1) Kuv tus Tswv Ntuj, thov koj qhib kuv qhov ncauj.
2) Kom kuv tau cav txog koj lub koob meej.
3) Huab Tais Leej Txiv, Huab Tais Leej Tub, Huab Tais Leej Ntuj Plig,
4) muaj koob meej nto moo lug lub zim txwv no mus txog fab lwm txheej xws li txheej laus thaud los.
CAIJ TOS HUAB TAIS
1. CUAB ZAJ
1) Mab Liab, koj yuav zoo siab,
2) koj yog tus muaj txiaj ntsim puv koj lub siab.
3) Koj yuav yug ib tug tub, koj yuav tis nws npe hu ua Yes Xus.
4) Leej Ntuj Plig Ntshiab yuav los nyob saum koj,
5) Ntuj lub hwj huam yuav los roos koj.
6) Tus me nyuam koj yuav yug yog ib tug ntshiab,
7) luag yuav hu nws ua Huab Tais Ntuj tus Tub.
8) Muaj ib lub suab qw nyob hauv teb chaws suab puam tias
9) Nej kho Huab Tais txoj kev, nej tshav nws tej xub ke kom tiaj.
10) Tswv Ntuj lub hnub nyoog tuaj txog ze lawm.
2. ZAJ HU NKAUJ
1) Nej ntsia tus Huab Tais cawm peb tuaj yuav txog.
2) Nyem no txog lub zwj ceeb kawg, Tswv Ntuj tso nws Leej Tub tuaj.
3) Huab Tais tsa nws tus chij coj tas txhua haiv neeg.
4) Nws muaj peev xwm hlob mus li, nws txoj kev thaj yeeb yuav tsis kawg.
5) Yes Lus Xas Les tshiab, koj tsa muag nriaj cov hlua khi koj.
6) Tas zeej tsoom hwm Ntuj, nej sawv tsees npaj siab tos Huab Tais.
7) Nej zam lub siab me, nej ntaus lub siab loj, nej ua thawj hlo.
8) Nej yuav luag ntxhi mus ce Huab Tais cov dej tshuaj.
9) Huab Tais txhob ncua ntev, koj tuaj ntxuav His Xas Lais tej txhaum.
10) Koj cev tes npo cov neeg khaub zig koj,
11) koj tsa cov neeg tsis muaj txoj sia.
12) Koj tuaj kaj cov neeg maub kev tsaus ntuj.
13) Koj sau tsoom pej xeem nyob thoob qab ntuj los vij koj tus chij.
14) Peb cav txog Huab Tais Leej Txiv nrog Leej Tub thiab Leej Nplij Neeg
15) muaj hwj huam koob meej nto moo lug mus tiam dhau tiam.
16) Ua li.
3. ZAJ NKAUJ PAJ NRUAG
4. TSWV NTUJ LO LUS
5. ZAJ THOV HUAB TAIS
1) Ntuj huab cua aib! Koj tso tus siab ntshiab tuaj puav tam li nag los.
2) Ntiaj teb liaj ia aib! Koj yug tus cawm lub yaj ceeb puav tam li noob tuaj kaus.
3) Peb sawv daws thov Huab Tais,
4) Tswv Ntuj, koj pom peb tu siab nyob hauv txoj kev tsaus,
5) thov ko tuaj xyuas peb tiam no,
6) thov koj nplij peb mus txog hnub koj lub hwj chim yuav tawm tuaj.
7) Peb vam txog koj
8) uas koj nrog Leej Txiv thiab nrog Leej Ntuj Plig Ntshiab muaj txoj sia,
9) thiab ua vaj nyob mus li tas txhiab niag tim puas xyoo.
10) Ua li.
CAIJ HUAB TAIS YUG LOS
1. CUAB ZAJ
1) Mab Liab yug nws Leej Tub, nws muab ntaub mos los qhwv.
2) Nws muab tso pw hauv lub dab nyuj.
3) Ib tug Tshiab tawm tuaj hais rau cov neeg zov yaj tias
4) Hmo no nyob hauv Das Vis lub nroog,
5) tus tuaj cawm nej yug los lawm.
6) Ib pab Tshiab coob tawm tuaj cav txog Huab Tais Ntuj tias
7) Nyob pem ntuj Tswv Ntuj nto meej nto moo,
8) nyob yaj ceeb cov neeg siab dawb siab huv nyob kaj lug.
2. ZAJ HU NKAUJ
1) Thaum lub sim ceeb tseem tsis tau xeeb los Leej Lo Lus yeej ua Tswv Ntuj.
2) Leej Lo Lus yuav lub cev neeg tuaj nrog peb nyob.
3) Tswv Ntuj xav coj tsoom neeg raug kev ploj rov los nyob hauv nws lub Ceeb Tsheej.
4) Nws yeem xeeb ntawm Nkauj Tsim Txiaj los.
5) Hnub no txoj kev thaj yeeb nqes saum ntuj los.
6) Yes Xus yog tus phooj ywg muaj lub npe nplij neeg lub siab.
7) Yog lub hnub tsom txoj kev kaj ua neeg lub tswv yim ntej.
8) Tas txhua leej xeeb los nyob hauv qab ntuj kha xav pom nws lub meej mom.
9) Cov neeg nyiam Ntuj cav txog tus nkauj tsis muab hlob,
10) ntxim Tswv Ntuj yug Leej Tub ib txhij ua Tswv Ntuj ua neeg,
11) pw hauv dab nyuj muaj hwj chim ci ntsa iab nyob saum ntuj.
12) Yog tus tub tawm hauv nws tuam tsev tuaj qhaib lub ntiaj teb neeg.
