-9-
YES XUS ZOO SIAB THAUM MUAJ NEEG HLOOV SIAB TSHIAB

Yes Xus thiab nws 6 tus thwj tim niaj hnub mus tshaj lub Moo Zoo nyob hauv cov zos thiab cov nroog nyob hauv lub xeev Nkas Lis Lais. Muaj ib tug neeg sau se hu ua ‘Mas Tais’ pom kam lawv 6 leeg nrog Yes Xus li ntawd. Mas Tais tseem pom Yes Xus coj tus yam ntxwv muaj tsim thiab hlub cov neeg me. Hauv Mas Tais nruab siab nws xav tias ntshai Yes Xus yog ib tug tuaj ntawm Tswv Ntuj tuaj, ces muaj ib hnub thaum Mas Tais tab tom zaum ntawm lub rooj sau se, Yes Xus tuaj txog ntawd. Yes Xus hais rau Mas Tais tias “Koj raws kuv mus” ces Mas Tais sawv tsees raws Yes Xus mus. 

Mas Tais ua ib pluag mov noj, nws caw Yes Xus thiab cov thwj tim. Thaum Yes Xus zaum noj mov hauv Mas Tais tsev, muaj ib co neeg sau se thiab ib co neeg txhaum coob tuaj nrog Yes Xus thiab cov thwj tim noj mov. Cov Fas Lis Xais pom li ntawd, ces lawv hais rau cov thwj tim tias “Vim li cas nej tus Xib Hwb nrog cov sau se thiab cov neeg txhaum noj mov?”

Tab sis Yes Xus twb hnov qhov lawv hais, nws thiaj teb tias “Tsis yog cov neeg noj qab nyob zoo yuav vam txog kws kho mob, tsuas yog cov neeg mob thiaj vam txog. Nej yuav kawm lo lus no lub ntsiab cia ‘Qhov kuv xav yuav yog txoj kev khuv leej, tsis yog thaj txi Ntuj.’ Vim kuv tsis tuaj hu cov neeg ncaj, kuv tuaj hu cov neeg txhaum” (MT 9: 9-13).

Yes Xus thiaj hais zaj paj lug rau lawv mloog tias “Nej leej twg, yog nws muaj ib puas tus yaj, tab sis ib tug ploj lawm, mas nws yeej yuav tso cuaj caum cuaj tus yaj tseg rau tom hav quav poj, mus nrhiav kom tau tus uas poob zoo lawm. Thaum nws nrhiav tau tus yaj poob zoo lawd, nws muab kwv saum xwb pwg, nws zoo siab tas nrho. Nws rov los tsev, ces nws nqua hu nws cov phooj ywg thiab cov nyob ze nws tuaj, nws hais rau lawv tias ‘Nej nrog kuv zoo siab, vim kuv nrhiav tau kuv tus yaj poob zoo lawm.’ Kuv hais rau nej tias, thaum ib tug neeg txhaum hloov siab los ntxub kev txhaum, mas muaj kev zoo siab loj nyob saum ntuj. Kev zoo siab ntawd loj dua kev zoo siab rau cuaj caum cuaj leeg siab ncaj uas tsis tas yuav hloov siab los ntxub kev txhaum.

Hos tus poj niam uas nws muaj kaum lub txiaj nyiag, yog ib lub poob lawm, mas nws yuav taws teeb cheb tsev, ua tib zoo nrhiav kom tau nws lub txiaj nyiag.  Thaum nws nrhiav tau lawm, nws nqua hu nws cov phooj ywg thiab cov nyob ze nws tuaj, nws hais tias ‘Nej nrog kuv zoo siab mas! Vim kuv nrhiav tau lub txiaj uas poob lawm!’  Kuv hais rau nej tias, thaum ib tug neeg txhaum hloov siab, mas muaj kev zoo siab loj nyob hauv Tswv Ntuj tsoom Tshiab ib yam li ntawd thiab” (LK 15: 1-10).

Yes Xus tseem hais ntxiv tias “Ib tug neeg muaj ob tug tub. Tus tub ntxawg hais rau nws txiv tias ‘Txiv, koj muab koj lub cuab tam feem uas yog kuv tug faib rau kuv.’ Ces leej txiv thiaj muab nws lub cuab tam faib rau nws ob tug tub. 

