Leej Ntshiab Lus Is tim 9 yog tus vaj kav Fab Kis teb hauv xyoo 1226 txog xyoo 1270.
Lus Is tim 9 yug los xyoo 1214. Nws poj niam nkawd muaj 11 tug me nyuam. Nws ua vaj kav teb chaws Fab Kis zoo kawg, ces teb chaws Fab Kis thiaj nyob thaj yeeb thiab muaj kev vam meej.
Tus vaj Lus Is tim 9 hlub nws poj niam, nws poj niam lub npe hu ua Mas Nkaws Lis.
Xyoo 1244 tus vaj Lus Is tim 9 raug ib tug mob hnyav uas sawv daws xav tias nws yuav zoo tsis taus lawm. Nws tus ntsuj plig kawg yuav mus cuag Huab Tais Tswv Ntuj. Tiam sis tus vaj Lus Is tim 9 tso siab rau Tswv Ntuj, nws hais rau sawv daws tias “Yog tias muaj ib hnub kuv rov zoo, mas kuv yuav coj ib pab tub rog mus tim lub teb chaws Ntshiab, kom xwv Huab Tais Yes Xus lub Ntxa tsis txhob nyob hauv cov Mawv Xis Lim lawv txhais tes.”
Tus vaj Lus Is tim 9 tau hais zoo li ntawd tas, tau 10 hnub tom qab nws cia li zoo lawm tiag, ces nws npaj siab ua tej dej num tseem ceeb raws li nws tej lus hais. Nws siv sij hawm ntev li 3 xyoos ntau los ua qhov ntawd.
Xyoo 1248 tus vaj Lus Is tim 9 thiaj coj 25,000 tus tub rog thiab 8,000 tus nees. Tus vaj Lus Is tim 9 ob tug kwv tij kuj nrog nws mus thiab. Muaj li ntawm 1,000 tawm lub nkoj thauj cov tub rog thiab cov nees mus hla lub hiav txwv Mes Dis Tes Las Nes. Thaum tus vaj Lus Is tim 9 thiab nws pab tub rog mus txog teb chaws Hais Nkws Tos, lawv txeeb tau lub nroog Das Mias. Tab sis lawv tsis muaj hmoov li. Pab tub rog feem coob raug mob loj thiab muaj ib nrab raug tuag. Tsis tas li ntawd xwb, tus vaj Lus Is tim 9 thiab ib co thawj tub rog kuj raug cov yeeb ncuab Mawv Xis Lim ntes coj mus kaw nyob hauv tsev loj faj.
Cov Mawv Xis Lim hais tias “Nej yuav tsum them ib pob nyiaj los txhiv nej, ces nej thiaj yuav tau dim ntawm tsev loj faj mus. Txij hnub no mus txog hnub uas cov nyiaj txhiv yuav tuaj txog peb tes, mas peb yuav tso nej tus vaj mus nyob twj lij. Tiam sis ntawm tus vaj cov thawj tub rog mas lawv yuav tsum nyob hauv tsev loj faj. Tsis li ntawd, mas peb yuav muab nej tus vaj kaw nyob hauv tsev loj faj, hos peb tso nws cov thawj tub rog mus nyob twj lij. Saib! Nej xav li cas?”
Tus vaj Lus Is tim 9 muaj lub siab zoo thiab siab tawv, nws tuaj yeem nyob hauv tsev loj faj mus txog hnub cov nyiaj txhiv tuaj txog. Ib lub hlis tom qab tus poj vaj Mas Nkaws Lis thiaj muab nyiaj npaum li cov Mawv Xis Lim tau hais coj mus txhiv tus vaj thiab nws cov thawj tub rog rov qab los.
Tau 17 xyoo sib law uas Lus Is tim 9 ua vaj kav nws lub teb chaws raws kev ncaj ncees. Niaj hnub chiv nws nrog tej pab neeg ntseeg mus koom Thaj Txi Ntuj thiab nws txais lub Cim Daws Txhaum, uas yog lub Cim pab peb nrog Tswv Ntuj rov sib haum xeeb .
Muaj ib yam loj uas tus vaj kub siab ua yog qhov tias hnub twg nws hnov tias nyob hauv lub teb chaws muaj cov nom txiav txim los sis cov tub ceev xwm ua tsis ncaj rau tsoom pej xeem, piv li lawv nyiag noj nyiaj xiab, lawv kaus tsoom pej xeem paj hlwb, mas hnub ntawd tus vaj cia li xa tub rog mus ntes cov nom phem ntawd thiab muab txim hnyav rau lawv, coj lawv los kaw hauv tsev loj faj. Tus vaj ua li ntawd mas tsoom pej xeem pluag thiab txom nyem nyiam nws kawg, vim lawv muaj chaw vam khom thiab tso siab.
Xyoo 1270 tus vaj Lus Is tim 9 rov coj ib pab tub rog mus rau tej lub teb chaws Tws Nis Xis uas muaj cov neeg coj Mawv Xis Lim kev cai. Zaum no yog zaum ob, tab sis tus vaj lub hom phiaj tsis zoo li qhov qub lawm, nws tsis yog mus ntaus rog lawm. Nws mus tshaj Ntuj Lus rau cov neeg Mawv Xis Lim, kom xwv lawv nrauj kev cai Mawv Xis Lim pov tseg thiab tig los yuav lub siab tshiab.
Zaum ntawd, tus vaj coj ib pab tub rog coob li 15,000 leej mus. Tab sis txoj hmoov kuj tsis muaj thiab. Thaum lawv tseem nyob hauv teb chaws Tws Nis Xis, mas cov tub rog raug mob loj coob leej, ces ib feem ntawm pab tub rog ntawd tau tuag. Tus vaj Lus Is tim 9 tus tub kuj tuag. Ho tus vaj kuj raug mob thiab tau tas sim neej. Yog hnub tim 25 lub 8 hli xyoo 1270.
Txij lub caij tus vaj Lus Is tim 9 tuag mus txog xyoo 1295 los xyoo 1297, mas muaj tej yam txawv txav zoo li no: muaj tej pab neeg mob tuav txog tus vaj Lus Is tim 9 lub npe los cev lawv tej lus thov rau Huab Tais Tswv Ntuj, mas lawv tus mob rov zoo hlo. Thaum muaj tej xwm txawv txav li ntawd tshwm sim, mas cov Tswv Qhia thiaj mus cev lus rau Vaj Qhia uas nyob lub nroog Los Mas. Vaj Qhia Npos Nis Fas tim 8 thiaj tshaj lus tawm rau lub Koom Txoos Kav Tos Liv paub tias “Yog vim muaj tej tus neeg muaj mob tau vam txog tus vaj Lus Is tim 9 los pab cev lus rau Tswv Ntuj, ces lawv tus mob thiaj rov zoo, mas tus vaj Lus Is tim 9 yog ib tug Leej Ntshiab nyob pem Tswv Ntuj lub Ceeb Tsheej. Li ntawd phim peb lub Koom Txoos Kav Tos Liv yuav vam txog Leej Ntshiab Lus Is tim 9 los pab peb cev tej lo lus thov rau peb tus Huab Tais Tswv Ntuj.”