13) Yes Xus uas koj yug ntawm Nkauj Ntshiab los,
14) koj nrog Leej Txiv thiab Leej Ntuj Plig
15) muaj koob meej nto moo lug mus txheej dhau txheej.
16) Ua li.
3. ZAJ NKAUJ PAJ NRUAG
4. TSWV NTUJ LO LUS
5. ZAJ THOV HUAB TAIS
1) Thaum txog ib tag hmo ntuj teb ntsiag to.
2) Koj lo lus muaj zog sawv ntawm lub theej kiab los.
3) Peb sawv daws thov Huab Tais,
4) Tswv Ntuj, koj yog tus ua kom Nkauj Ntshiab Mab Liab txi txiv,
5) nws yug tus cawm lub qab ntuj neeg mus li,
6) nws ua kom peb tau txais tus tsim txoj sia.
7) Thov koj mloog nws cev peb lus rau koj.
8) Peb vam txog peb tus Huab Tais Yes Xus Pleev uas nws yog koj tus tub, nws nrog koj thiab nrog Leej Ntuj Plig Ntshiab muaj txoj sia,
9) thiab ua vaj nyob mus li tas txhiab niag tim puas xyoo.
10) Ua li.
YES XUS TAWM TUAJ
1. CUAB ZAJ
1) Nyob phab hnub tuaj, peb pom tus vaj Yus Das lub hnub qub, peb tuaj hawm nws.
2) Npes Les Hes, Yus Das teb, koj tsis yog lub zos me dua cov.
3) Vim nyob hauv koj yuav sawv ib tug Tswv los kav kuv haiv His Xas Lais.
4) Cov kws hnub qub pom tus me nyuam nrog nws niam Mab Liab nyob.
5) Lawv kim caug pe tus me nyuam, lawv cev paj tshab pub ua tshav ntuj rau nws.
6) Lawv taug dua ib txog kev tshiab rov qab mus lawv teb chaws.
2. ZAJ HU NKAUJ
1) Hnub no Leej Pleev tawm tuaj puav tam li tus vaj tswj tas tsoom vaj,
2) nws lub hnub qub ci dua nkauj hnub coj cov kws txuj tuaj txog lub zos Npes Les Hes.
3) Rooj ntug qhib ncaj saum Tswv Ntuj tus Yaj nqes hauv dej Yos Las Das.
4) Rau hnub dej mloog Leej Pleev lus txia ua cawv nyob Kas Nas.
5) Tswv Ntuj tsoom tub, nej nqa paj tshab tuaj rau Huab Tais.
6) Nej muab nyiaj muab kub lost sob hwb nej tus vaj.
7) Nej cev txab txiv yoov rau Tswv Ntuj tus Thawj Leej Choj.
8) Nej npaj nqa tshuaj qhwv tuag rau tus tuaj yeem mus zwm ntxa.
9) Tas ntiaj teb cov haiv neeg cov Huab Tais nej tso kev khib kev muab hlob tseg.
10) Txhob ua tus vaj tsis hwm ntuj muab cov me nyuam siab dawb tua.
11) Nej taug lub hnub qub qhia kev mus txog Leej Pleev nrog nws niam tos nej.
12) Nej thau paj tshab zoo ntawm nej siab los cev rau nws.
13) Yes Xus uas koj tab meeg tawm tuaj rau tas txhua haiv neeg pom,
14) koj nrog Leej Txiv thiab Leej Ntuj Plig Ntshiab
15) muaj txoj sia thiab ua vaj nyob mus li tas txhiab niag tim puas xyoo.
16) Ua li.
3. ZAJ NKAUJ PAJ NRUAG
4. TSWV NTUJ LO LUS
5. ZAJ THOV HUAB TAIS
1) Leej Txiv lub suab nrov saum ntuj tuaj tias
2) Tus no yog kuv Leej Tub, kuv hlub nws kawg, kuv lub siab nrog nws nyob.
3) Peb sawv daws thov Huab Tais,
4) Huab Tais, koj tsoom pej xeem huab hwm thov koj,
5) koj qhia peb lub tswv yim kom peb pom cov num zoo ua,
6) koj ntxiv zog rau peblub siab kom peb ua tau cov num zoo.
7) Peb vam txog peb tus Huab Tais Yes Xus Pleev uas nws yog koj tus tub,
8) nws nrog koj thiab nrog Leej Ntuj Plig Ntshiab muaj txoj sia,
9) thiab ua vaj nyob mus li tas txhiab niag tim puas xyoo.
10) Ua li.
CAIJ PLAUB CAUG
1. CUAB ZAJ
1) Kuv haiv neeg, ib hnub coj cov kab ke yoo raws li kuv nyiam mas yog zoo li no:
2) yog daws cov hlua khi cov neeg tsis muaj txhaum,
3) yog txo cov neeg ris nra lawv lub nra,
4) yog nrog cov neeg tshaib faib yus cov mov,
5) yog cheem cov neeg pluag tsis muaj tsev kom lawv nyob hauv yus tsev.
6) Koj pom ib tug neeg khaub hlab, koj muab ris tsho rau nws hnav,
7) ib tug neeg muaj ib lub cev zoo li ko mas koj txhob thuam nws.
8) Nyem no nej yuav rov qab los cuag kuv, nej yuav hloov siab tas,
9) nej yuav yoo mov, yuav quaj txog nej cov txhaum.
10) Nej txhob ua nej tej tsho ntuag, yuav ua nej lub siab ntuag thiaj yog.
11) Nej rov los cuag nej tus Huab Tais, nws hlub nej,
12) nws khuv leej nej tas nrho, nws tsis xav pom nej ua phem.
