-1-
TSWV NTUJ NPAJ IB HAIV NEEG LOS TXAIS TUS CAWM SEEJ

Yog peb muab xam ua ntej Huab Tais Yes Xus yuav yug los li 1,850 xyoo mas peb yuav pom tias thaum ntawd, Huab Tais Tswv Ntuj tau hu ib tus neeg los ntseeg txog Tswv Ntuj kom tau npaj ib haiv neeg cia txais Huab Tais Tswv Ntuj Leej Tub yug los nyob hauv lawv. Leej Tub yuav yug los cawm tas lub ntiaj teb neeg ntawm lawv cov txhaum.
Nyob rau lub zim txwv ntawd, nyob tas ntiaj teb muaj tej haiv neeg tseem nyob ua tej pab tsawg tsawg thiab kuj muaj tej haiv neeg lawv tau sib yaum los nyob ua ib lub kuj cuab muaj vaj muaj nom kav lawv; lawv kawm txuj ci, lawv huam vam. Yam li nyob rau Tuam Tshoj mas muaj cov vaj Xyam Tshoj (Xia) sawv los tswj lub teb chaws, nyob Is Ntias muaj cov Maus Lis Yas (Maurya), nyob Mes Xos Pos Tes Mias muaj cov Xus Mes Lias (Sumerian), nyob Aws Los Pas muaj cov Hes Las, thiab nyob As Fis Kas muaj cov Hais Nkws Tos.
Thaum ntawd, txhua haiv neeg nyias muaj nyias cov dab, lawv teev thiab txi lawv cov dab kom pov hwm lawv thiab tsis txhob muab txim rau lawv. Lawv muab txhua yam lawv lub tswv yim mem tsis tau los tis rau dab tas, yam li lawv pom xob laim mas lawv hais tias yog “Yawm Xob’, lawv pom tej tob roob mas lawv hais tias muaj dab ‘Xeeb Teb Xeeb Chaw’, lawv ntsia daim av ces lawv hais tias muaj ib tug dab saib daim av; yog ‘Thwv Tim’, lawv tsa muag ntsia lub ntuj lawv hais tias muaj ib tug kav lub ntuj; yog ‘Tswv Ntuj’. Lawv hais li ntawd, tab sis lawv tsis paub tias tsuas muaj tib tug dab xwb thiaj yog tus tsim tas puas tsav yam thiab ua tswv kav tas lub sim ceeb; tus ntawd thiaj yog ‘Tus Tseem’, nws yog ‘Huab Tais Tswv Ntuj’
Huab Tais Tswv Ntuj pom tias ntiaj teb neeg yuam kev thiab nyob deb ntawm qhov tseeb vim ntiaj teb neeg poob rau hauv qhov txhaum ntau, ces Huab Tais Tswv Ntuj thiaj nrhiav saib puas yuav muaj ib tug neeg twg siab ncaj thiab mloog Tswv Ntuj Lus. Huab Tais Tswv Ntuj xav tsim ib haiv neeg ntshiab cia tos tus Huab Tais Tswv Ntuj yuav xa tuaj cawm lub ntiaj teb. 
Huab Tais Tswv Ntuj saib tag nrho txhua tus neeg hauv txhua txhia haiv, Huab Tais Tswv Ntuj pom tias nyob hauv lub nroog Has Laas hauv Mes Xos Pos Tas Mias mas muaj ib tug txiv neej siab ncaj thiab mloog Tswv Ntuj Lus, nws lub tswv yim txawv cov neeg nyob ib cheeb tsam ntawd; nws tsis ntseeg tias muaj ntau tus dab los yog ntau tus tswv ntuj tswv teb, nws tsuas ntseeg tias muaj tig tug Tswv Ntuj yog tus tsim lub sim ceeb. Nws ntseeg li ntawd tab sis nws kuj tsis paub tias Tswv Ntuj yog tus zoo li cas. Tus txiv neej no hu ua ‘Has Nplas’.
Muaj ib hnub Has Nplas hnov Huab Tais Tswv Ntuj lub suab nrov hauv nws nruab siab tias “Has Nplas, koj tso koj lub teb chaws tseg, koj tso koj tsev neeg thiab koj txiv cov dab qhuas tseg. Koj mus nyob lub teb chaws kuv yuav qhia rau koj, ces kuv yuav tsa koj ua ib haiv neeg loj” (HP 12: 1-3).
