Zaj no yog muab hauv Txiv Plig Nyiaj Pov phau ntawv ‘Lub Koom Txoos cov Cim Nqa Txiaj Ntsim’ sau xyoo 1993 nyob Zas Vais, Nkws Yas teb.
1. Tus tsim lub Cim Yug yog Yes Xus.
Thaum Yes Xus paub tias tshuav ib tsam xwb luag yuav tuaj ntes nws, kom tau muab nws tua, mas Yes Xus tsim ib co kab ke pab cov ntseeg nco txog Yes Xus lub neej cawm ntiaj teb. Ces thaum Yes Xus nrog nws cov thwj tim noj nws pluas mov kawg, yog lub Lis Piam Hla hnub tsib tsaus ntuj. Yes Xus tuav ib lub ncuav mov mog, nws foom hmoov zoo rau, nws muab los faib rau cov thwj tim, nws hais tias “Nej sawv daws txais. Yog kuv lub Cev raug puas kom tau pab nej.” Noj hmo tas, Leej Pleev kuj tuav lub ntim cawv, nws foom hmoov zoo rau, nws muab cev rau cov thwj tim, nws hais tias “Nej sawv daws txais, nej haus. Yog lub ntim rau kuv Roj Ntsha Cog Lus Tshiab nyob mus li. Yog Roj Ntsha yuav ntws los daws nej thiab tsoom sid cov txhaum. Nej yuav ua li ntawd mus li, kom tau nco txog kuv.”
Txij ntawd los, cov ntseeg mloog raws li Yes Xus lo lus, ces lawv rov ua xws li Yes Xus tau qhia. Niaj lis piam rov txog Hnub Chiv uas yog hnub Yes Xus sawv rov los, mas cov neeg ntseeg nyob tas ntiaj teb sib sau los ua lub Cim Yug.
2. Lub Txoos ua lub Cim Yug muaj ntau lub npe.
Lub Cim Yug yog lub Cim Ntshiab muaj tsim thiab muaj hwj huam dua cov. Tsoom ntseeg thiaj tis ntau lub npe rau lub Cim Yug, vim yog lub Cim Ntshiab hais txog ntau yam.
1) Peb tis lub npe hu ua ‘lub Cim Yug’ vim thaum peb txais lub Cim Yug, mas Yes Xus tuaj yug peb lub siab lub tswv yim (Z 6: 48-58).
2) Peb tis lub npe hu ua ‘Huab Tais Plua Mov’ vim yog plua mov kawg uas Yes Xus tau nrog cov thwj tim noj thiab peb kuj noj. Cov neeg ntseeg yuav noj mus txog lub caij sawv daws yuav noj Huab Tais Rooj Qav saum ntuj.
3) Peb tis npe hu ua ‘lub Cim Cav Txiaj Ntsim’ los ‘lub Txoos Cav Txiaj Ntsim’ vim yog lub Txoos ua lub cim cav txog Yes Xus uas nws yog lub txiaj ntsim loj tshaj (Great Grace) uas Tswv Ntuj pub rau ntiaj teb neeg.
4) Peb tis lub npe hu ua ‘lub Cim Nco Nraim’ vim tias thaum peb ua lub Cim ntawd, mas peb nco nraim txog Yes Xus tuag thiab sawv rov los.
5) Peb tis lub npe hu ua ‘Thaj Txi Ntuj’ vim thaum peb ua lub Txoos ntawd, mas cov mov cov cawv txia ua Yes Xus nyob saum Ntoo Cuam nws lub Cev thiab cov Ntshav. Yes Xus tau hais tias yog Yes Xus rov muab nws txi rau Tswv Ntuj xws li nws tau ua nyob saum Ntoo Cuam.
6) Peb tis lub npe hu ua ‘lub Cim Koom Siab’ vim thaum peb ua lub Txoos ntawd, peb nrog Yes Xus, nrog Tswv Ntuj, nrog tas tsoom ntseeg koom siab.
Lub Cim Yug yog tas txhua yam saum no tib si tiag, vim thaum peb ua lub Cim Yug mas peb ua tas txhua yam ntawd. Yes Xus kuj tuaj ua tas txhua yam ntawd. Yog vim qhov ntawd, mas peb thiaj saib lub Txoos Cav Txiaj Ntsim muaj nqi tshaj nyob hauv peb tej zaj teev Ntuj.
3. Lub Txoos Cav Txiaj Ntsim tus txheej txheem.
Lub Txoos Cav Txiaj Ntsim muaj 4 ntus loj:
1) Txais Tswv Ntuj Lo Lus, uas muaj:
– Cov lus thov txhaum; yog hais zaj ‘Kuv lees txhaum’.