2. ZAJ HU NKAUJ
1) Huab Tais Tswv Ntuj Tswv Teb,
2) lub sij hawm plaub caug no peb nquag teev koj.
3) Peb yuam peb lub cev kom txhob taug kev yooj yim.
4) Peb txhob tso peb lub siab mus nrhiav noj nrhiav haus raws txoj kev txhau.
5) Kwv tij phooj ywg, peb muab peb mov los faib rau cov neeg tshaib noj.
6) Peb txais cov pluag peb pub rau hnav.
7) Peb tso tej lus sib cav sib ceg ua plaub ua ntug tseg.
8) Peb pab luag ris luag lub nra.
9) Tswv Ntuj, koj pom hauv neeg nruab siab.
10) Koj paub tias peb tsis muaj zog ua raws txoj kev zoo.
11) Peb xav rov tig los cuag koj.
12) Koj zam rau peb, koj kho peb tus plig kom zoo hlo.
13) Leej Txiv Leej Tub Leej Ntuj Plig,
14) Huab Tais muaj txoj sia,
15) koj xav kom neej muaj txoj sia li koj.
16) Koj cawm neeg ntawm txoj kev tuag.
17) Tas lub qab ntuj neeg yuav nco koj txiaj ntsim nyob mus li.
18) Ua li.
3. ZAJ NKAUJ PAJ NRUAG
4. TSWV NTUJ LO LUS
5. ZAJ THOV HUAB TAIS
1) Huab Tais muab nws ob txhais tis los vov koj.
2) Koj nyob hauv nws qab tis, koj yuav tso siab.
3) Peb sawv daws thov Huab Tais,
4) Huab Tais, thov koj txiav cov hlua rub peb mus hauv txoj kev txhaum.
5) Peb tsim nyog raug txim.
6) Peb khaub zig koj lub siab zoo siab ntev.
7) Peb vam txog peb tus Huab Tais Yes Xus Pleev uas nws yog koj tus tub,
8) nws nrog koj thiab nrog Leej Ntuj Plig Ntshiab muaj txoj sia,
9) thiab ua vaj nyob mus li tas txhiab niag tim puas xyoo.
10) Ua li.
YES XUS RAUG TXOM NYEM
1. CUAB ZAJ
1) Leej Pleev yog tus Thawj Leej Choj kav lub Ceeb Tsheej tom ntej.
2) Nws tau hla lub Tuam Tsev Tsam Phooj uas tsis yog neeg txhais tes txhim tau.
3) Nws tau chaws mus hauv lub Tsev Txi Ntuj Ntshiab.
4) Nws tsis yuav ntshav tshis ntshav nyuj los txi Ntuj.
5) Nws muab nws roj ntsha los txhiv peb.
6) Nws cawm peb mus ib txhiab ib txhis.
2. ZAJ HU NKAUJ
1) Yav thaud ntoo coj peb lub keeb mus raws txoj kev tuag.
2) Nyem no Huab Tais ua kom ntoo nqa txoj sia rov rau neeg.
3) Lub ntiaj teb yuav tog hauv tim txwv.
4) Ntoo cuam yog lub nkoj pus peb mus txog lub tsheej nyob kaj lug.
5) Ntoo cuam koj ris lub nra zoo nyiam,
6) koj rawv koj tej ceg kom muag luav,
7) koj ris tus vaj kav lub ntuj nws lub cev,
8) koj muab koj los ua lub txaj zooj rau nws so.
9) Ntoo cuam kom nres peb lub siab ntseeg,
10) koj yog tus ntoo muaj koob meej nto tshaj,
11) ntiaj teb tej roob zoov, tsis muaj lwm tus ntoo txi txiv li koj.
12) Ntoo cuam peb hawm koj, peb khaub zig koj.
13) Lub hnub nyoog no peb nco txog peb tus Huab Tais raug txom nyem.
14) Koj txhab txiaj ntsim rau cov neeg ncaj, koj ntxuav cov neeg txhaum.
15) Leej Txiv Leej Tub Leej Ntuj Plig,
16) nej muaj koob meej ntoo moo lug loj sib luag,
17) tas lub sim ceeb cav txog nej peb leeg ua Tswv Ntuj.
18) Ua li.
3. ZAJ NKAUJ PAJ NRUAG
4. TSWV NTUJ LO LUS
5. ZAJ THOV HUAB TAIS
1) Tswv Ntuj, koj thaiv kuv kom lawv rab ntsis ntaj txhob chob kuv.
2) Huab Tais, koj pab kuv dim ntawm ncauj zag tsov lo.
3) Peb sawv daws thov Huab Tais,
4) Tswv Ntuj muaj hwj huam, niaj hnub peb ntsib ntau yam ceeb laj ntoog,
5) peb thov koj ntxiv zog rau peb,
6) vim peb tso siab rau koj tus Tub tuaj yeem txais txoj kev txom nyem.
7) Peb vam txog peb tus Huab Tais Yes Xus Pleev uas nws yog koj tus tub,
8) nws nrog koj thiab nrog Leej Ntuj Plig Ntshiab muaj txoj sia,
9) thiab ua vaj nyob mus li tas txhiab niag tim puas xyoo.
10) Ua li.
CAIJ HLA
1. CUAB ZAJ
1) Lawv pom ib tug hluas hnav tsho dawb zaum ntawm lawv sab xis, nws hais tias
2) Nej nrhiav Yes Xus uas luag muab nws tua nyob saum ntoo cuam, nws sawv rov qab los lawm.
3) Mab Liab Mas Ntas Las, koj mus hais rau kuv cov thwj tim tias
4) Kuv mus pem kuv Txiv thiab nej Txiv, kuv tus Huab Tais thiab nej tus Huab Tais.
