Hnub Chiv tim 22 lub 6 hli tas los no yog Hnub Hwm Yes Xus lub Cev thiab cov Ntshav los yog lub Cim Yug, mas Vaj Qhia Les Os 14 tawm tuaj coj cov ntseeg hais zaj teev Ntuj tus Tshiab xa xov hauv lub Lis Piam thiab nthuav lub Moo Zoo hauv hnub no rau sawv daws tau mloog. Lub Moo Zoo yog raws li cov lus Leej Ntshiab Lus Kas phau ntawv (LK 9: 11-17) hais txog thaum Huab Tais Yes Xus ua kom 5 lub ncuav mov thiab 2 tug ntses ntsu tuaj txaus yug tsib txhiab leej neeg.
Vaj Qhia hais li no tias Huab Tais Yes Xus hais kom cov thwj tim nqa 5 lub ncuav mov thiab 2 tus ntses lawv muaj los rau nws, ces Huab Tais Yes Xus foom hmoov zoo rau cov ncuav mov thiab cov ntses. Ua li ntawd tas, nws muab ntais thiab muab rau cov thwj tim coj mus cev rau sawv daws noj. Qhov peb pom mas yog qhov tias tsib txhiab leej neeg noj tsau tas, cov thwj tim tseem khaws tej sab mov seem puv 12 tawb.
Vaj Qhia ntuas sawv daws tias qhov hwj huam no tsis yog ib lub ‘cim’ (sign) xwb, qhov hwj huam no tseem yog ib yam pab kom peb nco qab tias ‘Tswv Ntuj cov paj tshab’ (God’s gifts) tab txawm yuav tsawg npaum cas, yog peb sib faib (shared) mas yuav ntau tuaj.
Thaum peb nyeem zaj Ntawv Moo Zoo no nyob hauv hnub hwm Yes Xus lub Cev thiab cov Ntshav, mas haj yam ntuas peb kom xav txog qhov tseem ceeb tias ‘Tswv Ntuj muab nws faib rau peb, qhov no yog ntiaj teb neeg kev sib faib lub hauv paus’. Thaum peb pub paj tshab rau tus twg, tab txawm me me xwb, thiab peb pom tus ntawd zeem tsam (appreciate), mas peb zoo siab (happy) vim qhov paj tshab ntawd ‘saws’ (unite) peb thiab tus peb nyiam los nyob ua ke. Ib yam li lub Cim Yug, Tswv Ntuj txais cov ncuav mov thiab cov cawv peb cev ua txim txi Ntuj nrog tas peb txoj sia, ces Tswv Ntuj foom hmoov thiab muab hloov ua Leej Pleev lub Cev thiab cov Ntshav; yog cov txim kev nyiam kom lub qab ntuj tau txais kev cawm.
Tswv Ntuj txais peb cov txim mas nws tau los koom nrog peb ua ke, thiab Tswv Ntuj hu peb los koom nrog Tswv Ntuj. Peb koom nyob hauv Tswv Ntuj tau yog peb xyiv fab txais thiab faib Tswv Ntuj lub paj tshab kev nyiam raws li Leej Ntshiab Aus Nkus hais tias “Peb muab ntau lub mov los tuav ua ib lub ncuav li cas, mas kev sis nyiam sis hlub txoj kev sib haum kuj rub peb los ua Leej Pleev lub cev ib yam li ntawd.”
Vaj Qhia Les Os 14 kuj tsis nco qab nqua hu sawv daws pab tsim kev thaj yeeb rau thaj tsam As Xias Nrab, nws hais tias “Kev sib ntaus rog tsis pab peb daws tau teeb meem, kev sib ntaus rog yim ua kom teeb meem yim kub tuaj, thiab kev sib ntaus rog ua qhov txhab rau ntiaj teb neeg lub keeb. Lub qhov txhab no siv caij nyoog ntev heev mam qhaws. Kev siv cuab yeej tua rog, tab txawm koj yog tus yeej, los koj yeej yuav tsis so tau leej niam lub kua muag; tab txawm koj yog tus yeej, los koj yeej yuav tsis tshem tau cov me nyuam txoj kev ntshai; tab txawm koj yog tus yeej, los koj yeej yuav tsis rub tau ntiaj teb lub neej lawm pem suab rov los tau.
Yav tsaus ntuj, Vaj Qhia Les Os 14 ua Tswv Cuab coj lub Txoos Teev Ntuj hwm Yes Xus lub Cev thiab cov Ntshav, mas Vaj Qhia rov nthuav txog zaj lus hauv lub Moo Zoo hnub no tias lub Cim Yug yog yam Tswv Ntuj muab faib pub rau ntiaj teb neeg li no:
Huab Tais Yes Xus muab 5 lub ncuav mov thiab 2 tus ntses los yug tsoom sid coob coob tuaj mloog nws yog ib lub cim qhia peb txog ntiaj teb neeg kev sib faib tias muaj lub hauv paus tuaj ntawm Tswv Ntuj muab nws faib rau peb. Tswv Ntuj yog tus Tswv Tsim, tab sis nws tuaj koom nrog peb ris peb kev txom nyem, nws xaiv yam me me peb muaj peev xwm cev tau rau Tswv Ntuj kom tau txhiv peb. Tswv Ntuj saws peb mus koom nrog nws ua ke, nws xyiv fab txais peb cov txim thiab hu peb kom txais thiab sib faib Tswv Ntuj cov paj tshab kev nyiam mas peb thiaj koom tau nrog Tswv Ntuj ua ke.
Thaum Huab Tais Yes Xus ua neej nyob, muaj cov neeg coob coob tshaib plab vim lawv tsis muaj txhiam xws yug lub cev, tab sis nyob rau lub ntuj zim txwv no, teeb meem txawv yav thaud lawm. Zim txwv no, cov neeg coob txom nyem tsis yog vim tsis muaj txhiam xws txaus noj, tab sis sawv daws txom nyem vim muaj ib pab neeg tsawg tsawg lawv hu dab dhau, ces lawv huas ntiaj teb kev vam meej cia ua lawv ntiag tug; lawv tsis faib pub rau cov neeg feem ntau. Li ntawd, peb thiaj pom tias nyob tas ntiaj teb muaj cov neeg tsis tsawg leej lawv yim nyob yim nplua nuj tuaj, hos cov neeg coob mas tseem niaj hnub ua neej nyob hauv kev pluag tshaib. Qhov no yog lub cim hais txog ‘kev tsis liam fab ntxim ntxub’ uas yog lub hauv paus chiv tus mob thiab kev tsis ncaj nyob hauv neeg lub xeeb ceem. Li ntawd, Tswv Ntuj kev faib nws rau peb thiaj yog tus ‘qauv’ peb yuav tau khaws los ntsuas thiab txhim kho peb kev ua neej nyob hauv lub Xyoo Ntshiab no.
Lub Koom Txoos Kav Tos Liv cov lus qhia txog lub Cim Yug hais tias Leej Pleev nyob txawm hauv lub Cim Yug. Yog li mas lub Cim Yug thiaj tsis yog cov ncuav mov hloov ua Leej Pleev lub Cev, thiab cov cawv hloov ua Leej Pleev cov Ntshav xwb; lub Cim Yug tseem hloov tus noj kom nws zoo li Leej Pleev, thiab lub Cim Yug kuj hloov lub Koom Txoos ua Yes Xus lub Cev thiab.