Hnub tim 13 lub 8 hli 2025 Vaj Qhia Les Os 14 rov tawm tuaj qhia Ntuj kev cai nyob hauv chav tsev Paj Lug Rau. Hnub no Vaj Qhia muab cov xwm tshwm sim hauv hmo Huab Tais Yes Xus nrog cov thwj tim noj pluas Hmo Hla, nws qhia cov thwj tim tias nyob hauv lawv muaj ib tug yuav ntxeev siab rau nws (MK 14: 17-21).
Nyob hauv zaj no, thaum Huab Tais Yes Xus qhia tias yuav muaj ib tug ntxeev siab rau nws, mas Huab Tais Yes Xus tsis tau tsa suab hais nrov nrov, los taw tes, los qhia lub npe tawm los kom sawv daws paub tias tus ntxeev siab yog leej twg. Tab sis Huab Tais Yes Xus hais ib los kom cov thwj tim rov tig los nug lawv tus kheej, saib tus ntxeev siab (Betray) ntawd puas yog lawv tus kheej.
Cov thwj tim hnov Huab Tais Yes Xus hais rau lawv tias muaj ib tug nyob hauv nej yuav muab kuv muag rau luag, mas lawv nug zom zaws tias “Puas yog kuv?”
Cov thwj tim lo lus no kuj yog qhia tau tias lawv ras tau tias lawv yog neeg zoo tsis tas, lawv yog neeg zog me, lawv yog neeg xav tau kev nyiam ntawm luag tej tab sis lawv kuj muaj peev xwm ua rau luag tej tu siab tau. Vim cov thwj tim kev ras li no, mas txoj kev cawm thiaj pib sawv. Li ntawd, thaum twg peb ras tau tias peb yog neeg tsis huv, peb tsis muaj zog txaus, peb yog neeg tseem muaj txhaum, mas peb thiaj vam txog Huab Tais Yes Xus pab; thaum ntawd, Huab Tais Yes Xus kev cawm tuaj txog ze peb.
Thaum cov thwj tim hnov lo lus ntawd, lawv tu siab (sorrow). Yog peb ua siab ncaj (sincerity) txais kev tu siab li no, peb kev tu siab yuav rais mus ua peb lub hauv paus hloov siab tshiab (conversion).
Huab Tais Yes Xus hais rau cov thwj tim ntxiv tias “Tus uas muab Neeg Leej Tub muag, mas nws txoj hmoov phem. Txhiaj khoov tus neeg ntawd tsis txhob yug los” (MK 14: 21). Lo lus no tsis yog lo lus ‘tsawm’ (curse), tab sis yog lo lus ‘quaj mob siab’ (cry of pain). Vim tias nyob hauv lus Hes Las, mas lo lus ‘hmoov phem’ (woe) lub suab zoo li quaj seev (lamentation), hos lo lus ‘txhiaj khoov’ (alas) txhais tau tias ‘kheev lam’, yog lo lus xyu vim pom luag txom nyem ces hlub dhau.
Li ntawd, Huab Tais Yes Xus tsis yog txiav txim (judging), tab sis yog nws txaus siab (accept) ris kev txom nyem no. Huab Tais Yes Xus pom kev phem, nws tsis pauj (avenge) tab sis nws tu siab (grieve). Kev ntxeev siab yog kev tshem (exclude) yus tawm ntawm kev cawm, tsis yog kev txiav txim uas tau teem caij tseg.
Vaj Qhia ntuas tias yog peb lees tias peb yog neeg peev xwm me tsis muaj zog txaus (our limit), thiab peb yeem cia Leej Pleev kev mob (pain of Christ) los chwv peb, mas peb muaj peev xwm yug dua tau (born again).
Huab Tais Yes Xus tsis txaj muag (scandalize) rau peb lub zog muag (fragility). Huab Tais Yes Xus paub zoo tias tsis muaj txoj kev phooj ywg twg yuav hla dhau kev pheej hmoo hauv txoj kev ntxeev siab tau. Tab sis Huab Tais Yes Xus tseem tso siab ntxiv mus. Huab Tais Yes Xus tseem zaum ntawm rooj mov nrog rau nws cov thwj tim. Huab Tais Yes Xus tseem ntais lub ncuav mov thiab cev rau tus thwj tim ntxeev siab. Tswv Ntuj tsis tso nws rooj qav kev nyiam, tab txawm nws paub ntsoov tias sawv daws yuav tso nws pov tseg. Qhov no yog Tswv Ntuj lub zog ntsiag ntsiag (silent power of God).
Kawg no, Vaj Qhia txhib sawv daws kom rov nug tus kheej tias “Tus ntxeev siab puas yog kuv?” Tos cia sawv daws nug li no, vim tias thaum peb nug peb li no mas yog peb tau qhib chav tseeb (space for truth) hauv peb nruab siab. Nyob hauv qhov chav tseeb no thiaj yog lub hauv paus chiv kev cawm; vim tias nyob hauv no peb yuav pom tias tej zaus peb yog tus rhuav peb kev tso siab rau Tswv Ntuj, tab sis peb kuj yuav muaj peev xwm rov txhim thiab txuag tau peb kev tso siab kom sawv ntseg ruaj tau tuaj.
Qhov no yog peb chaw vam khom; tab txawm peb paub tias peb yuav ntog, los Tswv Ntuj tsis tso peb pov tseg. Tab txawm peb ntxeev siab rau Tswv Ntuj, los Tswv Ntuj tseem nyiam peb mus li. Yog peb cia Tswv Ntuj kev nyiam los chwv peb, yog peb ua neeg me tsis muab hlob, yog peb yeem txais kev mob, thiab yog peb pheej xeeb mus li; mas peb yuav yug tshiab tau.