5) Nej nyob kaj lug, nej ntsia kuv ob txhais tes taw; yog kuv tiag. As Les Lus Yas
6) Cov neeg tsis tau pom lawv xub ntseeg mas lawv txoj hmoov zoo. As Les Lus Yas.
2. ZAJ HU NKAUJ
1) Peb nco txog hmo peb hnav dawb,
2) peb ua rooj qav noj tus Yaj Hla,
3) peb hla dhau lub pas dej liab,
4) lub caij no peb thiaj cav txog Leej Pleev ua peb tus hau.
5) Leej Pleev hlub peb, nws hliv nws roj ntsha muaj nqes rau peb haus.
6) Nws yog tus thawj Leej Choj muab nws lub Cev Ntshiab txi rau Ntuj.
7) Nws yog tus tseem yaj coj peb ua Hmoov Hla tas ib sid,
8) nws yog cov mov dawb yug cov neeg taug txoj kev ntshiab.
9) Yes Xus, koj yog tus yaj nqes saum ntuj los,
10) koj xyob ntxwj nyoog cov dab lawm ntuj txias teb tsaus,
11) koj txo cov saw khi neeg nyob hauv txoj kev tuag,
12) koj nqa txoj sia rov tuaj rau peb.
13) Yes Xus, peb rov yug los nyob hauv koj,
14) koj niaj hnub npo peb ntawm txoj kev txhaum,
15) peb luag ntxhi mus li nyob hauv lub txiaj ntsim Hla.
16) Peb yuav cav txog peb tus vaj peb leeg tiam dhau tiam. Ua li.
3. ZAJ NKAUJ PAJ NRUAG
4. ZAJ THOV HUAB TAIS
1) Huab Tais, koj nrog peb nyob. As Les Lus Yas.
2) Lub hnub dai ncuv tim npoo ntuj. As Les Lus Yas.
3) Peb sawv daws thov Huab Tais,
4) Tswv Ntuj, niaj xyoo koj tsa peb sawv ua tej lub Txoos lom zem cav txog peb tus Huab Tais sawv rov los. 5) Tas lub caij peb hla lub ntiaj teb no peb zoo siab ua hnub nyoog Hla.
6) Peb tso siab tias lwm tiam peb yuav mus ua lub Txoos lom zem mus li.
7) Peb vam txog peb tus Huab Tais Yes Xus Pleev uas nws yog koj tus tub,
8) nws nrog ko thiab nrog Leej Ntuj Plig Ntshiab
9) muaj txoj sia thiab ua vaj nyob mus li tas ib txhiab niag tim puas xyoo.
10) Ua li.
YES XUS MUS SAUM NTUJ
1. CUAB ZAJ
1) Huab Tais Leej Txiv tsa Yes Xus sawv rov los.
2) Nws hu Yes Xus mus zaum ntawm nws sab xis,
3) nyob siab dua tas cuaj phiaj Tshiab.
4) Leej Txiv tso tas puas tsav yam nyob hauv Yes Xus qab xib taws.
5) Nws tsa Yes Xus ua lub Koom Txoos lub taub hau.
6) Lub Koom Txoos yog nws lub Cev Hlob.
7) Yes Xus mus pem nws lub loog, sawv daws qw cav txog nws. As Les Lus Yas.
8) Paj nruag xa nws mus pem nws lub Tuam Tsev. As Les Lus Yas.
2. ZAJ HU NKAUJ
3. ZAJ NKAUJ PAJ NRUAG
4. ZAJ THOV HUAB TAIS
1) Kuv rov mus cuag kuv Txiv. As Les Lus Yas.
2) Kuv rov mus cuag nej tus Huab Tais. As Les Lus Yas.
3) Peb sawv daws thov Huab Tais,
4) Tswv Ntuj muaj hwj huam, peb ntseeg tias koj Leej Tub yog tus cawm pev,
5) nws rov mus saum ntuj.
6) Peb thov koj, koj coj peb tsoom neeg mus nrog koj nyob pem koj Leej Tub lub Ceeb Tsheej.
7) Peb vam txog peb tus Huab Tais Yes Xus Pleev uas nws yog koj tus tub,
8) nws nrog koj thiab nrog Leej Ntuj Plig Ntshiab muaj txoj sia,
9) thiab ua vaj nyob mus li tas txhiab niag tim puas xyoo.
10) Ua li.
LEEJ NTUJ PLIG NQES LOS
1. CUAB ZAJ
1) Thaum txog hnub cov Yus Das ua hnub nyoog Tsib Caug,
2) cov thwj tim tuaj nyob ua ke.
3) Ib sij huam lawv txawm hnov ib yam nrov nroo ntws saum ntuj tuaj
4) xws li ib nthwv cu aua ncha tas lub tsev lawv nyob.
5) Cov thwj tim pom ib co nplaim yees tawm tuaj zoo li nplaim taws.
6) Cov nplaim ntawd faib ua ntau tuspoob tuaj txhua cov thwj tim taub hau.
7) Tam sim ntawd Leej Ntuj Plig tuaj nyob puv lawv siab. As Les Lus Yas.
8) Lawv pib hais tej xeem lus tshiab raws li Leej Ntuj Plig qhia lawv hais. As Les Lus Yas.
2. ZAJ HU NKAUJ
1) Huab Tais Yes Xus, koj yeej muaj Tswv Ntuj lub meej mom,
2) koj sawv txij Tswv Ntuj, koj yeem hle lub hwj chim ntawd tseg.
3) Koj xaiv lub tsiv neej qhev, koj ua koj yau,
4) koj coj lub meej mom xws li me neeg,
5) koj tseem nyiam yau tshaj neeg,
6) koj tuaj yeem tuag nyob saum ntoo cuam.
