau tus. Nws xav tias nws hnub nyoog ntau lawm tsis tsim nyog yuav yuav ib tug me ntxhais xws li Mab Liab los ua nws poj niam. Tab sis cov Leej Choj tuaj caum lawm mas nws kawg yuav tau mus. Cov Leej Choj nqa Yos Xes rab pas nrig mus tso ntawm lub thaj txi Ntuj thiab teev Ntuj xws li lawv tau ua los ua ntej. Lawv rov coj rab pas nrig los cev rau Yos Xes. Thaum ntawd txawm muaj ib tug nquab ya hla ntawm rab pas nrig mus ncig Yos Xes taub hau.

Cov Leej Choj pom li ntawd, lawv tias yog Tswv Ntuj lub cim qhia tias Tswv Ntuj xaiv Yos Xes ua Mab Liab tus txiv, ces lawv muab Mab Liab qhaib rau Yos Xes.