Ntawv Kos Es Les (Book of Ecclesiastes)

Tus sau phau ntawv Kos Es Les hais tias nws yog Das Vis tus tub (KEL 1: 1) tab sis peb saib cov lus nyob hauv phau ntawv, mas tsis phim lub caij Xas Los Moos ua vaj vim lub caij ntawd, lawv tsis hais lus xws li ntawv Kos Es Les thiab lawv tsis xav tswv yim zoo li ntawd. Tus sau phau ntawv no ntshai nws yog ib tug His Xas Lais uas tau hnov cov Hes Las tej txuj, vim tas txhua yam nws hais txog neeg txoj hmoov, mas phim txhua yam uas cov Hes Las hais. Li ntawd, peb xav tias phau ntawv no sau nyob hauv tiam 3 ua Yes Xus ntej; yam li xyoo 250 vim lub caij ntawd, cov Hes Las kav Yus Das teb.
Lub npe ‘Kos Es Les’ yog hais raws li xeem lus Hes Nplaws ‘Qoheleth’ txhais tias ‘tus saib neeg kev sib txoos’ los yog ‘tus sawv cev sawv daws hais’; ntxeev ua lus Hes Las yog ‘Ecclesiastes’.
Ntawv Kos Es Les tsuas hais txog tib yam xwb; yam li ua neeg nyob ntiaj teb yog zoo li ib yam cuav, nyob hauv neeg lub neej tsis muaj ib yam txaus tso siab los txaus ua kom zoo siab tiag.
Ntawv Kos Es Les hais txog tej yam li nram no:

1. Neeg lam nyob ntiaj teb no vim 4 yam no;
   1.1 Neeg lub neej tsis muaj qab hau (KEL 1: 12-2).
   1.2 Neeg lub neej mus tshwm rau kev tuag xwb (KEL 3).
   1.3 Neeg tsis txawj pom txoj kev yuav tuag (KEL 4-5: 8).
   1.4 Nyiaj txiag pub kev kaj siab lug rau neeg tsis tau (KEL 5: 9-6).
2. Tsis muaj chaw ua kom neeg luag ntxhi vim 4 yam no; 2.1 Nyob ntiaj teb no, neeg tsis raug txoj hmoov phim neeg tus yam ntxwv (KEL 7: 8-8: 15). 2.2 Kev sib nyiam sib hlub tsis pub kev kaj siab lug (KEL 8: 16-9: 10). 2.3 Yus txoj hmoov tsis raws li yus tej hauj lwm uas zoo los phem (KEL 9: 10-11: 7). 2.4 Kev nyob laus nkoos tsis pub kev kaj siab lug rau yus (KEL 11: 8-12: 8).
   3. Txoj kev uas neeg yuav taug yog txoj kev mloog Tswv Ntuj lus (KEL 12: 9-14).
      Ntawv Kos Es Les qhia tej yam zoo li no:
3. Neeg yog ib tug me kawg nyob hauv lub qab ntuj no.
4. Peb tsis to taub tias Tswv Ntuj coj lub ntiaj teb neeg zoo li cas.
5. Peb tsis muaj cai nug Tswv Ntuj tias yog vim li cas Tswv Ntuj li pub txoj hmoov zoo li ub zoo li no rau peb.
6. Tswv Ntuj muaj cai txiav txim rau peb vim peb ua li ib li no.
7. Peb yuav tso siab tias Tswv Ntuj coj tas puas tsav yam zoo, peb yuav mloog Tswv Ntuj lus; yog vim Tswv Ntuj paub ntau yam dua peb mas peb thiaj tsis to taub Tswv Ntuj tej kev.
   Tus sau ntawv Kos Es Les sau tej yam qhia li ntawd, nws tseem tsis tau paub ntau yam uas Yes Xus yuav qhia meej; yam li nws tsis paub tias neeg yuav nyob lwm tiam, nws tsis paub tias peb txoj kev khwv muaj nqe pab cawm lub ntiaj teb neeg tau, nws tsis paub Tswv Ntuj tus txheej txheem cawm lub ntiaj teb neeg, thiab nws tsis paub Tswv Ntuj lub siab zoo hlub neeg.