7) Vim li ntawd Tswv Ntuj thiaj tsa koj siab,
8) muab lub npe nto loj tshaj rau koj.
9) Tas sawv daws nyob saum ntuj nyob nruab yaj nruab yeeb,
10) hnov txog lub npe Yes Xu skim caug hwm.
11) Tas txhua haiv neeg cav ncha ntws txog koj ua lawv tus tswv.
12) Huab Tais Leej Txiv thiaj nrog koj nto moo lug mus li. Ua li.
3. ZAJ NKAUJ PAJ NRUAG
4. ZAJ THOV HUAB TAIS
1) Cov Hauv Paus Xa Lus hais tau ntau xeem lus. As Les Lus Yas.
2) Lawv tshaj Tswv Ntuj cov hwj huam yees ntxwv. As Les Lus Yas.
3) Peb sawv daws thov Huab Tais,
4) Tswv Ntuj muaj hwj huam nyob mus li,
5) peb thov kom peb tau txais Leej Ntuj Plig lub txiaj ntsim pab ua neeg thoob tsib,
6) lub txiaj ntsim pub tswv yim, lub txiaj ntsim pab xav tom ntej tom qab,
7) lub txiaj ntsim ntxiv zog, lub txiaj ntsim qhia txuj ci,
8) lub txiaj ntsim xyiv fab tsob hwb Tswv Ntuj.
9) Peb vam txog peb tus Huab Tais Yes Xus Pleev uas nws yog koj tus tub,
10) nws nrog koj thiab nrog Leej Ntuj Plig Ntshiab muaj txoj sia,
11) thiab ua vaj nyob mus li tas txhiab niag tim puas xyoo.
12) Ua li.
CAIJ NYOB NRUAB XYOO
HNUB CHIV
1. CUAB ZAJ
1) Nej sawv daws cov neeg teev Huab Tais Ntuj.
2) Nej cav lus zoo txog Huab Tais Ntuj.
3) Nej cov neeg zov hmo nyob hauv Huab Tais Ntuj lub tsev.
4) Nej tsa tes txog cov rooj txi Ntuj.
5) Nyob pem Xis Yoos nej cav lus zoo txog Huab Tais Ntuj.
6) Txog tus Huab Tais tsim lub ntuj lub teb.
2. ZAJ HU NKAUJ
1) Leej Nplij Neeg yog koj lub zog tsis tuaj nres,
2) mas yuav tsis nuaj ib qho ntshiab nyob hauv neeg lub siab.
3) Koj ua kom tas puas tsav yam rov tshiab tuaj.
4) Yam twg tsis huv, thov koj tuaj ntxuav.
5) Yam twg qhuav, thov koj tuaj ywg rau.
6) Yam twg raug mob, thov koj tuaj kho.
7) Yam twg tawv, koj tuaj ua kom muag.
8) Yam twg txias, koj tuaj txhib kom kub.
9) Yam twg nkhaus, koj tuaj kho kom ncaj.
10) Peb yog cov neeg ntseeg txog koj,
11) cov neeg tso siab rau koj nyiam koj,
12) koj pub koj xya lub txiaj ntsim rau peb.
13) Koj pab peb tsim koob tsim hmoov tseg,
14) koj thau peb dim ntawm txoj kev txhaum,
15) koj coj peb kev mus pem lub teb chaws nyob thaj yeeb mus li.
16) Ua li.
3. ZAJ NKAUJ PAJ NRUAG
4. ZAJ THOV HUAB TAIS
1) Peb qhov chaw vam khom yog nyob hauv Huab Tais.
2) Tus Huab Tais tsim lub ntuj lub teb.
3) Peb sawv daws thov Huab Tais,
4) Huab Tais, hmo no koj tuaj saib lub tsev no,
5) koj ntiab tus niag ntxub neeg thiab ntxias neeg mus deb ntawm lub tsev no,
6) koj tso koj lo lus foom hmoov zoo los nyob saum peb mus li.
7) Peb vam txog peb tus Huab Tais Yes Xus Pleev uas nws yog koj tus tub,
8) nws nrog koj thiab nrog Leej Ntuj Plig Ntshiab muaj txoj sia,
9) thiab ua vaj nyob mus li tas txhiab niag tim puas xyoo.
10) Ua li.
HNUB OB
1. CUAB ZAJ
1) Ntuj Txiv, kuv hluas kuv yuav ua zoo li cas mus taug txoj kev ntshiab.
2) Kuv yuav ua zoo li cas coj koj tej lust as kuv sid.
3) Kuv nrhiav koj tas siab tas ntsws.
4) Koj tsis txhob cia kuv hla koj cov lus qhia.
5) Nyob hauv txoj kev ua koj tim khawv
6) kuv zoo siab dua luag nyob hauv txoj kev nplua nuj.
7) Koj ua siab zoo rau koj tus tub txib,
8) kuv thiaj muaj txoj sia.
2. ZAJ HU NKAUJ
1) Cov vaj txheeb kav lub Koom Txoos,
2) cov lwm txheeb coj Leej Pleev pab tub rog mus raws txoj kev yeej,
3) cov txwj laus tuav tus yawm sij qhib rooj ntug,
4) lub ntiaj teb hu nkauj cav txog nej nto moo lug.
5) Nej yog cov tshaj Yes Xus lub Moo Zoo,
6) nej qhia txoj kev ntseeg rau cov neeg ncaj,
7) nej qhia txoj kev tso siab txoj kev nyiam ntuj lub neej,
8) ua kom peb tiv tau tus yeeb ncuab yuam lub ntiaj teb neeg.
