Cov Ntawv Yaj Saub

Yaj Saub yog tus neeg uas Tswv Ntuj hu los ceeb toom cov lus uas Tswv Ntuj xav qhia rau ntiaj teb neeg, los yog Tswv Ntuj ib tug tiam lis los ib tug xa xov, yog ib tug neeg txhais Tswv Ntuj lo lus thiab piav rau tsoom sid paub meej.
Thaum Tswv Ntuj lo lus tuaj nyob hauv tus Yaj Saub mas tus Yaj Saub yuav yig tsis tau, nws yuav tsum txais thiab yuav tsum tshaj; nws yuav npog tsis tau. Tus Yaj Saub Yes Les Mias tau hais tias Tswv Ntuj tso Tswv Ntuj cov lus nyob hauv nws qhov ncauj (YLM 1: 9). Yaj Saub As Mos kuj hais tias “Thaum Huab Tais Tswv Ntuj hais lus mas leej twg yuav nyob twj ywm tau” (AM 3: 8). Yaj Saub His Xas kuj hais zoo li no “Huab Tais hais rau kuv tias ‘Koj mus! Koj yuav hais rau haiv neeg no tias nej mloog! Nej mloog mas! Nej tsis to taub! Nej ntsia! Nej ntsia mas! Nej pom kev tsis tseeb! Koj ua kom haiv neeg no lub siab tuab! Koj ua kom lawv pob ntseg hnyav. Koj pos lawv qhov muag mas! Tsam haiv neeg no qhov muag pom, lawv pob ntseg hnov, lawv lub siab to taub, ces lawv yuav tig los hloov ib lub siab tshiab, thiab lawv yuav zoo hlo’” (HX 6: 9-10).
Cov Yaj Saub tsis yog lawv lub ncauj cev Tswv Ntuj lo lus xwb, tas lawv lub neej yog ib lub cim cev Tswv Ntuj cov lus rau tsoom sid; yam li tus Yaj Saub Os Xes uas nws poj niam tso nws pov tseg mas nws raug lub neej li ntawd vim nws lub neej yuav nrog nws cov lus ntuas cov His Xas Lais kom lawv txhob tso Tswv Ntuj pov tseg. Tus Yaj Saub Yes Les Mias lub neej raug txom nyem thiab raug cov Yus Das hiam kuj yog zoo li ib zag ntuas cov His Xas Lais thiab xub qhia txog Yes Xus yuav raug nws haiv neeg hiam nws.
Tswv Ntuj ua zoo li cas qhia nws cov lus rau tus Yaj Saub?
Tej zaum tus Yaj Saub pom Tswv Ntuj xyeem ntawm nws qhov muag; xws li His Xais thiab Es Xes Kias. Tej zaum tus Yaj Saub hnov ib lo lus nrov ntawm nws pob ntseg tuaj. Tab sis ntau zaus Tswv Ntuj tshoj tus Yaj Saub lub siab, ces cov Yaj Saub yuav hais tias “Tswv Ntuj lo lus nrov tuaj txog kuv zoo li no”, los lawv hais tias “Yog Tswv Ntuj lo lus”, los yuav hais tias “Yog Tswv Ntuj hais zoo li no”. Tej zaum Tswv Ntuj tuaj tshoj tus Yaj Saub nyob hauv tsev teev Ntuj. Ntau zaus Tswv Ntuj tuaj tshoj tus Yaj Saub thaum nws tab tom ua ib yam hauj lwm; zoo li Yes Les Mias pom ob tawb txiv ncuav pias ces nws to taub tias ob tawb txiv ncuav pias ntawd zoo qhia cov Yus Das (YLM 12), los muaj ib zaug thaum Yes Les Mias mus xyuas ib tug puab lauj kaub ces nws to taub ib zag uas nws yuav tsum qhia rau cov His Xas Lais (YLM 18: 1-4).
Thaum cov Yaj Saub hnov Tswv Ntuj cov lus mas lawv ua ntau zaj los cev Tswv Ntuj cov lus; yam li lawv sau los hais ib zag li hu nkauj muaj txwm zoo mloog, los lawv hais lus xwb, los lawv hais tej zaj paj lug, los lawv hais ob peb lo lus ntuas meej, los lawv cem lawv tsawm. Los lawv hais ib zag zoo li zaj nkauj paj nruag, los lawv seev, los lawv thuam. Lawv nyias ua txawv nyias vim nyias muaj nyias tus yeeb yam. Lawv puav leej ua Tswv Ntuj cov tub teg tub taws tab sis nyias ua raws li nyias tus yeeb yam. Ib rab taus uas hauj lwm txawv ib rab txaug, ib tug Yaj Saub kuj ua hauj lwm txawv lwm tus Yaj Saub. Lawv puav leej ua Tswv Ntuj cov hauj lwm, tab sis nyias muaj nyias txoj kev txais Tswv Ntuj zaj tswv yim thiab nyias txoj kev cev Tswv Ntuj zaj tswv yim. His Xais hais lus txawv Yes Les Mias, As Mos hais lus txawv Os Xes.