Has Nplas hnov li ntawd, nws ntseeg ces nws cia li sawv kev mus. Has Nplas tso Has Laas teb tseg, nws mus rau sab Naj Fab mus txog Hais Nkws Tos teb ces nws mam rov nce toj los nyob rau Kas Nas Has teb. 
Huab Tais Tswv Ntuj tis lub npe tshiab rau Has Nplas hu ua ‘Has Nplas Has’ thiab tseem foom koob hmoov rau nws, ces Has Nplas Has poj niam muaj me nyuam.
Huab Tais Tswv Ntuj xav kom Has Nplas Has cov xeeb ntswv yog ib haiv neeg paub Tswv Ntuj thiab yog haiv neeg Huab Tais Tswv Ntuj qee cia rau Tswv Ntuj, ces Huab Tais Tswv Ntuj qhia tej yam tseeb txog lub ntiaj teb neeg rau Has Nplas Has thiab nws cov xeeb ntxwv tuaj tom qab. Huab Tais Tswv Ntuj qhia tias lub sim ceeb tshwm sim tuaj zoo li cas, ua cas neeg thiaj muaj txhaum, Huab Tais Tswv Ntuj hlub ntiaj teb neeg mas thaud Huab Tais Tswv Ntuj thiaj cog lus tias yuav xa ib tug tuaj cawm lub ntiaj teb neeg; tus ntawd yuav yug los nyob hauv Has Nplas Has haiv neeg.
Yuav luag tas txhua haiv neeg nyob hauv qab ntuj no puav leej muaj zaj kwv huam ‘ntuj tsim teb raug’; tab sis lawv piav sib txawv. Hmoob hais tias Yawm Saub thiab Poj Saub yog tus puab lub ntuj lub teb thiab tsim noob neej, Suav hais tias Yawg Phaj Kwm tawm hauv lub qe los, ces nws thawb daim plhaub qe kom sawv siab ua lub ntuj, hos daim plhaub qe hauv qab taws txawm txia ua lub teb; Phaj Kwm ib ce txia ua lub hnub lub hli, toj roob hav dej, xyoob ntoo nroj tsuag. 
Huab Tais Tswv Ntuj tshoj Has Nplas Has cov xeeb ntxwv kom paub tias Huab Tais Tswv Ntuj yog tus tsim lub ntuj lub teb. Huab Tais Tswv Ntuj qhia tias vim tib neeg muab hlob xav zoo li Tswv Ntuj, mas tib neeg thiaj xaiv tsis mloog Tswv Ntuj lus ces tib neeg thiaj poob rau txoj kev tuag. Nyob hauv Hmoob kuj muaj ob zag hais txog qhov no; ib zag hais tias Ntxwg Nyoog siab phem mas Ntxwg Nyoog tso kev tuag poob los rau hauv lub ntiaj teb, thiab ib zag hais tias yog Ci Txuj Cia Npuag nkawd siab phem nkawd muab Ci Kaws ntaus tuag mas Ci Kaws tau foom kom neeg tuag mus tsis txhob rov muaj dua txoj sia tshiab.
Cov lus hauv phau ntawv Hauv Paus piav zoo li no tias thaum chiv lub keeb, Tswv Ntuj tsim lub ntuj thiab lub ntiaj teb, mas lub ntiaj teb tseem tsis tau tsheej ntiaj teb thiab tsis muaj dab tsi nyob hauv li. Qhov tsaus ntuj nti npog lub qhov ntuj dub nciab. Tswv Ntuj cais qhov pom kev ntawm qhov tsaus ntuj. Tswv Ntuj ua lub ntuj ntsuab los quas cov dej nyob hauv qab ntuj ntsuab. Tswv Ntuj cais lub ntiaj teb ntawm haiv txwv. Tswv Ntuj kom lub ntiaj teb tuaj nroj tsuag kom muaj ntoo txi txiv. Tswv Ntuj kom muaj lub hnub thiab lub hli. Tswv Ntuj hais kom muaj tej tsiaj muaj sia nyob hauv cov dej, thiab kom muaj noog ya saum npoo ntiaj teb, Tswv Ntuj hais kom lub ntiaj teb muaj tsiaj muaj sia. 