9) Nej kho peb tus ntsuj plig kom zoo,
10) nej pab kom peb hlob nyob hauv txoj kev ntshiab.
11) Txog hnub kawg, Leej Pleev muaj hwj chim rov los,
12) nws yuav pub txoj kev kaj lug mus li rau peb. Ua li.
3. ZAJ NKAUJ PAJ NRUAG
4. ZAJ THOV HUAB TAIS
1) Lawv lub suab nrov mus txog plaub ceg kaum ntuj.
2) Lawv tshaj Huab Tais cov hwj huam yees ntxwv mus thoob qab ntuj khwb.
3) Peb sawv daws thov Huab Tais,
4) Huab Tais, peb paub koj lub npe,
5) paub txoj kev teev koj,
6) vim yav thaud cov Hauv Paus Xa Lus qhia lub ntiaj teb;
7) hnub no peb cav txog lawv lub hwj chim,
8) peb thov cog lus rau koj tias peb xav yoog lawv tus piv txwv.
9) Peb vam txog peb tus Huab Tais Yes Xus Pleev uas nws yog koj tus tub,
10) nws nrog koj thiab nrog Leej Ntuj Plig Ntshiab muaj txoj sia,
11) thiab ua vaj nyob mus li tas txhiab niag tim puas xyoo.
12) Ua li.
HNUB PEB
1. CUAB ZAJ
1) Huab Tais, thov koj tuaj tshoj kuv ua koj tus tim khawv.
2) Kuv lub siab txhob ntshaw txog nyiaj txiag.
3) Koj thaiv kuv qhov muag kom txhob pom tej yam tsis huv.
4) Kuv tso siab tias koj nyiam kuv, koj yuav cawm kuv.
5) Koj qhia kuv hais koj cov lus tseem ceeb.
6) Kuv yuav tab meeg ua tim khawv txog koj cov lus qhia nyob ntawm cov nom tswv xub ntiag.
2. ZAJ HU NKAUJ
1) Tsoom tim khawv, nej yog cov tub rog yeej cov yeeb ncuab ntxub Yes Xus lub Moo Zoo,
2) nej zoo siab hlo tiv ncauj tawg ncauj zag tsov lo,
3) nej nyob nres nroos tiv ntaj tiv hmuv.
4) Nyob hauv tsev loj faj nej vam txog Leej Nplij Neeg lub zog.
5) Nej txoj kev tuag ntuas peb mus taug txoj kev ntshiab,
6) peb xav nrog nej yeej cov hluav taws pus peb lub cev,
7) nrog nej saib Ntuj txoj sia muaj nqes dua kev noj qab nyob zoo.
8) Xyaum nrog nej nrhiav Leej Ntuj Plig lub zog.
9) Nej roj ntsha yog cov noob xeeb neeg ntseeg ua tsheej pab,
10) nej lus zam rau cov yeeb ncuab ua kom Yes Xus txoj kev nyiam nto moo,
11) nej nrog Tswv Ntuj tus tub txib raug luag hiam,
12) nrog nws pab lub ntiaj teb neeg dim ntawm kev txhaum.
13) Huab Tais cawm neeg, peb ntseeg txog koj.
14) Koj sau peb nrog tsoom tim khawv
15) ua npoj nyob pem koj lub Ceeb Tsheej lom zem mus li.
16) Ua li.
3. ZAJ NKAUJ PAJ NRUAG
4. ZAJ THOV HUAB TAIS
1) Tswv Ntuj sim lawv zoo li sim nyiaj sim kub nyob hauv lub yeej vub.
2) Nws txais lawv zoo li cov txim nyob saum lub thaj txi Ntuj.
3) Peb sawv daws thov Huab Tais,
4) Tswv Ntuj muaj hwj huam, peb zoo siab cav txog koj tsoom tim khawv ntshiab,
5) koj mloog lawv cev peb lus rau koj,
6) thov koj ua kom peb muaj zog ntau zuj zus nyob hauv txoj kev nyiam koj lub npe.
7) Peb vam txog peb tus Huab Tais Yes Xus Pleev uas nws yog koj tus tub,
8) nws nrog koj thiab nrog Leej Ntuj Plig Ntshiab muaj txoj sia,
9) thiab ua vaj nyob mus li tas txhiab niag tim puas xyoo.
10) Ua li.
HNUB PLAUB
1. CUAB ZAJ
1) Huab Tais, niaj hnub kuv tuav xam txog koj txoj cai.
2) Tab cov neeg tsis hwm Ntuj lawv lub vas puav kuv los kuv tseem nco txog koj txoj cai.
3) Ntug tag hmo kuv sawv los ua koj tsaug vim koj txiav txim ncaj.
4) Kuv npuab cov neeg hwm koj thiab mloog koj lus qhia.
5) Koj txoj kev nyiam ris mus puv tas ntiaj teb.
6) Thov koj qhia tej yam koj nyiam rau kuv paub.
2. ZAJ HU NKAUJ
1) Tas txhua haiv neeg nyob hauv lub qab ntuj kha,
2) nej cav txog tus Txiv Lees Ntseeg,
3) nws yog tus hwm Ntuj, tus xyuam xim,
4) nyiam ua me neeg,tsis yeem ua txhaum mus txog lub caij nws txoj sia tu.
5) Nws tsis tau mus raws kev plees kev ua si nyob saum yaj no.
6) Tsis muaj lwm tus tau coj Tswv Ntuj txoj cai zoo cuag nws,
7) nws tau zov hmo mus txog lub caij tus Tswv tuaj,
8) nws tau ua Huab Tais tus Tub Txib siab ntev siab ncaj.
