Hnub tim 31 lub 8 hli tas los no Vaj Qhia coj sawv daws hais zaj Tswv Ntuj tus Tshiab xa xov, mas Vaj Qhia thov Ntuj kom lub Koom Txoos ua tau lub tsev rau qhia txog kev tsis muab hlob raws nraim li Huab Tais Yes Xus tus piv txwv, kom lub Koom Txoos qhib txais sawv daws, thiab ua qhov chaw rhuav tshem neeg kev ua yeeb ncuab.
Hnub Chiv tas los, thaum tav su, Vaj Qhia Les Os 14 tawm tuaj coj tsoom neeg hais zaj Tswv Ntuj tus Tshiab xa xov nyob ntawm Leej Ntshiab Pob Zeb lub tshav puam, Vaj Qhia muab lub Moo Zoo hauv hnub no coj los nhuav ntuas sawv daws. Lub Moo Zoo hnub no lub ntsiab yog qhia kom peb ua neeg tsis muab hlob (humility). Leej Ntshiab Lus Kas piav nyob hauv nws phau Ntawv Moo Zoo txog thaum tus Fas Lis Xais caw Huab Tais Yes Xus mus noj mov hauv nws tsev (LK 14: 1, 7-14). Qhov no qhia peb tias neeg kev koom rooj mov yog ib lub cim qhia txog kev thaj yeeb (peace), kev sib koom (communion), kev sib faib (share), thiab kev sib ntsib (encounter).
Vaj Qhia pom tias yog ib yam tsis yooj yim uas sawv daws yuav ua siab dawb paug (genuine) sib ntsib. Tos Vaj Qhia hais li vim nyob hauv Ntawv Moo Zoo qhia peb tias lawv nyas ntshis los yog ‘soj ntsoov’ (observe) Huab Tais Yes Xus thaum Huab Tais Yes Xus mus hauv cov Fas Lis Xais tus thawj coj tsev. Huab Tais Yes Xus mus xws li tus neeg tsis muab hlob mus, nws ua ib tug qhua zoo (good guest), hwm (respect) thiab ua siab ncaj ncees (sincerity). Nyob ntawd, Huab Tais Yes Xus tau hais ib zag paj lug rau sawv daws mloog, yog zaj paj lug hais txog ib rooj tshoob zoo li rooj qav hnub no. Sawv daws nrawm nroov mus zaum thawj cov rooj uas yog tshwj cia rau cov neeg muaj meej mom zaum, lawv ua li ntawd, nyaj yog lawv xav kom luag ntsia pom hais tias lawv yog ib tug neeg tseem ceeb. Thaum sawv daws ua zoo li ntawd, zoo li sawv daws tab tom ‘sib twv’ (competition) tsis yog xav nyob ua ke zoo li ib pab kwv tij nyob sib cev sib faib.
Nyob hauv peb cov neeg ntseeg, thaum peb tuaj koom rooj mov hauv lub Txoos Txi Ntuj mas Huab Tais Yes Xus qhia peb tias nws yog peb tus qhua, nws hais lus rau peb thiab ntsia peb zoo li cas. Ntawm peb mas peb kuj yuav ntsia tus kheej xws li Huab Tais Yes Xus ntsia, peb ntsia saib peb puas dai ncuv rau kev nrog lwm tus neeg sib twv, kom lwm tus mloog yus, los yog muab yus piv nrog luag lwm tus.
Huab Tais Yes Xus qhia rau peb sawv daws tias kawg yog kev tsis muab hlob xwb thiaj coj tau peb mus txais kev twj lij. Peb ua neeg tsis muab hlob tau, yog thaum peb paub txhawj txog Tswv Ntuj lub Ceeb Tsheej thiab Tswv Ntuj lub siab ncaj, ces peb tsa taub hau ntsia mus deb ntawm peb. Yog peb tsuas ntsia peb xwb, peb yuav tsis pom tias Tswv Ntuj saib peb tseem ceeb npaum cas.
Yog peb ua tus xaiv zaum lub rooj puag nram qab, zoo dua nrog sawv daws sib txeeb zaum lub rooj ua ntej, mas peb lub meej mom (dignity) yuav tawm tuaj rau pom, ces qhov kawg peb yuav tau ua tus nyob pem ntej.