– Zaj hu nkauj cav txog Peb Leeg Huab Tais tias ‘Nyob pem ntuj’.
– Ib zag thov Ntuj qhib lub Txoos, yog thaum hais tias ‘Peb sawv daws thov Huab Tais.’
– Zaj nyeem ib, yog tej zaj uas lub Koom Txoos tau xaiv nyob hauv cov Ntawv Cog Qub Lus, los nyob hauv cov Ntawv Cog Lus Tshiab.
– Ib zag Nkauj Paj Nruag xaus zaj nyeem ib.
– Zaj nyeem ob, yog cov lus hauv cov Hauv Paus Xa Lus cov tsab ntawv.
– Zaj As Les Lus Yas, yog npaj siab mloog Ntawv Moo Zoo.
– Nyeem zaj Ntawv Moo Zoo.
– Leej Choj los tus Tub Tsob Hwb nthuav Tswv Ntuj cov lus uas tau nyeem tas lawm.
– Cov ntseeg hais zaj ‘Kuv ntseeg’ uas yog peb txoj kev ntseeg lub ntsiab.
– Cev cov lus thov Ntuj rau ntiaj teb raws li 4 hom lus thov li no: thov Ntuj rau lub Koom Txoos, thov Ntuj rau kev nom kev tswv, thov Ntuj rau cov neeg raug kev txom nyem, thov Ntuj raws li peb cov neeg hauv lub Txoos xav thov.
2) Cev cov txim.
– Cev cov mov uas yuav txia ua Yes Xus lub Cev.
– Muab ib teev dej los xyaw cov cawv; teev dej yog peb cov neeg tuaj ua lub Txoos, peb thov kom peb nrog Yes Xus cov Ntshav txia ua ib yam zoo txi rau Tswv Ntuj.
– Cev ntim cawv uas yog txia ua Yes Xus cov Ntshav.
– Hais rau cov ntseeg kom lawv rau siab thov kom Tswv Ntuj txais peb thaj txi Ntuj.
3) Zaj cav txiaj ntsim. Yog lub caij loj tshaj nyob hauv lub Txoos.
– Hu nkauj qhib zaj cav txiaj ntsim; Leej Choj xub hais zaj ‘Leej Txiv Ntshiab’ tas, mas cov ntseeg hu nkauj ‘Faj Tim Huab Tais Ntshiab’.
– Hu txog Leej Ntuj Plig Ntshiab kom nws lub hwj huam ua kom cov mov txia ua Yes Xus lub Cev, kom cov cawv txia ua Yes Xus cov Ntshav.
– Leej Choj muab mov, nws hais Yes Xus cov lus rau; thiab nws muab cawv, nws hais Yes Xus cov lus rau. Leej Choj cev Yes Xus lub Cev thiab Yes Xus cov Ntshav rau cov ntseeg hwm.
– Cov ntseeg hu nkauj cav txog Tswv Ntuj lub txiaj ntsim loj, xws li zaj ‘Thaum peb noj cov mov no’.
– Leej Choj kuj hais ib co lus nco txog Yes Xus lub txiaj ntsim loj.
– Thov kom Leej Ntuj Plig Ntshiab pub nws lub txiaj ntsim pab peb koom siab.
– Thov Tswv Ntuj rau lub Koom Txoos uas nyob ntiaj teb no, rau lub Koom Txoos uas mus cuag Tswv Ntuj, thiab rau lub Koom Txoos uas nrog Tswv Ntuj nyob.
– Hu nkauj tias peb npuab Leej Pleev hwm Leej Txiv tias ‘Yog vim Leej Pleev’.
4) Txais lub Cim Yug kom nrog Yes Xus koom siab koom cev.
– Hais zaj ‘Peb Txiv’.
– Thov kom Tswv Ntuj pub kev thaj yeeb, xws li ‘Tswv Ntuj ua nej siab kaj lug’.
– Hais zaj ‘Yaj Txi Tswv Ntuj’.
– Leej Choj cev Yes Xus lub Cev. Cov ntseeg hais tias ‘Huab Tais, kuv tsis tsim nyog’.
– Txais Yes Xus lub Cev.
– Hu nkauj cav txog Tswv Ntuj tuaj nyob hauv peb.
– Cev ib co lus ua Tswv Ntuj tsaug vim cov txiaj ntsim nws pub hauv lub Txoos no.
– Leej Choj hais zaj xaus lub Txoos tias ‘Peb sawv daws thov Huab Tais’.
– Foom hmoov zoo tias ‘Peb thov kom Huab Tais Leej Txiv’.
– Hais zaj ‘Nej rov mus, Yes Xus nrog nej nyob, ua nej siab kaj lug’, ces cov ntseeg hais ib zag hu nkauj xaus lub Txoos raws li lub caij.