Cov Yaj Saub zaum puav lawv cev Tswv Ntuj cov lus rau ib leeg; yam li Nas Taas mus ntuas Das Vis, His Xais mus ntuas Es Xes Kias. Zaum puav lawv ncaj qha hais rau tas tsoom sid thiab Tswv Ntuj tso tus Yaj Saub mus ntuas nws haiv neeg tib si. Tswv Ntuj xa lawv mus ntuas cov neeg nrog lawv nyob ua ib phaum, tab sis lawv cov lus ntuas yog ntuas sawv daws mus li vim lawv piav Tswv Ntuj kev cawm neeg; Tswv Ntuj cawm neeg mus txog hnub ntiaj teb kawg. Zoo li His Xais ntuas cov neeg nrog nws nyob tab sis nws cov lus yog hais txog lub caij ntiaj teb kawg vim ntau zaus nws piav txog Leej Pleev yuav tuaj tsim lub Ceeb Tsheej tshiab nyob mus li. Li ntawd, cov Yaj Saub ntuas cov His Xas Lais tab sis lawv cov lus raug tas ntiaj teb neeg uas yuav ua Tswv Ntuj haiv neeg.
Cov lus cov Yaj Saub cev mas hais txog 2 yam: 1) Ib co lus ntuas thiab qhuab qhia kom tso kev txhaum pov tseg, 2) Ib co lus nplij neeg vim Tswv Ntuj xav zam rau neeg.
Cov Yaj Saub lawv ntuas txog 3 yam li no; muaj ib tug Tswv Ntuj xwb, yuav mloog Tswv Ntuj cov lus qhia, muaj ib tug yuav tuaj cawm His Xas Lais.

1. Muaj ib tug Tswv Ntuj xwb. Cov Yaj Saub tau pab cov His Xas Lais kom lawv to taub zoo zuj zus tias muaj ib tug Tswv Ntuj xwb coj tas txhua haiv neeg; tus Tswv Ntuj ntawd yog Yas Ves (Huab Tais), nws yog tus Ntshiab, nws loj thiab zoo tshaj. Tab txawm pej kum haiv neeg lawv teev cov dab ua lawv cov Huab Tais tsis kav cov dab ntawd tsis yog tus tseem Tswv Ntuj. Tswv Ntuj tsis kheev kom teev tej dab ntawd ib yam li yog ib tug Huab Tais Tswv Ntuj. Neeg me kawg nyob ntawm Tswv Ntuj xub ntiag tsis kav Tswv Ntuj nrog neeg cog lus, nws nrog His Xas Lais ua txij ua nkawm.
2. Yuav mloog Tswv Ntuj cov lus qhia. Cov Yaj Saub ntuas kom cov His Xas Lais mloog Mais Xes txoj cai, kom tso kev txhaum pov tseg, kom lawv xub muab siab rau cev lawv lub siab rau Tswv Ntuj dua cev thaj txi Ntuj. Cov Yaj Saub qhuab qhia kev xis Tswv Ntuj siab; yam li kev nyiam ua neeg me, kev ncaj kev ncees, kev nyiam cov neeg txom nyem, kev pab tsoom txheeb ze, kev hwm Ntuj nyob hauv nruab siab.
3. Muaj ib tug yuav tuaj cawm His Xas Lais. Cov Yaj Saub qhia txog tus yuav tuaj cawm His Xas Lais thiab cawm tas lub ntiaj teb neeg. Cov Yaj Saub pheej paub tus yuav tuaj zoo zuj zus, nws yuav sau tsoom His Xas Lais sib ncaim rov los nyob ua ke, nws yuav tsa lub ntiaj teb nyob huav txoj kev thaj yeeb, nws yuav ua tas ntiaj teb tus vaj, nws yuav yog peb txoj kev ncaj, nws yuav yog Tswv Ntuj nrog peb nyob, nws yuav yog ib tug nyiam ua neeg me, ib tug tub txib. Thaum Yes Xus sawv rov los, nws xav piav tias Leej Pleev yog ib tug zoo li cas mas nws rov piav cov Yaj Saub tej lus ntuas rau ob tug thwj tim mus Es Mas Ws mloog vim cov Yaj Saub xub tau qhia zoo txog tus yuav tuaj cawm lub ntiaj teb neeg.
