Yus Xes Npis Us yug xyoo 283 hauv lub pov txwv Xas Dis Nias (Sardinia). Tom qab Yus Xes Npis Us txiv tuag ua tim khawv tas, nws niam coj nws hla hiav txwv mus nyob hauv tuam ceeb Los Mas. Yus Xes Npis Us ua thawj tug Tswv Qhia nyob hauv Vaws Xes Lis (Vercelli), Is Tas Lias Pej Fab. Yus Xes Npis Us tau nyeem Leej Ntshiab As Nthos Nyus lub neej tas, mas nws txhim tsa ib pab tub haum xeeb nyob hauv lub Ceeb Koom Txoos. Yus Xes Npis Us pab cov tub haum xeeb kom lawv muaj lub siab kub lug ua hauj lwm.
Xyoo 354 Vaj Qhia Lis Npaws Lis Yus (Liberius) hais kom Yus Xes Npis Us nrog Tswv Qhia Lus Xis Fes (Lucifer of Cagliari) mus thov tus vaj Koos Taas Tis Us tim 2 (Constantius II) qhib lub Rooj Ncauj Lus los txiav Tswv Qhia As Thas Nas thiab As Lis Yus cov lus sib cov nyom, ces xyoo 355 lawv ua lub Rooj Ncauj Lus nyob Mis Las Nos. Nyob hauv lub Rooj Ncauj Lus mas Yus Xes Npis Us nrog As Thas Nas ua ib tog, ces nws raug xa mus nyob Xais Thos Pos Lis (Scythopolis) hauv Xis Lias teb thiab hauv Kas Pas Dos Xias (Cappadocia). Qhov chaw kawg yog hauv Nthis Npes (Thebaid), Hais Nkws Tos teb.
Nyob hauv Nthis Npes, Yus Xes Npis Us raug tsim txom loj, lawv muab nws khi cab mus raws tej kev, tsis kav Yus Xes Npis Us tseem muaj siab ntseeg ruaj nreb xws li qub.
Xyoo 361 Ntsus Lias Nus (Julian) sawv ua vaj mas Yus Xes Npis Us thiaj rov tau txais kev twj lij. Yus Xes Npis Us mus koom nrog As Thas Nas 362 tus Leej Choj hauv As Les Xas Nrias zeem tseeb txog Leej Ntuj Plig Ntshiab yog Tswv Ntuj thiab Tswv Ntuj Leej Tub xeeb los ua neeg. Dua ntawd mas hais tias lawv yuav sawv los tawm tsam cov As Lis Yus uas qhia txoj kev ntseeg cuav.
Yus Xes Npis Us coj lawv cov lus txiav tuaj rau cov ntseeg nyob As Nthias Kias. Lawv vam tias cov ntseeg hauv As Nthias Kias yuav rov sib haum tau txij thaum lub Koom Txoos nyob As Nthias Kias tawg ua ob pab hauv xyoo 331 los. Tab sis cov ntseeg hauv As Nthias Kias tsis yuav Yus Xes Npis Us lawv zaj, ces Yus Xes Npis Us thiaj hla mus rau pem nws lub Ceeb Koom Txoos. Yus Xes Npis Us ua tus thawj tawm tsam cov As Lis Yus mus txog hnub nws txoj sia tu; yog xyoo 370.