Hnub chiv tim 27 lub 7 hli 2025 tas los yog Hnub Chiv Lis Piam 17 caij Nyob Nruab Xyoo, lub Moo Zoo hais txog thaum Huab Tais Yes Xus qhia cov thwj tim thov ntuj raws li zaj ‘Peb Txiv’ (LK 11: 1-13), mas Vaj Qhia Les Os 14 ntuas cov ntseeg tuaj koom hais zaj tus tshiab xa xov nyob hauv Leej Ntshiab Pob Zeb lub tshav puam hais tias Huab Tais nrog nraim peb, tab sis peb yuav tau muab Huab Tais qhov zoo los hloov peb thiab.
Vaj Qhia Les Os 14 pib nthuav lub Moo Zoo tias Huab Tais Yes Xus qhia peb hu Tswv Ntuj ua ‘Txiv’ mas yog Huab Tais Yes Xus hu peb mus nrhiav Tswv Ntuj ib yam li tus me nyuam tso siab lug mus ntsib nws txiv, ib yam li tus me nyuam ruaj siab tias nws txiv txais nws vim nws txiv nyiam thiab hlub nws.
Tswv Ntuj yog Leej Txiv muaj lub siab nyiam siab hlub nws cov me nyuam, Tswv Ntuj yog Leej Txiv tsis tso nws cov me nyuam pov tseg; tab txawm peb tuaj khob Tswv Ntuj qhov rooj thaum ib tag hmo, los tom qab peb tau ua txhaum ua yuam kev, Tswv Ntuj yeej yuav sawv los qhib qhov rooj thiab mloog peb.
Vaj Qhia ntuas tias nyob hauv zaj Peb Txiv, muaj ib yam peb yuav tsum ua raws yog peb xav hu Tswv Ntuj ua ‘Txiv’; yam ntawd yog ua ib cuab kwv tij. Leej Ntshiab Zam Ncauj Kub (St. John Chrysostom) tau hais tseg tias “Koj yuav hu tus Tswv Ntuj muaj lub siab hlub ntiaj teb neeg ua peb Txiv tau li cas, yog tias nyob hauv koj tseem muaj lub siab phem thiab lim hiam (a cruel and inhuman heart).” Vim tias thaum koj siab phem thiab siab lim hiam, mas yog koj twb tsis muaj Leej Txiv nyob saum ntuj lub cim nyob hauv koj. Lub cim ntawd yog lub siab hlub neeg.
Li ntawd, peb tsis yuav hu Tswv Ntuj ua Txiv tas, ces tig hlo los ua tus neeg nyaum (harsh) thiab tsis ras txog (insensitive) luag tej tau. Peb hu Tswv Ntuj ua Txiv, mas peb yuav tau cia Tswv Ntuj qhov zoo (God’s goodness), Tswv Ntuj lub siab ntev (God’s patience), Tswv Ntuj lub siab khuv leej neeg (God’s mercy) los hloov peb.
Tom qab ntuas sawv daws tas, Vaj Qhia Les Os 14 coj sawv daws thov ntuj rau lub teb chaws Thaib thiab Khas Phus Tshas vim tias nyob rau lub caij no tab tom muaj kev sib tua ntawm ciam teb. Vaj Qhia Les Os 14 hais tias “Txiv lub siab npuab cov neeg raug kev txom nyem vim kev sib cov nyom thiab kev kub ntxhov hauv lub qab ntuj no, tshwj xeeb mas hnub no Txiv thov ntuj rau cov pej xeem Thaib thiab Khas Phus Tshas ua neej nyob raws ntug ciam teb uas lawv ntsib teeb meem zaum no, thov Huab Tais Yes Xus tshoj ob tog nom tswv kom tig los tuav tes sib tham thiab rov sib haum xeeb sai sai.”