9) Huab Tais tsa cov Txiv Lees Ntseeg ua Vaj Qhia, ua Tswv Qhia, ua Leej Choj, ua tub tshaj Ntuj Lus.
10) Niaj hnub lawv tau coj sawv daws tuaj ncig lub thaj ntshiab,
11) lawv tau qhia cov neeg siab ntshiab zaj txuj ci,
12) lawv tsob hwb luag, pab tsoom sid mus raws txoj kev sib pab sib nqa.
13) Yes Xus, koj yog tsoom Txiv Lees Ntseeg tus ntaus thawj,
14) thov koj pus peb mus taug lawv tus lwj lwm.
15) Peb xav ua koj cov ntxhais txib tub txuas siab ncaj siab ncees,
16) nrog lawv mus ntsia koj nyob pem koj lub Ceeb Tsheej. Ua li.
3. ZAJ NKAUJ PAJ NRUAG
4. ZAJ THOV HUAB TAIS
1) Huab Tais coj tsoom Txiv Lees Ntseeg mus raws txoj kev ncaj.
2) Tswv Ntuj muab nws lub Ceeb Tsheej rau lawv pom.
3) Peb sawv daws thov Huab Tais,
4) Tswv Ntuj, koj tsoom pej xeem huab hwm qhuas txog tsoom Txiv Lees Ntseeg,
5) peb tsis tso siab rau peb cov koob hmoov,
6) thov koj mloog tsoom Txiv Lees Ntseeg
7) uas lawv tau nyiam mloog koj lus.
8) Koj pab peb yoog raws lawv tus piv txwv.
9) Peb vam txog peb tus Huab Tais Yes Xus Pleev uas nws yog koj tus tub,
10) nws nrog koj thiab nrog Leej Ntuj Plig Ntshiab muaj txoj sia,
11) thiab ua vaj nyob mus li tas txhiab niag tim puas xyoo.
12) Ua li.
HNUB TSIB
1. CUAB ZAJ
1) Ntuj Txiv, kuv tus plig yuav mus taug txoj kev cawm neeg txog qhov kawg.
2) Tas kuv sid kuv qhov muag yuav ntsia ntsoov cov lus koj cog.
3) Koj tus tub txib tseem yuav nyob hov ntev.
4) Muaj tej tus hiam kuv, thaum twg koj thiaj yuav muab txim rau lawv.
5) Kuv tsis tso koj tej lus qhia tseg tsis kav cov hiam kuv yuav luag yeej kuv.
6) Thov koj ntxiv txoj sia rau kuv, vim koj nyiam kuv.
2. ZAJ HU NKAUJ
1) Yes Xus, koj yug ntawm nkauj tsim txiaj los,
2) koj coj tsoom nkauj ntshiab nyob ntiaj teb no,
3) tsoom nkauj ntshiab nyob saum ntuj,
4) lawv nyob ncig koj puav tam niam ntab muv sua.
5) Lawv zoo siab qhuas lawv tus txiv muaj hwj chim ntsa iab.
6) Sab neeg tsis muaj zog lawv cheem tau lawv lub siab.
7) Tas ib sid lawv leg lawv tus txiv txoj hauj lwm.
8) Lawv tsob hwb lawv tej tub ki huam vam mus li.
9) Lawv xyiv fab xyuam xim npaj roj sam teeb tos lawv tus Huab Tais yuav tuaj.
10) Huab Tais siab zoo, koj mloog pab nkauj ntshiab thov koj.
11) Koj ua kom peb lub cev tsis txhob poob hauv txoj kev tsis tsheej tsis kiab.
13) Thov koj pub rau peb tus plig kom zoo nkauj
14) puav tam li cov nkauj ntshiab ua koj tsoom ntxhais ncig nyob pem Ceeb. Ua li.
3. ZAJ NKAUJ PAJ NRUAG
4. ZAJ THOV HUAB TAIS
1) Koj cov tub ki yuav sawv los hloov phaj txiv phaj yawg chaw,
2) koj yuav tsa lawv ua vaj kav tas txhua teb chaws.
3) Peb yuav cav txog koj tiam dhau tiam,
4) tas txhua haiv neeg yuav cav txog koj tis dhau tis.
5) Peb sawv daws thov Huab Tais,
6) Leej Txiv Tswv Ntuj siab zoo, koj yog tus muaj hwj huam ua tau tas puas tsav yam,
7) koj ua kom nyob hauv tas tsoom poj niam siab muag,
8) tej tus muaj peev xwm muab lawv lub siab lub cev los txi rau Ntuj,
9) koj mloog tsoom nkauj ntshiab cev peb lus rau koj,
10) koj pab peb nrhiav txoj kev kaj siab lug nyob hauv koj tib leeg.
11) Peb vam txog peb tus Huab Tais Yes Xus Pleev uas nws yog koj tus tub,
12) nws nrog koj thiab nrog Leej Ntuj Plig Ntshiab muaj txoj sia,
13) thiab ua vaj nyob mus li tas txhiab niag tim puas xyoo.
14) Ua li.
HNUB RAU
1. CUAB ZAJ
1) Huab Tais, kuv ntxub txoj kev ua neeg muaj ob lub siab,
2) kuv nyiam koj txoj kev cai.
3) Koj yog kuv qhov chaw nkaum,
4) koj yog lub vab hlau thaiv kuv.
5) Kuv vam tias koj yog tus nres kuv,
6) koj txhob tso kuv tseg.
7) Cov neeg hla koj lus, koj ua kom lawv ntog.
8) Cov neeg tsis hwm Ntuj nyob ntiaj teb no,
9) koj nchuav lawv pov tseg xws li quav hlau.
