(1XM 17: 32-33, 37, 40-51; MK 3: 1-6)
Huab Tais Yes Xus rov mus hauv lub tsev txoos. Nyob ntawd muaj pej xeem cov laus neeg uas yog cov Fas Lis Xais tuaj ntawm rooj txwj laus Xas Nes Nrees tuaj, lawv zaum cov rooj ua ntej. Cov txwj laus Xas Nes Nrees lawv tuaj hauv cov tsev txoos tsis yog kom tau teev Ntuj los yog mloog Tswv Ntuj cov lus; lawv tuaj nyas ntshis saib puas yuav muaj tus twg qhia tej yam tsis haum Mais Xes txoj cai los yog ua tej yam yuam kev nyob hauv lub txoos. Hnub no lawv pom Huab Tais Yes Xus tuaj nrog tsoom sid sib txoos ua ke, lawv thiaj nyas saib Huab Tais Yes Xus puas yuav ua tej yam txwv tsis pub ua nyob hauv hnub Xas Npas Tos los hnub caiv.
Hnub ntawd, muaj ib tug qhuav tes (paralysed) tuaj koom lub txoos thiab. Tus neeg ntawd tsis yog nws qhuav tes txij nruab thiab los, nws qhuav tes vim nws raug ib tug mob. Nyob hauv Mas Kos phau ntawv Moo Zoo xeem lus Hes Las tsis sau ntau txog tus qhuav tes no, tab sis nyob hauv phau ntawv Moo Zoo xeem lus Hes Nplaws sau tias tus qhuav tes no nws yog ib tug neeg puab thwv cib (stone mason). Nws qhuav tes li ntawd, mas ua rau nws ua tsis taus nws txoj hauj lwm, thiab nws tsis xav ua neeg thov khawv mus tas nws sid, ces nws thov Huab Tais Yes Xus pab kho nws.
Cov Yus Das saib tias kev kho neeg hnub Xas Npas Tos yog kev ua hauj lwm. Tus twg ua hauj lwm hnub Xas Npas Tos, mas yog nws hla txoj cai. Tab sis yog pab cawm ib tug neeg txoj sia, mas txoj cai hais tias ua tau.
Tus qhuav tes, nws txoj sia tsis poob hauv kev pheej hmoo, yuav tos dhau hnub Xas Npas Tos tso mam kho los yeej tsis lig dhau rau nws. Tab sis vim Huab Tais Yes Xus xav sim cov Yus Das saib lawv puas txawj hlub neeg, mas Huab Tais Yes Xus thiaj li hais rau tus qhuav tes kom nws los sawv hauv nruab nrab, kom tas lub txoos sawv daws pom.
Huab Tais Yes Xus nug lawv 2 lo lus.
Lo lus tim 1 Huab Tais Yes Xus nug lawv tias hnub Xas Npas Tos puas kheev kom ua qhov zoo los cia ua qhov phem?
Huab Tais Yes Xus lo lus nug ua rau sawv daws tsis pom qab yuav teb li cas. Yog lawv teb tias kheev kom ua qhov zoo, mas txhais tias lawv pom zoo cia Huab Tais Yes Xus kho tus qhuav tes. Yog lawv teb tias hnub Xas Npas Tos tsis cia ua qhov phem, ua cas thaum lawv pom tus qhuav tes, lawv tsis pab kho. Lawv ua li no, yog lawv tab tom ua qhov phem hauv hnub Xas Npas Tos.
Lo lus tim 2 Huab Tais Yes Xus nug lawv tias hnub Xas Npas Tos puas kheev cia cawm ib txog sia los txo ib txog sia?
Lo lus no yog Huab Tais Yes Xus tab meeg hais kom lawv ras tau tias thaum nws tab tom cawm tus qhuv tes txoj sia, ua cas lawv ho tab tom nrhiav tswv yim yuav muab nws tua. Muab xav li cas, los yeej pom tias kev cawm ib txog sia zoo dua txo ib txog sia.
Li ntawd, cov txwj laus thiaj tsis muaj tus twg teb taus rau Huab Tais Yes Xus, ces lawv thiaj li nyob ntsiag to.
Huab Tais Yes Xus pom li ntawd, nws ib txhij npau taws thiab tu siab, vim lawv kaw lawv lub siab, lawv tsis txawj hlub tus neeg txom nyem, lawv tsis qhib siab ua qhov zoo.
Huab Tais Yes Xus kho tus qhuav tes, ces cov Fas Lis Xais tawm mus, lawv mus nrog cov Hes Los Dias sab laj saib yuav ua li cas thiaj yuav tua tau Huab Tais Yes Xus. Ib txwm cov Fas Lis Xais tsis fim cov Hes Los Dias, lawv saib cov Hes Los Dias yog cov neeg tsis huv, vim cov Hes Los Dias yog Hes Los cov tub ncig thiab ua hauj lwm rau cov tseem hwv Los Mas. Tab sis vim kev ntxub phwj yws hauv lawv nruab siab, ces lawv tsis nco quav ntsej tias lawv tab tom tuav tes nrog cov neeg tsis huv. Lawv tsuas thov kom tau muab Huab Tais Yes Xus tuaj xwb, mas txaus lawm.
Li ntawd, nyob hauv Ntawv Moo Zoo zaj no, peb thiaj ntsia pom 2 yam sib txawv:
1. Cov Fas Lis Xais lawv saib txoj kev teev hawm (religion) yog ‘kab ke’ (ritual), mas lawv thiaj coj rawv txoj cai. Huab Tais Yes Xus hla txoj cai, ces lawv hais tias Huab Tais Yes Xus yog neeg tsis zoo.
2. Huab Tais Yes Xus saib txoj kev teev hawm yog ‘kev tsob hwb’ (service) vim nws nyiam Tswv Ntuj thiab hlub neeg, mas Huab Tais Yes Xus thiaj li muab txoj kev sis nyiam sis hlub ua qhov loj dua kev ua raws txoj cai.
Nyob hauv peb, tus twg nquag mus teev Ntuj, nyiam nyeem Ntawv Ntshiab, muab siab thov Ntuj tsis tseg, thiab ua raws cov kab ke; tab sis nws tsis pab luag tej, nws tsis hlub cov neeg txom nyem, nws tsis qee lub sij hawm rau lwm tus, mas tus ntawd tsuas yog teev hawm raws kab ke xwb; nws zoo li cov Fas Lis Xais.
Peb yuav tsob hwb Tswv Ntuj thiab luag tej tau li cas?
Peb saib Huab Tais Yes Xus ua tus piv txwv, ces peb yoog raws li Huab Tais Yes Xus ua rau peb pom. Huab Tais Yes Xus ua raws li tus neeg vam txog nws lub suab taij thov.