Hnub tim 13 lub 7 hli 2025, Vaj Qhia Les Os 14 ua Tswv Cuab coj lub Txoos Txi Ntuj nyob hauv Leej Ntshiab Tos Mas Npis Las Nos Vas lub tsev teev Ntuj (the Parish of St. Thomas of Villanova) nyob hauv Kas Tes Nkas Dos Fos, Vaj Qhia nthuav lub Moo Zoo hais txog tus Xas Mas Lias siab zoo (LK 10: 25-37) li no: Huab Tais Yes Xus zaj paj lug tus Xas Mas Lias siab zoo yog ib zag paj lug zoo nkauj thiab ntxim siab kawg nkaus. Zaj paj lug no twv peb kom rov tig los ntsia peb lub neej los soj peb lub siab saib niaj hnub peb ua cov hauj lwm pab luag tej vim yog txoj cai hais kom ua los peb pab luag tej vim peb lub siab khuv leej txog lawv ib yam li Tswv Ntuj khuv leej peb.
Zaj paj lug no qhia peb tias peb yuav paub txog yam tob tob hauv peb nruab siab tau, mas yog saib peb ua zoo li cas ntsia luag lwm tus. Tej zaum peb ntsia, ces peb lug kev mus lawm; tej zaum peb ntsia, ces peb hlub lawv tab sis peb tsis pab; tej zaum peb lam ntsia, tsis xav dab tsi; tej zaum peb ntsia, tab sis tsis ua zoo xauj. Kev ntsia li hais los saum no yog ntsia tab sis ua txuj tsis pom. Peb tsis muab lub siab ntsia, peb tsis ua zoo ntsia, peb tsis xav to taub txog tus peb tab tom ntsia.
Nyob hauv zaj paj lug no, tus Leej Choj thiab tus Les Vis nkawd pom tab sis nkawd tsis tig xauj, nkawd tsis quav ntsej txog tus raug mob. Qhov no qhia peb tias kev leg txoj kab xwm raws kev teev hawm tsis pab tau kom neeg muaj lub siab khuv leej.
Vaj Qhia hais ntxiv tias ua ntej yuav hais txog kev khuv leej raws txoj kev teev hawm, kev khuv leej yog neeg kev tsim txiaj. Ua ntej peb yuav ua neeg ntseeg, Tswv Ntuj hu peb los ua tib neeg ua ntej.
Tus Xas Mas Lias siab zoo hauv zaj no yog Huab Tais Yes Xus, nws khuv leej neeg, mas thaum nws ntsia ntiaj teb neeg, nws hlub thiab nres pab ntiaj teb neeg kom dim ntawm lawv tus mob. Nyob hauv peb tiam neeg no, peb tim ntsej tim muag nrog kev phem qhov tsaus ntuj, peb ntaus tsam kev pluag kev txom nyem, tab sis peb muaj Tswv Ntuj ntsia ntsoov peb. Tswv Ntuj khuv leej peb, nws thiaj nqes los nyob nruab nrab hauv peb thiab ua peb luag.
Vaj Qhia muab lus rau sawv daws xav li no tias yog peb ntsib ib tug neeg tab tom raug xwv txheej zoo li lub Moo Zoo hauv hnub no mas peb yuav ua zoo li cas, peb lug kev mus, los peb pab nws xws li tus Xas Mas Lias siab zoo? Muaj ntau zaus peb ua raws li txoj kab xwm xwb ces peb txaus siab lawm; los peb xav tias tus nyob ze peb yog tus zoo li peb, xav li peb, ntseeg xws li peb, yog ib haiv neeg li peb. Huab Tais Yes Xus xav kom peb hle lub siab xws li no pov tseg, peb tig los hnav lub siab tshiab hloov lub tswv yim tshiab, kom peb ua zoo li tus Xas Mas Lias uas nws ua tus nyob ze tus neeg raug xwv txheej.