Lub txoos cav txiaj ntsim los yog ‘Txoos Txi Ntuj’ yog peb txoj kev teev Tswv Ntuj zoo tshaj, vim 2 yam no:
1. Thaum peb ua lub Txoos, mas peb cov neeg ntseeg txhob txwm sib ntsib; peb ua ke teev Ntuj, ua ke tuaj txais Tswv Ntuj Lo Lus, ua ke hu nkauj hwm Tswv Ntuj, ua ke cav txog Yes Xus tuag thiab sawv rov los, ua ke txais Yes Xus lub Cev.
2. Lub txoos cav txiaj ntsim yog lub Cim Ntshiab uas niaj lis piam peb rau siab ua; yog thaj chaw thiab yog lub caij uas peb tuaj cuag Tswv Ntuj kom nws yug peb lub siab thiab peb lub tswv yim; peb nquag ua lub Txoos Cav Txiaj Ntsim ib yam li peb nquag noj mov kom muaj zog.
Thaum yus tuaj ua lub Txoos, yus yuav npaj tus cwj pwm zoo li cas?
1. Yus tuaj, mas yus tu lub cev kom zoo hauj sim. Tsis hais tias yuav ua zam; lub zam yus hnav muaj nqis tsis cuag lub siab thiab lub tswv yim yus npaj, tsis kav yus hnav huv vim yog ib txog kev hwm Tswv Ntuj thiab hwm cov neeg uas nrog yus sib sau ua lub Txoos.
2. Cov ntseeg kuj tu lub tsev teev Ntuj kom huv, kom zoo saib, npaj tej tais paj kom zoo nkauj. Tu lub Rooj Txi Ntuj thiab lub Rooj Nyeem Ntawv Ntshiab kom phim lub Thaj Txi Ntuj thiab phim Tswv Ntuj Lo Lus.
3. Cov neeg ntseeg npaj siab nrog sawv daws hu nkauj, rau siab mloog Tswv Ntuj Lo Lus. Peb txhob ua tus neeg tsis xav tswv yim dab tsi, tsuas lam coj lub cev tuaj zaum dog dig thiab ntsia ub ntsia no, nrog luag tham ua si, lam nyob ib teev tos kom lub Txoos tas, ces khiav sai sai.
Nyob hauv ntu txais Tswv Ntuj Lo Lus, yus yuav ua zoo li cas?
1. Yus tuaj kom haum lub caij, txhob tuaj lig dhau thaum sawv daws twb pib ua lub Txoos lawm. Xub tuaj ntxov me ntsis kom tau ib lub caij nrog sawv daws sib tham me ntsis nyob nraum zoov tso. Tej tus nyiam nkag hauv lub tsev teev Ntuj ob peb fiab ua ntej, lawv thiaj tau kev hais ob peb lo lus rau Tswv Ntuj hauv lawv nruab siab.
2. Thaum hais cov zaj teev Ntuj los hu tej zaj nkauj yus yuav muab siab rau xav txog cov lus yus hais rau Tswv Ntuj.
3. Thaum lawv nyeem thawj zaj thiab nyeem Ntawv Moo Zoo, thiab thaum nthuav Tswv Ntuj Lo Lus, mas yus yuav muab siab rau kawm Tswv Ntuj Lo Lus thiab khaws Tswv Ntuj Lo Lus. Phim yus yuav nco lo puav lus tseg los kaj yus lub siab.
4. Thaum hais zaj ‘Kuv ntseeg txog Tswv Ntuj’, mas tsis yog lub ncauj lam hais xwb; yog lub tswv yim ntseeg cov lus uas nyuam qhuav tau hnov lawv nthuav rau mloog.
5. Thaum txog lub caij cev cov lus thov Tswv Ntuj, mas zaum puav phim yus cev ib lo lus thov Ntuj. Coob leej dhau lawv tsis cev ib lo lus thov Ntuj; lawv twb muaj neeg mob hauv tsev, los lawv tab tom raug teeb meem, los tej zaus lawv xav txog ib zag zoo nrog sawv daws thov Ntuj tab sis lawv txaj muag; ces peb muaj tej lub Txoos uas tsis muaj neeg qhib ncauj cev ib lo lus. Peb xav kom peb cov Txoos teev Ntuj muaj sia, mas peb yuav rau siab cev tej lo lus tshiab. Yus cev lo lus thov Tswv Ntuj, yus tsis tos kom luag cev tas niaj tas xyoo zoo li yus tsis txawj hais lus.
Nyob hauv ntu cev cov txim, yus zoo siab ua zoo li cas?
