Hnub tim 6 lub 7 hli tas los thaum tav su, Vaj Qhia Les Os 14 coj cov ntseeg hais zaj tus Tshiab xa xov thiab nthuav lub Moo Zoo rau sawv daws mloog. Lub Moo Zoo yog piav txog Huab Tais Yes Xus xa 72 tus thwj tim mus tshaj txog Tswv Ntuj lub Ceeb Tsheej (LK12: 1-12, 17-20). Vaj Qhia hais zoo li no tias tus zauv 72 yog tus zauv qhia tias lub Moo Zoo yog Tswv Ntuj pub rau txhua haiv neeg nyob hauv lub qab ntuj, Huab Tais Yes Xus hais txog qhov no tias “Qoob loo zoo sau muaj ntau kawg, tab sis cov tub zog muaj tsawg” (LK 10: 2).
Huab Tais Tswv Ntuj xav ua tej yam loj nyob hauv ntiaj teb neeg lub neej thiab liv xwm, tab sis muaj tsawg leej thiaj ras txog, ces lawv nres thiab txais yam Tswv Ntuj pub rau lawv. Lawv tau txais, lawv tshaj thiab faib rau lwm tus.
Vaj Qhia hais ntxiv tias lub Koom Txoos thiab ntiaj teb neeg tsis xav tau tus ua hauj lwm raws li yog txoj kab xwm, tab sis lub Koom Txoos xav tau tus neeg kub siab ua hauj lwm vim nws xav ua tus thwj tim nyiam ua pov thawj rau cov nyob ib ncig nws pom txog Tswv Ntuj lub Ceeb Tsheej.
Cov neeg ua txoj hauj lwm vim lawv xav tias yog lawv txoj kab xwm, mas lawv yog cov ntseeg sab nraud xwb, lawv tsis muaj lub siab ntseeg. Cov neeg ntseeg zoo li no mas peb pom muaj coob; lawv ua raws li lawv kev ntseeg thaum lawv xav ua, tsis xav ua ces lawv tso tes. Lawv leg txoj hauj lwm tsis xwm yeem.
Huab Tais Yes Xus hais tias “Nej thov tus tswv qoob kom nws xa ib co tub zog tuaj sau nws cov qoob”, mas Vaj Qhia nthuav tias Tswv Ntuj cov tub zog sau qoob yuav muaj ntau tuaj tau, mas pib ntawm peb kev thov Tswv Ntuj. Cov ntseeg yuav tau muab kev thov Ntuj saib ua qhov loj; lawv yuav xub thov Ntuj ua ntej yuav ua cov hauj lwm saib xyuas tsoom ntseeg.
Tom qab ntawd, Vaj Qhia Les Os 14 tshaj rau sawv daws paub tias lub lis piam no mus, nws yuav tshais chaw mus nyob tim lub tsev Kas Tes Nkas Dos Fos (Castel Gandolfo) raws li cov kab ke Vaj Qhia ib txwm ua nyob hauv lub caij ntuj sov. Vaj Qhia kuj foom koob hmoov rau sawv daws kom nyob hauv lub caij ntuj sov no, sawv daws tawm rooj mus ncig teb chaws, mas kom sawv daws tau txais ib lub zog pab sawv daws kom lub cev thiab lub siab rov tshiab tuaj.