Hnub tim 30 lub 7 hli tas los Vaj Qhia Les Os 14 ntuas cov ntseeg kom lawv xyaum hais cov lus cawm luag, tsis yog hais cov lus txov luag.
Lis Piam Hnub Plaub yog hnub Vaj Qhia tuaj qhia Ntuj kev cai hais txog Huab Tais Yes Xus lub neeg tshaj lub Moo Zoo thiab ua cov hauj lwm kho ib zeej tsoom. Nyob hauv hnub no Vaj Qhia xav kom sawv daws ras tias lub zim txwv no yog lub zim txwv sawv daws xav txais kev kho (healing) ib yam li thaud Huab Tais Yes Xus tseem ua neej nyob. Tos Vaj Qhia hais zoo li ntawd, vim tias niaj hnub no lub qab ntuj nyob hauv ‘kev kub ntxhov’ (violence) thiab ‘kev ntxub ntxaug’ (hatred) uas txo neeg lub meej mom (human dignity). Peb lub xeeb ceem (society) tab tom raug mob, tsis yog los ntawm kev sib nrug (isolation), tab sis yog vim lub nra hnyav dhau.
Lub nra hnyav ntawd, yog qhov tias peb tau txais ntau tsav ntau yam xwm tsis hais cov xwm tseeb los cov xwm cuav, ces tej xwm ntawd tsuam peb lub hlwb lub tswv yim ua rau peb sab (exhausted) thiab yoob (confused).
Thaum zoo li no lawm, ib txhia thiaj xav kaw yus cia kom tsis txhob hnov los paub txog dab tsi ntxiv.
Yog muaj raws li cov lus no, mas hnub no Vaj Qhia Les Os 14 thiaj muab cov lus hauv Mas Kos Ntawv Moo Zoo zaj hais txog Huab Tais Yes Xus kho tus lag ntseg thiab nplaig txhav (MK 7: 31-37) los nthuav qhia sawv daws. Vaj Qhia hais tias tus neeg no nws tsis yog nrhiav Huab Tais Yes Xus kom tau pab nws, tab sis yog muaj lwm tus coj nws tuaj cuag Huab Tais Yes Xus. Qhov no yog daim duab tsom txog lub Koom Txoos tias yog tus ua lwm tus luag, tshwj xeeb thaum law lag ntseg los yog tsis hnov lus ntxiv lawm.
Tom qab tus lag ntseg thiab nplaig txhav ntsib Huab Tais Yes Xus tas, nws rov hais taus lus. Qhov no kuj qhia tau rau peb tias tej zaus tos nws tsis hais lus los yog vim nws tsis paub yuav hais dab tsi zoo, los yog tej zaus nws xav tias nws tsis txawj hais lus. Raws li peb pom mas nyob hauv peb, yog thaum peb hais lus tab sis luag tej to taub cov lus peb hais yuam kev, mas peb yeem nyob ntsiag ntsiag tsis hais lus ntshai yuav zoo dua. Muaj puas tsawg zaus peb ua li ntawd?
Vaj Qhia xav ntuas sawv daws tias kev nrog luag lwm tus sib tham sib txuas lus tsis yog kom luag to taub yam peb hais tawm los xwb, kev sib tham tseem pab kho luag tej thiab; yam li peb lo lus tsis txov luag tsis ua kom luag tu siab los ntxhov siab. Kev txawj hais lus yog lub taw rooj coj peb tawm mus pom Huab Tais Yes Xus, mus hla Huab Tais Yes Xus kev txom nyem, thiab ntsib Huab Tais Yes Xus tus Ntoo Cuam.
Li ntawd, hnub no Vaj Qhia thiaj coj sawv daws thov Huab Tais Yes Xus pab kho peb txoj kev sib tham sib txuas lus kom peb txawj hais cov lus zoo, lus mos, lus tseeb, thiab thov Huab Tais Yes Xus pab kom lub Koom Txoos yog qhov chaw txhua leej txhua tus tau hnov Huab Tais Yes Xus cov lus, txhua leej txhua tus tau txais kev daws kho, thiab txhua leej txhua tus txia ntshis ua tus xa moo hais txog txoj kev cawm.