1. Thaum cev mov cev cawv, mas yus yuav nco ntsoov cev yus lub neej rau Leej Txiv Tswv Ntuj; yus cev yus tej hauj lwm, yus lub siab lub tswv yim, yus lub cev thiab yus lub zog rau Leej Txiv. Cov mov thiab cov cawv yog neeg hauj lwm tsim thiaj muaj, yus thiaj cev yus tej hauj lwm nrog mov thiab cawv kom Tswv Ntuj txais.
2. Leej Choj hliv me ntsis dej los xyaw cov cawv; cov dej no yog lub cim hais txog peb tias peb mus xyaw cov cawv kom peb tau txia ua Yes Xus lub Cev thiab cov Ntshav xws li cov mov thiab cov cawv txia ua Yes Xus lub Cev.
Nyob hauv ntu cav txiaj ntsim, los yog ‘ua cov kab ke cav txog lub txiaj ntsim’ los yog ‘ua thaj txi Ntuj’, yus zoo siab ua zoo li cas?
1. Yus nco ntsoov tias ntu no yog ntu loj dua cov. Li ntawd, nyob hauv lub Txoos, sawv daws yuav sawv, mas yus nrog sawv daws sawv zoo zoo, mloog Leej Choj hais zaj ‘Leej Txiv Ntshiab’ thiab rau siab hu nkauj tias ‘Faj Tim Huab Tais Ntshiab’.
2. Ntu no yog Yes Xus los nyob hauv cov Mov thiab cov Cawv; Mov thiab Cawv txia ua Yes Xus lub Cev thiab cov Ntshav tiag raws li cov lus Yes Xus ib txwm tau hais. Thaum Leej Choj cev Yes Xus lub Cev rau sawv daws saib, mas yus saib thiab yus nyo taub hau hwm. Thaum cev Yes Xus cov Ntshav rau yus saib, yus nyo taub hau hwm. Lub caij ntawd tsis phim yus zaum thiab ntsia tom tej, los nrog cov nyob ze yus ua si. Lub caij ntawd tsis phim yus yuav tawm mus. Yog yus tawm mus, mas yog zoo li yus tsis to taub dab tsi, tsis paub tias Yes Xus los nrog peb nyob.
3. Thaum Leej Choj hais cov lus thov Ntuj rau peb cov neeg tuaj sib txoos, thiab rau peb cov neeg tuag, thiab rau cov ntseeg tas huv tib si, mas yus rau siab thov Ntuj. Tas mas thiaj zoo siab hais tias “Yog vim Leej Pleev, yog nrog Leej Pleev, yog nyob hauv Leej Pleev, koj thiaj nrog Leej Ntuj Plig Ntshiab muaj koob meej nto moo lug mus txog txhiab niag tim puas xyoo.”
Nyob hauv ntu txais Yes Xus lub Cev, mas yus yuav ua zoo li cas?
1. Yus zoo siab nrog sawv daws hais zaj ‘Peb Txiv’, hais zaj ‘Tswv Ntuj ua nej siab kaj lug’, hais zaj ‘Yaj Txi Tswv Ntuj’.
2. Thaum txais Yes Xus lub Cev, mas yus nco ntsoov tias yus nrog Yes Xus cog lus tias yus xav yuav nws los ua yus tus Huab Tais, xav txais nws zaj tswv yim tiag, yus tsis lam tuaj noj ib co mov tsis muaj nqis.
3. Yus txais Yes Xus lub cev tas, yus nrog Yes Xus tham nyob hauv yus nruab siab. Yus hais rau Yes Xus tias yus xav ua raws li cov lus yus tau hnov nyob hauv ntu txais Tswv Ntuj Lo Lus. Yus thov Yes Xus pab yus. Yus ua Yes Xus tsaug. Yus hais yus cov lus nyiam Yes Xus.
4. Yus nrog Yes Xus tham tas, yus kuj nrog sawv daws zoo siab hu nkauj.
5. Ua lub Txoos tiav tas lawm, ces yus rov mus tsev, yus nco ntsoov ua Yes Xus tim khawv hauv zej zog. Yus zoo siab luag ntxhi vim yug tau nrog cov ntseeg tib si ntsib Tswv Ntuj ib me chim.
Peb paub tias thaum peb ua lub Txoos Cav Txiaj Ntsim los yog Txoos Txi Ntuj, mas Yes Xus los nrog peb nyob hauv cov Mov thiab cov Cawv. Li ntawd, thaum yus paub tias yus muaj txhaum loj, ces yus ntshai tsam yus tsis tsim nyog txais Yes Xus lub Cev, mas yus yuav tau tuaj daws txhaum. Daws txhaum lawm, yus thiaj kaj siab txais Yes Xus lub Cev.