Tswv Ntuj hais tias “Peb yuav ua tib neeg raws li peb tus duab, kom zoo li peb me ntsis. Kom lawv ua tswv kav cov ntses nyob hauv hiav txwv, cov noog ya saum ntuj, cov tsiaj nyeg, tas txhua yam tsiaj qus thiab txhua yam kab ntsaum nkag hauv av.” Ces Tswv Ntuj tsim tib neeg ua txiv neej thiab ua poj niam. Tswv Ntuj foom lus zoo rau nkawd thiab hais rau nkawd tias “Neb yeej meem tsim noob, yeej meem huam vam mus puv ntiaj teb thiab tswj ntiaj teb. Neb kav cov ntses nyob hauv hiav txwv, cov noog ya saum ntuj thiab tas puas tsav yam tsiaj uas nkag hauv av. Kuv muab tas puas tsav yam nroj tsuag muaj noob uas tuaj nyob saum npoo av, kuv muab tas puas tsav yam ntoo txi txiv thiab muaj noob rau neb; tej ntawd yuav yog neb tej txhiam laj txhiam xws. Kuv muab tas txhua yam nroj ntsuab rau cov tsiaj qus, cov noog ya saum ntuj, tas txhua yam nkag hauv av thiab ciaj sia, kuv muab rau lawv ua txhiam xws noj” (HP 1: 1-31).
Tus nab hais rau tus poj niam tias “Tswv Ntuj hais tias neb yuav tsis txhob noj txhua yam txiv ntoo hauv lub vaj no puas yog?”
Tus poj niam teb rau tus nab tias “Wb noj tau cov txiv txi saum cov ntoo hauv lub vaj no tib si. Tsuas tshwj cov txiv txi saum tsob ntoo nyob hauv nruab nrab lub vaj, mas Tswv Ntuj hais tias neb tsis txhob noj, tsis txhob kov, yog neb noj neb kov, mas neb yuav tuag.”
Tus nab teb ntua tus poj niam tias “Tsis muaj li ntawd ib zaug! Neb yuav tsis tuag. Vim Tswv Ntuj paub tias, hnub twg neb noj ces neb qhov muag yuav qhib, neb yuav zoo li tej tus tswv ntuj uas paub qhov zoo thiab qhov phem.” 
Tus poj niam pom hais tias tus ntoo ntawd yeej zoo noj thiab zoo saib kawg, thiab yog tus ntoo uas yus ntshaw noj kom yus paub qhov zoo thiab qhov phem. Nws de zoj lub txiv ntawm tus ntoo los noj. Nws kuj cev rau nws tus txiv uas nrog nws nyob, ces tus txiv kuj noj thiab. Ces nkawd ob leeg qhov muag qhib plho, nkawd paub hais tias nkawd liab qab. Nkawd thiaj muab nplooj ncuav pias los ua tiab npua.
Thaum cua tuaj ntxiag, nkawd hnov Tswv Ntuj rhais ruam ncig lub vaj. Tus txiv neej thiab nws tus poj niam khiav tsiv nraim HUAB TAIS Tswv Ntuj hauv cov ntoo nyob hauv lub vaj. Tswv Ntuj hu tus txiv neej hais tias “Koj nyob qhov twg?”
Tus txiv neej teb tias “Kuv hnov koj rhais ruam hauv lub vaj. Kuv ntshai vim kuv liab qab, kuv thiaj khiav tsiv nraim.”
Tswv Ntuj rov hais ntxiv tias “Leej twg qhia koj tias koj liab qab? Yog koj noj lub txiv uas kuv txwv tsis pub noj lawm puas yog?”
Tus txiv neej teb tias “Yog tus poj niam uas koj tso nyob ze kuv, muab lub txiv rau kuv, ces kuv thiaj noj!”
Tswv Ntuj hais rau tus poj niam tias “Koj ua dab tsi li ntawd?”
Tus poj niam teb tias “Yog niag nab ntxias kuv, kuv thiaj noj.” 
Ces Tswv Ntuj hais rau tus nab hais tias “Vim koj tau ua li ntawd, koj txoj hmoov yuav phem tshaj ib tsoom tsiaj nyeg thiab tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej. Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws.”
Tswv Ntuj hais rau tus poj niam hais tias “Kuv yuav ua kom koj muaj mob ntau thaum koj xeeb tub xeeb ki. Koj yuav tau mob tau ntsaj, koj thiaj yug tau me tub me nyuam. Tsis kav, koj tseem yuav ntshaw koj tus txiv, tiam sis nws yuav tswj koj.” 