Ob peb hnub tom qab, tus tub ntxawg sau feem uas yog nws tug tas huv si,  nws khiav mus ib lub teb chaws deb. Nyob ntawd nws muab nws lub cuab tam phob vim nws coj ib lub neej tsis tsim txiaj.

Thaum nws muab nws lub cuab tam phob tas huv si lawm, ces lub teb chaws tshaib plab loj. Nws pib paub txoj kev yoo tshaib yoo nqhis. Nws thiaj mus ua zog hauv ib tug neeg nyob txawm lub teb chaws ntawd. Luag kom nws mus zov npua tom teb. Tus tub ntxawg ntshaw noj cov qos uas npua noj kom tsau nws plab, tab sis tsis muaj neeg pub rau nws noj. Nws lub siab mam li ras dheev tias ‘Pes tsawg leej tub zog nyob hauv kuv txiv tsev tau mov noj seem noj so, hos kuv nyob tuag tshaib ntuas ntawm no. Kuv xav mus cuag kuv txiv, kuv yuav hais rau nws tias ‘Txiv, kuv ua txhaum rau Ntuj thiab rau koj. Kuv tsis tsim nyog koj hu kuv ua koj tus tub ntxiv.  Thov koj saib kuv ib yam li koj ib tug tub zog.’

Tus tub ntxawg thiaj sawv kev rov los cuag nws txiv. Thaum tus tub tseem los txog deb, nws txiv twb pom nws. Leej txiv hlub kawg, nws khiav mus puag tus tub caj dab, thiab nwj nws tub tub ntev loo. Tus tub hais rau leej txiv tias ‘Txiv, kuv ua txhaum rau Ntuj thiab rau koj. Kuv tsis tsim nyog koj hu kuv ua koj tus tub ntxiv.’  

Tab sis leej txiv hais rau cov tub txib tias ‘Nej tsuag tsuag mus nqa lub tsho zoo nkauj tshaj los ntawm no, nej muab rau nws hnav, nej muab ib nti nplhaib los ntxig nws ntiv tes, thiab ib nkawg khau los ntxig nws ko taw. Nej cab tus xyuas nyuj rog los tua. Peb noj, peb ua lom zem. Vim tias kuv tus tub no tuag lawm, nyem no nws ciaj rov los.  Nws ploj lawm, nyem no rov nrhiav tau nws.’

Lawv sawv daws noj haus lom zem. Thaum ntawd, tus tub hlob tseem nyob tom teb. Thaum nws rov los yuav txog tsev, nws hnov suab paj nruag thiab suab dhia seev cev nrov ntsuag qees. Nws hu ib tug tub txib kom tawm mus cuag nws, nws nug saib lub suab ntawd yog dab tsi. Tus tub txib hais rau nws tias ‘Yog koj tus kwv rov qab los tsev, koj txiv tua tus xyuas nyuj rog, vim nws tau koj tus kwv rov los, noj qab nyob zoo.’ Ces tus tub hlob npau taws, nws tsis kam los hauv tsev. Leej txiv tawm tuaj thov kom nws los hauv tsev. Tab sis tus tub hlob teb rau nws txiv tias ‘Saib, kuv lis koj tej hauj lwm cuag li ib tug qhev tau npaum no xyoo, kuv tsis tau hla koj ib lo lus li, koj twb tsis muab ib tug me nyuam tshis pub kuv ib zaug, kom tau nrog kuv cov phooj ywg noj ib pluag lom zem. Hos koj niag tub ntawd, mus nrog cov niam ntiav muab koj lub cuab tam nqos tas, thaum nws rov los tsev, koj tua tus xyuas nyuj rog rau nws!’Leej txiv hais rau tus tub hlob tias ‘Me tub, koj ib txwm nrog kuv nyob. Ib puas tsav yam uas yog kuv tug, mas kuj yog koj tug. Tab sis, peb yuav tsum noj ib roog qav thiab ua lom zem, vim koj tus kwv no tuag lawm, zaum no nws ciaj rov los, nws ploj lawm, nyem no  nrhiav tau nws rov los” (LK 15: 11-32).