10) Kuv thiaj nyiam cov lus koj cog rau peb.
2. ZAJ HU NKAUJ
1) Peb cav txog tsoom poj niam siab ntshiab siab loj,
2) ntuj tsis tau kaj lawv sawv muab mov rau lawv tsev neeg noj,
3) lawv faib hauj lwm rau cov ntxhais txib tub txuas ua.
4) Lawv tu cev khov, loj npab ntshuas ua num.
5) Lawv txhais tes nquag saws ntuag, tooj xov, ntos ntaub.
6) Lawv cev tes pab cov neeg pluag, pub mov rau cov neeg tshaib noj.
7) Lawv lub ncauj tsuas qhia txoj kev hwm Ntuj hwm neeg.
8) Nyob hauv lub nroog nws tus txiv nto koob meej lug.
9) Huab Tais Yes Xus Pleev, koj yog cov neeg siab loj lub zog.
10) Thov koj ua kom peb txawj ua siab ntev rau cov neeg me,
11) ua siab dav rau cov neeg pluag,
12) ua siab zoo rau cov neeg nrog peb nyob.
13) Leej Txiv muaj hwj huam, peb cav txog koj lub hwj chim.
14) Leej Tub, peb tshaj koj lub koob meej.
15) Leej Ntuj Plig, peb mloog koj lub suab.
16) Peb xav kom tas lub qab ntuj neeg pe nej Peb Leeg Huab Tais mus txheej dhau txheej tis dhau tis.
17) Ua li.
3. ZAJ NKAUJ PAJ NRUAG
4. ZAJ THOV HUAB TAIS
1) Koj di ncauj nyias ntsais plhu soob xais.
2) Tswv Ntuj pub txoj hmoov zoo rau koj mus li.
3) Peb sawv daws thov Huab Tais,
4) Huab Tais, hnub no peb xyov fab hwm tsoom leej niam ntshiab mus pem koj lub Ceeb Tsheej,
5) thov koj mloog peb vam txog koj;
6) koj pab peb nyiam koj xws li ib pab me nyuam nyiam lawv niam lawv txiv.
7) Peb vam txog peb tus Huab Tais Yes Xus Pleev uas nws yog koj tus tub,
8) nws nrog koj thiab nrog Leej Ntuj Plig Ntshiab muaj txoj sia,
9) thiab ua vaj nyob mus li tas txhiab niag tim puas xyoo.
10) Ua li.
HNUB XYA
1. CUAB ZAJ
1) Tswv Ntuj tsoom tub txib, nej cav txog Tswv Ntuj lub npe mog.
2) Txij sab hnub tuaj mus txog sab hnub poob,
3) sawv daws cav txog Tswv Ntuj lub npe.
4) Tus tsis muaj zog nws ntog hauv av,
5) Tswv Ntuj tsa nws sawv.
6) Tus pluag nyob hauv quav chiv,
7) Tswv Ntuj tsa nws zaum nrog cov vaj saib Tswv Ntuj haiv neeg.
8) Tus poj niam tsis muaj me nyuam,
9) Tswv Ntuj tsa nws zaum hauv Tswv Ntuj tsev.
10) Tswv Ntuj tsa nws ua niam zaum hauv nruab nrab nws pab tub ki.
2. ZAJ HU NKAUJ
1) Niam nkauj xeeb zeej koj tau puag tus tsim koj,
2) koj tau tu nws hlob hauv koj xub ntiag,
3) koj lub koob meej loj tshaj ib zeej tsoom nkauj nruab ntug.
4) Koj nyob siab dua cov hnub qub ntsais tsias puv lub ntuj.
5) Es Vas tso peb tseg xws li cov me nyuam ntsuag.
6) Koj muab koj Leej Tub los ua zeej tsoom tij.
7) Es Vas tso peb txom nyem hauv lub hav tsaus nti.
8) Koj qhib rooj ntug kom peb tau so los siav.
9) Koj yog lub qhov rooj Huab Tais chaws los nyob yaj ceeb no,
10) koj yog nws lub Tuam Tsev ci ntsa zaj.
11) Tas nej ib tsoom haiv neeg tau dim ntawm txoj kev tuag,
12) nej npuaj teg luag ntxhi cav txog txoj sia tuaj ntawm nkauj xeeb zeej tuaj.
13) Yes Xus, koj yug ntawm nkauj nruab ntug los,
14) koj nrog Leej Txiv thiab Leej Ntuj Plig,
15) muaj koob meej nto moo lug txheej dhau txheej,
16) mus txog txhiab niag tim puas xyoo. Ua li.
3. ZAJ NKAUJ PAJ NRUAG
4. ZAJ THOV HUAB TAIS
1) Tswv Ntuj Leej Niam siab ntshiab, koj thov Ntuj rau peb,
2) kom peb tsim nyog txais txoj hmoov uas Leej Pleev npaj rau lub qab ntuj neeg.
3) Peb sawv daws thov Huab Tais,
4) Huab Tais Tswv Ntuj, thov koj pub rau peb cov neeg ua koj cov tub txib tub txuas
5) kom peb lub siab nyob dawb nyob huv,
6) peb lub cev tau noj qab nyob zoo.
7) Thov koj npo peb ntawm txoj kev ntxhov siab nyob yaj ceeb no,
8) thov koj pub txoj kev lom zem mus li rau peb nyob saum ntuj.
9) Peb vam txog peb tus Huab Tais Yes Xus Pleev uas nws yog koj tus tub,
10) nws nrog koj thiab nrog Leej Ntuj Plig Ntshiab muaj txoj sia,
11) thiab ua vaj nyob mus li tas txhiab niag tim puas xyoo.
12) Ua li.