Tswv Ntuj hais rau tus txiv neej hais tias “Vim koj tau mloog koj tus poj niam lus, koj thiaj noj lub txiv kuv txwv tsis kheev noj, av thiaj raug foom phem vim koj! Koj yuav siv zog khwv tas koj lub neej koj thiaj tau noj. Av yuav tuaj pos tuaj nrhab rau koj, thiab koj yuav noj tej nroj tsuag uas tuaj hauv nruab teb. Koj ntsej muag yuav tawm hws lug koj thiaj tau noj, mus txog hnub koj rov mus ua av, vim koj yog av puab. Koj yog av luaj ces koj yuav rov mus ua av luaj” (HP3: 1-19).
Has Nplas Has yug tau Is Mas Es thiab His Xas Has. Is Mas Es yuav yog cov As Las Npias tus yawg koob, lawv yog cov coj Mawv Xim Lim kev cai. Ntawm His Xas Has mas nws yug tau Es Xas Ws thiab Yas Kos. Es Xas Ws yog cov Es Doos nyob ntawm tus dej Yos Las Das sab hnub tuaj tus yawg koob, hos Yas Kos mas nws yog cov His Xas Lais tus yawg koob. Yas Kos yug tau 12 leej tub. Lawv 10 tus tij muab lawv tus kwv Yos Xes muag rau cov Mes Dias coj mus rau Hais Nkws Tos teb. Yos Xes nyob Hais Nkws Tos teb, nws ua Fas Las Oos ib tug nom tswj lub teb chaws, ces thaum teb chaws tshaib plab mas Yos Xes cov tij laug tuaj muas mov ntawm nws. Yos Xes qhia lawv tias nws yog lawv tus kwv, ces Yos Xes hais kom lawv coj lawv txiv Yas Kos thiab tsev neeg His Xas Lais tsiv los nyob Hais Nkws Tos teb. 
Cov His Xas Lais nyob Hais Nkws Tos teb tau ob peb tiam, lawv raug yuam ua qhev 400 xyoo. Lawv hu txog Huab Tais Tswv Ntuj, ces Huab Tais Tswv Ntuj hu Mais Xes kom sawv mus cawm cov His Xas Lais ntawm cov Hais Nkws Tos txhais tes. Mais Xes coj cov His Xas Lais los txog ntawm taw Roob Xis Nais, ces Huab Tais Tswv Ntuj pub nws txoj cai rau Mais Xes coj los qhuab qhia cov His Xas Lais. 
Huab Tais Tswv Ntuj hais tias “Kuv yog Yas Ves, nej tus Tswv Ntuj, yog tus ua kom nej dim ntawm Hais Nkws Tos teb los, dim ntawm txoj kev ua luag qhev.
Nej yuav tsis txhob muaj dua lwm tus tswv ntuj. Nej yuav tsis txhob puab ib tug mlom los ib tug duab zoo li tej yam nyob saum ntuj, los tej yam nyob hauv ntiaj teb no, los tej yam nyob hauv qab thu dej. Nej yuav tsis txhob pe cov mlom ntawd, txhob tsob hwb lawv. Nej yuav tsis txhob hu txog Yas Ves nej tus Tswv Ntuj lub npe mus ua tej yam tsis zoo. Nej yuav nco ntsoov caiv hnub xas npas tos, koj yuav muab saib ua ib hnub ntshiab. Nej yuav hwm koj niam thiab koj txiv, koj thiaj yuav tau nyob ntev niaj ntau xyoo hauv lub ntiaj teb uas nej tus Tswv Ntuj muab pub rau koj. Nej yuav tsis txhob tua neeg. Nej yuav tsis txhob zes luag txij luag nkawm. Nej yuav tsis txhob ua tub sab tub nyiag. Nej yuav tsis txhob liam rau luag tej. Nej yuav tsis txhob ntshaw txeeb luag vaj luag tsev. Nej yuav tsis txhob ntshaw txeeb luag tus poj niam, luag tus tub txib, luag tus ntxhais txib, luag tus nyuj los tus luj, los ib yam dab tsi uas yog luag tug” (KT 20: 1-17).