   Haiv neeg twg mas lawv nyias muaj nyias cov Yaj Saub; yam li cov Mes Xos Pos Tas Mias, cov Fes Nis Xias, cov Hais Nkws Tos, cov Hes Las, cov Los Mas, cov Suav, los Hmoob. Ntawm cov His Xas Lais txij Mais Xes los txog Zam Ntxuav Plig mas Tswv Ntuj xa nws cov Yaj Saub tuaj pab lawv tsis tseg; thawj tug Yaj Saub loj dua cov yog Mais Xes, tus ob yog Yos Xuas, tus peb yog Xas Muas. Lub caij cov His Xas Lais muaj vaj mas muaj cov Yaj Saub nyob ua tej pab, ces muaj tej tus Yaj Saub loj sawv los ntuas cov vaj; yam li Nas Taas, Es Lias, Es Lis Xais. Lawv tsis tau sau ntawv tseg tab sis lawv tau ua tej yam hauj lwm loj los ntuas tsoom sid.
   Tom qab Es Lis Xais tuag tas, kwv yees li xyoo 750 ua Yes Xus ntej mas As Mos thiab Os Xes thiaj sawv los ntuas tsoom His Xas Lais. Xyoo 740 His Xais thiab Mis Kes ua Yaj Saub nyob Yus Das teb. Xyoo 640 Xos Fos Nias ua Yaj Saub. Xyoo 627 Yes Les Mias ua Yaj Saub. Xyoo 612 Nas Hws ua Yaj Saub. Xyoo 600 Has Npas Kws ua Yaj Saub. Xyoo 598 Es Xes Kias ua Yaj Saub nyob Npas Npis Los. Xyoo 586 Os Npas Dias ua Yaj Saub. Xyoo 520 cov Yus Das rov los nyob Yes Lus Xas Les ces As Nkais thiab Ntxas Kas Lias ua Yaj Saub. Xyoo 420 Mas Las Kis ua Yaj Saub. Xyoo 350 Yos Es ua Yaj Saub. Tus Yaj Saub tuaj tom qab kawg yog tus Ntxuav Plig Zam.
   Nyob hauv cov Yaj Saub no, muaj 16 tug lawv los yog lawv cov thwj tim tau sau lawv cov lus ceeb toom Tswv Ntuj cov lus ua tej phau, ces thiaj muaj 16 phau ntawv yog cov ntawv Yaj Saub li nram no:
4. Phau ntawv His Xais,
5. Phau ntawv Yes Les Mias,
6. Phau ntawv Seev,
7. Phau ntawv Es Xes Kias,
8. Phau ntawv Os Xes,
9. Phau ntawv Yos Es,
10. Phau ntawv As Mos,
11. Phau ntawv Os Npas Dias,
12. Phau ntawv Yos Nas,
13. Phau ntawv Mis Kes,
14. Phau ntawv Nas Hws,
15. Phau ntawv Has Npas Kws,
16. Phau ntawv Xos Fos Nias,
17. Phau ntawv As Nkais,
18. Phau ntawv Ntxas Kas Lias,
19. Phau ntawv Mas Las Kis.
    Nyob hauv 16 phau ntawv Yaj Saub no, muaj 4 phau sau ntev dua cov; peb hu ua ‘Cov Yaj Saub Loj’; yog His Xais, Yes Les Mias, thiab Es Xes Kias. Dua cov mas yog ‘Cov Yaj Saub Me’.
    Nyob hauv Cov Ntawv Yaj Saub s muaj 3 hom lus:
20. Cov lus tus Yaj Saub cev rau tsoom His Xas Lais, nws hais tias “Nej…..”
21. Cov lus tus Yaj Saub piav txog nws lub neej thiab nws cov hauj lwm, nws hais tias “Kuv”.
22. Cov lus lwm tus piav txog tus Yaj Saub, lawv hais tias “Nws…”
    Cov Yaj Saub lawv cov ntawv tau pab cov His Xas Lais zoo; cov His Xas Lais siv cov Yaj Saub lawv tej ntawv rov los sib ntuas nyob hauv cov tsev txoos. Cov Yaj Saub yog cov tseem Xib Hwb tau qhia cov His Xas Lais kom ntseeg txog Tswv Ntuj, kom ua neeg ncaj, thiab kom tos tus Huab Tais yuav tuaj. Tab yog Yes Xus nws mus hauv lub tsev txoos, nws kuj yuav cov Yaj Saub cov ntawv.