Vaj Qhia Les Os 14 ntuas cov hlub ntxhais hluas tuaj sib txoos ua lub ntees cov hluas lub xyoo ntshiab nyob tuam ceeb Los Mas tias Huab Tais Yes Xus yog peb chaw vam khom thiab txhib lawv tias thaum twg lawv hnov Huab Tais Yes Xus khob lawv tus plig lub qhov rais, mas lawv tawm tuaj nrog Huab Tais Yes Xus mus yos kom pom txoj sia nyob mus li.
Hnub tim 28 lub 7 hli txog tim 3 lub 8 hli 2025 Vas Tis Kas ua lub ntees cov hluas lub xyoo ntshiab (Jubilee of Youth) nyob hauv tuam ceeb Los Mas, ces hnub tim 3 uas yog ncaj rau Hnub Chiv hauv lub Lis Piam, Vaj Qhia Les Os 14 thiaj tuaj ua tswv cuab coj lub txoos txi Ntuj. Vaj Qhia pib hais tias Huab Tais Yes Xus hloov peb lub neej thiab tsom kev kaj rau peb kev sib nyiam (affection), kev ntshaw (desire), thiab kev xav (thought).
Cov lus hauv phau ntawv Kos Es Les yog ib cov lus hais rau peb kom lees txais peb kev tsis muaj zog thiab lees tias txhua yam puav leej yaj ntshis.
Tswv Ntuj tsis tsim peb los kom nyob twj ywm, tab sis Tswv Ntuj tsim peb los kom huam vam mus li yog tias peb txawj sib nyiam. Li ntawd, peb thiaj ntshaw txog tej yam tseem ceeb. Thaum peb paub li no, peb thiaj yuav muab siab rau mloog lwm tus.
Peb muab peb kev ntshaw hloov ua kom zoo li tus me nyuam sawv ntawm tus ntaiv ntsia mus rau cov qhov rais, ces peb yuav pom tias Tswv Ntuj ntsia ntsoov peb thiab tab tom khob peb tus plig lub qhov rais.
Thaum peb tseem ua neeg hluas, peb qhib siab dav cia Huab Tais Yes Xus los nyob hauv, thiab peb tawm mus nrog Huab Tais Yes Xyus yos kom pom txoj sia nyob mus li, mas yog qhov zoo nkauj kawg kiag.
Thaud Leej Ntshiab Aus Nkus nug tias dab tsi yog neeg chaw vam khom? Puas yog lub ntiaj teb, los yam zoo nkauj nyob hauv lub ntiaj teb? Nws pom tias neeg chaw vam khom yog tus tsim lub ntiaj teb, tus tsim qhov zoo nkauj rau lub ntiaj teb. Tus ntawd yog Tswv Ntuj. Tswv Ntuj yog peb chaw vam khom.
Leej Ntshiab Aus Nkus tseem tau hais tias Huab Tais nyob hauv kuv, tab sis kuv nyob sab nraud, nyob ntawd kuv thiaj nrhiav Huab Tais. Huab Tais hu kuv, Huab Tais tsa suab nrov nrov hu, kom kuv hnov Huab Tais lub suab.
Vaj Qhia lees rau sawv daws tias muaj ntau tus tub ntxhais hluas ua zoo li Leej Ntshiab Aus Nkus, lawv xav ntau yam zoo li Leej Ntshiab Aus Nkus xav.
Muaj tej lo lus zoo li no txhawv hauv nruab siab; yam li kev zoo siab tseeb tiag (true happiness) yog dab tsi? Lub ntsiab hauv neeg txoj sia yog dab tsi? Dab tsi yuav pab daws peb lub neej tsis muaj qab hau no, los yog peb kev dhuav siab, los yog lub neej dog dig no tau?
Vaj Qhia muab ntsia mas pom tias ob peb hnub uas cov hluas tuaj sib sau ua ke nyob ntawm no, mas lawv tau txais ib lub swm txheej zoo nkauj thiab to taub tias peb lub neej puv npo tsis yog vim peb khaws tau ntam yam cia ua peb ntiag tug, los yog vim yam peb muaj; ib yam li zaj paj lug Huab Tais Yes Xus hais hauv lub Moo Zoo hnub no.
Peb lub neej puv npo tau mas yog peb zoo siab hlo pub yam peb muaj ntawd rau lwm tus. Peb yuav tsa hau ntsia mus lawm saud, ntsia Huab Tais Yes Xus tus ua peb chaw vam khom. Huab Tais Yes Xus zes kev ntshaw hauv peb kom kub tuaj, kom peb ntshaw ua cov hauj lwm loj thiab muaj tsim; yam li ua kom lub qab ntuj tsheej neeg thiab ua kwv ua tij.
Yog li mas thov peb tshwj kev koom nyob hauv Huab Tais no cia, tshwj kev ntau phooj ywg nrog Huab Tais no cia kom nyob mus li. Peb tshwj cia tau yog peb xyaum ua neeg nyiam thov ntuj, nyiam teev Ntuj, txais Cim Yug tas txwv, nquag mus daws txhaum, thiab ua cov hauj lwm sis nyiam sis hlub.
Li ntawd, tsis hais cov hluas mus nyob rau qhov twg kuj xij, xav kom lawv tsis txhob txaus siab rau yam lawv muaj. Cov hluas tsum ntshaw txog yam loj dua ntawd, yog coj lub neej mus nyob hauv qhov ntshiab huv, ces lawv yuav pom tias niaj hnub lub Moo Zoo yuav ua lub teeb ci nyob hauv lawv thiab nyob hauv lwm tus.