Cov His Xas Lais pom zoo koom ib lub suab teb tias “Cov lus uas Huab Tais Tswv Ntuj tau hais mas peb yuav coj tas huv tib si.” Ces Mais Xes muab Huab Tais Tswv Ntuj cov lus sau rau hauv ib phau ntawv cia, ces tag kis, nws sawv ntxov, nws txhim ib lub thaj txi Ntuj rau ntawm taw roob thiab kaum ob tug ncej zeb rau kaum ob lub xeem His Xas Lais, ces nws xa ib co tub hluas mus txi Ntuj, lawv coj tej tus thav nyuj mus hlawv txi rau Huab Tais Tswv Ntuj. Mais Xes cug cov tsiaj ntawd cov ntshav, nws muab ib nrab rau hauv phiab, nws muab ib nrab hliv ywg lub thaj txi Ntuj. Nws muab phau ntawv cog lus los nyeem rau tsoom pej xeem mloog, lawv qw tias “Txhua yam Huab Tais Tswv Ntuj tau hais, peb yuav coj thiab peb yuav mloog.”
Mais Xes txawm muab cov ntshav los nchos rau saum tsoom pej xeem sawv daws, nws hais tias “Cov ntshav no yog ntshav cog lus, Huab Tais Tswv Ntuj tau nrog nej cog lus raws li cov lus sau hauv phau ntawv” (KT 24: 1-8).
Huab Tais Tswv Ntuj thiab cov His Xas Lais cog lus zoo li ntawd. Huab Tais Tswv Ntuj xaiv lawv ua Tswv Ntuj haiv neeg.
Cov His Xas Lais tau ua tsis ncaj ntau zaus rau Huab Tais Tswv Ntuj, ces Huab Tais Tswv Ntuj cia lawv nyob teb chaws suab puam 40 xyoo, mas Huab Tais Tswv Ntuj tiaj pub lawv mus nyob hauv lub teb chaws Huab Tais Tswv Ntuj cog lus yuav pub rau lawv; yog Kas Nas Has teb. 
Xyoo 1050 ua Yes Xus ntej, cov His Xas Lais xaiv Xas Ws ua lawv tus vaj. Xas Ws tuag tas, ces Das Vis sawv ua cov His Xas Lais tus vaj tshiab. Huab Tais Tswv Ntuj hais rau cov His Xas Lais tias Das Vis caj ces yuav ua vaj mus li. Das Vis xeeb ntxwv yuav ua tus vaj Pleev cawm cov His Xas Lais. Huab Tais Tswv Ntuj tshoj tus Yaj Saub Nas Taas, ces nws hais rau Das Vis tias “Thaum koj sim neej dua tas koj yuav mus nrog koj cov poj yawm txwv koob pw, kuv yuav cia koj ib tug xeeb ntxwv tawm ntawm koj roj ntsha los hloov koj ua vaj. Kuv yuav nres nws txoj kev ua vaj kom nyob ruaj nreb. Kuv yuav ua nws txiv, nws yuav yog kuv leej tub. Yog nws ua qhov phem, kuv yuav xuas ib tug pas los muab txim rau nws, kuv yuav ntaus nws xws li neeg ntaus neeg” (2XM 7: 12, 14). Huab Tais Tswv Ntuj kuj tau cog lus rau Das Vis tias “Tus kuv yuav tsa los zaum saum koj lub theej kiab yog ib tug tawm hauv koj los” (NPN 132: 11). 
Cov His Xas Lais ntau leeg ua tsis ncaj rau Huab Tais Tswv Ntuj, lawv yoog raws cov neeg nyob ib ncig, lawv mus teev pej kum cov dab, lawv hla txoj cai. Huab Tais Tswv Ntuj hlub cov His Xas Lais, nws tuaj tshoj tej tus neeg siab ncaj lub siab kom lawv ua Yaj Saub cev Tswv Ntuj cov lus qhuab qhia lawv, thiab hais rau lawv kom tos tus vaj Pleev yuav tuaj cawm lawv thiab lub qab ntuj neeg. Huab Tais Tswv Ntuj tshoj tus Yaj Saub His Xais ces nws tshaj tias “Das Vis tsev neeg, nej mloog mas! Nej ua kom tej tib neeg sab tas nrho, los tsis txaus nej siab! Nej tseem yuav ua kom Tswv Ntuj sab thiab. Vim li ntawd, Huab Tais yuav pub ib lub cim rau nej. Nej ntsia saib! Tus poj niam hluas xeeb tub lawm. Nws yuav yug ib tug tub. Nws yuav tis npe rau nws tus tub hu ua Es Mas Nus Es (HX 7: 13-14). 
