Hnub tim 24 lub 8 hli 2025 ncaj rau Hnub Chiv lis piam 21 caij Nyob Nruab Xyoo, lub Moo Zoo yog cov lus raws li Leej Ntshiab Lus Kas phau ntawv hais txog lub qhov rooj nqaim (LK 13: 22-30), mas Vaj Qhia nthuav tias lub qhov rooj nqaim qhia kom peb ua lub neej nyob hauv kev ntseeg tiag.
Ua ntej yuav coj sawv daws hais zaj ‘tus Tshiab xa xov’, Vaj Qhia Les Os 14 nthuav lub Moo Zoo hauv Hnub Chiv lis piam 21 caij Nyob Nruab Xyoo rau sawv daws mloog thiab xav tswv yim. Hnub no Huab Tais Yes Xus hais txog ‘lub qhov rooj nqaij’ (narrow gate). Vaj Qhia muaj lus rau sawv daws khaws xav, yog lo lus tias ‘Huab Tais Tswv Ntuj yog Leej Txiv hlub thiab khuv leej neeg, ua cas Huab Tais Yes Xus thiaj li hais tias cov yuav tau txais kev cawm, yog cov mus hauv lub qhov rooj nqaim?’
Vaj Qhia muab xav mas pom tias lo lus no tsis ua rau peb qaug zog, tab sis lo lus no twv peb cov xav tias kuv muab siab ntso leg txoj kab xwm teev hawm Tswv Ntuj (practice religion) zoo lawm, kuv tau txais kev cawm lawm.
Kom peb nco nraim lo lus tias qhov Huab Tais Tswv Ntuj txaus siab mas tsis yog peb cov txim txi Ntuj thiab peb cov lus thov Ntuj, tab sis qhov Huab Tais Tswv Ntuj nyiam mas yog kev nyiam lwm tus neeg thiab ua ncaj rau peb cov kwv tij. Yog li mas, thaum cov neeg hais tias lawv zoo txaus lawm vim lawv tsis nruam lub Txoos txi Ntuj thiab lawv kub siab thov Ntuj tsis tseg, lawv mus sawv nyob ntawm Tswv Ntuj xub ntiag; lawv yuav hais rau Huab Tais Tswv Ntuj tias “Huab Tais, peb twb noj thiab haus nyob ntawm koj xub ntiag, hos koj twb qhia sawv daws nyob hauv peb cov tshav puam.”
Cov neeg zoo li no, Huab Tais Tswv Ntuj yuav teb rau lawv tias “Kuv tsis paub nej nyob qhov twg tuaj, nej txav mus deb kuv, tas nej cov ua tsis ncaj huv tib si.”
Tos Vaj Qhia hais zoo li ntawd, vim tias kev ntseeg tsis yog yuav ntsuas tias koj puas muab siab rau teev Ntuj los koj paub Ntuj kev cai npaum li cas. Kev ntseeg tiag (authentic faith) tsis yog lub ncauj tshaj txog Lo Lus, tsis yog kev mus koom lub Txoos txi Ntuj, kev paub Ntuj kev cai zoo. Peb kev ntseeg yuav txia ua kev ntseeg tiag tau, mas yog kev ntseeg ntawd vas tag nrho peb lub neej, kev ntseeg ntawd ua tus cag nrhau peb txoj kev xaiv, kev ntseeg ntawd ua rau peb muab siab rau ua qhov zoo (good) thiab pheej hmoo nyiam (risk in love) luag tej xws li Huab Tais Yes Xus.
Huab Tais Yes Xus yog tus piv txwv thiab yog tus qauv hais txog kev ntseeg tiag, Huab Tais Yes Xus yog lub qhov rooj nqaim cia rau peb chaws mus hauv kom tau txais kev cawm. Huab Tais Yes Xus lub qhov rooj yog Ntoo Cuam lub qhov rooj nqaim (the narrow gate of the Cross).
Kev chaws mus hauv lub qhov rooj nqaim thiaj li yog yam txiav siab tsis yooj yim (difficult decision) thiab feem ntau tsis nyiam xaiv (unpopular decision), yog kev tawm tsam peb lub siab nyiam cuaj khaum (resisting our selfish inclinations), yog kev qee yus tus kheej mus tsob hwm luag lwm tus (placing ourselves at the service of others), yog kev ua qhov yog txawm tias saib zoo li lub tswv yim phem yeej lub tswv yim zoo lawm (persevering in doing what is right when the logic of evil seems to prevail).
Yog peb chaws tau lub qhov rooj nqaim li hais los no, peb yuav pom tias peb lub neej no huaj vam. Tom qab ntawd, peb yuav tau mus nyob hauv Tswv Ntuj lub siab lub plawv dav thiab nyob zoo siab mus li hauv Tswv Ntuj rooj qav.