Peb nres saib, peb nres xauj, peb cia luag lwm tus lub neej chaws los chwv peb siab, ces peb yuav ua tau tus nyob ze luag tej, ua tau sawv daws tus zoo phooj ywg, ua tau sawv daws tus tseem kwv tij, peb rhuav tau lub ntsa zeb nyob hauv peb nruab siab. Thaum ntawd, peb yuav pom tias kev nyiam muaj zog dua kev phem thiab kev tuag.
Vaj Qhia xav kom peb ntsia Huab Tais Yes Xus, muab peb lub siab los mloog Huab Tais Yes Xus lo lus hais tuaj rau peb nruab siab tias “Koj mus, koj ua zoo li ntawd thiab mog” (LK 10: 37).
Tom qab ua Thaj Txi Ntuj tas, Vaj Qhia tawm los coj sawv daws teev Ntuj raws li zaj tus Tshiab xa xov. Vaj Qhia ntuas sawv daws tias peb tau txoj sia nyob mus li yog vim peb saib xyuas lwm tus nyob hauv cov hauj lwm tsob hwb (service) thiab nyiam (love) lawv.
Vaj Qhia xav txog lo lus tus Kws Lij Choj nug Huab Tais Yes Xus tias “Xib Hwb, kuv yuav ua dab tsi thiaj tau txais txoj sia nyob mus li los ua kuv lub cuab tam?” (LK 10: 25), mas Vaj Qhia pom tias tus Kws Lij Choj no lo lus yog ib yam tob tob nyob hauv txhua tus neeg nruab siab uas sawv daws xav kom lawv ua neej nyob tsis plam taw, tsis poob rau kev phem thiab qhov tuag.
Vaj Qhia tseem pom ntxiv tias ntiaj teb neeg tsis yuav yuam los thov tau kom lawv muaj txoj sia nyob mus li, tab sis lawv tsum txais thiab cev txoj sia nyob mus li ib tiam dhau rau ib tiam neeg. Kawg yog Tswv Ntuj tib tug xwb thiaj yuav pub tau txoj sia nyob mus li ua tib neeg lub cuab tam, ib yam li niam txiv pub cuab tam rau lawv cov me nyuam.
Yog vim li ntawd, Huab Tais Yes Xus thiaj hais tias tus xav tau txoj sia nyob mus li, nws yuav tau ua xis Tswv Ntuj siab; yog kom nws nyiam Tswv Ntuj tas siab tas ntsws thiab nyiam tus nyob ze nws ib yam li nws rov nyiam nws.
Vaj Qhia hais tias yog peb ua ob yam li hais mas yog peb tau ua raws li Leej Txiv kev nyiam. Tswv Ntuj lub siab nyiam yog txoj sia txoj cai (the law of life) uas Tswv Ntuj yog tus tau xub coj ua ntej; yog nws nyiam peb tsis muaj chaw xyeej nyob hauv nws Leej Tub Yes Xus. Li ntawd, cov ntseeg txog Yes Xus, lawv yuav nrhiav lub ntsiab hauv kev nyiam tau nyob hauv Huab Tais Yes Xus, lawv yuav pom tias lub siab nyiam txawj ua siab dawb (love is generous), lub siab nyiam txawj zam rau sawv daws (love is forgiving), lub siab nyiam txawj ua siab dav (love is expansive), lub siab nyiam tsis kaw peb cia rau peb ntiag tug (love never leaving us closed in on ourselves).
Ib yam li Tswv Ntuj, nws nyiam tib neeg mas nws thiaj xa Huab Tais Yes Xus tuaj nyob ze tib neeg, ntawm peb mas Tswv Ntuj kuj hu peb los nyob ze luag tej. Peb yoog raws Huab Tais Yes Xus tus piv txwv, peb coj kev nplij neeg thiab kev vam khom mus rau cov neeg tag kev tso siab thiab qaug zog.
Yog kom peb tau txoj sia nyob mus li, mas peb yuav tsob hwb txoj sia, yam li saib xyuas cov neeg nrog peb nyob ua ke. Yog peb muab siab rau nrhiav kev tsob hwb txoj sia, mas peb yuav txia ua tus kws tsim kev thaj yeeb nyob hauv peb lub neej niaj hnub.