Nej ntsia! Kuv tus tub txib uas kuv nres, tus kuv xaiv, tus kuv nyiam tas siab. Nws yuav piav Txoj Cai rau cov kuj cuab. Kuv tus tub txib yuav tsis nthe, tsis hais nrov, tsis ua suab ncha nyob ntawm tej kev hauv nroog. Nws yuav tsis lov tus txhiav qaug, nws lub siab pheej xeeb yuav piav Txoj Cai. Kuv tus tub txib yuav tsis ntaus siab me, tsis qaug zog mus txog hnub nws tsa kev ncaj kav ntiaj teb. Cov pov txwv tos txog nws Txoj Cai (HX 42: 1-8). 
Kuv tau hu koj los nyob hauv txoj kev ncaj, kuv tau tuav koj tes, kuv tau puab koj, kuv tau xaiv koj los ua kuv tus tub txib tsim haiv neeg cog lus, kuv tau xaiv koj los ua lub teeb pom kev kaj cov kuj cuab. Kuv xaiv koj los ua tus qhib cov dig muag qhov muag, kuv tau xaiv koj los ua kom tawm los, rho cov neeg nyob hauv qhov taub kom tawm hauv kev tsaus ntuj nti los. 
Nws tshaj tias kev thaj yeeb tuaj lawm! Nws qhia sawv daws paub tias kev noj qab nyob zoo tuaj txog lawm, nws tuaj tshaj kev cawm neeg. Nej ntsia kuv tus tub txib Saib! Nws yuav vam meej. Nws yuav nce mus, nws yuav sawv siab. Sawv daws yuav cav lus zoo txog nws. Coob leej pom nws, lawv yuav nyob hab nuv, vim nws lub cev puas tas, nws tsis zoo li neeg lawm. Nws lub cev ntaj ntsug tsis zoo xws leej tib neeg cov tub lub cev. Li ntawd, nws yuav ua kom ntau lub kuj cuab ceeb nkaus. Cov vaj yuav nyob qhov ncauj kaw ntom nti rau ntawm nws xub ntiag, vim lawv pom ib yam uas tsis muaj leej twg tau piav rau lawv, lawv hnov ib yam uas lawv tsis tau hnov hais txog (HX 52: 7, 13-15).
Tab sis tus tub txib raug luag nkaug, yog vim peb tej hauj lwm phem. Nws raug luag tsuj, yog vim peb cov txhaum. Lub txim uas nyob saum nws, yog tus nqi nws them kom peb tau nyob thaj yeeb. Nws tej thaj doog ua kom peb tej mob nkeeg zoo hlo. Peb sawv daws zoo li ib co yaj poob zoo, peb nyias taug nyias txoj kev. Yas Ves ua kom txoj kev txhaum uas peb sawv daws taug rov los poob rau saum tus tub txib. Tus tub txib raug luag hiam heev kawg, tab sis nws yeem ua tus me, nws tsis qhib ncauj. Nws ua zoo li tus yaj uas luag cab mus rau lub tsev tua tsiaj. Nws nyob twj ywm xws li tus yaj uas luag txiav nws cov plaub. Nws ua siab ntev nyiaj, nws tsis qhib ncauj li” (HX 53: 5-7).
His Xais tshaj ntxiv tias Tswv Ntuj tus Tub Txib yuav hais tias “Lawv ntaus kuv, mas kuv tig kuv nraub qaum rau lawv ntaus. Lawv xav rho kuv cov hwj txwv, mas kuv tig kuv sab plhu rau lawv. Lawv xav ib tawg ncuav rau kuv thiab xav nto qaub ncaug rau kuv ntsej muag, los kuv tsis fee plhu rau lawv” (HX 50: 6).Tus Yaj Saub Yes Les Mias kuj tshaj rau cov Yus Das tias “Huab Tais Tswv Ntuj ceeb toom li no tias ‘Nej ntsia saib! Twb tcog lub caij kuv yuav tsa ib tug kaus siab ncaj hauv Das Vis tsev neeg. Tus kaus ntawd yuav ua vaj, nws yuav xyuam xim, nws yuav ua raws kev ncaj kev ncees nyob hauv lub teb chaws no” (YLM 23: 5).